| ᠮᠣᠩᠭᠣᠯ ᠪᠢᠴᠢᠭ |
|
ᠬᠢᠲᠠᠳ ᠠᠩᠭᠯᠢ ᠶᠠᠫᠣᠨ |
|
ᠠᠯᠮᠠᠰ ᠺᠣᠮᠫᠠᠨᠢ
email : mongol@almas.co.jp
tel : +81-3-5688-2081 fax : +81-3-5688-2082 |
|
ᠮᠠᠨᠠᠢ ᠵᠣᠬᠢᠶᠠᠯᠤᠨ ᠪᠠᠭᠠᠲᠤᠷ ᠨᠢᠭᠡ ᠬᠣᠶᠠᠷᠬᠠᠨ ᠭᠤᠳᠤᠮᠵᠢᠪᠠᠷ ᠬᠡᠳᠦᠬᠡᠨ ᠮᠤᠷᠤᠢᠭᠠᠳ ᠵᠣᠷᠢᠭᠰᠠᠨ ᠪᠠᠢᠰᠢᠩᠤᠨ ᠳᠡᠷᠭᠡᠳᠡ ᠬᠦᠷᠴᠦ ᠢᠷᠡᠪᠡ᠃ ᠣᠢᠷᠠᠳᠴᠤ ᠢᠷᠡᠭᠡᠳ ᠬᠠᠷᠠᠪᠠᠯ ᠡᠨᠡ ᠪᠠᠢᠰᠢᠩ ᠪᠦᠷᠴᠦ ᠣᠯᠬᠢᠶᠠᠦᠭᠡᠢ ᠬᠠᠷᠠᠭᠳᠠᠵᠤ ᠪᠠᠢᠯᠠ᠃ ᠬᠠᠰᠢᠶᠠ ᠪᠣᠯᠤᠨ ᠬᠠᠭᠠᠯᠭᠠᠨᠤᠭᠤᠳᠤᠨ ᠮᠣᠳᠤᠨᠳᠤ ᠬᠥᠭᠡᠴᠦ ᠰᠠᠭᠤᠵᠤ᠂ ᠠᠵᠢᠯᠴᠢᠳᠤᠨ ᠭᠡᠷ ᠣᠷᠤᠨ᠂ ᠰᠠᠩ ᠬᠥᠮᠦᠷᠭᠡ᠂ ᠵᠣᠭᠤᠷᠢ ᠵᠡᠷᠭᠡ ᠬᠠᠭᠤᠴᠢᠷᠠᠨ ᠥᠮᠦᠬᠢᠷᠡᠭᠰᠡᠨ ᠪᠠᠢᠰᠢᠩᠤᠳ ᠬᠠᠰᠢᠶᠠ ᠳᠦᠭᠦᠷᠡᠩ ᠪᠠᠷᠠᠭᠠᠨᠳᠠᠨ ᠬᠠᠷᠠᠭᠳᠠᠨᠠ᠃ ᠵᠡᠷᠭᠡᠯᠡᠳᠡᠭᠡ ᠬᠠᠰᠢᠶᠠᠨᠤᠭᠤᠳ ᠤᠷᠤᠭᠤ ᠣᠷᠤᠳᠠᠭ ᠬᠠᠭᠠᠯᠭᠠᠶᠢ ᠡᠳᠡᠭᠡᠷ ᠪᠠᠢᠰᠢᠩᠤᠨ ᠵᠡᠭᠦᠨ ᠪᠠᠷᠠᠭᠤᠨ ᠲᠠᠯᠠᠳᠤ ᠭᠠᠷᠭᠠᠵᠠᠢ᠃
ᠳᠡᠭᠡᠷᠡ ᠦᠶᠡᠳᠦ ᠡᠨᠳᠡ ᠶᠡᠬᠡᠯᠡ ᠬᠥᠭᠵᠢᠯᠲᠡᠢ ᠠᠮᠢᠳᠤᠷᠠᠯ ᠣᠷᠭᠢᠯᠵᠤ ᠪᠠᠢᠭᠰᠠᠨᠢᠶᠠᠨ ᠣᠳᠣ ᠪᠠᠯᠠᠷᠠᠭᠰᠠᠨᠨᠢ ᠡᠨᠡ ᠪᠦᠭᠦᠳᠡ ᠳᠡᠭᠡᠷᠡ ᠢᠯᠡ ᠪᠠᠢᠨᠠ᠃ ᠡᠨᠳᠡ ᠠᠮᠢᠳᠤ ᠶᠠᠭᠤᠮᠠᠰᠤᠨ ᠰᠢᠨᠵᠢ ᠣᠭᠲᠤ ᠠᠯᠠᠭᠠ: ᠣᠩᠭᠤᠢᠵᠤ ᠪᠠᠢᠭᠠ ᠬᠠᠭᠠᠯᠭᠠᠴᠤ ᠠᠯᠠᠭᠠ᠂ ᠣᠷᠤᠵᠤ ᠭᠠᠷᠴᠤ ᠶᠠᠪᠤᠭᠠ ᠬᠥᠮᠦᠰᠴᠦ ᠦᠵᠡᠭᠳᠡᠬᠦᠦᠭᠡᠢ᠃ ᠰᠠᠢᠬᠠᠨ ᠲᠣᠬᠢᠯᠢᠭ ᠡᠵᠡᠩᠨᠡᠨ ᠬᠠᠮᠢᠶᠠᠷᠴᠤ ᠪᠠᠢᠭᠠᠶᠢᠨ ᠲᠡᠮᠳᠡᠭᠴᠦ ᠣᠭᠲᠤ ᠦᠵᠡᠭᠳᠡᠬᠦᠦᠭᠡᠢ᠃ ᠡᠨᠳᠡᠬᠢᠶᠢᠨ ᠦᠬᠡᠨᠴᠡ ᠪᠠᠢᠳᠠᠯᠳᠤ ᠠᠮᠢᠳᠤᠷᠠᠯᠤᠨ ᠲᠡᠮᠳᠡᠭ ᠣᠷᠤᠭᠤᠯᠬᠤ ᠭᠡᠰᠡᠨᠶᠦᠮᠰᠢᠭ ᠨᠢᠭᠡ ᠬᠥᠮᠦᠨ ᠲᠡᠷᠭᠡᠨᠳᠦ ᠶᠠᠭᠤᠮᠠ ᠠᠴᠢᠵᠤ᠂ ᠳᠡᠭᠡᠷᠡᠡᠴᠡᠨᠢ ᠴᠢᠭᠢᠷᠰᠦᠪᠡᠷ ᠪᠦᠲᠡᠭᠡᠭᠡᠳ᠂ ᠨᠡᠭᠡᠭᠡᠯᠲᠡᠲᠡᠢ ᠭᠠᠭᠴᠠᠬᠠᠨ ᠲᠣᠮᠤ ᠬᠠᠭᠠᠯᠭᠠᠪᠠᠷ ᠣᠷᠤᠵᠤ ᠶᠠᠪᠤᠪᠠ᠃ ᠬᠠᠰᠢᠶᠠᠨᠤ ᠳᠥᠷᠦ ᠲᠡᠮᠦᠷᠲᠦ ᠡᠯᠭᠦᠭᠡᠰᠦᠲᠡᠢ ᠠᠪᠤᠷᠭᠤ ᠲᠣᠮᠤ ᠴᠣᠣᠵᠢᠪᠠᠷ ᠪᠣᠳᠤᠪᠠᠯ ᠡᠨᠡ ᠬᠠᠭᠠᠯᠭᠠ ᠰᠠᠶᠢᠯᠠ ᠣᠩᠭᠤᠢᠭᠰᠠᠨᠠᠴᠠ ᠪᠢᠰᠢ᠂ ᠪᠤᠰᠤᠳ ᠴᠠᠭᠲᠤ ᠦᠷᠭᠦᠯᠵᠢ ᠲᠦᠭᠵᠢᠶᠡᠰᠦᠲᠡᠢ ᠪᠠᠢᠳᠠᠭᠨᠢ ᠢᠯᠡᠬᠡᠨ ᠮᠡᠳᠡᠭᠳᠡᠵᠦ ᠪᠠᠢᠯᠠ᠃ ᠨᠢᠭᠡ ᠪᠠᠢᠰᠢᠩᠤᠨ ᠳᠡᠷᠭᠡᠳᠡ ᠰᠠᠶᠢᠶᠢᠨ ᠢᠷᠡᠭᠰᠡᠨ ᠲᠡᠷᠭᠡᠴᠢᠨᠲᠡᠢ ᠨᠢᠭᠡ ᠠᠮᠢᠲᠠᠨ ᠬᠡᠷᠡᠯᠳᠦᠵᠦ ᠪᠠᠢᠭᠠᠶᠢ ᠴᠢᠴᠢᠺᠤᠸ ᠳᠠᠷᠤᠢ ᠬᠠᠷᠠᠭᠠᠳ᠂ ᠡᠨᠡᠴᠢᠨᠢ ᠴᠣᠬᠤᠮ ᠶᠠᠮᠠᠷ ᠠᠮᠢᠲᠠᠨ ᠪᠤᠢ? ᠡᠷᠡᠭᠲᠡᠢᠶᠦᠮᠦᠦ᠂ ᠡᠮᠡᠭᠲᠡᠢᠶᠦᠮᠦᠦ? ᠭᠡᠵᠦ ᠲᠠᠨᠢᠬᠤ ᠭᠡᠳ ᠴᠥᠬᠦᠷᠡᠯᠡ᠃ ᠲᠡᠭᠦᠨᠦ ᠬᠤᠪᠴᠠᠰᠤᠪᠠᠷ ᠲᠡᠢᠮᠦ ᠬᠦᠢᠰᠦᠶᠢᠨ ᠬᠥᠮᠦᠨ ᠭᠡᠵᠦ ᠬᠡᠯᠡᠬᠦᠳᠦ ᠲᠤᠩ ᠬᠡᠴᠡᠭᠦᠦ ᠪᠠᠢᠯᠠ᠃ ᠳᠡᠪᠡᠯᠨᠢ ᠶᠠᠭ ᠡᠮᠡᠭᠲᠡᠢ ᠬᠥᠮᠦᠨᠦ ᠬᠢᠰᠢᠭ ᠪᠠᠢᠭᠰᠠᠨ ᠪᠠ ᠲᠣᠯᠤᠭᠠᠢ ᠳᠡᠭᠡᠷᠡᠨᠢ ᠬᠥᠳᠡᠭᠡᠶᠢᠨ ᠡᠬᠡᠨᠡᠷᠦᠳ ᠡᠮᠦᠰᠴᠦ ᠶᠠᠪᠤᠳᠠᠭ ᠮᠠᠯᠠᠭᠠᠢᠲᠠᠢ ᠠᠳᠠᠯᠢ ᠱᠣᠪᠤᠭᠤᠷ ᠶᠠᠭᠤᠮᠠ ᠲᠠᠯᠪᠢᠭᠠᠲᠠᠢ᠃ ᠵᠥᠪᠬᠡᠨ ᠬᠣᠭᠤᠯᠠᠢᠨᠢ ᠡᠮᠡᠭᠲᠡᠢᠴᠦᠳᠦᠨ ᠬᠢᠡᠴᠡ ᠠᠷᠠᠢᠯᠠ ᠪᠦᠳᠡᠭᠢ ᠰᠥᠭᠡᠩᠭᠢ ᠰᠣᠨᠤᠰᠳᠠᠨᠠ᠃ 《ᠡᠨᠡᠴᠢᠨᠢ ᠡᠮᠡᠭᠲᠡᠢ ᠬᠥᠮᠦᠨ ᠪᠠᠢᠬᠤ ᠰᠢᠪ》 ᠭᠡᠵᠦ ᠴᠢᠴᠢᠺᠤᠸ ᠪᠣᠳᠤᠭᠰᠠᠨᠢᠶᠠᠨ 《ᠪᠢᠰᠢ ᠳ᠋ᠠ 》 ᠭᠡᠵᠦ ᠰᠠᠨᠠᠭᠠᠳ ᠳᠠᠬᠢᠵᠤ ᠰᠠᠢᠨ ᠠᠵᠢᠭᠯᠠᠭᠠᠳ 《ᠡᠮᠡᠭᠲᠡᠢ ᠪᠠᠢᠯᠭᠦᠢ ᠶᠠᠭᠠᠬᠢᠬᠤᠪ》 ᠭᠡᠵᠦ ᠬᠡᠯᠡᠪᠡ᠃ ᠬᠠᠷᠢᠨ ᠲᠡᠷᠡ ᠠᠮᠢᠲᠠᠨᠨᠢ ᠴᠢᠴᠢᠺᠤᠸᠢ ᠮᠥᠨ ᠶᠡᠬᠡ ᠰᠢᠷᠲᠡᠨ ᠬᠠᠷᠠᠨᠠ᠃ ᠴᠢᠴᠢᠺᠤᠸᠢ ᠪᠠᠢᠲᠤᠭᠠᠢ ᠰᠧᠯᠢᠹᠣᠨᠢ ᠮᠥᠨ ᠰᠠᠢᠲᠤᠷ ᠠᠵᠢᠭᠯᠠᠭᠰᠠᠨ ᠪᠥᠭᠡᠳ ᠮᠣᠷᠢᠳᠢ ᠰᠡᠭᠦᠯᠡᠴᠡᠨᠢ ᠬᠣᠩᠰᠢᠶᠠᠷᠲᠤᠨᠢ ᠬᠦᠷᠲᠡᠯᠡ ᠬᠠᠷᠠᠵᠤ ᠪᠠᠢᠭᠠᠪᠠᠷ ᠪᠣᠳᠤᠪᠠᠯ ᠵᠣᠴᠢᠨᠤ ᠢᠷᠡᠭᠰᠡᠨᠳᠦ ᠲᠡᠷᠡ ᠠᠮᠢᠲᠠᠨ ᠶᠡᠬᠡ ᠭᠠᠢᠬᠠᠭᠰᠠᠨ ᠪᠣᠯᠤᠯᠲᠠᠢ᠃ ᠪᠦᠰᠡᠡᠴᠡᠪᠡᠨ ᠵᠡᠭᠦᠭᠰᠡᠨ ᠪᠥᠭᠡᠮ ᠲᠦᠯᠬᠢᠭᠦᠷᠢᠨᠢ ᠬᠠᠷᠠᠬᠤᠶᠢᠨ ᠳᠠᠭᠠᠤ ᠲᠠᠷᠢᠶᠠᠴᠢᠨᠢ ᠡᠯᠳᠡᠪ ᠮᠠᠭᠤᠬᠠᠢ ᠦᠭᠡᠪᠡᠷ ᠵᠠᠩᠨᠠᠵᠤ ᠪᠠᠢᠬᠤᠶᠢ ᠰᠣᠨᠤᠰᠤᠭᠠᠳ ᠴᠢᠴᠢᠺᠤᠸ 《ᠮᠥᠨ ᠳ᠋ᠠ᠂ ᠨᠢᠷᠪᠠ ᠡᠮᠡᠭᠲᠡᠢ ᠰᠢᠪ ᠳ᠋ᠠ 》 ᠭᠡᠵᠦ ᠳ᠋ᠦᠩᠨᠡᠪᠡ᠃
《ᠡᠮᠡᠭᠡᠨ ᠭᠤᠸᠠᠢ᠂ ᠨᠣᠶᠠᠨᠲᠠᠨ ᠶᠠᠭᠤ ᠬᠢᠵᠦ ᠪᠠᠢᠨᠠ ᠪᠤᠢ?》 ᠭᠡᠵᠦ ᠲᠡᠷᠭᠡᠨᠡᠴᠡᠪᠡᠨ ᠪᠠᠭᠤᠬᠤᠶᠢᠨ ᠳᠠᠭᠠᠤ ᠴᠢᠴᠢᠺᠤᠸᠤᠨ ᠠᠰᠠᠭᠤᠬᠤᠳᠤ ᠨᠢᠷᠪᠠ ᠡᠮᠡᠭᠲᠡᠢ ᠠᠰᠠᠭᠤᠯᠲᠠᠶᠢᠨᠢ ᠪᠦᠭᠦᠳᠡᠶᠢᠨᠢ ᠰᠣᠨᠤᠰᠤᠯᠦᠭᠡᠢ ᠬᠥᠨᠳᠡᠯᠡᠨᠡᠴᠡ ᠣᠷᠤᠵᠤ:
《ᠡᠵᠡᠭᠦᠢ》 ᠭᠡᠵᠦ ᠬᠡᠯᠡᠭᠡᠳ ᠪᠠᠢᠰᠬᠢᠵᠤ ᠪᠠᠢᠭᠠᠳ ᠳᠠᠬᠢᠨ 《 ᠲᠠ ᠶᠠᠭᠤ ᠭᠡᠵᠦ ᠶᠠᠪᠤᠭᠠ ᠬᠥᠮᠦᠨ ᠪᠤᠢ?》 ᠭᠡᠵᠦ ᠠᠰᠠᠭᠤᠪᠠ᠃
《ᠠᠷᠠᠯᠵᠢᠶᠠᠨᠤ ᠲᠤᠬᠠᠢ ᠵᠢᠭᠠᠬᠠᠨ ᠬᠡᠷᠡᠭᠲᠡᠢ ᠶᠠᠪᠤᠭᠠ᠃ 》
《ᠲᠡᠭᠡᠪᠡᠯ ᠥᠷᠦᠭᠡ ᠤᠷᠤᠭᠤ ᠣᠷᠤ》 ᠭᠡᠵᠦ ᠨᠢᠮᠪᠠ ᠡᠮᠡᠭᠲᠡᠢ ᠬᠡᠯᠡᠭᠡᠳ ᠭᠤᠯᠢᠷ ᠪᠣᠯᠴᠢᠬᠠᠭᠰᠠᠨ᠂ ᠲᠣᠮᠤ ᠴᠣᠭᠤᠷᠤᠬᠠᠢᠲᠠᠢ ᠬᠤᠪᠴᠠᠰᠤᠨᠤᠪᠠᠨ ᠠᠷᠤᠶᠢ ᠨᠠᠰᠢ ᠬᠠᠷᠠᠭᠤᠯᠤᠨ ᠬᠠᠭᠠᠯᠭᠠᠶᠢ ᠣᠩᠭᠤᠢᠯᠭᠠᠪᠠ᠃
ᠴᠢᠴᠢᠺᠤᠸ ᠵᠣᠭᠤᠷᠢᠳᠤ ᠣᠷᠤᠭᠰᠠᠨᠰᠢᠭ᠋ ᠬᠦᠢᠲᠡᠨ ᠠᠮᠢᠰᠭᠤᠯ ᠭᠠᠷᠴᠤ ᠪᠠᠢᠭᠠ ᠥᠷᠭᠡᠨ ᠬᠠᠷᠠᠩᠭᠤᠢ ᠡᠭᠦᠳᠡᠨ ᠫᠧᠩᠢ ᠳᠠᠮᠵᠢᠨ ᠮᠥᠨ ᠬᠠᠪ ᠬᠠᠷᠠᠩᠭᠤᠢ ᠪᠣᠯᠪᠠᠴᠤ ᠬᠠᠭᠠᠯᠭᠠᠶᠢ ᠨᠡᠭᠡᠭᠡᠵᠦ ᠴᠢᠨᠠᠳᠤ ᠭᠡᠭᠡᠨ ᠥᠷᠦᠭᠡᠨᠳᠦᠨᠢ ᠣᠷᠤᠬᠤᠳᠠᠭᠠᠨ ᠲᠡᠭᠦᠨᠦ ᠳᠣᠲᠤᠷᠠᠬᠢ ᠡᠮᠬᠢ ᠵᠠᠮᠪᠠᠷᠠᠭᠠᠦᠭᠡᠢ ᠪᠠᠢᠳᠠᠯᠢ ᠦᠵᠡᠭᠡᠳ ᠭᠠᠢᠬᠠᠪᠠ᠃ ᠡᠨᠡ ᠪᠠᠢᠰᠢᠩᠤᠨ ᠱᠠᠯᠠᠶᠢ ᠤᠨᠠᠬᠤ ᠭᠡᠵᠦ ᠰᠢᠷᠡᠭᠡ ᠰᠠᠨᠳᠠᠯᠢ ᠵᠡᠷᠭᠡ ᠪᠦᠬᠦ ᠬᠣᠭᠰᠢᠯᠢ ᠢᠩᠭᠢᠵᠦ ᠣᠪᠤᠭᠠᠯᠠᠪᠠᠤᠤ ᠭᠡᠵᠦ ᠰᠠᠨᠠᠭᠳᠠᠮᠠᠷ ᠪᠠᠢᠪᠠ᠃ ᠨᠢᠭᠡ ᠰᠢᠷᠡᠭᠡᠨ ᠳᠡᠭᠡᠷᠡ ᠡᠪᠳᠡᠷᠬᠡᠢ ᠰᠠᠨᠳᠠᠯᠢ ᠪᠠᠢᠯᠠ᠃ ᠲᠡᠭᠦᠨᠦ ᠳᠡᠷᠭᠡᠳᠡ ᠲᠠᠤᠬᠠᠢᠨᠢ ᠵᠣᠭᠰᠤᠴᠢᠬᠠᠭᠰᠠᠨ ᠬᠠᠭᠤᠴᠢᠨ ᠴᠠᠭ ᠲᠠᠯᠪᠢᠭᠠᠲᠠᠢ ᠪᠠᠢᠪᠠ᠃ ᠲᠡᠷᠡ ᠴᠠᠭᠤᠨ ᠲᠠᠤᠬᠠᠢᠠᠴᠠ ᠠᠭᠠᠯᠵᠢ ᠰᠢᠯᠦᠰᠦ ᠲᠠᠲᠠᠵᠤ ᠡᠬᠢᠯᠡᠭᠰᠡᠨ ᠬᠠᠷᠠᠭᠳᠠᠨᠠ᠃ ᠳᠡᠭᠡᠷᠡ ᠦᠶᠡᠶᠢᠨ ᠬᠣᠭᠤᠯᠠᠨᠤ ᠮᠥᠩᠭᠦᠨ ᠰᠠᠪᠠ ᠬᠡᠷᠡᠭᠯᠡᠯ᠂ ᠠᠷᠢᠬᠢᠨᠤ ᠯᠣᠩᠬᠤ ᠪᠣᠯᠤᠨ ᠬᠢᠲᠠᠳ ᠱᠠᠵᠠᠩ ᠰᠠᠪᠠ ᠵᠡᠷᠭᠡᠶᠢ ᠠᠭᠤᠯᠤᠭᠰᠠᠨ ᠬᠣᠷᠭᠤᠶᠢ ᠰᠢᠷᠡᠭᠡᠨ ᠳᠡᠷᠭᠡᠳᠡ ᠬᠠᠨᠠᠨᠳᠤ ᠲᠤᠯᠭᠠᠨ ᠬᠥᠨᠳᠡᠯᠡᠨ ᠲᠠᠯᠪᠢᠵᠠᠢ᠃ ᠮᠥᠨ ᠲᠠᠨᠠ ᠰᠢᠭᠢᠳᠭᠡᠭᠰᠡᠨ ᠰᠢᠷᠡᠭᠡ ᠡᠨᠳᠡ ᠪᠠᠢᠭᠰᠠᠨ ᠪᠥᠭᠡᠳ ᠰᠢᠭᠢᠳᠭᠡᠭᠡ ᠨᠤᠭᠦᠳᠦᠨ ᠵᠠᠷᠢᠮᠨᠢ ᠬᠣᠪᠬᠤᠷᠠᠨ ᠤᠨᠠᠵᠤ᠂ ᠰᠠᠭᠤᠷᠢᠨᠤᠭᠤᠳᠨᠢ ᠬᠣᠩᠬᠤᠢᠯᠳᠤᠨ᠂ ᠴᠠᠪᠠᠤᠨᠢ ᠰᠢᠷᠠᠯᠠᠨ ᠦᠵᠡᠭᠳᠡᠨᠡ᠃ ᠡᠨᠡ ᠰᠢᠷᠡᠭᠡᠨ ᠳᠡᠭᠡᠷᠡ ᠡᠯᠳᠡᠪ ᠶᠠᠭᠤᠮᠠ ᠡᠷᠢᠶᠡᠴᠢᠭᠰᠡᠨ᠂ ᠳᠡᠭᠡᠷᠡᠡᠴᠡᠨᠢ ᠥᠨᠳᠡᠭᠡᠨ ᠬᠡᠯᠪᠡᠷᠢᠶᠢᠨ ᠪᠠᠷᠢᠭᠤᠯᠲᠠᠢ ᠨᠣᠭᠤᠭᠠᠷᠠᠭᠰᠠᠨ ᠭᠠᠨᠳᠢᠭ ᠳᠠᠷᠤᠪᠴᠢᠪᠠᠷ ᠳᠠᠷᠤᠭᠰᠠᠨ᠂ ᠳᠠᠪᠬᠤᠷ ᠳᠠᠪᠬᠤᠷ ᠵᠢᠵᠢᠭ ᠴᠠᠭᠠᠰᠤ᠂ ᠠᠷᠠᠰᠤᠨ ᠬᠠᠪᠲᠠᠰᠤᠲᠠᠢ ᠤᠯᠠᠭᠠᠨ ᠬᠥᠪᠡᠭᠡᠲᠡᠢ ᠡᠷᠲᠡ ᠴᠠᠭᠤᠨ ᠨᠢᠭᠡ ᠪᠣᠲᠢ ᠨᠣᠮ᠂ ᠣᠢᠶᠢᠨ ᠬᠤᠰᠢᠭᠠᠶᠢᠨ ᠴᠢᠨᠡᠭᠡᠨ ᠪᠣᠯᠲᠠᠯᠠ ᠬᠠᠲᠠᠵᠤ ᠬᠣᠷᠴᠢᠢᠭᠰᠠᠨ ᠨᠢᠮᠪᠡᠭᠡ᠂ ᠲᠦᠰᠢᠯᠭᠡᠲᠡᠢ ᠰᠠᠨᠳᠠᠯᠢᠶᠢᠨ ᠥᠷᠦᠭᠡᠰᠦᠨ ᠲᠦᠰᠢᠪᠴᠢ᠂ ᠳᠣᠲᠤᠷᠠᠨᠢ ᠰᠢᠩᠭᠡᠨ ᠤᠯᠠᠭᠠᠨ ᠶᠠᠭᠤᠮᠠᠲᠠᠢ᠂ ᠲᠡᠭᠦᠨᠳᠦᠨᠢ ᠭᠤᠷᠪᠠᠨ ᠢᠯᠠᠭᠠᠲᠠᠢ᠂ ᠴᠠᠭᠠᠰᠤᠪᠠᠷ ᠲᠠᠭᠯᠠᠭᠰᠠᠨ ᠬᠤᠨᠳᠠᠭᠠ᠂ ᠯᠠᠴᠠᠶᠢᠨ ᠬᠡᠯᠲᠡᠷᠬᠡᠢ᠂ ᠬᠠᠮᠢᠭᠠᠠᠴᠠ ᠲᠡᠭᠦᠭᠰᠡᠨᠢ ᠪᠤᠤ ᠮᠡᠳᠡ ᠳᠠᠪᠤᠤᠶᠢᠨ ᠥᠭᠡᠳᠡᠰᠦ ᠨᠤᠭᠦᠳ᠂ ᠪᠡᠬᠡᠨᠳᠦ ᠵᠢᠭᠤᠷᠠᠯᠳᠤᠨ ᠬᠠᠲᠠᠭᠰᠠᠨ᠂ ᠠᠭᠤᠰᠭᠢᠨᠤ ᠰᠦᠷᠢᠶᠡᠪᠡᠷ ᠬᠠᠲᠠᠩᠭᠢᠷ ᠪᠣᠯᠤᠭᠰᠠᠨ ᠬᠥᠮᠦᠨᠰᠢᠭ ᠬᠣᠶᠠᠷ ᠥᠳᠦᠨ ᠦᠵᠦᠭ᠂ ᠮᠤᠰᠺᠸᠠᠶᠢ ᠹᠷᠠᠨᠼᠢᠴᠤᠳᠤᠨ ᠳᠣᠪᠲᠤᠯᠬᠤᠠᠴᠠ ᠡᠮᠦᠨᠡ ᠡᠵᠡᠨ ᠬᠥᠮᠦᠨ ᠬᠡᠷᠡᠭᠯᠡᠵᠦ ᠪᠠᠢᠭᠰᠠᠨ ᠪᠣᠯᠪᠠᠤᠤ ᠬᠡᠮᠡᠷ ᠰᠢᠪ ᠰᠢᠷᠠ ᠪᠣᠯᠴᠢᠬᠠᠭᠰᠠᠨ ᠰᠢᠭᠢᠴᠢᠯᠡᠭᠦᠷ ᠵᠡᠷᠭᠡ ᠬᠡᠷᠡᠭᠲᠡᠢ ᠬᠡᠷᠡᠭᠦᠭᠡᠢ ᠣᠯᠠᠨ ᠶᠠᠭᠤᠮᠠ ᠬᠥᠭᠯᠡᠷᠡᠭᠰᠡᠨ ᠪᠠᠢᠯᠠ᠃
