| ᠮᠣᠩᠭᠣᠯ ᠪᠢᠴᠢᠭ |
|
ᠬᠢᠲᠠᠳ ᠠᠩᠭᠯᠢ ᠶᠠᠫᠣᠨ |
|
ᠠᠯᠮᠠᠰ ᠺᠣᠮᠫᠠᠨᠢ
email : mongol@almas.co.jp
tel : +81-3-5688-2081 fax : +81-3-5688-2082 |
|
ᠬᠣᠷᠤᠠ ᠶᠢᠷᠲᠢᠨᠴᠦᠳᠦ ᠬᠣᠣᠰᠦᠭᠡᠢ ᠡᠨᠡ ᠱᠣᠷᠤᠩ᠂ ᠬᠣᠶᠠᠷ ᠳᠡᠯᠢᠮ ᠥᠷᠭᠡᠨ ᠭᠤᠷᠪᠠᠨ ᠠᠯᠳᠠ ᠤᠷᠲᠤ᠂ ᠪᠠᠰᠠ ᠲᠤᠩ ᠴᠢᠭᠢᠭᠯᠢᠭ ᠪᠠ ᠦᠮᠡᠬᠡᠢ ᠴᠢᠬᠤᠯ᠂ ᠫᠠᠳ ᠬᠠᠷᠠᠩᠭᠤᠢ᠃ ᠳᠣᠲᠤᠷᠠᠨᠢ ᠬᠥᠬᠡ ᠪᠤᠳᠤᠭᠢᠶᠠᠷ ᠪᠤᠳᠤᠭᠰᠠᠨ ᠠᠷᠪᠠᠨ ᠲᠠᠪᠤᠨ ᠭᠷᠡᠳᠦ᠋ᠰᠦᠨ ᠴᠠᠬᠢᠯᠭᠠᠨ ᠳ᠋ᠧᠩᠲᠡᠢ᠃ ᠡᠭᠦᠳᠡ ᠪᠣᠯᠭᠠᠨᠳᠤᠨᠢ 《ᠶᠠᠯᠠᠲᠠᠨ》 ᠬᠠᠮᠢᠶᠠᠷᠤᠭᠴᠢᠳᠤᠨ ᠳᠣᠲᠤᠭᠰᠢ ᠬᠠᠷᠠᠬᠤ ᠬᠤᠷᠤᠭᠤᠨ ᠴᠢᠨᠡᠭᠡᠨ ᠱᠠᠭᠠᠢᠪᠤᠷᠲᠠᠢ᠃ ᠡᠨᠡ ᠭᠡᠷᠲᠦ ᠬᠠᠯᠠᠭᠤᠨ ᠬᠠᠨᠵᠤ᠂ ᠮᠣᠳᠤᠨ ᠣᠷᠤ᠂ ᠰᠢᠷᠡᠭᠡ ᠰᠠᠨᠳᠠᠯᠢ ᠭᠡᠵᠦ ᠣᠷᠤᠴᠤᠦᠭᠡᠢ᠂ ᠳᠡᠷᠡ ᠳᠡᠪᠢᠰᠭᠡᠷᠦᠨ ᠣᠷᠤᠨᠳᠤ ᠴᠠᠭᠠᠨ ᠨᠣᠭᠤᠭᠠᠨᠤ ᠡᠪᠡᠰᠦᠨ ᠤᠭᠤᠲᠠ ᠪᠣᠯᠤᠨ ᠬᠣᠶᠠᠷ ᠲᠣᠭᠤᠰᠭᠠᠯᠠ ᠪᠠᠢᠪᠠ᠃ ᠠᠭᠠᠯᠵᠢᠨ ᠰᠢᠯᠦᠰᠦ ᠲᠣᠣᠷᠯᠠᠭᠰᠠᠨ ᠡᠨᠡ ᠪᠦᠷᠬᠦᠭ ᠴᠢᠬᠤᠯ ᠥᠷᠦᠭᠡᠨᠳᠦ ᠤᠷᠠᠩᠬᠠᠢ ᠬᠤᠪᠴᠠᠰᠤᠲᠠᠢ᠂ ᠥᠷᠪᠦᠭᠡᠷ ᠤᠷᠲᠤ ᠭᠡᠵᠢᠭᠡᠲᠡᠢ᠂ ᠳᠥᠴᠢ ᠭᠠᠷᠤᠢ ᠨᠠᠰᠤᠨᠤ ᠬᠥᠮᠦᠨ ᠰᠠᠭᠤᠵᠤ ᠪᠠᠢᠯᠠ᠃
ᠲᠡᠭᠦᠨᠦ ᠨᠡᠷᠡᠨᠢ ᠣᠶᠤᠨᠪᠠᠲᠤ ᠭᠡᠳᠡᠭ᠃ ᠲᠡᠷᠡ ᠠᠯᠳᠠᠷᠲᠤ ᠡᠮᠴᠢ ᠪᠥᠭᠡᠳ ᠵᠢᠷᠦᠬᠡᠨᠦ ᠡᠪᠡᠳᠴᠢᠨ ᠰᠤᠳᠤᠯᠬᠤ ᠭᠠᠵᠠᠷᠤᠨ ᠬᠠᠷᠢᠭᠤᠴᠠᠯᠭᠠᠲᠠᠨᠶᠤᠮ᠃ ᠡᠨᠡ ᠬᠥᠮᠦᠨᠳᠦ ᠪᠠᠰᠠ ᠡᠮᠨᠡᠯᠭᠡᠶᠢᠨ ᠳᠡᠭᠡᠳᠦ ᠰᠤᠷᠭᠠᠭᠤᠯᠢᠶᠢᠨ 《ᠬᠠᠷᠠ》 ᠫᠷᠣᠹᠧᠰᠰᠣᠷ᠂ 《ᠲᠡᠷᠰᠯᠡᠭᠦᠦ》 ᠡᠷᠳᠡᠮᠲᠡᠨ ᠭᠡᠬᠦ ᠮᠡᠲᠦᠶᠢᠨ ᠪᠠᠭᠠᠦᠭᠡᠢ ᠣᠯᠠᠨ 《ᠨᠡᠷᠡ ᠴᠣᠯᠠ》ᠲᠠᠢ ᠪᠠᠢᠵᠠᠢ᠃ ᠲᠡᠷᠡ᠂ ᠬᠢᠲᠠᠳ ᠡᠸᠦ᠋ᠷᠣᠫᠡ ᠡᠮᠨᠡᠯᠭᠡᠶᠢ ᠤᠶᠠᠯᠳᠤᠭᠤᠯᠬᠤ ᠠᠷᠭᠠᠪᠠᠷ ᠵᠢᠷᠦᠬᠡᠨ ᠡᠪᠡᠳᠴᠢᠨᠢ ᠵᠠᠰᠠᠭᠠᠳ ᠯᠤᠲᠤ ᠶᠡᠬᠡ ᠠᠮᠵᠢᠯᠲᠠ ᠭᠠᠷᠭᠠᠭᠰᠠᠨ ᠪᠣᠯᠬᠣᠷ ᠤᠯᠤᠰᠤᠨ ᠳᠣᠲᠤᠭᠠᠳᠤ ᠭᠠᠳᠠᠭᠠᠳᠤᠳᠤ ᠠᠯᠳᠠᠷᠰᠢᠭᠰᠠᠨᠶᠤᠮ᠃ ᠵᠢᠷᠠᠭᠠᠳ ᠣᠨᠤ ᠦᠶᠡᠳᠦ ᠳᠡᠯᠭᠡᠷᠡᠵᠦ ᠪᠠᠢᠭᠰᠠᠨ 《ᠡᠷᠳᠡᠮ ᠮᠡᠳᠡᠯᠭᠡᠨᠢ ᠬᠡᠳᠦᠢ ᠰᠠᠢᠨ ᠪᠣᠯ ᠦᠵᠡᠯ ᠰᠠᠨᠠᠭᠠᠨᠢ ᠲᠡᠳᠦᠢ ᠲᠡᠷᠰᠯᠡᠭᠦᠦ᠂ ᠭᠠᠪᠢᠶᠠ ᠵᠢᠳᠭᠦᠯᠨᠢ ᠬᠡᠳᠦᠢ ᠶᠡᠬᠡ ᠪᠣᠯ ᠶᠠᠯᠠ ᠭᠡᠮᠨᠢ ᠲᠡᠳᠦᠢ ᠬᠦᠨᠳᠦ》 ᠭᠡᠳᠡᠭ ᠯᠣᠭᠢᠭᠢᠶᠠᠷ ᠰᠣᠶᠤᠯᠤᠨ ᠬᠤᠪᠢᠰᠭᠠᠯᠤᠨ ᠡᠬᠢᠨᠳᠦ ᠣᠶᠤᠨᠪᠠᠲᠤ ᠲᠡᠷᠰᠯᠡᠭᠦᠦ ᠡᠷᠳᠡᠮ ᠰᠢᠨᠵᠢᠯᠡᠭᠡᠨᠦ ᠡᠷᠬᠡ ᠰᠦᠷᠳᠡᠨᠢᠶᠡᠷ ᠲᠡᠮᠡᠴᠡᠭᠳᠡᠵᠡᠢ᠃ ᠬᠥᠳᠡᠯᠭᠡᠭᠡᠨᠦ ᠬᠥᠭᠵᠢᠯᠲᠡᠶᠢ ᠳᠠᠭᠠᠯᠳᠤᠵᠤ 《ᠶᠠᠯᠠ》ᠨᠢ ᠤᠯᠠᠮᠢᠶᠠᠷ ᠨᠡᠮᠡᠭᠳᠡᠭᠰᠡᠭᠡᠷ ᠢᠷᠡᠪᠡ᠃ ᠲᠡᠷᠡ ᠡᠪ ᠬᠠᠮᠲᠤ ᠨᠠᠮᠤᠨ ᠭᠡᠰᠢᠭᠦᠨ᠂ ᠰᠤᠳᠤᠯᠬᠤ ᠭᠠᠵᠠᠷᠤᠨ ᠨᠠᠮᠤᠨ ᠬᠣᠷᠢᠶᠠᠨᠤ ᠱᠦᠵᠢ ᠪᠠᠢᠭᠰᠠᠨ ᠲᠤᠯᠠ ᠨᠠᠮᠤᠨ ᠳᠣᠲᠤᠷᠠᠬᠢ ᠬᠥᠷᠦᠩᠭᠡᠲᠦ ᠶᠣᠰᠤᠨᠤ ᠵᠠᠮᠢᠶᠠᠷ ᠶᠠᠪᠤᠭᠴᠢ ᠡᠷᠬᠡ ᠪᠠᠷᠢᠭᠴᠢ᠂ ᠬᠤᠪᠢᠰᠭᠠᠯᠤᠨ ᠡᠰᠡᠷᠭᠦᠦ ᠵᠠᠰᠠᠪᠤᠷᠢᠯᠠᠬᠤ ᠦᠵᠡᠯᠲᠡᠨ ᠪᠣᠯᠬᠤᠨᠢᠴᠤ ᠶᠠᠷᠢᠶᠠᠨᠦᠭᠡᠢ᠃ ᠡᠭᠦᠪᠡᠷ ᠦᠯᠦ ᠪᠠᠷᠠᠨ ᠮᠣᠩᠭᠤᠯ ᠬᠥᠮᠦᠨᠦ ᠬᠤᠪᠢᠳᠤ ᠠᠰᠠᠭᠤᠳᠠᠯᠤᠨ ᠬᠢᠨᠢ ᠰᠢᠨᠵᠢ ᠴᠢᠨᠠᠷᠲᠤ ᠪᠠᠰᠠ 《ᠦᠨᠳᠦᠰᠦᠲᠡᠨᠦ ᠣᠨᠴᠠᠯᠢᠭ》 ᠳᠣᠪᠤᠢᠨ ᠢᠯᠡᠷᠡᠵᠦ᠂ ᠦᠨᠳᠦᠰᠦᠲᠡᠨᠦ ᠬᠠᠭᠠᠴᠠᠭᠤᠯᠬᠤ ᠦᠵᠡᠯᠲᠡᠨᠴᠦ ᠪᠣᠯᠴᠢᠬᠠᠪᠠ᠃ 《ᠬᠣᠶᠠᠳᠤᠭᠠᠷ ᠰᠠᠷᠠᠶᠢᠨ ᠰᠦᠷᠭᠡᠦ ᠤᠷᠤᠰᠭᠠᠯ》ᠤᠨ ᠦᠶᠡᠳᠦ ᠰᠠᠨᠠᠭᠠᠨᠳᠤᠦᠭᠡᠢᠪᠠᠷ ᠬᠣᠶᠠᠷ ᠪᠦᠯᠦᠭ ᠵᠣᠬᠢᠶᠠᠨ ᠪᠠᠢᠭᠤᠯᠤᠯᠲᠠᠶᠢᠨ ᠬᠥᠰᠢᠭᠡᠶᠢᠨ ᠠᠷᠤᠳᠠᠬᠢ ᠬᠠᠷᠠ ᠲᠣᠬᠢᠭᠴᠢ ᠪᠣᠯᠵᠤ ᠬᠣᠴᠤᠷᠴᠠᠢ᠃ 《ᠮᠠᠯᠲᠠᠵᠤ ᠠᠷᠢᠯᠭᠠᠬᠤ》 ᠬᠥᠳᠡᠯᠭᠡᠭᠡᠨ ᠡᠬᠢᠯᠡᠩᠭᠦᠲᠡ ᠶᠠᠯᠠᠨᠢ ᠤᠯᠠᠮ ᠬᠦᠨᠳᠦᠷᠡᠵᠦ᠂ ᠨᠠᠮᠢ ᠡᠰᠡᠷᠭᠦᠴᠡᠵᠦ ᠤᠯᠤᠰᠠᠴᠠ ᠤᠷᠪᠠᠬᠤ ᠪᠦᠯᠦᠭᠦᠨ ᠨᠢᠷᠤᠭᠤᠪᠴᠢ ᠬᠦᠴᠦᠨ᠂ ᠭᠠᠳᠠᠭᠠᠳᠤᠶᠢᠨ ᠲᠠᠩᠨᠠᠭᠤᠯᠤᠨ ᠵᠣᠬᠢᠶᠠᠨ ᠪᠠᠢᠭᠤᠯᠤᠯᠲᠠ ᠪᠣᠯᠤᠭᠰᠠᠨ ᠊᠊᠊᠊ 《ᠥᠪᠦᠷ ᠠᠷᠠᠳᠤᠨ ᠨᠠᠮ》ᠤᠨ ᠲᠥᠪ ᠬᠣᠷᠢᠶᠠᠨᠤ ᠭᠡᠰᠢᠭᠦᠨ ᠪᠣᠯᠵᠤ 《ᠵᠡᠷᠭᠡ ᠳᠡᠰ》 ᠳᠡᠪᠰᠢᠵᠡᠢ᠃ ᠣᠷᠴᠢᠮᠠᠴᠠ ᠲᠡᠭᠦᠨᠦ ᠠᠰᠠᠭᠤᠳᠠᠯᠤᠨ ᠬᠢᠨᠢ ᠰᠢᠨᠵᠢ ᠴᠢᠨᠠᠷ ᠢᠳᠡᠭ ᠢᠳᠡᠭᠢᠶᠡᠷ ᠬᠦᠨᠳᠦᠷᠡᠵᠦ ᠬᠠᠮᠤᠭᠤᠨ ᠡᠮᠵᠡᠭ ᠭᠠᠵᠠᠷ ᠭᠡᠪᠡᠯ ᠶᠠᠫᠤᠨᠤ ᠲᠠᠩᠨᠠᠭᠤᠯ᠂ ᠭᠠᠳᠠᠭᠠᠳᠤᠲᠠᠢ ᠰᠦᠯᠪᠡᠭᠡᠯᠳᠦᠭᠰᠡᠨ ᠬᠡᠷᠡᠭ ᠮᠥᠨ ᠭᠡᠵᠦ ᠡᠷᠡᠭᠦᠦ ᠲᠤᠯᠭᠠᠨ ᠰᠢᠬᠠᠵᠤ ᠥᠴᠢᠭᠯᠡᠭᠦᠯᠳᠡᠭ ᠪᠣᠯᠤᠯᠠ᠃
ᠣᠶᠤᠨᠪᠠᠲᠤ ᠡᠬᠢᠯᠡᠵᠦ ᠠᠪᠲᠠᠬᠤ ᠦᠶᠡᠳᠦ ᠲᠡᠮᠡᠴᠡᠭᠳᠡᠬᠦᠡᠴᠡ ᠪᠤᠰᠤᠳ ᠴᠠᠭᠲᠤᠨᠢ 《ᠦᠬᠡᠷᠦᠨ ᠬᠠᠰᠢᠶᠠ》ᠳᠤ ᠰᠤᠷᠤᠯᠴᠠᠬᠤ ᠪᠤᠶᠤ ᠪᠠᠢᠭᠤᠯᠭᠠᠳᠠᠭᠠᠨ ᠬᠢᠨᠠᠯᠲᠠᠶᠢᠨ ᠳᠣᠣᠷᠠ ᠬᠥᠳᠡᠯᠮᠦᠷᠢᠯᠡᠵᠦ᠂ ᠦᠳᠡᠰᠢᠳᠡᠭᠡᠨ ᠭᠡᠷᠲᠡᠭᠡᠨ ᠬᠠᠷᠢᠳᠠᠭ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠬᠡᠵᠢᠶᠡ ᠳᠠᠭᠤᠳᠠᠪᠠᠯ ᠲᠡᠳᠦᠢᠳᠦ ᠣᠰᠤᠯᠳᠠᠯᠦᠭᠡᠢ ᠬᠦᠷᠬᠦᠯᠡ ᠠᠯᠪᠠᠲᠠᠢ ᠪᠠᠢᠯᠠ᠃ ᠰᠡᠭᠦᠯᠳᠡᠵᠦ ᠢᠷᠡᠭᠡᠳ ᠬᠢᠨᠠᠯᠲᠠᠶᠢᠨ ᠳᠣᠣᠷᠠ ᠬᠥᠳᠡᠯᠮᠦᠷᠢᠯᠡᠳᠡᠭᠡᠴᠡᠪᠡᠨ ᠲᠤᠰᠠᠭᠠᠷᠯᠠᠭᠳᠠᠨ ᠪᠠᠢᠴᠠᠭᠠᠭᠳᠠᠵᠤ ᠭᠠᠭᠴᠠᠭᠠᠷ ᠬᠣᠷᠢᠭᠳᠠᠵᠠᠢ᠃ ᠨᠢᠳᠤᠨᠤᠨ ᠡᠪᠦᠯᠦᠨ ᠶᠡᠬᠡ ᠴᠠᠰᠤᠲᠠᠢ ᠨᠢᠭᠡ ᠰᠥᠨᠢ᠂ ᠠᠶᠤᠮᠠᠷ ᠳᠣᠭᠰᠢᠨ ᠬᠡᠳᠦᠨ ᠬᠥᠮᠦᠨ ᠲᠡᠭᠦᠨᠢ ᠪᠠᠷᠢᠵᠤ ᠬᠦᠯᠢᠭᠡᠳ᠂ ᠨᠢᠳᠦᠶᠢᠨᠢ ᠪᠦᠲᠡᠭᠡᠵᠦ᠂ ᠪᠠᠭᠠ ᠲᠡᠷᠭᠡᠨᠳᠦ ᠴᠢᠬᠢᠵᠦ ᠣᠷᠤᠭᠤᠯᠤᠭᠠᠳ ᠬᠠᠭᠠᠰ ᠴᠠᠭ ᠢᠯᠡᠭᠦᠦ ᠳᠠᠪᠬᠢᠭᠰᠠᠭᠠᠷ ᠪᠠᠢᠵᠤ ᠦᠯᠦ ᠲᠠᠨᠢᠬᠤ ᠨᠢᠭᠡᠨ ᠠᠰᠠᠷᠤᠨ ᠱᠠᠲᠤᠨ ᠳᠣᠣᠷᠠᠬᠢ ᠬᠦᠷᠵᠡ ᠱᠦᠭᠦᠷ ᠬᠤᠷᠢᠶᠠᠳᠠᠭ ᠬᠣᠩᠭᠢᠯᠳᠤ ᠠᠪᠠᠴᠢᠵᠤ ᠬᠣᠷᠢᠵᠠᠢ᠃
ᠡᠨᠡᠬᠦ ᠱᠣᠷᠤᠩᠳᠤ ᠡᠬᠢᠨᠳᠡᠭᠡᠨ ᠴᠠᠬᠢᠯᠭᠠᠨ ᠳ᠋ᠧᠩ ᠪᠠᠢᠭᠰᠠᠨᠦᠭᠡᠢ ᠪᠣᠯᠬᠣᠷ ᠣᠶᠤᠨᠪᠠᠲᠤ ᠨᠡᠯᠢᠶᠡᠳ ᠤᠷᠲᠤ ᠬᠤᠭᠤᠴᠠᠭᠠ ᠡᠳᠦᠷ ᠰᠥᠨᠢᠶᠢ ᠢᠯᠭᠠᠵᠤ ᠴᠢᠳᠠᠬᠤᠪᠠᠨ ᠪᠣᠯᠢᠵᠤ᠂ ᠬᠠᠶᠠ ᠵᠠᠷᠢᠮᠳᠠᠭᠠᠨ ᠰᠥᠨᠢᠶᠢ ᠡᠳᠦᠷᠢᠶᠡᠷ ᠠᠨᠳᠠᠭᠤᠷᠠᠵᠤ᠂ ᠠᠶᠠᠭᠠ ᠰᠠᠪᠬᠠᠪᠠᠨ ᠪᠠᠷᠢᠭᠠᠳ ᠬᠣᠭᠤᠯᠠ ᠬᠦᠷᠭᠡᠬᠦᠶᠢ ᠬᠦᠯᠢᠶᠡᠭᠡᠳ ᠰᠥᠨᠢ ᠳᠠᠭᠤᠰᠤᠨ ᠰᠠᠭᠤᠴᠢᠬᠠᠳᠠᠭ᠃ ᠬᠣᠵᠢᠮᠨᠢ ᠲᠡᠷᠡ ᠣᠷᠤᠢ ᠳᠡᠭᠡᠭᠦᠷᠨᠢ ᠲᠦᠵᠢᠭᠢᠨᠡᠬᠦ ᠬᠥᠯᠦᠨ ᠴᠢᠮᠡᠭᠡᠪᠡᠷ ᠰᠥᠨᠢ ᠡᠳᠦᠷᠢ ᠪᠠᠷᠤᠭᠯᠠᠳᠠᠭ ᠪᠣᠯᠵᠤ ᠪᠢᠯᠡ᠃
ᠣᠶᠤᠨᠪᠠᠲᠤ᠂ ᠣᠳᠣ ᠴᠣᠬᠤᠮ ᠬᠡᠳᠦᠨ ᠰᠠᠷᠠᠶᠢᠨ ᠬᠡᠳᠦᠨ ᠪᠣᠯᠤᠭᠠᠳ ᠪᠠᠢᠭᠠᠶᠢ ᠮᠡᠳᠡᠬᠦᠦᠭᠡᠢ ᠪᠣᠯᠪᠠᠴᠤ ᠤᠷᠢᠬᠠᠨ ᠬᠠᠪᠤᠷᠤᠨ ᠰᠣᠷᠭᠤᠭ ᠠᠮᠢᠰᠭᠤᠯ ᠲᠡᠯᠡᠨ ᠬᠠᠷᠠᠶᠢᠨ ᠬᠣᠷᠮᠤᠢᠪᠠᠷ ᠨᠡᠭᠦᠳᠡᠯᠯᠡᠵᠦ ᠪᠠᠢᠭᠠᠶᠢ ᠣᠷᠴᠢᠮᠤᠨ ᠠᠭᠤᠷ ᠠᠮᠢᠰᠭᠤᠯᠤᠨ ᠪᠠᠢᠳᠠᠯᠠᠴᠠ ᠮᠠᠭᠠᠳᠯᠠᠵᠤ ᠮᠡᠳᠡᠵᠡᠢ᠃ ᠲᠡᠷᠡ᠂ ᠬᠠᠷᠠᠩᠭᠤᠢ ᠭᠡᠷᠲᠦ ᠰᠠᠭᠤᠵᠤ ᠡᠳᠦᠷ ᠰᠠᠷᠠᠶᠢ ᠲᠥᠯᠦᠪᠯᠡᠪᠡᠯ᠂ ᠣᠳᠣ ᠬᠠᠷᠢᠨ ᠮᠢᠩᠭᠠ ᠶᠢᠰᠦᠨ ᠵᠠᠭᠤᠨ ᠵᠢᠷᠠ ᠶᠢᠰᠦᠨ ᠣᠨᠤ ᠬᠠᠪᠤᠷ ᠪᠣᠯᠤᠭᠠᠳ ᠪᠠᠢᠭᠠᠰᠢᠭ᠋ ᠪᠣᠳᠤᠭᠳᠠᠯᠠ᠃ ᠰᠠᠷᠠ ᠡᠳᠦᠷ ᠭᠡᠳᠡᠭᠴᠢᠨᠢ ᠬᠡᠵᠢᠶᠡᠳᠡ ᠵᠣᠭᠰᠤᠯᠦᠭᠡᠢ ᠤᠷᠤᠭᠰᠢᠯᠠᠳᠠᠭ ᠪᠣᠯᠬᠣᠷ ᠠᠷᠠᠳ ᠲᠦᠮᠡᠨᠦ ᠲᠥᠯᠦᠭᠡ ᠠᠵᠢᠯᠯᠠᠬᠤ ᠡᠷᠬᠡᠪᠡᠨ ᠠᠯᠳᠠᠭᠰᠠᠨ ᠬᠠᠢᠷᠠᠨ ᠡᠳᠦᠷ ᠬᠣᠨᠤᠭᠤᠳ ᠡᠬᠡ ᠣᠷᠤᠨᠳᠤᠴᠤ ᠭᠡᠰᠡᠨ ᠬᠤᠪᠢ ᠬᠥᠮᠦᠨᠳᠦᠴᠦ ᠭᠡᠰᠡᠨ ᠴᠥᠮ ᠣᠨᠴᠠᠶᠢᠨ ᠡᠷᠬᠢᠮ ᠨᠠᠨᠳᠢᠨ ᠪᠠᠢᠳᠠᠭ ᠠᠵᠢ᠃ ᠴᠠᠭ ᠮᠥᠴᠡ ᠬᠠᠷᠠᠩᠭᠤᠢ ᠱᠣᠷᠤᠩᠳᠤ ᠬᠣᠷᠢᠭᠳᠠᠭᠰᠠᠨ ᠬᠥᠮᠦᠨᠳᠦ ᠠᠪᠴᠤ ᠬᠡᠯᠡᠪᠡᠯ ᠠᠯᠲᠠ ᠮᠥᠩᠭᠦᠨᠡᠴᠡ ᠦᠨᠡᠲᠡᠢ᠂ ᠣᠷᠬᠣᠳᠠᠢ ᠡᠷᠳᠡᠨᠢᠡᠴᠡ ᠬᠣᠪᠤᠷ ᠭᠡᠳᠡᠭᠢ ᠶᠠᠭᠤᠨ ᠥᠭᠦᠯᠡᠬᠦ ᠠᠵᠢ᠃
ᠨᠢᠭᠡ ᠦᠳᠡᠶᠢᠨ ᠬᠣᠢᠨᠠ ᠬᠣᠭᠤᠯᠠᠨᠤ ᠴᠠᠭ ᠪᠣᠯᠤᠭᠠᠳᠤᠢ ᠪᠠᠢᠲᠠᠯᠠ ᠱᠣᠷᠤᠩᠤᠨ ᠡᠭᠦᠳᠡ ᠭᠡᠨᠡᠳᠲᠡ ᠲᠠᠴᠢᠭᠢᠨᠠᠵᠤ᠂ ᠲᠤᠰᠭᠠᠢ ᠬᠡᠷᠡᠭᠦᠨ ᠠᠵᠢᠯᠲᠠᠨ ᠣᠷᠤᠵᠤ ᠢᠷᠡᠭᠡᠳ:
《ᠣᠶᠤᠨᠪᠠᠲᠤ ᠡ᠂ ᠭᠠᠷᠴᠤ ᠢᠷᠡ!》 ᠭᠡᠵᠦ ᠪᠠᠷᠬᠢᠷᠠᠪᠠ᠃
ᠣᠶᠤᠨᠪᠠᠲᠤᠶᠢᠨ ᠪᠦᠬᠦ ᠪᠡᠶᠡᠨᠢ ᠲᠡᠷᠡ ᠳᠣᠣᠷᠠᠪᠠᠨ ᠵᠢᠬᠡᠭᠦᠴᠡᠵᠦ᠂ ᠬᠤᠢᠬᠠᠨ ᠦᠰᠦᠨᠢ ᠵᠢᠷᠦᠰᠬᠢᠨ ᠪᠣᠰᠪᠠ᠃ ᠰᠥᠰᠦᠷᠬᠡᠦ ᠰᠠᠢᠨ ᠡᠷᠡ ᠡᠷᠡᠭᠦᠳᠡᠨ ᠲᠠᠮᠤᠯᠠᠭᠳᠠᠬᠤ᠂ ᠭᠤᠲᠤᠭᠠᠨ ᠳᠣᠷᠤᠮᠵᠢᠯᠠᠭᠳᠠᠬᠤᠠᠴᠠ ᠶᠡᠷᠦ ᠳᠠᠯᠳᠢᠷᠠᠵᠤ ᠦᠵᠡᠭᠡᠦᠭᠡᠢ ᠪᠣᠯᠪᠠᠴᠤ ᠲᠣᠭᠠᠦᠭᠡᠢ ᠣᠯᠠᠨ ᠤᠳᠠᠭᠠ ᠮᠤᠯᠲᠤᠷᠠᠭᠰᠠᠨ ᠲᠣᠬᠤᠢᠶᠢᠨᠢ ᠳᠠᠬᠢᠨ ᠮᠤᠰᠭᠢᠵᠤ᠂ ᠲᠠᠬᠢᠷ ᠵᠡᠮᠳᠡᠭ ᠪᠣᠯᠭᠠᠴᠢᠬᠠᠬᠤᠠᠴᠠᠯᠠ ᠵᠢᠷᠦᠬᠡᠰᠢᠳᠡᠭᠶᠦᠮ᠃ ᠬᠥᠮᠦᠨ ᠭᠡᠳᠡᠭᠴᠢᠨᠢ ᠥᠷᠦᠭᠡᠯ ᠪᠤᠰᠤᠳᠲᠤ ᠥᠭᠡᠳᠡ ᠲᠤᠰᠠᠲᠠᠢ ᠶᠠᠪᠤᠪᠠᠯ ᠰᠠᠶᠢ ᠬᠥᠮᠦᠨ ᠪᠣᠯᠤᠭᠰᠠᠨᠤ ᠠᠴᠢᠲᠠᠢ᠂ ᠬᠡᠷᠪᠡ ᠨᠡᠭᠡᠷᠡᠨ ᠳᠤᠲᠠᠭᠤ ᠵᠡᠮᠳᠡᠭ ᠪᠣᠯᠴᠢᠬᠠᠭᠠᠳ ᠠᠵᠢᠯᠯᠠᠬᠤ ᠴᠢᠳᠠᠪᠤᠷᠢᠪᠠᠨ ᠠᠯᠳᠠᠪᠠᠯ ᠠᠮᠢᠳᠤ ᠶᠠᠪᠤᠭᠰᠠᠨᠤ ᠠᠰᠢᠭᠦᠭᠡᠢ ᠰᠢᠦ ᠳ᠋ᠠ᠃ ᠲᠡᠷᠡ ᠲᠣᠭᠤᠰᠭᠠᠨ ᠳᠡᠭᠡᠷᠡᠡᠴᠡ 《ᠦᠭᠡᠶᠢᠨ ᠲᠡᠭᠦᠪᠦᠷᠢ》ᠪᠡᠨ ᠠᠪᠴᠤ᠂ ᠵᠢᠩᠭᠢᠨᠡᠮᠡ ᠬᠦᠢᠲᠡᠨ ᠬᠠᠶᠠᠭᠠᠶᠢ ᠲᠦᠰᠢᠵᠦ ᠲᠤᠯᠤᠭᠰᠠᠭᠠᠷ ᠥᠷᠦᠭᠡᠰᠦᠨ ᠬᠥᠯᠢᠶᠡᠨ ᠴᠢᠷᠴᠦ ᠱᠣᠷᠤᠩᠠᠴᠠ ᠭᠠᠷᠪᠠ᠃ ᠣᠶᠤᠨᠪᠠᠲᠤ ᠤᠳᠠᠭᠠ ᠪᠣᠯᠭᠠᠨᠤ 《 ᠰᠢᠭᠦᠯᠲᠡ》ᠶᠢ ᠥᠩᠭᠡᠷᠡᠭᠰᠡᠨᠲᠡᠢᠪᠡᠨ ᠠᠳᠠᠯᠢᠪᠠᠷ ᠠᠶᠤᠯᠭᠠᠨ ᠰᠦᠷᠳᠡᠭᠦᠯᠵᠦ᠂ ᠡᠷᠡᠭᠦᠳᠡᠨ ᠲᠠᠮᠤᠯᠠᠬᠤ ᠣᠪ ᠮᠡᠬᠡ ᠪᠦᠬᠦᠨᠢ ᠠᠷᠭᠠᠴᠠᠨ ᠥᠩᠭᠡᠷᠡᠭᠦᠯᠬᠦ ᠪᠦᠷᠢᠨ ᠪᠡᠯᠡᠳᠭᠡᠯᠲᠡᠢ ᠪᠠᠢᠯᠠ᠃ ᠲᠡᠷᠡᠬᠦ᠂ ᠨᠡᠷᠡ ᠳᠡᠭᠡᠷᠡᠪᠡᠨ 《ᠲᠤᠰᠭᠠᠢ ᠬᠡᠷᠡᠭᠦᠨ ᠠᠯᠪᠠᠨ ᠭᠡᠷ》 ᠭᠡᠵᠦ ᠪᠢᠴᠢᠵᠦ ᠪᠠᠢᠪᠠᠴᠤ ᠨᠢᠳᠡᠷ ᠳᠡᠭᠡᠷᠡᠪᠡᠨ ᠬᠠᠤᠯᠢ ᠪᠤᠰᠤᠪᠠᠷ ᠪᠠᠢᠭᠤᠯᠤᠭᠳᠠᠭᠰᠠᠨ ᠡᠷᠡᠭᠦᠦ ᠰᠢᠳᠭᠡᠯᠦᠨ ᠭᠠᠵᠠᠷ ᠪᠣᠯᠬᠤ ᠲᠠᠰᠤᠯᠭᠠᠨᠳᠤ ᠠᠯᠬᠤᠨ ᠣᠷᠤᠪᠠ᠃ ᠰᠣᠨᠢᠨᠶᠤᠮ ᠠ᠋! ᠥᠨᠥᠬᠢ ᠨᠢᠳᠦᠪᠡᠨ ᠰᠢᠪᠦᠭᠡ᠂ ᠨᠢᠳᠤᠷᠭᠠᠪᠠᠨ ᠮᠠᠨᠴᠤᠷᠭᠠ ᠪᠣᠯᠭᠠᠭᠰᠠᠨ ᠭᠠᠢᠬᠠᠯᠤᠳ ᠨᠢᠭᠡᠴᠦ ᠬᠠᠷᠠᠭᠳᠠᠭᠰᠠᠨᠦᠭᠡᠢ᠂ ᠥᠨᠥ 《ᠣᠶᠤᠨᠪᠠᠲᠤᠶᠢ ᠴᠣᠬᠢᠵᠤ ᠤᠨᠠᠭᠠᠶᠠ!》 《ᠳᠠᠢᠰᠤᠨ ᠪᠠᠭᠤᠵᠤ ᠥᠭᠬᠦᠦᠭᠡᠢ ᠪᠣᠯ ᠲᠡᠭᠦᠨᠢ ᠮᠥᠬᠦᠭᠡᠶᠡ!》 ᠭᠡᠬᠦ ᠵᠡᠷᠭᠡᠶᠢᠨ ᠤᠷᠢᠶᠠ ᠯᠣᠽᠦ᠋ᠩᠴᠦ ᠰᠣᠨᠤᠰᠳᠠᠭᠰᠠᠨᠦᠭᠡᠢ᠃ ᠭᠡᠷᠲᠦ 《ᠮᠠᠯᠲᠠᠵᠤ ᠠᠷᠢᠯᠭᠠᠬᠤ》 ᠬᠥᠳᠡᠯᠭᠡᠭᠡᠨᠦ ᠳᠡᠳ᠋ ᠶᠡᠷᠦᠩᠬᠡᠢ ᠵᠢᠯᠤᠭᠤᠳᠤᠭᠴᠢ ᠪᠥᠭᠡᠳ 《ᠥᠪᠦᠷ ᠠᠷᠠᠳᠤᠨ ᠨᠠᠮ》ᠤᠨ ᠲᠤᠰᠭᠠᠢ ᠬᠡᠷᠡᠭᠦᠨ ᠳᠤᠭᠤᠢᠯᠠᠩᠤᠨ ᠳᠠᠷᠤᠭᠠ ᠳᠠᠯᠠᠢ ᠭᠠᠭᠴᠠᠭᠠᠷ ᠰᠠᠭᠤᠵᠤ ᠪᠠᠢᠯᠠ᠃
ᠳᠠᠯᠠᠢ ᠣᠳᠣ ᠮᠣᠩᠭᠤᠯ ᠺᠠᠳ᠋ᠷᠴᠤᠳᠤᠨ ᠳᠣᠲᠤᠷᠠᠠᠴᠠ ᠨᠠᠮ ᠪᠣᠯᠤᠨ ᠡᠬᠡ ᠣᠷᠤᠨᠳᠠᠭᠠᠨ 《 ᠬᠢᠵᠠᠭᠠᠯᠠᠰᠢᠦᠭᠡᠢ ᠦᠨᠡᠨᠴᠢ ᠰᠢᠳᠤᠷᠭᠤ》ᠪᠠᠷ ᠲᠣᠭᠠᠴᠢᠭᠳᠠᠭᠰᠠᠨ ᠴᠣᠷᠢᠶᠢᠨ ᠭᠠᠭᠴᠠ ᠦᠭᠡᠭᠦᠦ ᠠᠩᠭᠢᠶᠢᠨ 《ᠬᠤᠪᠢᠰᠭᠠᠯᠴᠢ》ᠶᠤᠮ᠃ ᠨᠢᠭᠤᠴᠠ ᠤᠴᠢᠷ ᠨᠠᠷᠢᠨ ᠤᠬᠠᠭᠠᠨᠢᠨᠢ ᠰᠠᠢᠨ ᠮᠡᠳᠡᠳᠡᠭ ᠲᠡᠭᠦᠨᠰᠢᠭ ᠣᠷᠤᠨ ᠨᠤᠲᠤᠭᠤᠨ ᠮᠣᠩᠭᠤᠯ ᠺᠠᠳ᠋ᠷ 《ᠬᠤᠪᠢᠰᠭᠠᠯ》 ᠬᠢᠵᠦ 《ᠤᠷᠪᠠᠯᠭᠠ ᠭᠠᠷᠭᠠᠭᠰᠠᠨ》ᠦᠭᠡᠢᠶᠤᠮ ᠪᠣᠯ ᠮᠠᠨᠤ ᠰᠢᠨᠡ ᠢᠷᠡᠭᠰᠡᠨ ᠮᠠᠩ ᠰᠧᠯᠢᠩ ᠪᠠᠰᠠ ᠡᠬᠡ ᠣᠷᠤᠨᠤ ᠤᠮᠠᠷᠠᠳᠤ ᠬᠢᠯᠢᠳᠦ ᠪᠤᠯᠠᠭᠳᠠᠭᠰᠠᠨ ᠲᠡᠰᠦᠷᠡᠬᠦ ᠲᠣᠮᠤ ᠪᠥᠮᠪᠦᠭᠡ - 《 ᠥᠪᠦᠷ ᠠᠷᠠᠳᠤᠨ ᠨᠠᠮ》ᠢ ᠲᠡᠭᠡᠵᠦ ᠬᠢᠯᠪᠠᠷᠬᠠᠨᠢᠶᠠᠷ ᠮᠠᠯᠲᠠᠨ ᠭᠠᠷᠭᠠᠵᠤ ᠴᠢᠳᠠᠬᠤᠦᠭᠡᠢᠶᠤᠮ ᠭᠡᠨᠡ᠃
ᠡᠨᠡ ᠬᠥᠮᠦᠨ᠂ ᠮᠠᠩ ᠰᠧᠯᠢᠩᠲᠡᠢ ᠤᠴᠠᠷᠠᠮᠠᠭᠴᠠ ᠨᠣᠬᠠᠢᠶᠢᠨ ᠭᠤᠶᠠ ᠪᠣᠯᠵᠤ ᠬᠦᠴᠦᠪᠡᠨ ᠡᠷᠭᠦᠬᠦᠪᠡᠷ ᠰᠢᠢᠳᠦᠭᠡᠳ ᠳᠡᠭᠡᠷᠡᠪᠡᠨ ᠲᠥᠪ ᠬᠣᠷᠢᠶᠠᠲᠠᠢ᠂ ᠳᠣᠣᠷᠠᠪᠠᠨ ᠦᠨᠳᠦᠰᠦᠨ ᠱᠠᠲᠤᠲᠠᠢ ᠪᠥᠭᠡᠳ ᠤᠷᠪᠠᠬᠤ ᠪᠡᠯᠡᠳᠭᠡᠯᠢᠶᠡᠨ ᠨᠢᠭᠡᠨᠲᠡ ᠪᠦᠬᠦ ᠲᠠᠯᠠᠪᠠᠷ ᠬᠢᠵᠦ ᠳᠠᠭᠤᠰᠭᠠᠭᠰᠠᠨ 《ᠥᠪᠦᠷ ᠠᠷᠠᠳᠤᠨ ᠨᠠᠮ》ᠢ ᠳᠣᠲᠤᠷᠠᠠᠴᠠᠨᠢ ᠢᠯᠡᠴᠢᠯᠡᠵᠦ ᠶᠡᠬᠡ ᠭᠠᠪᠢᠶᠠ ᠪᠠᠢᠭᠤᠯᠤᠭᠰᠠᠨᠶᠤᠮ᠃ ᠮᠠᠨᠤ ᠳᠠᠯᠠᠢ ᠪᠣᠯ ᠲᠡᠦᠬᠡᠨᠡᠴᠡᠪᠡᠨ ᠠᠪᠤᠭᠠᠳ ᠵᠠᠪᠰᠠᠷᠢᠶᠠᠷ ᠰᠢᠷᠭᠤᠵᠤ ᠵᠠᠪᠰᠢᠶᠠᠨᠢ ᠳᠠᠯᠢᠮᠳᠠᠭᠤᠯᠤᠨ᠂ ᠰᠠᠯᠬᠢᠨᠤ ᠠᠶᠠᠪᠠᠷ ᠰᠡᠭᠦᠯ ᠰᠢᠷᠪᠠᠬᠤ ᠬᠥᠮᠦᠨ ᠪᠣᠯᠬᠣᠷ ᠬᠥᠳᠡᠯᠭᠡᠭᠡᠨ ᠡᠬᠢᠯᠡᠮᠡᠭᠴᠡ ᠬᠡᠲᠦ 《ᠵᠡᠭᠦᠨ》ᠦ ᠣᠪᠤᠷ ᠭᠠᠷᠭᠠᠵᠤ᠂ ᠰᠢᠳᠠᠮ ᠡᠷᠭᠢᠭᠦᠯᠦᠨ ᠬᠥᠮᠦᠨ ᠠᠮᠢᠲᠠᠨᠢ ᠭᠦᠳᠭᠡᠨ ᠬᠣᠣᠷᠯᠠᠳᠠᠭ ᠪᠣᠯᠤᠭᠰᠠᠨᠢᠶᠠᠷ ᠵᠠᠩᠢᠨᠢ ᠰᠠᠢᠨ ᠮᠡᠳᠡᠳᠡᠭ ᠤᠯᠤᠰ ᠲᠡᠭᠦᠨᠳᠦ 《ᠰᠢᠳᠠᠮ ᠳᠠᠯᠠᠢ》 ᠭᠡᠰᠡᠨ ᠴᠣᠯᠠ ᠡᠷᠭᠦᠵᠡᠢ᠃ ᠬᠥᠮᠦᠰ ᠲᠡᠭᠦᠨᠢ 《ᠳᠠᠯᠠᠢ ᠰᠢᠳᠠᠮ》 ᠭᠡᠬᠦᠶᠦᠮᠦᠦ ᠡᠰᠡᠬᠦᠯᠡ ᠰᠢᠭᠤᠳ 《ᠰᠢᠳᠠᠮ》 ᠭᠡᠵᠦ ᠲᠣᠪᠴᠢᠯᠠᠵᠤ ᠵᠠᠩᠰᠢᠵᠠᠢ᠃
ᠳᠡᠯᠢᠭᠦᠨ ᠬᠥᠬᠡ ᠴᠢᠷᠠᠢᠳᠠᠭᠠᠨ ᠲᠠᠪᠠᠲᠠᠢ ᠢᠨᠢᠶᠡᠳᠦ ᠢᠯᠡᠷᠡᠭᠦᠯᠦᠭᠰᠡᠨ ᠰᠢᠳᠠᠮ ᠳᠠᠯᠠᠢ : 《ᠰᠠᠭᠤ!》 ᠭᠡᠵᠦ ᠬᠠᠶᠠᠭᠠ ᠨᠠᠭᠠᠯᠳᠤᠭᠤᠯᠤᠨ ᠲᠠᠯᠪᠢᠭᠰᠠᠨ ᠰᠠᠨᠳᠠᠯᠢᠶᠢ ᠵᠢᠭᠠᠪᠠ᠃
ᠣᠶᠤᠨᠪᠠᠲᠤ ᠰᠠᠨᠳᠠᠯᠢ ᠳᠡᠭᠡᠷᠡᠨᠢ ᠠᠭᠠᠵᠢᠮᠬᠠᠨ ᠭᠡᠭᠴᠢ ᠰᠠᠭᠤᠭᠠᠳ᠂ ᠵᠤᠷᠰᠢᠯ ᠶᠣᠰᠤᠭᠠᠷ 《ᠦᠭᠡᠶᠢᠨ ᠲᠡᠭᠦᠪᠦᠷᠢ》ᠶᠢᠨ ᠨᠠᠢ᠍ᠮᠠᠳᠤᠭᠠᠷ ᠬᠠᠭᠤᠳᠠᠰᠤᠶᠢ ᠳᠡᠯᠭᠡᠲᠡᠯᠡ ᠴᠠᠭᠠᠳᠤᠭᠤᠯᠠᠨᠢ ᠬᠠᠷᠢᠨ 《ᠦᠭᠡᠶᠢᠨ ᠲᠡᠭᠦᠪᠦᠷᠢ》 ᠤᠩᠰᠢᠭᠰᠠᠨᠦᠭᠡᠢᠪᠠᠷ ᠰᠢᠭᠤᠳ:
《ᠴᠢ ᠠᠰᠠᠭᠤᠳᠠᠯᠢᠶᠠᠨ ᠬᠢᠷᠢ ᠵᠡᠷᠭᠡ ᠪᠣᠳᠤᠯᠬᠢᠯᠠᠪᠠ?》 ᠭᠡᠵᠦ ᠠᠰᠠᠭᠤᠪᠠ᠃
《ᠰᠢᠨᠡ ᠠᠰᠠᠭᠤᠳᠠᠯ ᠪᠣᠳᠤᠵᠤ ᠣᠯᠤᠭᠠᠦᠭᠡᠢᠯᠠ ᠪᠠᠢᠭᠰᠠᠭᠠᠷ》 ᠭᠡᠵᠦ ᠣᠶᠤᠨᠪᠠᠲᠤ ᠤᠳᠠᠭᠠ ᠪᠦᠷᠢᠶᠢᠨ ᠬᠠᠷᠢᠭᠤᠯᠳᠠᠭ ᠶᠣᠰᠤᠪᠠᠷᠢᠶᠠᠨ ᠬᠠᠷᠢᠭᠤᠯᠤᠯᠠ᠃
ᠰᠢᠳᠠᠮ᠂ ᠮᠠᠩ ᠰᠧᠯᠢᠩᠢ ᠳᠠᠭᠤᠷᠢᠶᠠᠭᠰᠠᠨ ᠮᠠᠶᠢ᠍ᠭᠲᠠᠢ ᠬᠣᠭᠤᠯᠠᠢᠪᠠᠨ ᠨᠢᠭᠡ ᠵᠠᠰᠠᠵᠤ ᠠᠪᠤᠭᠠᠳ:
《ᠮᠠᠶᠢ᠍ᠭᠢᠴᠢᠨᠢ ᠦᠵᠡᠬᠦᠳᠦ ᠴᠢ ᠪᠠᠷᠤᠭ ᠴᠢᠯᠠᠭᠤᠨ ᠲᠣᠯᠤᠭᠠᠢᠲᠠᠢ ᠴᠢᠭᠢᠶᠡᠷᠢᠶᠡᠨ ᠪᠤᠷᠬᠠᠨ ᠪᠣᠯᠬᠤᠪᠠᠷ ᠰᠢᠭᠤᠳᠴᠢᠬᠠᠭᠰᠠᠨ ᠰᠢᠪ᠃ ᠭᠡᠪᠡᠴᠦ ᠪᠢᠳᠡ ᠨᠠᠮᠤᠨ ᠴᠢᠭᠯᠡᠯᠲᠡ᠂ ᠲᠥᠷᠦᠶᠢᠨ ᠪᠣᠳᠤᠯᠭᠠᠪᠠᠷ ᠴᠢᠮᠠᠢ ᠦᠷᠭᠦᠯᠵᠢᠯᠡᠨ ᠠᠪᠤᠷᠠᠬᠤᠪᠠᠷ ᠴᠢᠷᠮᠠᠢᠵᠤ ᠪᠠᠢᠨᠠ᠃ ᠴᠢ ᠦᠬᠦᠲᠡᠯᠡᠪᠡᠨ ᠦᠨᠡᠨᠢᠶᠡᠨ ᠬᠡᠯᠡᠬᠦᠦᠭᠡᠢᠪᠡᠷ ᠭᠡᠵᠦ ᠰᠢᠳᠦ ᠵᠠᠭᠤᠭᠰᠠᠨ ᠪᠣᠯᠪᠠᠴᠤ ᠦᠷᠡ ᠬᠡᠦᠬᠡᠳᠢᠶᠡᠨ ᠪᠣᠳᠤᠬᠤᠦᠭᠡᠢ ᠪᠠᠢᠵᠤ ᠪᠣᠯᠬᠤᠤᠤ!》 ᠭᠡᠵᠦ ᠵᠣᠷᠢᠭᠤᠳᠠ ᠪᠦᠳᠦᠭᠦᠨ ᠳᠠᠭᠤᠨᠢᠶᠠᠷ ᠬᠡᠯᠡᠨᠡ᠃
ᠣᠶᠤᠨᠪᠠᠲᠤ ᠮᠥᠨᠯᠡ ᠤᠤᠯᠤᠨ ᠶᠠᠩᠵᠤᠪᠠᠷ ᠲᠣᠯᠤᠭᠠᠢᠪᠠᠨ ᠤᠨᠵᠢᠢᠯᠭᠠᠨ ᠰᠠᠭᠤᠨᠠ᠃
ᠰᠢᠳᠠᠮ᠂ ᠢᠨᠢᠶᠡᠮᠰᠦᠭ ᠴᠢᠷᠠᠢᠯᠠᠵᠤ᠂ ᠣᠶᠤᠨᠪᠠᠲᠤᠶᠢᠨ ᠵᠦᠭ ᠲᠠᠮᠠᠬᠢ ᠭᠣᠵᠤᠢᠯᠭᠠᠨ᠂
《ᠵᠠ᠂ ᠲᠠᠮᠠᠬᠢ ᠲᠠᠲᠠᠭᠠᠴᠢ!》 ᠭᠡᠪᠡ᠃
ᠬᠡᠳᠦᠨ ᠡᠳᠦᠷᠦᠨ ᠡᠮᠦᠨᠡ ᠰᠢᠳᠠᠮ᠂ ᠪᠡᠶᠡᠪᠡᠷᠢᠶᠡᠨ ᠲᠦᠷᠦᠭᠦᠯᠡᠵᠦ ᠣᠶᠤᠨᠪᠠᠲᠤᠶᠢ ᠵᠠᠨᠴᠢᠵᠤ ᠲᠠᠮᠤᠯᠠᠬᠤᠳᠠᠭᠠᠨ ᠤᠩᠭᠤᠰᠴᠤ ᠪᠠᠢᠭᠠ ᠲᠠᠮᠠᠬᠢᠨᠤ ᠶᠣᠵᠤᠭᠤᠷᠢᠶᠠᠨ ᠴᠢᠬᠢᠨᠳᠦᠨᠢ ᠴᠢᠬᠢᠵᠦ ᠣᠷᠤᠭᠤᠯᠤᠭᠰᠠᠨ ᠶᠠᠪᠤᠳᠠᠯᠢ ᠪᠣᠳᠤᠭᠠᠳ ᠴᠡᠭᠡᠵᠢᠨᠳᠦᠨᠢ ᠬᠣᠷᠤᠰᠤᠯ ᠵᠠᠨᠤᠯᠤᠨ ᠭᠠᠯ ᠪᠠᠳᠠᠷᠠᠬᠤ ᠣᠶᠤᠨᠪᠠᠲᠤ ᠲᠡᠭᠦᠨᠦ ᠵᠦᠭ ᠬᠠᠷᠠᠵᠤ ᠦᠵᠡᠭᠰᠡᠨᠦᠭᠡᠢ᠃
ᠶᠠᠭ ᠡᠨᠡ ᠦᠶᠡᠳᠦ ᠠᠯᠪᠠᠨ ᠰᠢᠷᠡᠭᠡᠨ ᠳᠡᠭᠡᠷᠡᠬᠢ ᠳ᠋ᠢᠶᠠᠩᠬᠤᠸᠠ ᠬᠠᠩᠭᠢᠨᠠᠨ ᠳᠤᠤᠭᠠᠷᠤᠯᠠ᠃ ᠰᠢᠳᠠᠮ᠂ ᠬᠠᠷᠢᠯᠴᠠᠭᠤᠷᠢ ᠠᠪᠴᠤ ᠴᠢᠩᠨᠠᠭᠰᠠᠨᠢᠶᠠᠨ ᠳᠠᠷᠤᠢ ᠪᠢᠯᠳᠠᠤᠴᠢ ᠳᠦᠷᠢᠯᠡᠵᠦ: 《 ᠠ ᠁ ᠠ ᠁ ᠁ ᠴᠧᠨ ᠨᠠᠷᠢᠨ ᠪᠢᠴᠢᠭᠡᠴᠢᠦᠦ? ᠶᠠᠭᠤ ᠭᠡᠨᠡ? ᠁ ᠲᠠ ᠵᠢᠭᠠᠬᠠᠨ ᠬᠦᠯᠢᠶᠡᠵᠦ ᠪᠠᠢ ᠁》 ᠭᠡᠳ ᠬᠠᠷᠢᠯᠴᠠᠭᠤᠷᠢ ᠬᠣᠶᠠᠷ ᠭᠠᠷᠢᠶᠠᠷᠢᠶᠠᠨ ᠳᠠᠷᠤᠭᠰᠠᠭᠠᠷ ᠣᠶᠤᠨᠪᠠᠲᠤᠶᠢᠨ ᠵᠦᠭ:
《ᠴᠢ ᠭᠠᠷ!》 ᠭᠡᠵᠦ ᠵᠠᠷᠯᠢᠭᠳᠠᠪᠠ᠃
ᠭᠡᠷᠡᠴᠡ ᠭᠠᠷᠴᠤ ᠬᠠᠭᠠᠯᠭᠠᠨ ᠳᠡᠷᠭᠡᠳᠡ ᠬᠦᠯᠢᠶᠡᠵᠦ ᠵᠣᠭᠰᠤᠭᠰᠠᠨ ᠣᠶᠤᠨᠪᠠᠲᠤᠳᠤ ᠰᠢᠳᠠᠮᠤᠨ ᠳ᠋ᠢᠶᠠᠩᠬᠤᠸᠠᠪᠠᠷ ᠶᠠᠷᠢᠬᠤ ᠦᠭᠡ ᠠᠯᠳᠠᠭ ᠣᠨᠤᠭ ᠰᠣᠨᠤᠰᠳᠠᠨᠠ᠃
《᠁ ᠡᠨᠡ᠂ ᠯᠣᠣ ᠴᠧᠨ ᠡ᠂ ᠲᠠ ᠡᠨᠡ ᠬᠥᠮᠦᠨᠢ ᠮᠡᠳᠡᠬᠦᠦᠭᠡᠢ ᠪᠢᠰᠢ ᠁ ᠶᠣᠰᠤᠲᠠᠢ ᠶᠠᠫᠤᠨᠤ ᠲᠠᠩᠨᠠᠭᠤᠯ᠂ ᠲᠡᠷᠡ ᠴᠢᠭᠢᠶᠡᠷᠢᠶᠡᠨ ᠭᠠᠳᠠᠭᠠᠳᠤᠲᠠᠢ ᠰᠦᠯᠪᠡᠭᠡᠯᠳᠦᠭᠰᠡᠨ ᠡᠲᠡᠭᠡᠳ ᠮᠥᠨ ᠮᠥᠷᠲᠡᠭᠡᠨ ᠣᠪᠤᠷᠨᠢ ᠲᠤᠢᠯᠤᠨ ᠮᠤᠵᠢᠭᠤᠳᠠ ᠁ ᠠᠢ ᠳ᠋ᠠ᠂ ᠰᠧᠯᠢᠩ ᠭᠡᠨᠡᠳᠲᠡ ᠶᠠᠭᠠᠬᠢᠭᠠᠳ ᠡᠢᠮᠦ ᠠᠷᠭᠠ ᠬᠡᠮᠵᠢᠶᠡ ᠠᠪᠤᠭᠰᠠᠨᠢ ᠪᠢ ᠶᠠᠭ ᠣᠢᠯᠠᠭᠠᠬᠤᠦᠭᠡᠢ ᠪᠠᠢᠨᠠ ᠁ ᠶᠠᠭᠤ ᠭᠡᠨᠡ? ᠴᠢ ᠪᠠᠰᠠ ᠣᠢᠯᠠᠭᠠᠬᠤᠦᠭᠡᠢ ᠭᠡᠨᠡ? ᠁ ᠠᠶᠠ ᠁ ᠵᠠ᠂ ᠵᠠ᠂ ᠵᠠ ᠣᠢᠯᠠᠭᠠᠭᠰᠠᠨᠴᠤ ᠬᠡᠷᠡᠭᠵᠢᠭᠦᠯᠦᠨᠡ᠂ ᠡᠰᠡ ᠣᠢᠯᠠᠭᠠᠭᠰᠠᠨᠴᠤ ᠬᠡᠷᠡᠭᠵᠢᠭᠦᠯᠦᠨᠡ ᠭᠡᠰᠡᠨ ᠵᠢᠭᠠᠪᠤᠷᠢ ᠪᠠᠢᠳᠠᠭ ᠰᠢᠤ ᠳ᠋ᠠ᠂ ᠪᠢ ᠣᠳᠣᠪᠠᠷ ᠵᠢᠭᠠᠪᠤᠷᠢ ᠶᠣᠰᠤᠭᠠᠷ ᠬᠡᠷᠡᠭᠵᠢᠭᠦᠯᠦᠨᠡ》 ᠭᠡᠳ ᠳ᠋ᠢᠶᠠᠩᠬᠤᠸᠠᠶᠢᠨ ᠬᠠᠷᠢᠯᠴᠠᠭᠤᠷ ᠲᠠᠯᠪᠢᠬᠤ ᠳᠢᠩᠭᠠᠷ ᠬᠢᠬᠦ ᠳᠠᠭᠤᠨ ᠰᠣᠨᠤᠰᠳᠠᠪᠠ᠃
ᠳ᠋ᠢᠶᠠᠩᠬᠤᠸᠠ ᠳᠡᠭᠡᠷᠡ ᠶᠠᠷᠢᠵᠤ ᠪᠠᠢᠭᠰᠠᠨᠨᠢ ᠪᠠᠷᠤᠭ ᠨᠠᠮᠠᠢ ᠵᠢᠭᠠᠭᠰᠠᠨ ᠪᠠᠢᠬᠤ ᠭᠡᠵᠦ ᠳᠣᠲᠤᠷᠠᠪᠠᠨ ᠲᠠᠭᠠᠮᠠᠭᠯᠠᠭᠰᠠᠨ ᠣᠶᠤᠨᠪᠠᠲᠤ᠂ ᠪᠠᠰᠠ ᠶᠠᠮᠠᠷ ᠠᠷᠭᠠ ᠬᠡᠮᠵᠢᠶᠡ ᠠᠪᠬᠤ ᠭᠡᠵᠦ ᠪᠠᠢᠭᠠ ᠪᠣᠯ? ᠭᠡᠵᠦ ᠪᠠᠢᠲᠠᠯᠠ᠂ ᠰᠢᠳᠠᠮ ᠲᠡᠭᠦᠨᠢ ᠳᠠᠭᠤᠳᠠᠵᠤ ᠣᠷᠤᠭᠤᠯᠤᠭᠠᠳ ᠶᠡᠬᠡᠯᠡ ᠡᠶᠡᠯᠳᠡᠭᠢᠶᠡᠷ:
《ᠣᠪᠤᠷᠴᠢᠨᠢ ᠮᠥᠨᠯᠡ ᠵᠥᠪ ᠪᠤᠰᠤ ᠪᠠᠢᠭᠰᠠᠭᠠᠷ ᠳ᠋ᠠ᠂ ᠭᠡᠪᠡᠴᠦ ᠴᠢᠮᠠᠢ ᠵᠠᠰᠠᠵᠤ ᠠᠪᠬᠤᠶᠢᠨ ᠲᠥᠯᠦᠭᠡ ᠪᠢᠳᠡ ᠥᠨᠥᠡᠴᠡ ᠡᠬᠢᠯᠡᠭᠡᠳ ᠭᠡᠭᠡᠲᠡᠢ ᠭᠡᠷᠲᠦ ᠣᠷᠤᠭᠤᠯᠤᠨᠠ᠃ ᠭᠡᠲᠡᠯᠡ ᠴᠢ ᠬᠠᠷᠢᠨ ᠪᠤᠷᠤᠩᠬᠤᠢᠯᠠᠭᠠᠳ ᠭᠠᠷᠴᠢᠬᠠᠯᠠ᠂ ᠣᠳᠣ ᠬᠡᠷᠡᠭᠦᠭᠡᠢ ᠪᠣᠯᠴᠢᠬᠠᠯᠠ ᠭᠡᠵᠦ ᠪᠢᠲᠡᠭᠡᠢ ᠪᠣᠳᠤ! ᠴᠠᠭᠤᠨ ᠪᠠᠢᠳᠠᠯᠢ ᠰᠠᠢᠨ ᠲᠠᠨᠢᠵᠤ ᠠᠪ᠂ ᠴᠢᠩᠭᠢᠭᠡᠳ ᠶᠠᠫᠤᠨᠳᠤ ᠰᠠᠭᠤᠭᠠ ᠳᠤᠮᠳᠠᠳᠤᠶᠢᠨ ᠲᠡᠷᠡ ᠬᠠᠷᠢᠶᠠᠲᠤᠳᠤ ᠨᠢᠭᠤᠴᠠ ᠮᠡᠳᠡᠭᠡ ᠬᠦᠷᠭᠡᠭᠰᠡᠨ ᠵᠡᠷᠭᠡ ᠭᠣᠣᠯ ᠠᠰᠠᠭᠤᠳᠠᠯᠤᠳᠢᠶᠠᠨ ᠰᠠᠢᠲᠤᠷ ᠪᠣᠳᠤᠵᠤ ᠴᠢᠷᠮᠠᠢᠬᠤ ᠬᠡᠷᠡᠭᠲᠡᠢ᠂ ᠮᠡᠳᠡᠪᠡᠦᠦ?》 ᠭᠡᠪᠡ᠃
ᠣᠶᠤᠨᠪᠠᠲᠤ ᠦᠭᠡ ᠳᠠᠭᠤᠨᠦᠭᠡᠢ ᠰᠠᠭᠤᠨᠠ᠃ ᠡᠨᠡ ᠪᠣᠯ ᠰᠢᠳᠠᠮᠤᠨ ᠤᠬᠠᠭᠠᠨ ᠣᠭᠲᠤ ᠪᠢᠰᠢ ᠭᠡᠳᠡᠭᠢ ᠲᠡᠷᠡ ᠳᠣᠲᠤᠷᠠᠪᠠᠨ ᠲᠣᠳᠤᠷᠬᠠᠢ ᠮᠡᠳᠡᠵᠦ ᠪᠠᠢᠯᠠ᠃ ᠮᠣᠩᠭᠤᠯ ᠬᠥᠮᠦᠨᠢ ᠦᠵᠡᠪᠡᠯ ᠠᠷᠠᠭᠠ ᠰᠢᠳᠦᠪᠡᠨ ᠬᠠᠪᠢᠷᠴᠤ ᠪᠠᠷᠢᠪᠴᠢᠯᠠᠵᠤ ᠬᠣᠷᠢᠬᠤ᠂ ᠠᠯᠠᠵᠤ ᠪᠤᠯᠠᠬᠤᠠᠴᠠ ᠥᠭᠡᠷᠡᠶᠢ ᠮᠡᠳᠡᠳᠡᠭᠦᠭᠡᠢ ᠮᠠᠩ ᠰᠧᠯᠢᠩ ᠶᠠᠭᠠᠬᠢᠭᠠᠳ ᠭᠡᠨᠡᠳᠲᠡᠬᠡᠨ ᠡᠢᠮᠦ ᠶᠡᠬᠡ ᠥᠷᠦᠰᠢᠶᠡᠯ ᠲᠠᠯᠪᠢᠴᠢᠬᠠᠪᠠ?
ᠶᠠᠷᠢᠯᠴᠠᠵᠤ ᠪᠠᠷᠠᠩᠭᠤᠲᠠ ᠲᠤᠰᠭᠠᠢ ᠬᠡᠷᠡᠭᠦᠨ ᠬᠥᠮᠦᠰ ᠣᠶᠤᠨᠪᠠᠲᠤᠶᠢ ᠨᠢᠭᠡ ᠭᠡᠭᠡᠨ ᠰᠠᠷᠠᠭᠤᠯ ᠲᠠᠰᠤᠯᠭᠠᠨᠳᠤ ᠳᠠᠭᠠᠭᠤᠯᠵᠤ ᠣᠷᠤᠪᠠ᠃ ᠲᠡᠭᠡᠭᠡᠳ ᠳᠡᠮᠡᠢ ᠤᠳᠠᠭᠰᠠᠨᠦᠭᠡᠢᠪᠠᠷ ᠬᠠᠭᠠᠰ ᠵᠢᠯᠦᠨ ᠡᠮᠦᠨᠡ ᠪᠠᠢᠭᠤᠯᠭᠠᠳᠠᠭᠠᠨ ᠬᠣᠷᠢᠭᠳᠠᠵᠤ ᠪᠠᠢᠬᠤᠳᠤ ᠬᠡᠷᠡᠭᠯᠡᠵᠦ ᠪᠠᠢᠭᠰᠠᠨ ᠬᠥᠨᠵᠢᠯᠡ ᠳᠡᠪᠢᠰᠭᠡᠷ᠂ ᠡᠳᠦᠷ ᠲᠤᠲᠤᠮᠤᠨ ᠵᠠᠷᠤᠳᠠᠯᠤᠳᠢᠨᠢ ᠪᠦᠷ ᠠᠪᠴᠢᠷᠠᠵᠤ ᠥᠭᠪᠡ᠃
ᠡᠨᠡ ᠡᠳᠦᠷ᠂ ᠣᠶᠤᠨᠪᠠᠲᠤ ᠬᠥᠯ ᠭᠠᠷ ᠡᠪᠡᠳᠬᠦᠪᠡᠨ ᠲᠡᠰᠪᠦᠷᠢᠯᠡᠨ ᠴᠢᠭᠢᠭᠲᠡᠢ ᠬᠥᠨᠵᠢᠯᠡ ᠳᠡᠪᠢᠰᠭᠡᠷᠢᠶᠡᠨ ᠨᠠᠷᠠᠨᠳᠤ ᠳᠡᠯᠭᠡᠨ᠂ ᠪᠥᠭᠡᠰᠦ ᠬᠢᠭᠤᠷᠰᠤ ᠳᠦᠭᠦᠷᠦᠭᠰᠡᠨ ᠬᠤᠪᠴᠠᠰᠤ ᠬᠤᠨᠠᠷᠢᠶᠠᠨ ᠤᠭᠠᠵᠠᠢ᠃ ᠰᠥᠨᠢ ᠪᠣᠯᠬᠤᠳᠤ ᠳᠤᠯᠠᠭᠠᠨ ᠬᠥᠨᠵᠢᠯᠡᠳᠡᠭᠡᠨ ᠰᠢᠷᠭᠤᠵᠤ ᠲᠣᠬᠢᠲᠠᠢ ᠰᠠᠢᠨ ᠤᠨᠲᠠᠶᠠ ᠭᠡᠵᠦ ᠪᠣᠳᠤᠭᠰᠠᠨ ᠪᠣᠯᠪᠠᠴᠤ ᠰᠥᠨᠢᠵᠢᠨ ᠨᠣᠢᠷ ᠬᠦᠷᠦᠭᠰᠡᠨᠦᠭᠡᠢ᠃ ᠰᠧᠯᠢᠩ ᠭᠡᠨᠡᠳᠲᠡ ᠶᠠᠭᠠᠬᠢᠭᠠᠳ ᠨᠠᠮᠠᠢ ᠰᠠᠨᠠᠭᠠᠨᠳᠤ ᠣᠷᠤᠵᠤ᠂ ᠶᠠᠮᠠᠷᠴᠤ ᠥᠴᠢᠭᠦᠭᠡᠢ ᠪᠠᠢᠲᠠᠯᠠ ᠭᠡᠭᠡᠨ ᠰᠠᠷᠠᠭᠤᠯ ᠭᠡᠷᠲᠦ ᠣᠷᠤᠭᠤᠯᠴᠢᠬᠠᠪᠠ ᠳ᠋ᠠ ? ᠭᠡᠬᠦ ᠮᠡᠲᠦᠶᠢᠨ ᠠᠰᠠᠭᠤᠯᠲᠠᠨᠤᠭᠤᠳ ᠲᠠᠷᠢᠬᠢᠨᠳᠤᠨᠢ ᠡᠷᠭᠢᠯᠳᠦᠭᠰᠡᠭᠡᠷ ᠪᠠᠢᠯᠠ᠃ ᠮᠠᠩ ᠰᠧᠯᠢᠩ ᠭᠡᠨᠡᠳᠲᠡ ᠤᠬᠠᠮᠰᠠᠷᠠᠭᠰᠠᠨᠶᠤᠮ ᠭᠡᠵᠦᠦᠦ? ᠥᠪᠦᠷ ᠮᠣᠩᠭᠤᠯᠳᠤ ᠢᠷᠡᠭᠰᠡᠨᠡᠴᠡ ᠨᠠᠰᠢᠬᠢ ᠬᠣᠶᠠᠷ ᠵᠢᠯ ᠭᠠᠷᠤᠢᠬᠠᠨᠤ ᠪᠠᠢᠳᠠᠯᠢᠶᠠᠷᠨᠢ ᠦᠵᠡᠬᠦᠳᠦ ᠲᠡᠢᠮᠦᠴᠦ ᠣᠯᠢᠭᠲᠠᠢ ᠶᠠᠭᠤᠮᠠ ᠪᠢᠰᠢ᠃ ᠲᠡᠷᠡ ᠬᠡᠳᠦᠢᠪᠡᠷ ᠵᠠᠵᠢᠨ ᠦᠰᠦᠪᠡᠨ ᠴᠠᠢᠲᠠᠯᠠ ᠳᠠᠢᠨᠳᠤ ᠶᠠᠪᠤᠭᠰᠠᠨ ᠠᠷᠢᠭᠤᠨ ᠲᠡᠦᠬᠡᠲᠡᠢ ᠭᠡᠳᠡᠭ ᠪᠣᠯᠪᠠᠴᠤ ᠤᠯᠤᠰ ᠲᠥᠷᠦ᠂ ᠲᠥᠷᠦᠶᠢᠨ ᠪᠣᠳᠤᠯᠭᠠᠶᠢᠨ ᠬᠢᠷᠢ ᠬᠡᠮᠵᠢᠶᠡᠨᠢ ᠶᠠᠭᠠᠬᠢᠬᠤᠶᠢᠨ ᠠᠷᠭᠠᠦᠭᠡᠢ ᠳᠣᠣᠷᠠᠶᠤᠮ᠃ ᠵᠥᠪᠬᠡᠨ ᠺᠠᠳ᠋ᠷ ᠬᠡᠷᠡᠭᠯᠡᠬᠦ ᠲᠠᠯᠠᠪᠠᠷ ᠦᠵᠡᠭᠰᠡᠨᠴᠦ ᠮᠡᠳᠡᠵᠦ ᠪᠣᠯᠤᠨᠠ᠃ ᠥᠪᠦᠷ ᠮᠣᠩᠭᠤᠯᠳᠤ ᠡᠯᠡ ᠦᠨᠳᠦᠰᠦᠲᠡᠨᠦ ᠺᠠᠳ᠋ᠷᠴᠤᠳ ᠮᠢᠩᠭᠠ ᠲᠦᠮᠡ ᠪᠠᠢᠲᠠᠯᠠ ᠢᠲᠡᠭᠡᠳᠡᠭᠨᠢ ᠬᠠᠷᠢᠨ ᠠᠯᠢ ᠡᠷᠲᠡ ᠨᠠᠮᠠᠴᠠ ᠬᠥᠭᠡᠭᠡᠭᠳᠡᠭᠰᠡᠨ ᠤᠯᠤᠰ ᠲᠥᠷᠦᠶᠢᠨ ᠵᠠᠪᠰᠢᠭᠴᠢ ᠰᠢᠳᠠᠮᠯᠠ ᠪᠠᠢᠯᠠ᠃ ᠲᠡᠢᠮᠦ ᠬᠥᠮᠦᠨᠢᠶᠡᠷ ᠵᠥᠪᠯᠡᠭᠴᠢ ᠪᠣᠯᠭᠠᠨ ᠵᠠᠮᠴᠢ ᠬᠢᠭᠰᠡᠨ ᠬᠣᠢᠨᠠ᠂ ᠳᠠᠢᠨ ᠪᠠᠢᠯᠳᠤᠭᠠᠨ ᠵᠢᠯᠤᠭᠤᠳᠤᠭᠠᠳ ᠢᠯᠠᠯᠲᠠ ᠣᠯᠬᠤ ᠡᠳᠦᠷ ᠪᠠᠢᠨᠠ ᠭᠡᠵᠦᠦᠦ?