ᠬᠠᠨᠠᠨ ᠳᠡᠭᠡᠭᠦᠷ ᠡᠮᠬᠢᠦᠭᠡᠢ ᠰᠢᠬᠠᠴᠠᠯᠳᠤᠭᠤᠯᠤᠨ ᠡᠯᠭᠦᠭᠰᠡᠨ ᠵᠢᠷᠤᠭᠤᠳ ᠪᠠᠢᠪᠠ: ᠮᠣᠷᠢᠳᠢᠶᠠᠨ ᠤᠰᠤᠨᠳᠤ ᠵᠢᠪᠪᠦᠭᠦᠯᠦᠨ ᠬᠠᠰᠭᠢᠷᠤᠯᠳᠤᠨ ᠶᠠᠪᠤᠭᠰᠠᠨ᠂ ᠲᠣᠮᠤ ᠪᠥᠮᠪᠦᠷᠦᠳ ᠪᠠᠷᠢᠭᠰᠠᠨ᠂ ᠭᠤᠷᠪᠠᠯᠵᠢᠨ ᠮᠠᠯᠠᠭᠠᠢᠲᠠᠢ ᠴᠡᠷᠢᠭᠦᠳᠲᠡᠢ ᠶᠠᠮᠠᠷ ᠨᠢᠭᠡᠨ ᠪᠠᠢᠯᠳᠤᠭᠠᠨᠢ ᠬᠠᠷᠠᠭᠤᠯᠤᠭᠰᠠᠨ ᠬᠠᠭᠤᠴᠢᠷᠠᠵᠤ ᠰᠢᠷᠠᠯᠠᠭᠰᠠᠨ ᠰᠡᠢᠯᠦᠮᠡᠯ ᠬᠡᠪᠦᠨ ᠤᠷᠲᠤ ᠵᠢᠷᠤᠭᠢ ᠬᠦᠷᠡᠯ ᠪᠤᠳᠤᠭᠢᠶᠠᠷ ᠬᠥᠪᠡᠭᠡᠯᠡᠨ ᠳᠥᠷᠪᠡᠨ ᠪᠤᠯᠤᠩᠳᠤᠨᠢ ᠤᠭᠠᠯᠵᠠ ᠭᠠᠷᠭᠠᠭᠰᠠᠨ᠂ ᠰᠢᠯᠦᠭᠡᠢ ᠤᠯᠠᠭᠠᠨ ᠽᠠᠨᠳᠠᠨ ᠮᠣᠳᠤᠨ ᠵᠢᠶᠠᠵᠠᠨᠳᠤ ᠰᠠᠭᠤᠯᠭᠠᠭᠰᠠᠨ ᠬᠠᠷᠠᠭᠳᠠᠨᠠ᠃ ᠴᠡᠴᠡᠭ ᠵᠢᠮᠢᠰ᠂ ᠵᠦᠰᠦᠮᠡᠯ ᠲᠠᠷᠪᠤᠰ᠂ ᠵᠡᠷᠯᠢᠭ ᠭᠠᠬᠠᠢᠶᠢᠨ ᠲᠣᠯᠤᠭᠠᠢ᠂ ᠳᠣᠷᠤᠭᠰᠢ ᠬᠠᠷᠠᠭᠤᠯᠵᠤ ᠡᠯᠭᠦᠭᠰᠡᠨ ᠨᠤᠭᠤᠰᠤ ᠵᠡᠷᠭᠡᠶᠢ ᠵᠢᠷᠤᠭᠰᠠᠨ ᠲᠣᠰᠤᠨ ᠪᠤᠳᠤᠭᠤᠨ ᠲᠣᠮᠤ ᠬᠠᠷᠠ ᠵᠢᠷᠤᠭ ᠪᠠᠢᠯᠳᠤᠭᠠᠨᠤ ᠵᠢᠷᠤᠭᠤᠨ ᠳᠡᠷᠭᠡᠳᠡ ᠪᠠᠷᠤᠭ ᠬᠠᠭᠠᠰ ᠬᠠᠨᠠ ᠡᠵᠡᠯᠡᠵᠡᠢ᠃ ᠶᠣᠷᠤᠭᠢᠶᠠᠷ ᠣᠷᠢᠶᠠᠭᠰᠠᠨ᠂ ᠲᠣᠭᠤᠰᠤᠨᠳᠤ ᠳᠠᠷᠤᠭᠳᠠᠵᠤ ᠬᠦᠷᠢᠶᠢᠨ ᠡᠭᠦᠷᠦᠨ ᠥᠩᠭᠡᠲᠡᠢ ᠪᠣᠯᠤᠭᠰᠠᠨᠯᠠᠶᠢᠨ ᠲᠠᠯᠪᠢᠭᠤᠷ ᠶᠠᠭ ᠲᠠᠭᠠᠵᠠᠶᠢᠨ ᠳᠤᠮᠳᠠᠠᠴᠠ ᠡᠯᠭᠦᠭᠡᠲᠡᠢ ᠪᠠᠢᠯᠠ᠂ ᠰᠢᠷᠡᠭᠡᠨ ᠳᠡᠭᠡᠷᠡ ᠪᠠᠢᠬᠤ ᠡᠷᠬᠡᠦᠭᠡᠢ ᠡᠯᠳᠡᠪ ᠮᠤᠤᠰᠠᠢᠨ ᠶᠠᠭᠤᠮᠠ ᠥᠷᠦᠭᠡᠨᠦ ᠨᠢᠭᠡ ᠪᠤᠯᠤᠩᠳᠤ ᠣᠪᠤᠭᠠᠯᠠᠭᠠᠰᠤᠲᠠᠢ ᠬᠠᠷᠠᠭᠳᠠᠨᠠ᠃ ᠲᠡᠳᠡᠭᠡᠷᠦᠨ ᠶᠠᠭᠤ ᠪᠣᠯᠬᠤᠶᠢ ᠲᠠᠨᠢᠬᠤᠶᠠ ᠪᠡᠷᠬᠡ ᠠᠵᠢ᠂ ᠤᠴᠢᠷᠨᠢ ᠡᠨᠡ ᠪᠦᠬᠦᠨ ᠳᠡᠭᠡᠷᠡ ᠤᠴᠢᠷᠦᠭᠡᠢ ᠵᠤᠵᠠᠭᠠᠨ ᠲᠣᠭᠤᠰᠤ ᠲᠣᠷᠲᠤᠭ ᠰᠠᠭᠤᠵᠤ᠂ ᠭᠠᠷ ᠬᠦᠷᠪᠡᠯ ᠳᠣᠣᠷᠠᠬᠠᠨᠢᠶᠠᠨ ᠶᠠᠭ ᠲᠠᠪᠤᠨ ᠬᠤᠷᠤᠭᠤᠲᠠᠢ ᠬᠠᠷᠠ ᠪᠡᠭᠡᠯᠡᠢᠰᠢᠭ ᠪᠣᠯᠬᠤ ᠪᠠᠢᠯᠠ᠃ ᠡᠨᠡ ᠣᠪᠤᠭᠠᠯᠠᠭᠠᠲᠠᠢ ᠬᠣᠭ ᠳᠣᠲᠤᠷᠠᠠᠴᠠ ᠮᠣᠳᠤᠨ ᠬᠦᠷᠵᠡᠶᠢᠨ ᠬᠤᠭᠤᠷᠬᠠᠢ᠂ ᠬᠠᠭᠤᠴᠢᠨ ᠰᠠᠪᠢᠬᠢᠨ ᠭᠤᠲᠤᠯᠤᠨ ᠥᠰᠦᠭᠡᠢᠯᠡ ᠲᠣᠳᠤ ᠬᠠᠷᠠᠭᠳᠠᠨᠠ᠃ ᠰᠢᠷᠡᠭᠡᠨ ᠳᠡᠭᠡᠷᠡ ᠬᠡᠪᠲᠡᠵᠦ ᠪᠠᠢᠭᠠ ᠤᠨᠲᠠᠬᠤᠳᠤ ᠡᠮᠦᠰᠳᠡᠭ ᠬᠠᠭᠤᠴᠢᠨ ᠮᠠᠯᠠᠭᠠᠢ ᠡᠨᠳᠡ ᠬᠥᠮᠦᠨ ᠠᠮᠢᠲᠠᠨ ᠪᠠᠢᠭᠠᠶᠢᠨ ᠲᠡᠮᠳᠡᠭ ᠪᠣᠯᠵᠤ ᠪᠠᠢᠭᠰᠠᠨᠦᠭᠡᠢ ᠪᠣᠯ ᠡᠨᠡ ᠥᠷᠦᠭᠡᠶᠢ ᠬᠥᠮᠦᠨ ᠰᠠᠭᠤᠳᠠᠭ ᠭᠠᠵᠠᠷ ᠭᠡᠵᠦ ᠶᠠᠭᠠᠬᠢᠭᠰᠠᠨᠴᠤ ᠪᠣᠳᠤᠮᠠᠷᠦᠭᠡᠢ ᠪᠠᠢᠪᠠ᠃
ᠴᠢᠴᠢᠺᠤᠸ ᠡᠨᠳᠡᠬᠢ ᠶᠠᠭᠤᠮᠠᠶᠢ ᠭᠠᠢᠬᠠᠨ ᠬᠠᠷᠠᠵᠤ ᠠᠵᠢᠭᠯᠠᠨ ᠰᠠᠭᠤᠲᠠᠯᠠ ᠬᠠᠵᠠᠭᠤ ᠲᠠᠯᠠᠶᠢᠨ ᠬᠠᠭᠠᠯᠭᠠ ᠣᠩᠭᠤᠢᠵᠤ᠂ ᠲᠦᠷᠦᠭᠦᠬᠡᠨ ᠬᠠᠰᠢᠶᠠᠨ ᠳᠣᠲᠤᠷᠠ ᠲᠠᠭᠠᠷᠠᠯᠳᠤᠭᠰᠠᠨ ᠨᠢᠷᠪᠠ ᠡᠮᠡᠭᠲᠡᠢ ᠣᠷᠤᠵᠤ ᠢᠷᠡᠯᠡ᠃ ᠴᠢᠴᠢᠺᠤᠸ ᠡᠨᠡ ᠬᠥᠮᠦᠨᠢ ᠬᠠᠷᠠᠬᠤᠲᠠᠢᠪᠠᠨ ᠵᠡᠷᠭᠡ᠂ᠦᠭᠡᠢ ᠡᠨᠡᠴᠢᠨᠢ ᠡᠮᠡᠭᠲᠡᠢ ᠪᠢᠰᠢ ᠡᠷᠡᠭᠲᠡᠢ ᠨᠢᠷᠪᠠ ᠪᠠᠢᠬᠤ ᠰᠢᠪ᠃ ᠡᠨᠡ ᠨᠢᠷᠪᠠ ᠡᠮᠡᠭᠲᠡᠢ ᠬᠥᠮᠦᠨ ᠪᠠᠢᠭᠰᠠᠨ ᠪᠣᠯ ᠶᠠᠳᠠᠬᠤᠳᠠᠭᠠᠨ ᠬᠤᠰᠤᠬᠤ ᠰᠠᠬᠠᠯᠦᠭᠡᠢ ᠪᠠᠢᠬᠤ ᠶᠣᠰᠤᠲᠠᠢ᠃ ᠭᠡᠲᠡᠯᠡ ᠡᠨᠡᠴᠢᠨᠢ ᠰᠠᠬᠠᠯᠢᠶᠠᠨ ᠬᠤᠰᠤᠳᠠᠭᠶᠤᠮᠰᠢᠭ᠋ ᠪᠠᠢᠨᠠ᠃ ᠬᠠᠷᠢᠨ ᠲᠡᠭᠡᠬᠦᠳᠡᠭᠡᠨ ᠶᠡᠬᠡᠯᠡ ᠤᠳᠠᠵᠤ ᠬᠤᠰᠤᠳᠠᠭᠨᠢ ᠢᠯᠡ ᠪᠠᠢᠨᠠ᠃ ᠶᠠᠭᠠᠬᠢᠭᠠᠳ ᠪᠤᠢ ᠭᠡᠪᠡᠯ ᠬᠠᠴᠠᠷᠤᠨ ᠳᠣᠣᠷᠠᠳᠤ ᠬᠡᠰᠡᠭᠨᠢ ᠵᠦᠴᠢᠶᠡᠨᠳᠦ ᠡᠯᠭᠦᠭᠡᠰᠦᠲᠡᠢ ᠪᠠᠢᠳᠠᠭ ᠮᠣᠷᠢᠨᠤ ᠲᠡᠮᠦᠷ ᠱᠤᠸᠠᠵᠠᠰᠢᠭ᠋ ᠠᠷᠵᠠᠢᠴᠢᠬᠠᠭᠰᠠᠨ ᠪᠠᠢᠨᠠ ᠭᠡᠵᠦ ᠴᠢᠴᠢᠺᠤᠸ ᠪᠣᠳᠤᠭᠠᠳ ᠭᠠᠢᠬᠠᠭᠰᠠᠨᠤ ᠲᠡᠮᠳᠡᠭ ᠴᠢᠷᠠᠢᠳᠤᠨᠢ ᠢᠯᠡᠷᠡᠨ᠂ ᠲᠡᠷᠡ ᠬᠥᠮᠦᠨᠢ ᠶᠠᠭᠤ ᠭᠡᠵᠦ ᠬᠡᠯᠡᠳᠡᠭ ᠪᠣᠯ ᠭᠡᠵᠦ ᠬᠦᠯᠢᠶᠡᠵᠦ ᠪᠠᠢᠯᠠ᠃ ᠲᠡᠷᠡ ᠬᠥᠮᠦᠨ ᠪᠠᠰᠠ ᠴᠢᠴᠢᠺᠤᠸᠤᠨ ᠶᠠᠭᠤ ᠬᠡᠯᠡᠬᠦᠶᠢ ᠬᠦᠯᠢᠶᠡᠵᠦ ᠪᠠᠢᠪᠠ᠃ ᠴᠢᠴᠢᠺᠤᠸ ᠡᠢᠮᠦ ᠬᠠᠴᠢᠨ ᠬᠥᠮᠦᠨᠢ ᠭᠠᠢᠬᠠᠨ ᠰᠠᠭᠤᠭᠰᠠᠨᠢᠶᠠᠨ ᠵᠣᠷᠢᠭᠯᠠᠵᠤ:
《ᠲᠠᠨᠠᠢ ᠨᠣᠶᠠᠨᠲᠠᠨ ᠶᠠᠭᠠᠬᠢᠭᠰᠠᠨ ᠪᠤᠢ? ᠥᠷᠦᠭᠡᠨᠳᠡᠭᠡᠨ ᠪᠤᠢᠤᠤ?》 ᠭᠡᠵᠦ ᠠᠰᠠᠭᠤᠯᠠ᠃
《ᠡᠵᠡᠨ ᠡᠨᠳᠡ ᠪᠤᠢ!》 ᠭᠡᠵᠦ ᠡᠷᠡᠭᠲᠡᠢ ᠨᠢᠷᠪᠠ ᠬᠠᠷᠢᠭᠤᠯᠪᠠ᠃
《ᠬᠠᠮᠢᠭᠠ ᠪᠠᠢᠨᠠ?》 ᠭᠡᠵᠦ ᠴᠢᠴᠢᠺᠤᠸ ᠠᠰᠠᠭᠤᠬᠤᠳᠤ:
《ᠡᠷᠬᠢᠮᠮᠢᠨᠢ᠂ ᠲᠠ ᠰᠣᠬᠤᠷᠶᠤᠮᠤᠤ ᠳ᠋ᠠ ? ᠡᠵᠡᠨ ᠬᠥᠮᠦᠨ ᠪᠢ ᠪᠠᠢᠨᠠ》 ᠭᠡᠵᠦ ᠡᠷᠡᠭᠲᠡᠢ ᠨᠢᠷᠪᠠ ᠬᠠᠷᠢᠭᠤᠯᠪᠠ᠃
ᠮᠠᠨᠠᠢ ᠵᠣᠬᠢᠶᠠᠯᠤᠨ ᠪᠠᠭᠠᠲᠤᠷ ᠡᠨᠡ ᠦᠭᠡᠶᠢ ᠰᠣᠨᠤᠰᠬᠤᠲᠠᠢᠪᠠᠨ ᠵᠡᠷᠭᠡ ᠡᠷᠬᠡᠦᠭᠡᠢ ᠭᠡᠳᠡᠷᠭᠦ ᠤᠬᠤᠷᠢᠵᠤ᠂ ᠲᠡᠷᠡ ᠬᠥᠮᠦᠨᠢ ᠰᠠᠢᠲᠤᠷ ᠰᠢᠷᠲᠡᠨ ᠬᠠᠷᠠᠯᠠ᠃ ᠴᠢᠴᠢᠺᠤᠸ ᠶᠠᠩᠵᠤ ᠪᠦᠷᠢᠶᠢᠨ ᠬᠥᠮᠦᠨᠢ ᠦᠵᠡᠵᠦ ᠬᠠᠷᠠᠵᠤ ᠶᠠᠪᠤᠭᠰᠠᠨᠢᠶᠠᠷ ᠪᠠᠷᠠᠬᠤᠦᠭᠡᠢ᠂ ᠤᠩᠰᠢᠭᠴᠢᠳ ᠲᠠ ᠪᠢᠳᠡᠨᠦ ᠶᠡᠷᠦ ᠦᠵᠡᠭᠡᠳᠦᠢ ᠡᠯᠳᠡᠪ ᠬᠥᠮᠦᠨᠢ ᠦᠵᠡᠵᠦ ᠬᠠᠷᠠᠵᠤ ᠶᠠᠪᠤᠭᠰᠠᠨ ᠪᠣᠯᠪᠠᠴᠤ ᠡᠨᠡ ᠮᠡᠲᠦ ᠬᠥᠮᠦᠨᠢ ᠶᠡᠷᠦ ᠬᠠᠷᠠᠭᠠᠳᠤᠢᠶᠤᠮ᠃ ᠡᠨᠡ ᠬᠥᠮᠦᠨᠦ ᠴᠢᠷᠠᠢᠨᠢ ᠶᠡᠷᠦᠶᠢᠨ ᠲᠤᠷᠠᠩᠬᠠᠢ ᠡᠪᠦᠭᠡᠳᠦᠨ ᠴᠢᠷᠠᠢᠠᠴᠠ ᠢᠯᠭᠠᠭᠳᠠᠬᠤ ᠣᠨᠴᠠᠶᠢᠨ ᠰᠢᠨᠵᠢ ᠲᠡᠮᠳᠡᠭᠦᠭᠡᠢ ᠪᠣᠯᠪᠠᠴᠤ ᠬᠡᠲᠦᠷᠬᠡᠢ ᠡᠮᠰᠡᠭᠡᠷᠦᠨ ᠤᠯᠠᠮᠠᠴᠠ ᠳᠤᠤᠭᠠᠷᠬᠤᠳᠠᠭᠠᠨ ᠬᠥᠮᠦᠨ ᠥᠭᠡᠳᠡ ᠰᠢᠯᠦᠰᠦᠪᠡᠨ ᠦᠰᠦᠷᠭᠡᠬᠦᠦᠭᠡᠢ ᠭᠡᠵᠦ ᠠᠮᠠᠪᠠᠨ ᠦᠷᠭᠦᠯᠵᠢᠳᠡ ᠠᠯᠴᠢᠭᠤᠷᠢᠶᠠᠷ ᠲᠠᠭᠯᠠᠵᠤ ᠶᠠᠪᠤᠳᠠᠭ ᠠᠵᠢ᠃ ᠭᠦᠨ ᠨᠦᠬᠡᠨᠡᠴᠡ ᠨᠠᠷᠢᠬᠠᠨ ᠬᠣᠩᠰᠢᠶᠠᠷ ᠴᠤᠬᠤᠢᠯᠭᠠᠵᠤ᠂ ᠡᠨᠳᠡ ᠮᠤᠤᠷ᠂ ᠳᠦᠷᠰᠦᠭᠦᠢ ᠬᠡᠦᠬᠡᠳ ᠬᠣᠷᠭᠤᠳᠠᠭᠰᠠᠨ ᠪᠠᠢᠵᠤ ᠮᠠᠭᠠᠳ ᠭᠡᠵᠦ ᠪᠣᠯᠭᠤᠮᠵᠢᠯᠠᠨ᠂ ᠴᠢᠬᠢᠪᠡᠨ ᠰᠡᠷᠲᠡᠢᠯᠭᠡᠨ ᠰᠠᠬᠠᠯᠢᠶᠠᠨ ᠬᠥᠳᠡᠯᠭᠡᠨ᠂ ᠳᠠᠢᠰᠤᠨᠤ ᠦᠨᠦᠷ ᠠᠪᠬᠤᠶᠢ ᠣᠷᠤᠯᠳᠤᠵᠤ ᠪᠠᠢᠭᠠ ᠬᠤᠯᠤᠭᠠᠨᠠᠶᠢᠨ ᠨᠢᠳᠦᠰᠢᠭ ᠬᠠᠷᠠᠴᠠᠲᠠᠢ ᠵᠢᠭᠠᠯᠬᠠᠨ ᠬᠣᠶᠠᠷ ᠨᠢᠳᠦᠨᠢ ᠥᠳᠭᠡᠨ ᠬᠥᠮᠦᠰᠭᠡᠨ ᠳᠣᠲᠤᠷᠠᠠᠴᠠ ᠴᠣᠭᠲᠠᠢ ᠬᠡᠪᠢᠶᠡᠷᠢᠶᠡᠨ ᠬᠠᠷᠠᠭᠳᠠᠨᠠ᠃ ᠲᠡᠭᠦᠨᠦ ᠬᠤᠪᠴᠠᠰᠤᠨᠢ ᠪᠦᠷᠴᠦ ᠰᠣᠨᠢᠨ ᠪᠠᠢᠯᠠ᠃ ᠡᠩᠭᠡᠷ ᠵᠠᠭᠠᠮᠠ᠂ ᠬᠣᠶᠠᠷ ᠬᠠᠨᠴᠤᠢᠨᠢ ᠭᠤᠲᠤᠯᠤᠨ ᠵᠤᠵᠠᠭᠠᠨ ᠪᠤᠯᠢᠭᠠᠷᠢᠰᠢᠭ᠋ ᠪᠣᠯᠤᠨ ᠬᠠᠷᠠᠯᠠᠨ ᠭᠢᠯᠲᠠᠭᠠᠨᠠᠵᠤ᠂ ᠡᠨᠡ ᠳᠡᠪᠡᠯᠢ ᠶᠠᠮᠠᠷ ᠡᠳ᠋ᠢᠶᠡᠷ ᠣᠶᠤᠭᠰᠠᠨᠢ ᠮᠡᠳᠡᠬᠦ ᠠᠷᠭᠠᠦᠭᠡᠢ ᠪᠣᠯᠵᠠᠢ᠃ ᠠᠷᠤᠶᠢᠨ ᠬᠣᠶᠠᠷ ᠬᠣᠷᠮᠤᠢᠶᠢᠨ ᠣᠷᠤᠨᠳᠤ ᠳᠥᠷᠪᠡᠨ ᠬᠣᠷᠮᠤᠢ ᠤᠨᠵᠢᠭᠢᠨᠠᠵᠤ ᠲᠡᠭᠦᠨᠡᠴᠡ ᠪᠥᠭᠡᠮ ᠬᠥᠪᠦᠩ ᠴᠤᠬᠤᠢᠨᠠ᠃ ᠡᠨᠡ ᠬᠥᠮᠦᠨ ᠣᠢᠮᠤᠰᠤᠶᠤᠮᠤᠤ᠂ ᠶᠠᠮᠠᠷ ᠨᠢᠭᠡᠨ ᠶᠠᠭᠤᠮᠠᠶᠢᠨ ᠰᠣᠢᠯᠲᠠᠶᠤᠮᠤᠤ᠂ ᠡᠰᠡᠬᠦᠯᠡ ᠪᠡᠯᠬᠡᠭᠦᠪᠴᠢᠶᠦᠮᠦᠦ ᠬᠡᠮᠡᠷ ᠶᠠᠭᠤᠮᠠᠶᠢ ᠬᠦᠵᠦᠭᠦᠨᠳᠡᠭᠡᠨ ᠡᠯᠭᠦᠭᠰᠡᠨᠨᠢ ᠯᠠᠪᠯᠠ ᠪᠦᠴᠡ ᠵᠠᠩᠭᠢᠶᠠ ᠪᠢᠰᠢ ᠪᠠᠢᠬᠤ᠃ ᠬᠡᠷᠪᠡ ᠴᠢᠴᠢᠺᠤᠸ ᠡᠢᠮᠦ ᠬᠤᠪᠴᠠᠰᠤᠲᠠᠢ ᠬᠥᠮᠦᠨᠢ ᠶᠠᠮᠠᠷ ᠨᠢᠭᠡᠨ ᠰᠦᠮᠡᠶᠢᠨ ᠬᠠᠭᠠᠯᠭᠠᠨ ᠳᠡᠭᠡᠷᠡ ᠬᠠᠷᠠᠭᠰᠠᠨ ᠪᠣᠯ ᠲᠡᠭᠦᠨᠳᠦ ᠯᠠᠪ ᠬᠣᠶᠠᠷ ᠺᠣᠫᠸᠢᠢᠺᠠ ᠵᠣᠭᠤᠰ ᠥᠭᠬᠦᠶᠦᠮ᠃ ᠴᠢᠴᠢᠺᠤᠸ ᠶᠠᠳᠠᠭᠤ ᠬᠥᠮᠦᠨᠢ ᠬᠠᠷᠠᠬᠤᠳᠠᠭᠠᠨ ᠬᠣᠶᠠᠷ ᠺᠣᠫᠸᠢᠢᠺᠠ ᠥᠭᠭᠦᠯᠦᠭᠡᠢ ᠥᠩᠭᠡᠷᠡᠳᠡᠭᠦᠭᠡᠢ ᠰᠠᠢᠨ ᠰᠠᠨᠠᠭᠠᠲᠠᠢ ᠬᠥᠮᠦᠨ ᠪᠠᠢᠵᠠᠢ᠃ ᠭᠡᠲᠡᠯᠡ ᠣᠳᠣ ᠤᠷᠳᠤᠨᠢ ᠭᠤᠢᠯᠢᠨᠴᠢᠨ ᠪᠢᠰᠢ᠂ ᠮᠢᠩᠭᠠ ᠭᠠᠷᠤᠢ ᠠᠯᠪᠠᠲᠤᠶᠢᠨ ᠰᠦᠨᠡᠰᠦᠶᠢ ᠭᠠᠷᠲᠠᠭᠠᠨ ᠠᠳᠭᠤᠭᠰᠠᠨ ᠭᠠᠵᠠᠷᠤᠨ ᠡᠵᠡᠨ ᠵᠣᠭᠰᠤᠵᠤ ᠪᠠᠢᠪᠠ᠃ ᠡᠨᠡ ᠠᠢᠯᠤᠨ ᠬᠠᠳᠠᠭᠠᠯᠠᠭᠰᠠᠨ᠂ ᠴᠠᠢᠯᠭᠠᠭᠰᠠᠨ ᠴᠠᠢᠯᠭᠠᠭᠠᠳᠤᠢ ᠦᠷᠡ ᠲᠠᠷᠢᠶᠠᠰᠢᠭ᠋ ᠶᠡᠬᠡ ᠦᠷᠡ ᠲᠠᠷᠢᠶᠠ ᠬᠠᠳᠠᠭᠠᠯᠠᠵᠤ ᠪᠠᠢᠳᠠᠭ ᠪᠠᠶᠠᠨ ᠬᠥᠮᠦᠨ ᠡᠨᠡ ᠬᠠᠪᠢᠳᠤ ᠪᠠᠢᠬᠤᠦᠭᠡᠢᠶᠤᠮ᠃ ᠡᠨᠡ ᠬᠥᠮᠦᠨᠦ ᠬᠤᠷᠢᠶᠠᠨ ᠳᠠᠷᠤᠵᠤ ᠪᠠᠢᠭᠠᠲᠠᠢ ᠠᠳᠠᠯᠢ᠂ ᠶᠣᠷᠤᠭ᠂ ᠴᠡᠮᠪᠡ᠂ ᠡᠳ᠋ᠯᠡᠭᠰᠡᠨ ᠡᠳ᠋ᠯᠡᠭᠡᠳᠦᠢ ᠨᠡᠬᠡᠢ᠂ ᠪᠣᠷᠴᠠᠯᠠᠭᠰᠠᠨ ᠵᠢᠭᠠᠰᠤ᠂ ᠨᠣᠭᠤᠭᠠ ᠵᠢᠮᠢᠰ ᠵᠡᠷᠭᠡᠶᠢᠨ ᠢᠳᠡᠰᠢ ᠤᠤᠭᠤᠰᠢᠶᠢᠨ ᠡᠯᠳᠡᠪ ᠶᠠᠭᠤᠮᠠᠪᠠᠷ ᠳᠦᠭᠦᠷᠦᠭᠰᠡᠨ ᠰᠠᠩ ᠬᠥᠮᠦᠷᠭᠡᠲᠡᠢ ᠬᠥᠮᠦᠨ ᠪᠠᠢᠬᠤᠦᠭᠡᠢ᠃ ᠬᠡᠨ ᠬᠥᠮᠦᠨ ᠡᠨᠡ ᠠᠢᠯᠤᠨ ᠶᠠᠩᠵᠤ ᠪᠦᠷᠢᠶᠢᠨ ᠮᠣᠳᠤᠨ ᠮᠠᠲᠧᠷᠢᠶᠠᠯ ᠪᠠ ᠬᠡᠷᠡᠭᠯᠡᠭᠡᠦᠭᠡᠢ ᠰᠠᠪᠠ ᠰᠠᠭᠠᠯᠢ ᠬᠤᠷᠢᠶᠠᠨ ᠣᠪᠤᠭᠠᠯᠠᠭᠰᠠᠨ ᠬᠠᠰᠢᠶᠠ ᠤᠷᠤᠭᠤ ᠬᠠᠷᠠᠪᠠᠯ ᠬᠥᠩᠭᠡᠨ ᠬᠥᠯᠲᠡᠢ᠂ ᠬᠠᠳᠠᠮ ᠡᠬᠡ ᠡᠭᠡᠴᠢᠨᠡᠷ ᠡᠳᠦᠷ ᠪᠦᠷᠢ ᠲᠣᠭᠤᠭᠠᠴᠢᠨᠠᠷᠢᠶᠠᠨ ᠳᠠᠭᠠᠭᠤᠯᠵᠤ ᠣᠴᠢᠳᠠᠭ ᠮᠤᠰᠺᠸᠠᠶᠢᠨ ᠨᠢᠭᠡ ᠮᠣᠳᠤᠨ ᠰᠠᠪᠠ ᠰᠠᠭᠠᠯᠢᠶᠢᠨ ᠵᠠᠬᠠ ᠳᠡᠯᠭᠡᠭᠦᠷᠲᠦ ᠢᠷᠡᠴᠢᠬᠡᠭᠰᠡᠨᠶᠦᠮᠦᠦ ᠭᠡᠵᠦ ᠰᠠᠨᠠᠭᠳᠠᠨᠠ᠃ ᠡᠨᠳᠡ ᠬᠠᠷᠠᠭᠳᠠᠬᠤᠨᠢ ᠰᠡᠢᠯᠵᠦ᠂ ᠤᠬᠤᠵᠤ᠂ ᠵᠤᠷᠠᠵᠤ᠂ ᠬᠥᠷᠦᠵᠦ ᠬᠢᠭᠰᠡᠨ ᠮᠣᠳᠤᠨ ᠰᠠᠪᠠ ᠰᠠᠭᠠᠯᠢᠶᠤᠮ᠂ ᠡᠭᠦᠨᠦ ᠳᠣᠲᠤᠷᠠ: ᠪᠠᠷᠢᠭᠤᠯᠲᠠᠢ ᠪᠠᠷᠢᠭᠤᠯᠦᠭᠡᠢ ᠬᠠᠪᠴᠢᠭ᠂ ᠪᠣᠷᠲᠤᠭᠤ᠂ ᠴᠣᠷᠭᠤᠲᠠᠢ ᠴᠣᠷᠭᠤᠦᠭᠡᠢ ᠳᠡᠪᠦᠷᠡ᠂ ᠤᠭᠢᠶᠠᠯᠭᠠᠶᠢᠨ ᠲᠦᠩᠫᠧᠩ᠂ ᠳᠤᠷᠤᠰᠤᠨ ᠰᠠᠭᠰᠤ᠂ ᠡᠬᠡᠨᠡᠷ ᠬᠡᠦᠬᠡᠨᠴᠦᠳ ᠶᠠᠭᠤᠮᠠ ᠳᠡᠪᠲᠦᠭᠡᠳᠡᠭ ᠮᠣᠳᠤᠨ ᠰᠠᠪᠠ᠂ ᠨᠠᠷᠢᠬᠠᠨ ᠤᠯᠢᠶᠠᠰᠤᠪᠠᠷ ᠬᠦᠷᠦᠭᠰᠡᠨ ᠬᠠᠢᠷᠴᠠᠭ᠂ ᠦᠢᠰᠦᠪᠡᠷ ᠬᠦᠷᠦᠭᠰᠡᠨ ᠰᠠᠭᠰᠤ ᠵᠡᠷᠭᠡ ᠪᠠᠶᠠᠨ ᠶᠠᠳᠠᠭᠤ ᠣᠷᠤᠰ ᠬᠥᠮᠦᠰᠲᠦ ᠴᠢᠬᠤᠯᠠ ᠬᠡᠷᠡᠭᠴᠡᠭᠡᠲᠡᠢ ᠵᠦᠢᠯᠦᠳ ᠪᠠᠢᠯᠠ᠃ ᠡᠢᠮᠦ ᠲᠣᠭᠠ ᠲᠣᠮᠰᠢᠦᠭᠡᠢ ᠡᠳ᠋ ᠬᠥᠷᠦᠩᠭᠡᠲᠡᠢ ᠫᠯᠶᠦᠱᠺᠢᠨᠳᠦ ᠳᠠᠬᠢᠭᠠᠳ ᠶᠠᠭᠤ ᠬᠡᠷᠡᠭᠲᠡᠢ ᠪᠤᠢ? ᠡᠳ᠋ᠯᠡᠩᠨᠢ ᠳᠠᠬᠢᠨ ᠨᠢᠭᠡ ᠨᠡᠮᠡᠭᠳᠡᠭᠰᠡᠨᠴᠦ᠂ ᠬᠡᠳᠦᠨ ᠦᠶᠡ ᠵᠠᠯᠭᠠᠮᠵᠢᠯᠠᠭᠰᠠᠨᠴᠤ ᠡᠳ᠋ ᠬᠡᠷᠡᠭᠯᠡᠯᠢ ᠵᠠᠷᠤᠵᠤ ᠪᠠᠷᠠᠬᠤᠦᠭᠡᠢ ᠪᠣᠯᠪᠠᠴᠤ᠂ ᠡᠨᠡ ᠪᠦᠬᠦ ᠬᠣᠭᠰᠢᠯ ᠬᠥᠷᠦᠩᠭᠡᠳᠡᠭᠡᠨ ᠰᠡᠳᠭᠢᠯ ᠬᠠᠩᠬᠤᠦᠭᠡᠢ᠂ ᠡᠳᠦᠷ ᠪᠦᠷᠢ ᠬᠠᠷᠢᠶᠠᠲᠤ ᠲᠣᠰᠭᠤᠨᠢᠶᠠᠷᠢᠶᠠᠨ ᠬᠡᠰᠦᠵᠦ᠂ ᠭᠦᠦᠷ ᠮᠦᠦᠷ ᠵᠡᠷᠭᠡᠶᠢᠨ ᠳᠣᠭᠤᠤᠷ ᠱᠠᠭᠠᠢᠵᠤ᠂ ᠬᠠᠭᠤᠴᠢᠨ ᠭᠤᠲᠤᠯᠤᠨ ᠤᠯᠠ᠂ ᠳᠠᠪᠤᠤᠶᠢᠨ ᠥᠭᠡᠳᠡᠰᠦ᠂ ᠬᠠᠳᠠᠭᠠᠰᠤ᠂ ᠸᠠᠭᠠᠷ ᠱᠠᠵᠠᠩᠤᠨ ᠬᠠᠭᠠᠷᠬᠠᠢ ᠵᠡᠷᠭᠡ ᠶᠡᠷᠦᠨᠢ ᠲᠠᠭᠠᠷᠢᠯᠳᠤᠭᠰᠠᠨ ᠪᠦᠬᠦᠨᠢ ᠭᠡᠷᠲᠡᠭᠡᠨ ᠠᠪᠴᠢᠷᠠᠵᠤ᠂ ᠲᠦᠷᠦᠭᠦᠦ ᠴᠢᠴᠢᠺᠤᠸᠤᠨ ᠬᠠᠷᠠᠭᠰᠠᠨ ᠲᠠᠰᠤᠯᠭᠠᠶᠢᠨ ᠪᠤᠯᠤᠩᠳᠤ ᠣᠪᠤᠭᠠᠯᠠᠳᠠᠭ ᠪᠠᠢᠯᠠ᠃ ᠶᠠᠭᠤᠮᠠ ᠡᠷᠢᠵᠦ ᠶᠠᠪᠤᠭᠠ ᠫᠯᠶᠦᠱᠺᠢᠨᠢ ᠲᠠᠷᠢᠶᠠᠴᠢᠳ ᠬᠠᠷᠠᠬᠤᠳᠠᠭᠠᠨ 《ᠴᠡᠪᠡᠷᠯᠡᠭᠴᠢᠮᠠᠨᠢ ᠵᠡᠭᠡᠯᠢᠪᠡᠨ ᠱᠦᠭᠦᠷᠳᠡᠬᠦᠪᠡᠷ ᠭᠠᠷᠤᠯᠠ》 ᠭᠡᠵᠦ ᠶᠠᠷᠢᠯᠴᠠᠨᠠ᠃ ᠫᠯᠶᠦᠱᠺᠢᠨᠦ ᠶᠠᠪᠤᠵᠤ ᠥᠩᠭᠡᠷᠡᠭᠰᠡᠨ ᠬᠣᠢᠨᠠ ᠭᠤᠳᠤᠮᠵᠢᠨᠤ ᠬᠣᠭ ᠨᠣᠪᠰᠢᠶᠢ ᠱᠦᠭᠦᠷᠳᠡᠬᠦ ᠶᠠᠪᠤᠳᠠᠯ ᠦᠨᠡᠨᠳᠡᠭᠡᠨ ᠭᠠᠷᠳᠠᠭᠦᠭᠡᠢ ᠪᠠᠢᠪᠠ᠃ ᠠᠶᠠᠨ ᠵᠠᠮᠢᠶᠠᠷ ᠶᠠᠪᠤᠭᠠ ᠴᠡᠷᠢᠭᠦᠨ ᠳᠠᠷᠤᠭᠠ ᠭᠤᠲᠤᠯᠤᠨ ᠳᠠᠷᠤᠪᠴᠢᠪᠠᠨ ᠭᠡᠭᠡᠭᠰᠡᠨᠢ ᠮᠡᠳᠡᠬᠦᠲᠡᠢ ᠵᠡᠷᠭᠡᠯᠡ ᠲᠡᠷᠡᠨᠢ ᠥᠨᠥᠬᠢ ᠣᠪᠤᠭᠠᠯᠠᠭᠠᠲᠠᠢ ᠶᠠᠭᠤᠮᠠᠨᠳᠤ ᠳᠣᠣᠷᠠᠬᠠᠨᠢᠶᠠᠨ ᠣᠷᠤᠳᠠᠭ ᠪᠠᠢᠯᠠ᠃ ᠤᠰᠤᠨᠳᠤ ᠶᠠᠪᠤᠭᠰᠠᠨ ᠡᠮᠡᠭᠲᠡᠢ᠂ ᠬᠤᠳᠳᠤᠭ ᠳᠡᠭᠡᠷᠡ ᠰᠠᠭᠠᠲᠠᠵᠤ ᠥᠭᠡᠷᠡ ᠶᠠᠭᠤᠮᠠ ᠬᠠᠷᠠᠭᠠᠳ ᠲᠦᠷ ᠵᠠᠭᠤᠷᠠ ᠰᠡᠳᠭᠢᠯ ᠠᠯᠭᠠᠰᠠᠪᠠᠯ᠂ ᠫᠯᠶᠦᠱᠺᠢᠨ ᠲᠡᠷᠡ ᠡᠮᠡᠭᠲᠡᠢᠶᠢᠨ ᠬᠤᠪᠢᠩᠢ ᠰᠡᠮᠬᠡᠨ ᠠᠪᠤᠭᠠᠳ ᠶᠠᠪᠤᠳᠠᠭ ᠪᠠᠢᠵᠠᠢ᠃ ᠬᠠᠷᠢᠨ ᠶᠠᠭᠤᠮᠠᠪᠠᠨ ᠳᠣᠣᠷᠠᠨᠢ ᠦᠭᠡᠢᠯᠡᠵᠦ᠂ ᠫᠯᠶᠦᠱᠺᠢᠨᠦ ᠬᠤᠯᠠᠭᠠᠢᠯᠠᠭᠰᠠᠨᠢ ᠢᠯᠡᠴᠢᠯᠡᠪᠡᠯ ᠲᠡᠭᠦᠨᠢ ᠦᠭᠡ ᠳᠠᠭᠤᠦᠭᠡᠢ ᠪᠤᠴᠠᠭᠠᠵᠤ ᠥᠭᠳᠡᠭ ᠪᠣᠯᠪᠠᠴᠤ ᠬᠡᠷᠪᠡ ᠲᠡᠭᠦᠨᠢᠶᠡᠨ ᠥᠨᠥᠬᠢ ᠣᠪᠤᠭᠠᠯᠠᠭᠰᠠᠨ ᠬᠣᠭ ᠨᠣᠪᠰᠢᠳᠠᠭᠠᠨ ᠠᠪᠠᠴᠢᠭᠠᠳ ᠬᠢᠴᠢᠬᠡᠭᠰᠡᠨ ᠪᠣᠯ᠂ ᠪᠢ ᠲᠡᠢᠮᠦ ᠭᠠᠵᠠᠷᠠᠴᠠ ᠲᠡᠢᠮᠦ ᠨᠡᠷᠡᠲᠡᠢ ᠬᠥᠮᠦᠨᠡᠴᠡ ᠬᠤᠳᠠᠯᠳᠤᠵᠤ ᠠᠪᠤᠭᠰᠠᠨᠶᠤᠮ᠂ᠦᠭᠡᠢ ᠪᠣᠯ ᠡᠪᠦᠭᠡ ᠡᠴᠢᠭᠡᠶᠢᠨᠮᠢᠨᠢ ᠥᠪ ᠬᠥᠷᠦᠩᠭᠡ ᠪᠣᠯᠭᠠᠵᠤ ᠨᠠᠳᠠ ᠦᠯᠡᠳᠡᠭᠡᠭᠰᠡᠨ ᠶᠠᠭᠤᠮᠠ ᠭᠡᠵᠦ ᠠᠮᠠ ᠠᠯᠳᠠᠨ ᠲᠠᠩᠭᠠᠷᠢᠭᠯᠠᠵᠤ ᠡᠵᠡᠨᠳᠦᠨᠢ ᠶᠡᠷᠦ ᠪᠤᠴᠠᠭᠠᠵᠤ ᠥᠭᠳᠡᠭᠦᠭᠡᠢᠶᠦᠮ᠃ ᠫᠯᠶᠦᠱᠺᠢᠨ ᠭᠡᠷᠲᠡᠭᠡᠨ ᠪᠠᠢᠬᠤᠳᠠᠭᠠᠨ ᠯᠠᠴᠠᠶᠢᠨ ᠬᠡᠯᠲᠡᠷᠬᠡᠢ᠂ ᠴᠠᠭᠠᠰᠤᠨᠤ ᠥᠭᠡᠳᠡᠰᠦ᠂ ᠥᠳᠦ ᠰᠣᠳᠤ᠂ ᠶᠡᠷᠦ ᠨᠢᠳᠦᠨᠳᠦᠨᠢ ᠦᠵᠡᠭᠳᠡᠭᠰᠡᠨ ᠶᠠᠭᠤᠮᠠ ᠪᠦᠬᠦᠨᠢ ᠱᠠᠯᠠ ᠳᠡᠭᠡᠷᠡᠡᠴᠡ ᠲᠡᠭᠦᠵᠦ ᠰᠢᠷᠡᠭᠡᠨ ᠳᠡᠭᠡᠷᠡ᠂ ᠴᠣᠩᠬᠤᠨ ᠳᠡᠭᠡᠷᠡ ᠲᠠᠯᠪᠢᠳᠠᠭ ᠪᠠᠢᠪᠠ᠃
ᠳᠡᠭᠡᠷᠡ ᠦᠶᠡᠳᠦ ᠫᠯᠶᠦᠱᠺᠢᠨ᠂ ᠡᠬᠡᠨᠡᠷ ᠬᠡᠦᠬᠡᠳᠲᠡᠢ᠂ ᠶᠠᠭᠤᠮᠠᠨᠳᠠᠭᠠᠨ ᠭᠠᠮᠲᠠᠢ ᠬᠥᠮᠦᠨ ᠪᠠᠢᠭᠰᠠᠨᠶᠤᠮ᠃ ᠬᠥᠷᠰᠢ ᠬᠥᠮᠦᠰᠨᠢ ᠠᠢᠯᠴᠢᠯᠠᠨ ᠢᠷᠡᠵᠦ ᠬᠣᠭᠤᠯᠠ ᠢᠳᠡᠬᠦ ᠵᠠᠭᠤᠷᠠᠪᠠᠨ ᠠᠵᠤ ᠠᠬᠤᠢᠪᠠᠨ ᠬᠡᠷᠬᠢᠨ ᠡᠵᠡᠩᠨᠡᠨ ᠬᠠᠮᠢᠶᠠᠷᠬᠤᠶᠢᠨ ᠠᠷᠭᠠ ᠤᠬᠠᠭᠠᠨ ᠪᠠ ᠨᠠᠷᠢᠯᠠᠨ ᠬᠠᠮᠠᠭᠠᠯᠠᠵᠤ ᠪᠠᠢᠬᠤᠶᠢᠨ ᠰᠠᠨᠠᠭᠤᠯᠭᠠ ᠰᠤᠷᠭᠠᠮᠵᠢᠶᠢ ᠲᠡᠭᠦᠨᠢᠶᠡᠷ ᠵᠢᠭᠠᠯᠭᠠᠨ ᠠᠪᠳᠠᠭ ᠪᠠᠢᠵᠠᠢ᠃ ᠡᠨᠡ ᠠᠢᠯᠤᠨ ᠪᠦᠬᠦ ᠠᠵᠤ ᠠᠬᠤᠢ ᠬᠡᠪᠦᠨ ᠲᠦᠪᠰᠢᠨ ᠪᠠᠢᠳᠠᠯᠢᠶᠠᠷ ᠶᠠᠪᠤᠭᠳᠠᠨ ᠲᠡᠭᠡᠷᠮᠡ᠂ ᠴᠡᠮᠪᠡᠶᠢᠨ ᠦᠢᠯᠡᠳᠪᠦᠷᠢ᠂ ᠮᠣᠳᠤᠨᠤ ᠦᠢᠯᠡᠳᠭᠡᠯ᠂ ᠡᠭᠡᠷᠡᠬᠦ ᠰᠠᠤᠷᠢ ᠮᠠᠰᠢᠨᠨᠤᠭᠤᠳᠨᠢ ᠴᠥᠮᠢᠶᠡᠷᠢᠶᠡᠨ ᠡᠨᠳᠡᠭᠳᠡᠯᠦᠭᠡᠢ ᠠᠵᠢᠯᠯᠠᠵᠤ ᠪᠠᠢᠳᠠᠭ ᠪᠢᠯᠡ᠃ ᠡᠵᠡᠨ ᠬᠥᠮᠦᠨ᠂ ᠰᠢᠯᠦᠰᠦᠪᠡᠷᠢᠶᠡᠨ ᠲᠣᠣᠷ ᠲᠠᠲᠠᠳᠠᠭ ᠬᠥᠳᠡᠯᠮᠦᠷᠢᠳᠦ ᠬᠢᠴᠢᠶᠡᠩᠭᠦᠢ ᠠᠭᠠᠯᠵᠢᠰᠢᠭ᠋᠂ ᠠᠵᠤ ᠠᠬᠤᠢᠶᠢᠨ ᠥᠨᠴᠦᠭ ᠪᠤᠯᠤᠩᠤᠨ ᠨᠢᠭᠡᠶᠢᠴᠦ ᠣᠷᠬᠢᠭᠳᠠᠭᠤᠯᠤᠯᠦᠭᠡᠢ ᠪᠦᠭᠦᠳᠡᠶᠢ ᠬᠡᠰᠦᠭᠦᠴᠢᠯᠡᠨ ᠡᠷᠭᠢᠵᠦ᠂ ᠡᠵᠡᠨ ᠬᠥᠮᠦᠨᠦ ᠬᠤᠷᠴᠠ ᠬᠠᠷᠠᠭᠠ ᠶᠠᠭᠤᠮᠠ ᠪᠦᠬᠦᠨ ᠳᠡᠭᠡᠷᠡ ᠬᠦᠷᠦᠯᠴᠡᠳᠡᠭ ᠪᠠᠢᠯᠠ᠃ ᠠᠢᠬᠤᠪᠲᠤᠷ ᠶᠡᠬᠡ ᠬᠠᠯᠠᠭᠤᠮᠰᠤᠭᠤᠨ ᠲᠡᠮᠳᠡᠭ ᠫᠯᠶᠦᠱᠺᠢᠨᠦ ᠴᠢᠷᠠᠢᠳᠤ ᠶᠡᠷᠦ ᠦᠵᠡᠭᠳᠡᠭᠡᠳᠦᠢ ᠪᠣᠯᠪᠠᠴᠤ ᠤᠬᠠᠭᠠᠨᠲᠠᠢ ᠬᠥᠮᠦᠨ ᠭᠡᠳᠡᠭᠨᠢ ᠲᠡᠭᠦᠨᠦ ᠨᠢᠳᠦᠶᠢ ᠬᠠᠷᠠᠬᠤᠳᠤ ᠢᠯᠡᠬᠡᠨ ᠪᠠᠢᠳᠠᠭᠤᠨ ᠳᠡᠭᠡᠷᠡ ᠶᠠᠭᠤᠮᠠ ᠶᠠᠷᠢᠬᠤᠳᠠᠭᠠᠨ ᠨᠡᠯᠢᠶᠡᠳ ᠬᠠᠰᠢᠷ᠂ ᠤᠴᠢᠷᠢ ᠮᠡᠳᠡᠳᠡᠭ ᠪᠠᠢᠭᠰᠠᠨ ᠲᠤᠯᠠ ᠦᠭᠡᠶᠢᠨᠢ ᠴᠢᠩᠨᠠᠵᠤ ᠰᠠᠭᠤᠬᠤᠳᠤ ᠠᠶᠠᠲᠠᠢᠴᠤ ᠪᠠᠢᠳᠠᠭ ᠠᠵᠢ᠃ ᠡᠶᠡᠯᠳᠡᠭ ᠵᠥᠭᠡᠯᠡᠨ ᠵᠠᠩᠲᠠᠢ᠂ ᠶᠠᠷᠢᠶᠠ ᠬᠥᠭᠡᠷᠦᠭᠡᠲᠡᠢ ᠭᠡᠷᠦᠨ ᠡᠵᠡᠭᠲᠡᠢ ᠠᠢᠯ ᠠᠢᠮᠠᠭᠤᠨ ᠳᠤᠮᠳᠠᠪᠠᠨ ᠣᠪᠤᠭᠠ ᠨᠡᠷᠡ ᠲᠥᠷᠦᠲᠡᠢ ᠪᠠᠢᠭᠰᠠᠨ ᠪᠢᠯᠡ᠃ ᠵᠣᠴᠢᠳᠲᠤ ᠤᠷᠢᠶᠠᠯᠢᠭ ᠵᠠᠩᠲᠠᠢ᠂ ᠰᠢᠷᠭᠠᠯ ᠴᠠᠭᠠᠨ ᠦᠰᠦᠲᠡᠢ᠂ ᠴᠠᠩᠬᠤᠢ ᠴᠡᠴᠡᠭᠰᠢᠭ ᠰᠠᠢᠬᠠᠨ ᠴᠢᠷᠠᠢᠲᠠᠢ ᠬᠣᠶᠠᠷ ᠬᠡᠦᠬᠡᠨᠨᠢ ᠭᠡᠢᠴᠢᠳᠢ ᠤᠭᠲᠤᠵᠤ ᠭᠠᠷᠳᠠᠭ᠃ ᠭᠠᠪᠰᠢᠭᠠᠢ ᠰᠡᠷᠭᠦᠯᠡᠩ ᠵᠢᠭᠠᠯ ᠬᠦᠦᠨᠢ ᠢᠷᠡᠭᠰᠡᠨ ᠭᠡᠢᠴᠢᠳᠢ ᠡᠶᠡᠭᠦᠢᠷᠬᠡᠵᠦ ᠪᠠᠢᠭᠠ ᠡᠰᠡᠬᠦᠶᠢ ᠠᠩᠬᠠᠷᠤᠯᠦᠭᠡᠢ ᠦᠨᠦᠰᠳᠡᠭ᠃ ᠡᠨᠡ ᠠᠢᠯᠤᠨ ᠴᠣᠩᠬᠤᠨᠤᠭᠤᠳ ᠴᠥᠮᠢᠶᠡᠷ ᠨᠡᠭᠡᠭᠡᠯᠲᠡᠲᠡᠢ ᠪᠠᠢᠳᠠᠭ ᠪᠠ ᠪᠠᠢᠰᠢᠩᠤᠨ ᠳᠡᠭᠡᠳᠦ ᠳᠠᠪᠬᠤᠷᠲᠤ ᠹᠷᠠᠨᠼᠢ ᠪᠠᠭᠰᠢ ᠰᠠᠭᠤᠳᠠᠭ ᠪᠠᠢᠵᠠᠢ᠂ ᠡᠨᠡ ᠪᠠᠭᠰᠢ ᠰᠠᠬᠠᠯᠢᠶᠠᠨ ᠴᠡᠪᠡᠷ ᠰᠠᠢᠬᠠᠨ ᠬᠤᠰᠤᠳᠠᠭ᠃ ᠡᠨᠡ ᠪᠠᠭᠰᠢ ᠠᠩ ᠠᠩᠨᠠᠬᠤᠳᠠᠭᠠᠨ ᠮᠡᠷᠭᠡᠨ᠂ ᠬᠤᠷ ᠭᠤᠷᠭᠤᠤᠯ ᠪᠤᠶᠤ ᠨᠤᠭᠤᠰᠤᠶᠢ ᠥᠪᠡᠷᠢᠶᠡᠨ ᠠᠯᠠᠵᠤ ᠠᠪᠴᠢᠷᠠᠳᠠᠭ᠂ᠦᠭᠡᠢ ᠪᠣᠯ ᠪᠣᠷᠤ ᠰᠢᠪᠠᠭᠤᠨᠤ ᠥᠨᠳᠡᠭᠡ ᠲᠡᠭᠦᠵᠦ ᠠᠪᠴᠢᠷᠠᠳᠠᠭ᠃ ᠬᠠᠷᠢᠨ ᠥᠨᠳᠡᠭᠡᠶᠢ ᠥᠪᠡᠷᠡᠴᠡᠨᠢ ᠥᠭᠡᠷᠡ ᠬᠥᠮᠦᠨ ᠠᠮᠠᠨᠳᠠᠭᠠᠨ ᠬᠦᠷᠭᠡᠳᠡᠭᠦᠭᠡᠢ ᠪᠠᠢᠭᠰᠠᠨ ᠤᠴᠢᠷ ᠲᠡᠭᠦᠨᠢᠶᠡᠨ ᠲᠣᠰᠤᠨᠳᠤ ᠬᠠᠭᠠᠷᠢᠭᠤᠯᠵᠤ ᠭᠠᠭᠴᠠᠭᠠᠷᠢᠶᠠᠨ ᠢᠳᠡᠳᠡᠭ ᠪᠠᠢᠯᠠ᠃ ᠬᠣᠶᠠᠷ ᠬᠡᠦᠬᠡᠨᠦ ᠬᠢᠨᠢ ᠪᠠᠭᠰᠢ᠂ ᠴᠢᠭᠢᠷᠠᠭ ᠪᠡᠶᠡᠲᠡᠢ ᠬᠥᠳᠡᠭᠡᠶᠢᠨ ᠡᠮᠡᠭᠲᠡᠢ ᠮᠥᠨ ᠳᠡᠭᠡᠳᠦ ᠳᠠᠪᠬᠤᠷᠲᠤ ᠰᠠᠭᠤᠳᠠᠭ ᠪᠠᠢᠪᠠ᠃ ᠡᠵᠡᠨ ᠭᠤᠸᠠᠢ ᠥᠪᠡᠷᠢᠶᠡᠨ ᠪᠠᠬᠠᠨ ᠬᠠᠭᠤᠴᠢᠷᠠᠭᠰᠠᠨ ᠪᠣᠯᠪᠠᠴᠤ ᠡᠪᠲᠡᠢᠬᠡᠨ ᠲᠣᠨᠤᠭ ᠪᠦᠷᠢᠨᠲᠡᠢ᠂ ᠬᠠᠮᠢᠭᠠᠪᠠᠨᠴᠤ ᠨᠥᠬᠦᠭᠡᠰᠦ ᠣᠷᠤᠭᠠᠳᠤᠢ ᠬᠤᠪᠴᠠᠰᠤ ᠡᠮᠦᠰᠴᠦ᠂ ᠬᠣᠭᠤᠯᠠᠨᠤᠪᠠᠨ ᠥᠷᠦᠭᠡᠨᠳᠦ ᠣᠷᠤᠳᠠᠭ ᠪᠠᠢᠵᠠᠢ᠃ ᠭᠡᠲᠡᠯᠡ ᠰᠠᠢᠬᠠᠨ ᠰᠡᠳᠭᠢᠯᠲᠦ ᠡᠨᠡ ᠡᠵᠡᠨ ᠬᠥᠮᠦᠨᠦ ᠠᠪᠠᠭᠠᠢ ᠨᠠᠰᠤ ᠪᠠᠷᠠᠵᠤ᠂ ᠵᠠᠷᠢᠮ ᠰᠠᠩ ᠬᠥᠮᠦᠷᠭᠡ ᠪᠣᠯᠤᠨ ᠠᠪᠳᠠᠷᠠ ᠬᠣᠷᠭᠤᠶᠢᠨ ᠲᠦᠯᠬᠢᠭᠦᠷ ᠵᠡᠷᠭᠡ ᠠᠷᠰᠠᠷ ᠵᠢᠵᠢᠭ ᠵᠦᠢᠯ ᠳᠡᠭᠡᠷᠡ ᠬᠠᠯᠠᠮᠵᠢᠪᠠᠨ ᠲᠠᠯᠪᠢᠵᠤ ᠪᠠᠢᠬᠤ ᠡᠭᠦᠷᠭᠡ ᠫᠯᠶᠦᠱᠺᠢᠨ ᠥᠪᠡᠷᠲᠦᠨᠢ ᠨᠣᠭᠳᠠᠬᠤ ᠪᠣᠯᠵᠤ᠂ ᠪᠡᠯᠪᠡᠰᠦᠨ ᠬᠣᠴᠤᠷᠤᠭᠰᠠᠨ ᠬᠥᠮᠦᠨ ᠪᠦᠭᠦᠳᠡᠶᠢᠨ ᠠᠳᠠᠯᠢ᠂ ᠶᠠᠭᠤᠮᠠ ᠪᠣᠯᠭᠠᠨᠢ ᠢᠲᠡᠭᠡᠬᠦᠦᠭᠡᠢ ᠰᠡᠵᠢᠭᠴᠢ᠂ ᠤᠯᠠᠮ ᠬᠢᠨᠠᠭᠤᠷ ᠬᠠᠷᠠᠮᠴᠢ ᠪᠣᠯᠵᠠᠢ᠃ ᠡᠨᠡ ᠲᠠᠯᠠᠪᠠᠷ ᠫᠯᠶᠦᠱᠺᠢᠨ ᠶᠡᠬᠡ ᠥᠬᠢᠨ ᠠᠯᠧᠺᠰᠠᠨᠳ᠋ᠧᠷᠠ ᠰᠲᠧᠫᠠᠨᠤᠸᠨᠠᠳᠠᠭᠠᠨ ᠨᠠᠢᠳᠠᠵᠤ ᠴᠢᠳᠠᠬᠤᠦᠭᠡᠢ ᠪᠠᠢᠭᠰᠠᠨ ᠠᠵᠢ᠃ ᠢᠩᠭᠢᠳᠡᠭᠦᠨ ᠵᠥᠪᠨᠢ ᠬᠣᠵᠢᠮ ᠮᠡᠳᠡᠭᠳᠡᠭᠰᠡᠨᠶᠦᠮ᠃ ᠶᠡᠬᠡ ᠥᠬᠢᠨᠨᠢ ᠡᠬᠡᠶᠢᠨᠢᠶᠡᠨ ᠨᠠᠰᠤ ᠪᠠᠷᠠᠭᠰᠠᠨ ᠬᠣᠢᠨᠠ ᠤᠳᠠᠯᠦᠭᠡᠢ ᠮᠣᠷᠢᠲᠤ ᠴᠡᠷᠢᠭᠦᠨ ᠬᠣᠷᠢᠶᠠᠨᠤ ᠠᠯᠪᠠ ᠬᠠᠭᠠᠵᠤ ᠪᠠᠢᠭᠠ ᠱᠲ᠋ᠠᠪᠤᠨ ᠠᠬᠠᠮᠠᠳ ᠴᠣᠯᠠᠲᠠᠢ ᠴᠡᠷᠢᠭᠦᠨ ᠳᠠᠷᠤᠭᠠᠶᠢ ᠳᠠᠭᠠᠵᠤ ᠠᠷᠢᠯᠤᠭᠰᠠᠨᠶᠤᠮ᠃ ᠡᠴᠢᠭᠡᠮᠢᠨᠢ ᠴᠡᠷᠢᠭᠦᠨ ᠳᠠᠷᠤᠭᠠ ᠪᠦᠭᠦᠳᠡᠶᠢ ᠮᠥᠷᠦᠢᠲᠡᠢ ᠲᠣᠭᠯᠠᠵᠤ ᠪᠠᠢᠳᠠᠭᠢᠶᠠᠨ ᠠᠯᠳᠠᠵᠤ ᠶᠠᠪᠤᠳᠠᠭ ᠪᠦᠲᠦᠯᠦᠭᠡᠢ ᠬᠥᠮᠦᠰ ᠭᠡᠵᠦ ᠬᠢᠯᠢᠰᠲᠡᠭᠦᠯᠬᠦ ᠤᠴᠢᠷᠠᠴᠠ ᠨᠠᠮᠠᠢ ᠡᠨᠡ ᠬᠥᠮᠦᠨᠲᠡᠢ ᠤᠷᠤᠭᠯᠠᠬᠤᠶᠢ ᠶᠠᠭᠠᠬᠢᠭᠰᠠᠨᠴᠤ ᠵᠥᠪᠰᠢᠶᠡᠷᠡᠬᠦᠦᠭᠡᠢ ᠭᠡᠵᠦ ᠶᠡᠬᠡ ᠥᠬᠢᠨᠨᠢ ᠰᠠᠢᠨ ᠮᠡᠳᠡᠵᠦ ᠪᠠᠢᠭᠰᠠᠨ ᠲᠤᠯᠠ ᠶᠠᠳᠠᠭᠤᠬᠠᠨ ᠲᠣᠰᠭᠤᠨᠤ ᠨᠢᠭᠡᠨ ᠰᠦᠮᠡᠳᠦ ᠣᠴᠢᠵᠤ ᠬᠤᠷᠢᠮᠯᠠᠵᠠᠢ᠃ ᠡᠴᠢᠭᠡᠨᠢ ᠥᠬᠢᠨᠦᠪᠡᠨ ᠬᠣᠢᠨᠠᠠᠴᠠ ᠨᠡᠬᠡᠭᠦᠯᠴᠢᠨ ᠶᠠᠪᠤᠭᠤᠯᠤᠭᠰᠠᠨᠦᠭᠡᠢ ᠪᠣᠯᠪᠠᠴᠤ ᠲᠥᠷᠦᠭᠰᠡᠨ ᠥᠬᠢᠨᠢᠶᠡᠨ ᠨᠢᠳᠦᠨᠳᠡᠭᠡᠨᠴᠦ ᠦᠵᠡᠬᠦᠦᠭᠡᠢ ᠭᠡᠵᠦ ᠲᠠᠩᠭᠠᠷᠢᠭᠯᠠᠭᠰᠠᠨᠶᠤᠮ᠃ ᠡᠨᠡ ᠠᠢᠯᠤᠨ ᠬᠥᠮᠦᠨ ᠠᠮᠠᠶᠢᠨ ᠴᠥᠭᠡᠷᠡᠬᠦ ᠲᠤᠲᠤᠮ᠂ ᠬᠠᠷᠠᠮᠴᠢ ᠰᠡᠳᠭᠢᠯᠦᠨ ᠦᠨᠡᠨᠴᠢ ᠨᠥᠬᠦᠷ ᠪᠤᠭᠤᠷᠤᠯ ᠦᠰᠦ ᠣᠯᠠᠨ ᠪᠣᠯᠬᠤ ᠲᠤᠲᠤᠮ᠂ ᠡᠵᠡᠨ ᠥᠪᠡᠷᠢᠶᠡᠨᠴᠦ ᠤᠯᠠᠮ ᠬᠠᠷᠠᠮᠴᠢ ᠪᠣᠯᠵᠠᠢ᠃ ᠬᠦᠦᠨᠢ ᠠᠯᠪᠠ ᠬᠠᠭᠠᠬᠤ ᠴᠠᠭ ᠪᠣᠯᠬᠤᠳᠤ ᠹᠷᠠᠨᠼᠢ ᠪᠠᠭᠰᠢ ᠬᠠᠯᠠᠭᠳᠠᠵᠤ ᠶᠠᠪᠤᠭᠰᠠᠨᠶᠤᠮ᠃ ᠥᠬᠢᠳᠦᠨ ᠬᠢᠨᠢ ᠬᠥᠮᠦᠵᠢᠭᠦᠯᠦᠭᠴᠢᠪᠡᠷ ᠰᠠᠭᠤᠵᠤ ᠪᠠᠢᠭᠰᠠᠨ ᠡᠮᠡᠭᠲᠡᠢ᠂ ᠠᠯᠧᠺᠰᠠᠨᠳ᠋ᠧᠷᠠ ᠰᠲᠧᠫᠠᠨᠤᠸᠨᠠᠶᠢ ᠬᠤᠯᠠᠭᠠᠢᠯᠠᠵᠤ ᠰᠡᠮᠬᠡᠨ ᠠᠪᠠᠴᠢᠭᠰᠠᠨ ᠬᠡᠷᠡᠭᠲᠦ ᠣᠷᠤᠯᠴᠠᠪᠠ ᠭᠡᠵᠦ ᠬᠥᠭᠡᠭᠡᠭᠳᠡᠨ ᠲᠣᠨᠢᠯᠤᠭᠰᠠᠨᠶᠤᠮ᠃ ᠡᠴᠢᠭᠡᠶᠢᠨᠢᠶᠡᠨ ᠬᠡᠯᠡᠭᠰᠡᠨ ᠶᠣᠰᠤᠭᠠᠷ ᠣᠯᠢᠭᠲᠠᠢᠬᠠᠨ ᠠᠯᠪᠠᠨ ᠲᠤᠰᠢᠶᠠᠯ ᠡᠷᠢᠬᠦ ᠭᠡᠵᠦ ᠬᠦᠦᠨᠢ ᠮᠤᠵᠢᠶᠢᠨ ᠲᠥᠪ ᠬᠣᠷᠢᠶᠠᠨᠳᠤ ᠣᠴᠢᠭᠠᠳ᠂ ᠲᠠᠮᠠᠭᠠ ᠲᠤᠰᠢᠶᠠᠯᠤᠨ ᠭᠠᠵᠠᠷᠢᠶᠠᠷ ᠠᠯᠪᠠ ᠡᠷᠢᠵᠦ ᠣᠷᠤᠬᠤᠶᠢᠨ ᠣᠷᠤᠨᠳᠤ ᠴᠡᠷᠢᠭᠦᠨ ᠬᠣᠷᠢᠶᠠᠨᠳᠤ ᠠᠯᠪᠠ ᠬᠠᠭᠠᠬᠤ ᠪᠣᠯᠵᠤ᠂ ᠬᠤᠪᠴᠠᠰᠤᠨᠤ ᠮᠥᠩᠭᠦ ᠢᠷᠡᠭᠦᠯᠦᠨᠡᠦᠦ ᠭᠡᠵᠦ ᠡᠴᠢᠭᠡᠳᠡᠭᠡᠨ ᠵᠠᠬᠢᠳᠠᠯ ᠪᠢᠴᠢᠭᠰᠡᠨ ᠪᠣᠯᠪᠠᠴᠤ ᠠᠷᠠᠳᠤᠨ ᠱᠣᠭ ᠦᠭᠡᠪᠡᠷ ᠬᠡᠯᠡᠪᠡᠯ ᠬᠠᠮᠠᠷ ᠲᠠᠮᠠᠬᠢ ᠲᠠᠲᠠᠵᠠᠢ᠃ ᠣᠳᠭᠤᠨ ᠥᠬᠢᠨᠨᠢ ᠡᠴᠢᠭᠡᠶᠢᠨ ᠬᠠᠮᠲᠤ ᠭᠡᠷᠲᠡᠭᠡᠨ ᠰᠠᠭᠤᠵᠤ ᠪᠠᠢᠭᠠᠳ ᠨᠠᠰᠤ ᠪᠠᠷᠠᠵᠤ᠂ ᠫᠯᠶᠦᠱᠺᠢᠨ ᠭᠠᠭᠴᠠᠭᠠᠷ ᠬᠣᠴᠤᠷᠴᠤ ᠡᠨᠡ ᠶᠡᠬᠡ ᠬᠥᠷᠦᠩᠭᠡᠶᠢ ᠮᠠᠨᠠᠭᠴᠢ᠂ ᠬᠠᠳᠠᠭᠠᠯᠠᠭᠴᠢ᠂ ᠡᠵᠡᠨ ᠡᠨᠡ ᠭᠤᠷᠪᠠᠨ ᠡᠭᠦᠷᠭᠡᠶᠢ ᠪᠡᠶᠡᠯᠡᠭᠦᠯᠬᠦ ᠪᠣᠯᠤᠭᠰᠠᠨᠶᠤᠮ᠃ ᠬᠠᠷᠠᠮᠴᠢ ᠰᠡᠳᠭᠢᠯ ᠭᠡᠳᠡᠭ ᠪᠣᠯ ᠴᠢᠨᠤᠠᠰᠢᠭ᠋ ᠬᠣᠪᠳᠤᠭ ᠪᠠᠢᠳᠠᠭ᠃ ᠭᠠᠭᠴᠠ ᠪᠡᠶᠡ ᠰᠠᠭᠤᠬᠤ ᠶᠠᠪᠤᠳᠠᠯ ᠬᠥᠮᠦᠨᠢ ᠤᠯᠠᠮ ᠬᠣᠪᠳᠤᠭ ᠪᠣᠯᠭᠠᠵᠤ ᠬᠠᠷᠠᠮᠴᠢ ᠰᠡᠳᠭᠢᠯᠢ ᠬᠥᠭᠵᠢᠭᠡᠬᠦ ᠰᠠᠢᠨ ᠨᠥᠬᠦᠴᠡᠯ ᠪᠣᠯᠵᠤ ᠪᠠᠢᠯᠠ᠃ ᠫᠯᠶᠦᠱᠺᠢᠨᠦ ᠤᠤᠯᠠᠴᠠ ᠮᠥᠴᠢᠳᠬᠡᠨ ᠬᠥᠮᠦᠨᠦ ᠴᠢᠨᠠᠷᠨᠢ ᠴᠠᠭ ᠢᠮᠠᠭᠲᠠ ᠪᠠᠭᠠᠰᠴᠤ᠂ ᠡᠨᠡᠬᠦ ᠬᠥᠮᠦᠨᠦ ᠣᠷᠤᠨᠴᠤᠭᠠᠴᠠ ᠡᠳᠦᠷ ᠢᠷᠡᠬᠦ ᠲᠤᠲᠤᠮ ᠨᠢᠭᠡ ᠬᠡᠰᠡᠭ ᠶᠠᠭᠤᠮᠠ ᠬᠣᠯᠲᠤᠷᠠᠨ ᠤᠨᠠᠵᠤ ᠪᠠᠢᠯᠠ᠃ ᠴᠡᠷᠢᠭ ᠬᠥᠮᠦᠰᠦᠨ ᠲᠤᠬᠠᠢ ᠫᠯᠶᠦᠱᠺᠢᠨᠦ ᠮᠠᠭᠤ ᠰᠠᠨᠠᠵᠤ ᠶᠠᠪᠤᠳᠠᠭᠨᠢ ᠵᠥᠪ ᠭᠡᠳᠡᠭᠢ ᠵᠣᠷᠢᠭᠤᠳᠠ ᠪᠠᠲᠤᠯᠠᠬᠤ ᠭᠡᠰᠡᠨᠶᠦᠮᠰᠢᠭ ᠬᠦᠦᠨᠢ ᠮᠥᠷᠦᠢᠲᠡᠢ ᠲᠣᠭᠯᠠᠵᠤ᠂ ᠪᠠᠢᠳᠠᠭᠢᠶᠠᠨ ᠠᠯᠳᠠᠪᠠ ᠭᠡᠰᠡᠨ ᠴᠢᠮᠡᠭᠡᠶᠢ ᠡᠨᠡ ᠦᠶᠡᠪᠡᠷ ᠡᠴᠢᠭᠡᠨᠢ ᠳᠤᠭᠤᠯᠤᠭᠠᠳ ᠬᠦᠦᠳᠡᠭᠡᠨ ᠬᠠᠷᠢᠶᠠᠯ ᠶᠠᠪᠤᠭᠤᠯᠵᠤ᠂ ᠲᠡᠭᠦᠨᠡᠴᠡ ᠬᠣᠢᠰᠢ ᠮᠢᠨᠦ ᠲᠥᠷᠦᠭᠰᠡᠨ ᠬᠦᠦ ᠳᠡᠯᠡᠬᠡᠢ ᠳᠡᠭᠡᠷᠡ ᠪᠠᠢᠭᠠ ᠡᠰᠡᠬᠦ ᠲᠤᠬᠠᠢ ᠨᠢᠭᠡᠴᠦ ᠤᠳᠠᠭᠠ ᠳᠤᠷᠠᠳᠤᠭᠰᠠᠨᠦᠭᠡᠢ᠂ ᠵᠢᠯ ᠪᠦᠷᠢ ᠪᠠᠢᠰᠢᠩᠤᠨ ᠨᠢᠵᠡᠭᠡᠳ ᠴᠣᠩᠬᠤ ᠲᠦᠭᠵᠢᠭᠳᠡᠭᠰᠡᠭᠡᠷ ᠢᠷᠡᠵᠦ᠂ ᠲᠦᠷᠦᠭᠦᠬᠡᠨ ᠤᠩᠰᠢᠭᠴᠢᠳᠤᠨ ᠬᠠᠷᠠᠳᠠᠭ ᠬᠣᠶᠠᠷ ᠴᠣᠩᠬᠤ ᠦᠯᠡᠳᠡᠵᠦ ᠨᠢᠭᠡᠶᠢᠨᠢ ᠴᠠᠭᠠᠰᠤᠪᠠᠷ ᠪᠥᠭᠯᠡᠭᠰᠡᠨ ᠪᠠᠢᠯᠠ᠃ ᠠᠵᠤ ᠠᠬᠤᠢᠶᠢᠨ ᠭᠣᠣᠯ ᠴᠢᠬᠤᠯᠠ ᠵᠦᠢᠯᠦᠳ ᠠᠭᠠᠵᠢᠮᠢᠶᠠᠷ ᠠᠯᠠᠭᠠ ᠪᠣᠯᠵᠤ ᠡᠵᠡᠨ ᠬᠥᠮᠦᠨᠦ ᠢᠪᠴᠤᠤ ᠬᠠᠷᠠᠭᠠ ᠲᠠᠰᠤᠯᠭᠠᠨ ᠳᠣᠲᠤᠭᠤᠷᠢᠶᠠᠨ ᠲᠡᠭᠦᠳᠡᠭ ᠴᠠᠭᠠᠰᠤᠨᠤ ᠥᠭᠡᠳᠡᠰᠦ᠂ ᠥᠳᠦ ᠰᠣᠳᠤᠪᠠᠷ ᠬᠢᠵᠠᠭᠠᠷᠯᠠᠭᠳᠠᠳᠠᠭ ᠪᠣᠯᠵᠤ᠂ ᠠᠵᠤ ᠠᠬᠤᠢᠯᠠᠯᠠᠴᠠ ᠦᠢᠯᠡᠳᠪᠦᠷᠢᠯᠡᠵᠦ ᠪᠠᠢᠭᠠ ᠶᠠᠭᠤᠮᠠᠶᠢᠨᠢ ᠬᠤᠳᠠᠯᠳᠤᠵᠤ ᠠᠪᠬᠤᠪᠠᠷ ᠢᠷᠡᠭᠰᠡᠨ ᠬᠥᠮᠦᠰᠲᠡᠢ ᠦᠭᠡᠪᠡᠨ ᠤᠯᠠᠮᠠᠴᠠ ᠤᠯᠠᠮ ᠣᠢᠯᠠᠭᠠᠯᠴᠠᠬᠤᠪᠠᠨ ᠪᠣᠯᠢᠵᠠᠢ᠃ ᠫᠠᠨᠽᠠᠴᠢᠨᠨᠠᠷ ᠲᠡᠭᠦᠨᠲᠡᠢ ᠦᠨᠡ ᠬᠡᠯᠡᠯᠴᠡᠨ ᠲᠣᠬᠢᠷᠠᠬᠤᠦᠭᠡᠢ ᠴᠥᠬᠦᠷᠡᠬᠦᠳᠡᠭᠡᠨ ᠡᠨᠡᠴᠢᠨᠢ ᠬᠥᠮᠦᠨ ᠪᠢᠰᠢ ᠴᠢᠳᠭᠦᠷᠶᠦᠮ ᠡ ᠭᠡᠵᠦ ᠬᠡᠯᠡᠭᠡᠳ ᠳᠠᠬᠢᠨ ᠵᠥᠪᠯᠡᠬᠦᠪᠡᠨ ᠪᠣᠯᠢᠭᠰᠠᠨᠶᠤᠮ᠃ ᠡᠢᠮᠦ ᠤᠴᠢᠷᠠᠴᠠ ᠡᠨᠡ ᠠᠢᠯᠤᠨ ᠡᠪᠡᠰᠦ ᠪᠣᠷᠳᠤᠭᠠ ᠦᠷᠡ ᠲᠠᠷᠢᠶᠠᠨᠢ ᠢᠯᠵᠠᠷᠠᠵᠤ᠂ ᠪᠤᠬᠠᠯᠳᠠᠨ ᠣᠪᠤᠭᠠᠯᠠᠭᠰᠠᠨ ᠡᠪᠡᠰᠦ ᠲᠠᠷᠢᠶᠠᠨᠢ ᠴᠠᠭᠠᠨ ᠨᠣᠭᠤᠭᠠ ᠤᠷᠭᠤᠭᠤᠯᠤᠮᠠ ᠠᠶᠠᠲᠠᠢ ᠥᠲᠦᠭ ᠪᠣᠯᠵᠤ᠂ ᠵᠣᠭᠤᠷᠢᠨᠳᠠᠭᠠᠨ ᠬᠠᠳᠠᠭᠠᠯᠠᠭᠰᠠᠨ ᠭᠤᠯᠢᠷᠨᠢ ᠰᠦᠬᠡᠪᠡᠷ ᠴᠠᠪᠴᠢᠬᠤᠳᠤᠴᠤ ᠬᠠᠭᠠᠷᠠᠮᠠᠷᠦᠭᠡᠢ ᠴᠢᠯᠠᠭᠤᠰᠢᠭ᠋ ᠬᠠᠲᠠᠭᠤ ᠪᠣᠯᠵᠠᠢ᠃ ᠳᠠᠪᠤᠤ᠂ ᠴᠡᠮᠪᠡ ᠨᠤᠭᠦᠳᠨᠢ ᠦᠵᠢᠷᠡᠨ ᠭᠠᠷ ᠬᠦᠷᠬᠦᠲᠡᠢ ᠵᠡᠷᠭᠡ ᠴᠢᠨᠳᠠᠷᠠ ᠪᠣᠯᠤᠨ ᠪᠤᠲᠠᠷᠠᠳᠠᠭ ᠪᠠᠢᠯᠠ᠃ ᠫᠡᠯᠶᠦᠱᠺᠢᠨ᠂ ᠬᠤᠯᠠᠭᠠᠢᠴᠢ ᠵᠣᠯᠢᠭᠤᠳᠨᠢ ᠤᠤᠭᠤᠴᠢᠬᠠᠬᠤ ᠮᠠᠭᠠᠳᠦᠭᠡᠢ ᠭᠡᠵᠦ ᠲᠡᠮᠳᠡᠭᠯᠡᠵᠦ ᠲᠠᠯᠪᠢᠭᠰᠠᠨ ᠯᠣᠩᠬᠤᠲᠠᠢ ᠳᠠᠷᠠᠰᠤ᠂ ᠥᠳᠦᠨ ᠦᠵᠦᠭ᠂ ᠯᠠᠴᠠᠶᠢᠨ ᠬᠡᠯᠲᠡᠷᠬᠡᠢ ᠬᠠᠮᠢᠭᠠ ᠪᠠᠢᠳᠠᠭᠢ ᠰᠠᠢᠨ ᠮᠡᠳᠡᠳᠡᠭᠡᠴᠡ ᠪᠢᠰᠢ᠂ ᠥᠭᠡᠷᠡ ᠬᠥᠷᠦᠩᠭᠡ ᠬᠣᠭᠰᠢᠯᠢᠶᠠᠨ ᠮᠠᠷᠲᠠᠳᠠᠭ ᠪᠣᠯᠵᠠᠢ᠃ ᠭᠡᠲᠡᠯᠡ ᠬᠠᠷᠢᠶᠠᠲᠤ ᠠᠯᠪᠠᠲᠤᠨᠠᠷᠠᠴᠠ ᠲᠠᠲᠠᠵᠤ ᠠᠵᠤ ᠠᠬᠤᠢᠯᠠᠯᠳᠠᠭᠠᠨ ᠣᠷᠤᠭᠤᠯᠳᠠᠭ ᠣᠷᠤᠯᠭᠠᠨᠢ ᠤᠷᠢᠳᠠᠶᠢᠨᠢᠶᠠᠨ ᠠᠳᠠᠯᠢ ᠬᠡᠪᠢᠶᠡᠷ ᠶᠠᠪᠤᠭᠳᠠᠵᠤ ᠪᠠᠢᠯᠠ᠃ ᠲᠠᠷᠢᠶᠠᠴᠢᠳ ᠲᠤᠰᠢᠶᠠᠳᠠᠭ ᠠᠯᠪᠠᠪᠠᠨ ᠬᠡᠪᠢᠶᠡᠷᠢᠶᠡᠨᠯᠡ ᠲᠤᠰᠢᠶᠠᠭᠰᠠᠭᠠᠷ ᠪᠠᠢᠪᠠ᠃ ᠲᠠᠷᠢᠶᠠᠴᠢᠨ ᠡᠮᠡᠭᠲᠡᠢ ᠤᠷᠢᠳᠤ ᠥᠭᠴᠦ ᠪᠠᠢᠭᠰᠠᠨᠲᠠᠢᠪᠠᠨ ᠠᠳᠠᠯᠢ ᠬᠡᠮᠵᠢᠶᠡᠨᠦ ᠰᠠᠮᠤᠷ ᠲᠤᠰᠢᠶᠠᠵᠤ᠂ ᠨᠡᠬᠡᠮᠡᠯᠴᠢ ᠬᠡᠦᠬᠡᠨ ᠤᠷᠢᠳᠤ ᠨᠡᠬᠡᠵᠦ ᠪᠠᠢᠭᠰᠠᠨᠲᠠᠢᠪᠠᠨ ᠠᠳᠠᠯᠢ ᠬᠡᠮᠵᠢᠶᠡᠨᠦ ᠶᠣᠷᠤᠭ ᠨᠡᠬᠡᠵᠦ ᠲᠤᠰᠢᠶᠠᠳᠠᠭ ᠪᠠᠢᠯᠠ᠃ ᠬᠠᠷᠢᠶᠠᠲᠤ ᠠᠯᠪᠠᠲᠤᠨᠠᠷᠤᠨ ᠨᠡᠢᠯᠡᠭᠦᠯᠦᠭᠰᠡᠨ ᠶᠠᠭᠤᠮᠠ ᠪᠦᠭᠦᠳᠡᠶᠢ ᠨᠢᠭᠡ ᠭᠠᠵᠠᠷᠲᠤ ᠣᠪᠤᠭᠠᠯᠠᠭᠰᠠᠨᠨᠢ ᠢᠯᠵᠠᠷᠠᠨ ᠬᠥᠭᠡᠴᠦᠷᠡᠵᠦ ᠪᠠᠢᠭᠰᠠᠨᠢᠶᠠᠷ ᠪᠠᠷᠠᠬᠤᠦᠭᠡᠢ᠂ ᠫᠯᠶᠦᠱᠺᠢᠨ ᠥᠪᠡᠷᠢᠶᠡᠨᠴᠦ ᠬᠥᠮᠦᠨ ᠲᠥᠷᠦᠯᠬᠢᠲᠡᠨᠦ ᠳᠣᠲᠤᠷᠠᠠᠴᠠ ᠢᠯᠵᠠᠷᠠᠨ ᠬᠥᠭᠡᠴᠦᠷᠡᠵᠦ ᠪᠠᠢᠯᠠ᠃
ᠠᠯᠧᠺᠰᠠᠨᠳ᠋ᠧᠷᠠ ᠰᠲᠧᠫᠠᠨᠤᠸᠨᠠᠳᠤ ᠱᠲ᠋ᠠᠪᠤᠨ ᠠᠬᠠᠮᠠᠳᠤᠨ ᠨᠡᠭᠦᠳᠡᠯᠦᠨ ᠠᠮᠢᠳᠤᠷᠠᠯᠨᠢ ᠠᠢᠯ ᠭᠡᠷ ᠪᠣᠯᠬᠤᠶᠢᠨ ᠡᠮᠦᠨᠡ ᠰᠠᠢᠬᠠᠨ ᠰᠠᠨᠠᠭᠳᠠᠵᠤ ᠪᠠᠢᠭᠰᠠᠨᠢᠶᠠᠨ ᠣᠳᠣ ᠵᠣᠪᠠᠯᠠᠩᠲᠠᠢ ᠪᠣᠯᠤᠭᠰᠠᠨ ᠤᠴᠢᠷ᠂ ᠡᠴᠢᠭᠡᠶᠢᠨᠢᠶᠡᠨ ᠬᠥᠷᠦᠩᠭᠡᠡᠴᠡ ᠭᠣᠷᠢᠳᠠᠵᠤ ᠵᠢᠭᠠᠯ ᠬᠦᠦᠶᠢᠨ ᠬᠠᠮᠲᠤ ᠡᠴᠢᠭᠡᠶᠢᠨᠳᠡᠭᠡᠨ ᠬᠣᠶᠠᠷ ᠤᠳᠠᠭᠠ ᠢᠷᠡᠭᠰᠡᠨᠶᠦᠮ᠃ ᠬᠠᠷᠢᠨ ᠫᠯᠶᠦᠱᠺᠢᠨ ᠥᠬᠢᠨᠳᠡᠭᠡᠨ ᠠᠭᠤᠴᠢᠯᠠᠯ ᠬᠠᠢᠷᠠᠯᠠᠭᠰᠠᠨᠢᠶᠠᠷ ᠪᠠᠷᠠᠬᠤᠦᠭᠡᠢ᠂ ᠰᠢᠷᠡᠭᠡᠨ ᠳᠡᠭᠡᠷᠡ ᠪᠠᠢᠭᠰᠠᠨ ᠨᠢᠭᠡ ᠲᠣᠪᠴᠢᠶᠢ ᠠᠴᠢ ᠬᠦᠦᠳᠡᠭᠡᠨ ᠲᠣᠭᠯᠠ ᠭᠡᠵᠦ ᠥᠭᠭᠦᠭᠰᠡᠨ ᠪᠣᠯᠪᠠᠴᠤ ᠥᠬᠢᠨᠳᠡᠭᠡᠨ ᠬᠥᠷᠦᠩᠭᠡ ᠮᠥᠩᠭᠦ ᠥᠭᠭᠦᠯᠦᠭᠡᠢ ᠶᠠᠪᠤᠭᠤᠯᠵᠠᠢ᠃ ᠳᠠᠷᠠᠭᠠᠨᠢ ᠥᠬᠢᠨᠨᠢ ᠬᠣᠶᠠᠷ ᠵᠢᠭᠠᠯ ᠬᠦᠦᠶᠢᠨ ᠬᠠᠮᠲᠤ ᠡᠴᠢᠭᠡᠳᠡᠭᠡᠨ ᠳᠠᠬᠢᠨ ᠢᠷᠡᠵᠡᠢ᠃ ᠡᠴᠢᠭᠡᠶᠢᠨ ᠡᠮᠦᠰᠴᠦ ᠶᠠᠪᠤᠭᠠ ᠲᠡᠷᠯᠢᠭᠨᠢ ᠭᠬᠢᠷ ᠪᠣᠯᠵᠤ ᠢᠴᠢᠮᠡᠷ ᠪᠣᠯᠤᠭᠠᠳ ᠪᠠᠢᠭᠰᠠᠨᠢ ᠠᠯᠧᠺᠰᠠᠨᠳ᠋ᠧᠷᠠ ᠰᠲᠧᠫᠠᠨᠤᠸᠨᠠ ᠲᠦᠷᠦᠭᠦᠦ ᠢᠷᠡᠬᠦᠳᠡᠭᠡᠨ ᠬᠠᠷᠠᠭᠰᠠᠨ ᠤᠴᠢᠷ ᠴᠠᠢᠳᠤ ᠢᠳᠡᠬᠦ ᠲᠠᠯᠬᠠᠶᠢᠨ ᠬᠠᠮᠲᠤ ᠰᠢᠨᠡ ᠲᠡᠷᠯᠢᠭ ᠠᠪᠴᠢᠷᠠᠵᠤ ᠥᠭᠴᠡᠢ᠃ ᠫᠯᠶᠦᠱᠺᠢᠨ ᠠᠴᠢᠨᠠᠷᠢᠶᠠᠨ ᠡᠷᠬᠡᠯᠡᠭᠦᠯᠵᠦ᠂ ᠨᠢᠭᠡ ᠨᠢᠭᠡᠪᠡᠷᠨᠢ ᠪᠠᠷᠠᠭᠤᠨ ᠵᠡᠭᠦᠨ ᠬᠥᠯ ᠳᠡᠭᠡᠷᠡᠪᠡᠨ ᠰᠠᠭᠤᠯᠭᠠᠵᠤ᠂ ᠵᠢᠩᠬᠢᠨᠢ ᠮᠣᠷᠢ ᠤᠨᠤᠭᠠᠳ ᠳᠠᠪᠬᠢᠵᠤ ᠪᠠᠢᠭᠠᠶᠤᠮᠰᠢᠭ᠋ ᠬᠥᠯᠢᠶᠡᠨ ᠬᠥᠳᠡᠯᠭᠡᠨ ᠲᠣᠭᠯᠠᠭᠤᠯᠵᠤ᠂ ᠥᠬᠢᠨᠦᠪᠡᠨ ᠠᠪᠴᠢᠷᠠᠭᠰᠠᠨ ᠲᠠᠯᠬᠠ᠂ ᠲᠡᠷᠯᠢᠭ ᠬᠣᠶᠠᠷᠢᠨᠢ ᠠᠪᠤᠭᠰᠠᠨ ᠪᠣᠯᠪᠠᠴᠤ ᠬᠠᠷᠢᠭᠤᠳᠤᠨᠢ ᠶᠠᠭᠤᠴᠤ ᠥᠭᠭᠦᠯᠦᠭᠡᠢ ᠬᠣᠭᠤᠰᠤᠨ ᠪᠤᠴᠠᠭᠠᠵᠠᠢ᠃
ᠴᠢᠴᠢᠺᠤᠸᠤᠨ ᠡᠮᠦᠨᠡ ᠡᠢᠮᠦ ᠬᠠᠴᠢᠨ ᠬᠥᠮᠦᠨ ᠵᠣᠭᠰᠤᠵᠤ ᠪᠠᠢᠯᠠ!