ᠮᠠᠷᠭᠠᠰᠢᠨᠢ ᠣᠶᠤᠨᠪᠠᠲᠤ ᠪᠤᠴᠠᠯᠤᠭᠰᠠᠨ ᠤᠰᠤ ᠠᠪᠬᠤᠪᠠᠷ ᠣᠴᠢᠬᠤ ᠲᠠᠰᠢᠷᠠᠮᠳᠤ ᠠᠰᠠᠷᠤᠨ ᠳᠡᠭᠡᠷᠡ ᠳᠣᠣᠷᠠᠬᠢ ᠲᠤᠰᠠᠭᠠᠷ 《ᠭᠢᠨᠳᠠᠨ》ᠨᠤᠭᠤᠳᠢ ᠨᠢᠭᠡ ᠨᠢᠭᠡᠪᠡᠷ ᠠᠵᠢᠭᠯᠠᠵᠤ ᠦᠵᠡᠭᠰᠡᠨᠴᠢᠨᠢ᠂ ᠵᠢᠵᠢᠭᠬᠡᠨ ᠨᠦᠬᠡ ᠴᠣᠭᠤᠯᠤᠭᠰᠠᠨ ᠡᠭᠦᠳᠡ ᠪᠦᠬᠦᠨᠳᠦ ᠴᠥᠮ ᠪᠦᠳᠦᠭᠦᠨ ᠬᠠᠷᠠ ᠣᠨᠢᠰᠤ ᠡᠯᠭᠦᠭᠡᠰᠦᠲᠡᠢ ᠬᠠᠷᠠᠭᠳᠠᠨᠠ᠃ ᠡᠭᠦᠨᠢ ᠦᠵᠡᠭᠡᠳ ᠣᠶᠤᠨᠪᠠᠲᠤ ᠤᠯᠠᠮ ᠭᠠᠢᠬᠠᠯᠠ᠃ ᠡᠳᠡᠭᠡᠷ ᠬᠣᠷᠢᠭᠳᠠᠵᠤ ᠪᠠᠢᠭᠠ ᠬᠥᠮᠦᠰᠦᠨ ᠳᠤᠮᠳᠠ ᠲᠡᠷᠡ ᠪᠣᠯ ᠬᠠᠮᠤᠭᠤᠨ 《ᠬᠦᠨᠳᠦ ᠶᠠᠯᠠᠲᠠᠨ》 ᠪᠥᠭᠡᠳ ᠮᠠᠩ ᠰᠧᠯᠢᠩ ᠪᠡᠶᠡᠪᠡᠷᠢᠶᠡᠨ ᠰᠣᠨᠢᠨ ᠳᠡᠭᠡᠷᠡ ᠨᠡᠷᠡ ᠳᠤᠷᠠᠳᠤᠨ ᠨᠡᠢᠲᠡᠯᠡᠭᠰᠡᠨ ᠴᠣᠬᠢᠯᠲᠠ ᠥᠭᠬᠦ ᠭᠣᠣᠯ ᠡᠲᠡᠭᠡᠳ ᠪᠢᠯᠡ᠃ ᠭᠡᠲᠡᠯᠡ ᠥᠨᠥᠳᠦᠷ ᠶᠠᠭᠠᠬᠢᠭᠠᠳ ᠭᠠᠭᠴᠠᠭᠠᠷᠢᠨᠢ ᠠᠭᠤᠴᠢᠯᠠᠭᠰᠠᠨᠶᠤᠮ ᠪᠣᠯ? ᠲᠡᠷᠡ᠂ ᠡᠳᠦᠷ ᠰᠥᠨᠢᠦᠭᠡᠢ ᠠᠬᠢᠨ ᠳᠠᠬᠢᠨ ᠪᠣᠳᠤᠭᠰᠠᠨ ᠪᠣᠯᠪᠠᠴᠤ ᠬᠠᠷᠢᠭᠤᠯᠲᠠ ᠥᠭᠴᠦ ᠶᠡᠷᠦ ᠴᠢᠳᠠᠭᠰᠠᠨᠦᠭᠡᠢ᠃
ᠭᠤᠲᠠᠭᠠᠷ ᠡᠳᠦᠷᠦᠨ ᠦᠳᠡᠶᠢᠨ ᠡᠮᠦᠨᠡ᠃ ᠴᠡᠩᠬᠡᠷ ᠨᠣᠭᠤᠭᠠᠨ ᠱᠠᠩᠬᠠᠢ ᠮᠠᠰᠢᠨ ᠨᠢᠰᠦᠨ ᠢᠷᠡᠵᠦ ᠤᠰᠤᠲᠤᠶᠢᠨ ᠠᠵᠢᠯᠴᠢᠨᠤ ᠰᠤᠪᠢᠯᠠᠯᠲᠠᠶᠢᠨ ᠬᠣᠷᠢᠶᠠᠨᠤ ᠭᠣᠣᠯ ᠠᠰᠠᠷᠤᠨ ᠡᠮᠦᠨᠡ ᠵᠣᠭᠰᠤᠪᠠ᠃ ᠮᠠᠰᠢᠨᠠᠴᠠ ᠪᠠᠭᠤᠭᠰᠠᠨ ᠬᠣᠶᠠᠷ ᠴᠡᠷᠢᠭ ᠶᠡᠨᠳᠡᠷ ᠥᠭᠡᠳᠡ ᠶᠠᠭᠠᠷᠠᠨ ᠭᠦᠶᠦᠭᠰᠡᠭᠡᠷ ᠰᠢᠭᠤᠳ ᠰᠢᠳᠠᠮᠤᠨ ᠠᠯᠪᠠᠨ ᠭᠡᠷᠲᠦ ᠣᠷᠤᠪᠠ᠃ ᠲᠡᠭᠡᠭᠡᠳ ᠳᠡᠮᠡᠢ ᠤᠳᠠᠭᠰᠠᠨᠦᠭᠡᠢ᠂ ᠣᠶᠤᠨᠪᠠᠲᠤᠶᠢᠨ ᠰᠠᠭᠤᠵᠤ ᠪᠠᠢᠭᠠ ᠲᠠᠰᠤᠯᠭᠠᠨᠳᠤ ᠲᠡᠷᠡ ᠬᠣᠶᠠᠷ ᠴᠡᠷᠢᠭᠢ ᠳᠠᠭᠠᠭᠤᠯᠵᠤ ᠢᠷᠡᠭᠰᠡᠨ ᠰᠢᠳᠠᠮ᠂ ᠳᠠᠳᠤᠭᠰᠠᠨ ᠵᠠᠩᠰᠢᠯᠢᠶᠠᠷᠢᠶᠠᠨ ᠬᠣᠭᠤᠯᠠᠢᠪᠠᠨ ᠵᠠᠰᠠᠵᠤ:
《ᠴᠢᠨᠦ ᠠᠰᠠᠭᠤᠳᠠᠯ ᠪᠤᠰᠤᠳᠤᠨ ᠬᠢᠲᠡᠢ ᠠᠳᠠᠯᠢᠦᠭᠡᠢ ᠪᠣᠯᠬᠣᠷ ᠮᠠᠩ ᠰᠧᠯᠢᠩᠦᠨ ᠬᠡᠷᠡᠭ ᠡᠷᠬᠢᠯᠡᠬᠦ ᠭᠠᠵᠠᠷᠠᠴᠠ ᠰᠢᠭᠤᠳ ᠬᠠᠮᠢᠶᠠᠷᠬᠤ ᠪᠣᠯᠵᠠᠢ᠃ ᠴᠢ ᠬᠤᠷᠳᠤᠨ ᠲᠡᠷᠭᠡᠨᠳᠦ ᠭᠠᠷ!》 ᠭᠡᠵᠦ ᠣᠶᠤᠨᠪᠠᠲᠤᠶᠢ ᠲᠥᠪ ᠴᠢᠩᠭᠠᠪᠠᠷ ᠵᠠᠷᠯᠢᠭᠳᠠᠯᠠ᠃
ᠲᠡᠷᠭᠡᠨᠳᠦ ᠰᠠᠭᠤᠭᠰᠠᠨᠤ ᠳᠠᠷᠠᠭᠠ ᠡᠮᠦᠨᠡᠬᠢ ᠰᠠᠭᠤᠳᠠᠯᠠᠴᠠ ᠡᠷᠭᠢᠵᠦ ᠬᠠᠷᠠᠭᠰᠠᠨ ᠰᠢᠳᠠᠮ :
《ᠴᠢ ᠬᠡᠵᠢᠶᠡᠳᠡ ᠮᠠᠨᠤᠰᠠᠶᠢ ᠢᠲᠡᠭᠡᠳᠡᠭᠦᠭᠡᠢ ᠪᠣᠯᠬᠣᠷ ᠴᠢᠨᠦ ᠬᠠᠷᠢᠶᠢᠨ ᠬᠠᠷᠢᠴᠠᠭᠠᠶᠢ ᠶᠠᠭᠠᠬᠢᠭᠰᠠᠨᠴᠤ ᠮᠡᠳᠡᠵᠦ ᠴᠢᠳᠠᠬᠤᠦᠭᠡᠢ ᠭᠡᠵᠦ ᠪᠣᠳᠤᠭᠰᠠᠭᠠᠷ ᠢᠷᠡᠵᠡᠢ᠃ ᠭᠡᠲᠡᠯᠡ ᠦᠨᠡᠨᠳᠡᠭᠡᠨ ᠪᠢᠳᠡ ᠲᠥᠪᠦᠨ ᠬᠠᠮᠢᠶᠠ ᠪᠦᠬᠦᠢ ᠪᠠᠢᠭᠤᠯᠭᠠᠪᠠᠷ ᠳᠠᠮᠵᠢᠨ ᠣᠨᠴᠤᠭᠤᠢ ᠠᠷᠭᠠ ᠠᠪᠴᠤ ᠪᠠᠢᠭᠠᠳ ᠶᠠᠫᠤᠨᠳᠤ ᠰᠠᠭᠤᠭᠠ ᠳᠤᠮᠳᠠᠳᠤᠶᠢᠨ ᠬᠠᠷᠢᠶᠠᠲᠤᠶᠢᠨ ᠵᠠᠩᠴᠢᠶᠢ ᠨᠥᠮᠦᠷᠦᠭᠰᠡᠨ ᠲᠠᠩᠨᠠᠭᠤᠯ ᠨᠠᠰᠤᠲᠤ ᠲᠠ ᠬᠣᠶᠠᠷᠤᠨ ᠬᠣᠭᠤᠷᠤᠨᠳᠤᠬᠢ ᠠᠯᠢᠪᠠ ᠨᠢᠭᠤᠴᠠ ᠠᠵᠢᠯᠯᠠᠭᠠᠨᠤᠭᠤᠳᠢᠴᠢᠨᠢ ᠴᠥᠮ ᠡᠵᠡᠮᠰᠢᠭᠡᠳ ᠠᠪᠴᠢᠬᠠᠭᠰᠠᠨ ᠰᠢᠤ᠃ ᠭᠡᠪᠡᠴᠦ ᠴᠢ ᠣᠳᠣ ᠵᠠᠪᠳᠤᠭᠠᠳ ᠲᠤᠰᠢᠶᠠᠬᠤᠳᠤ ᠬᠦᠷᠪᠡᠯ ᠠᠷᠠᠢ ᠣᠷᠤᠢᠲᠠᠬᠤᠪᠠᠷᠴᠤᠦᠭᠡᠢ᠃ ᠪᠢᠳᠡ ᠪᠣᠯ ᠴᠥᠮ ᠦᠭᠡᠭᠦᠦ ᠠᠩᠭᠢᠶᠢᠨ ᠲᠥᠷᠦᠶᠢᠨ ᠪᠣᠳᠤᠯᠭᠠᠶᠢ ᠦᠨᠡᠨᠴᠢᠪᠡᠷ ᠬᠡᠷᠡᠭᠵᠢᠭᠦᠯᠳᠡᠭ ᠤᠯᠤᠰᠶᠤᠮ᠃ ᠴᠢ ᠬᠣᠲᠠᠳᠤ ᠣᠷᠤᠭᠰᠠᠨᠤᠪᠠᠨ ᠳᠠᠷᠠᠭᠠ ᠠᠯᠢᠪᠠᠪᠠᠨ ᠦᠯᠡᠳᠡᠭᠡᠯᠦᠭᠡᠢ ᠲᠤᠢᠯᠪᠤᠷᠢᠲᠠᠢ ᠴᠠᠭᠠᠪᠤᠷᠢᠯᠠᠬᠤ ᠬᠡᠷᠡᠭᠲᠡᠢ! ᠮᠡᠳᠡᠪᠡᠦᠦ?》 ᠭᠡᠵᠦ ᠣᠶᠤᠨᠪᠠᠲᠤᠳᠤ ᠬᠡᠯᠡᠪᠡ᠃
ᠣᠶᠤᠨᠪᠠᠲᠤ ᠲᠡᠭᠦᠨᠲᠡᠢ ᠢᠯᠡᠭᠦᠦ ᠳᠤᠲᠠᠭᠤ ᠨᠤᠷᠱᠤᠬᠤ ᠳᠤᠷᠠᠦᠭᠡᠢ ᠲᠤᠯᠠ:
《ᠨᠠᠳᠠ ᠁ ᠲᠤᠰᠢᠶᠠᠬᠤ ᠶᠠᠭᠤᠮᠠ ᠳᠠᠩᠴᠢ ᠠᠯᠠᠭᠠ!》 ᠭᠡᠵᠦ ᠲᠣᠯᠤᠭᠠᠢ ᠰᠡᠭᠰᠦᠷᠪᠡ᠃
《ᠲᠡᠢᠮᠦ ᠪᠣᠯ ᠴᠢ ᠠᠯᠢ ᠵᠠᠮ ᠵᠠᠮᠨᠠᠬᠤᠪᠠᠨ ᠥᠪᠡᠷᠢᠶᠡᠨ ᠮᠡᠳᠡ!》
ᠪᠠᠭᠠ ᠲᠡᠷᠭᠡ ᠮᠤᠷᠤᠢ ᠰᠠᠷᠤᠢ ᠵᠠᠮᠢᠶᠠᠷ ᠳᠥᠴᠢᠭᠡᠳ ᠮᠢᠨᠦ᠋ᠲ ᠬᠢᠷᠢ ᠭᠦᠶᠦᠭᠡᠳ ᠰᠠᠶᠢ ᠤᠯᠠᠭᠠᠨ ᠲᠣᠭᠤᠰᠭᠠᠨ ᠬᠡᠷᠡᠮᠲᠡᠢ ᠪᠢᠴᠢᠬᠠᠨ ᠬᠦᠷᠢᠶᠡᠨᠳᠦ ᠣᠷᠤᠵᠤ ᠵᠣᠭᠰᠤᠯᠠ᠃ ᠣᠶᠤᠨᠪᠠᠲᠤᠶᠢᠨ ᠭᠡᠮᠲᠦᠭᠰᠡᠨ ᠭᠠᠷᠨᠢ ᠬᠦᠨᠳᠦ ᠶᠠᠭᠤᠮᠠ ᠡᠷᠭᠦᠵᠦ ᠳᠡᠢᠯᠳᠡᠭᠦᠭᠡᠢ ᠪᠣᠯᠬᠣᠷ ᠥᠨᠥ ᠬᠣᠶᠠᠷ ᠴᠡᠷᠢᠭ ᠣᠷᠤ ᠳᠡᠪᠢᠰᠭᠡᠷᠢᠨᠢ ᠰᠤᠢᠪᠳᠠᠵᠤ ᠳᠡᠭᠦᠷᠦᠭᠰᠡᠭᠡᠷ ᠨᠢᠭᠡ ᠰᠠᠢᠬᠠᠨ ᠠᠰᠠᠷᠲᠤ ᠳᠠᠭᠠᠭᠤᠯᠤᠨ ᠣᠷᠤᠪᠠ᠃ ᠡᠨᠡ ᠠᠰᠠᠷ ᠤᠤᠯᠨᠢ ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠣᠷᠤᠨᠤ ᠨᠢᠭᠡᠨ ᠳᠡᠳ᠋ ᠲᠡᠷᠢᠭᠦᠯᠡᠭᠴᠢᠶᠢᠨ ᠰᠠᠭᠤᠵᠤ ᠪᠠᠢᠭᠰᠠᠨ ᠣᠷᠳᠤᠨ ᠪᠢᠯᠡ᠃
ᠣᠶᠤᠨᠪᠠᠲᠤ ᠠᠰᠠᠷᠲᠤ ᠣᠷᠤᠩᠭᠤᠲᠠᠪᠠᠨ ᠮᠡᠯᠡᠷᠡᠴᠢᠬᠡᠪᠡ᠃ ᠡᠨᠡᠴᠢᠨᠢ ᠶᠠᠭᠯᠠ ᠬᠡᠭᠡᠨᠴᠢᠷ ᠰᠠᠢᠬᠠᠨ ᠵᠣᠴᠢᠳᠤᠨ ᠪᠠᠭᠤᠳᠠᠯᠰᠢᠭ᠋ ᠶᠡᠬᠡᠮᠰᠦᠭ ᠪᠥᠭᠡᠳ ᠦᠵᠡᠰᠭᠦᠯᠡᠩ ᠭᠠᠵᠠᠷ ᠪᠠᠢᠭᠠ ᠳ᠋ᠠ᠃ ᠠᠭᠤᠯᠵᠠᠯᠲᠠᠶᠢᠨ ᠥᠷᠦᠭᠡᠨᠳᠦᠨᠢ ᠭᠣᠶᠤ ᠭᠠᠳᠠᠷᠲᠠᠢ ᠵᠥᠭᠡᠯᠡᠨ ᠰᠠᠭᠤᠳᠠᠯᠤᠳᠢ ᠡᠩᠨᠡᠭᠦᠯᠦᠨ ᠲᠠᠯᠪᠢᠵᠠᠢ᠃ ᠰᠢᠯ ᠲᠠᠯᠪᠢᠭᠤᠷ ᠳᠡᠭᠡᠷᠡ ᠲᠤᠰᠭᠠᠢ ᠬᠢᠴᠡᠲᠡᠢ ᠴᠠᠢᠶᠢᠨ ᠰᠠᠪᠠ᠂ ᠲᠠᠮᠠᠬᠢᠨᠤ ᠮᠥᠩᠭᠦᠨ ᠬᠠᠢᠷᠴᠠᠭ ᠪᠠ ᠬᠣᠶᠠᠷ ᠰᠠᠪᠠ ᠰᠢᠯᠪᠢᠲᠡᠢ ᠵᠦᠩᠬᠤᠸᠠ ᠲᠠᠮᠠᠬᠢ ᠬᠠᠷᠠᠭᠳᠠᠨᠠ᠃ ᠭᠡᠷᠡᠯ ᠨᠡᠪᠲᠡᠷᠬᠡᠢ ᠭᠡᠭᠡᠨ ᠰᠠᠷᠠᠭᠤᠯ ᠲᠣᠮᠤ ᠴᠣᠩᠬᠤᠨᠳᠤᠨᠢ ᠬᠤᠸᠠᠷᠲᠠᠢ ᠬᠥᠰᠢᠭᠡ ᠡᠯᠭᠦᠵᠦ᠂ ᠭᠡᠷᠦᠨ ᠳᠥᠷᠪᠡᠨ ᠪᠤᠯᠤᠩᠳᠤᠨᠢ ᠫᠧᠩᠰᠡᠲᠡᠢ ᠰᠣᠷᠭᠤᠭ ᠴᠡᠴᠡᠭᠦᠳ ᠥᠩᠭᠡ ᠢᠯᠭᠠᠷᠠᠨ ᠳᠡᠯᠭᠡᠷᠡᠵᠦ ᠪᠠᠢᠯᠠ᠃ ᠰᠢᠯ ᠨᠢᠭᠤᠷᠲᠠᠢ ᠪᠣᠰᠤᠭᠠ ᠠᠪᠳᠠᠷᠠ ᠪᠣᠯᠤᠨ ᠬᠤᠪᠴᠠᠰᠤᠨ ᠵᠢᠶᠠᠵᠠᠶᠢᠨ ᠬᠣᠭᠤᠷᠤᠨᠳᠤᠬᠢ ᠬᠠᠢᠯᠠᠰᠤᠨ ᠮᠣᠳᠤᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠨᠢᠭᠡ ᠲᠣᠮᠤ ᠵᠢᠷᠤᠭᠲᠤ ᠷᠠᠳᠢᠣ᠋ ᠲᠠᠯᠪᠢᠭᠠᠰᠤᠲᠠᠢ᠃ ᠳᠣᠲᠤᠷᠠ ᠥᠷᠦᠭᠡᠨᠳᠦᠨᠢ ᠫᠦᠷᠱᠲᠦ ᠥᠷᠭᠡᠨ ᠣᠷᠤ᠂ ᠰᠢᠨᠡ ᠮᠠᠶᠢ᠍ᠭᠤᠨ ᠪᠢᠴᠢᠭᠦᠨ ᠰᠢᠷᠡᠭᠡᠲᠡᠢ᠃ ᠡᠨᠡ ᠪᠦᠬᠦᠨᠢ ᠦᠵᠡᠬᠦᠳᠦ ᠣᠷᠴᠢᠮᠤᠨ ᠡᠳᠦᠷ ᠲᠡᠳᠡ ᠨᠠᠷᠢᠨ ᠨᠢᠮᠪᠠᠢ ᠪᠠᠢᠷᠢᠯᠠᠭᠤᠯᠤᠭᠰᠠᠨᠨᠢ ᠲᠤᠩᠴᠤ ᠲᠣᠳᠤᠷᠬᠠᠢ ᠮᠡᠳᠡᠭᠳᠡᠵᠦ ᠪᠠᠢᠯᠠ᠃
ᠦᠳᠡᠶᠢᠨ ᠬᠣᠢᠨᠠ᠂ ᠥᠨᠥ ᠬᠣᠶᠠᠷ ᠴᠡᠷᠢᠭ ᠣᠶᠤᠨᠪᠠᠲᠤᠶᠢ ᠳᠠᠭᠠᠭᠤᠯᠤᠨ ᠠᠪᠠᠴᠢᠵᠤ ᠦᠰᠦᠶᠢᠨᠢ ᠵᠠᠰᠠᠭᠤᠯᠤᠨ ᠰᠠᠬᠠᠯ ᠰᠠᠨᠴᠢᠭᠢᠨᠢ ᠬᠤᠰᠤᠭᠤᠯᠤᠭᠠᠳ ᠪᠡᠶᠡᠶᠢᠨᠢ ᠪᠠᠰᠠ ᠤᠭᠢᠶᠠᠯᠭᠠᠵᠠᠢ᠃ ᠢᠩᠭᠢᠵᠦ ᠪᠠᠷᠠᠭᠠᠳ ᠶᠠᠪᠤᠬᠤᠳᠠᠭᠠᠨ ᠲᠡᠳᠡ:
《ᠴᠢᠨᠦ ᠡᠨᠡ ᠬᠤᠪᠴᠠᠰᠤᠴᠢᠨᠢ ᠦᠵᠡᠬᠦᠳᠦ ᠳᠠᠩᠴᠢ ᠮᠠᠭᠤᠬᠠᠢ᠃ ᠣᠷᠤᠢ ᠲᠡᠰᠢᠪᠡᠨ ᠰᠣᠯᠢᠬᠤ ᠬᠤᠪᠴᠠᠰᠤᠪᠠᠨ ᠠᠪᠴᠢᠷᠠᠭᠤᠯ! ᠴᠢ ᠡᠨᠳᠡ ᠲᠡᠷᠢᠭᠦᠯᠡᠭᠴᠢᠶᠢᠨ ᠵᠣᠬᠢᠶᠠᠯᠢ ᠰᠠᠢᠲᠤᠷ ᠰᠤᠷᠤᠯᠴᠠᠵᠤ᠂ ᠵᠢᠭᠠᠪᠤᠷᠢ ᠬᠦᠯᠢᠶᠡᠨ ᠨᠣᠮᠤᠬᠠᠨ ᠰᠠᠭᠤ! ᠪᠢᠲᠡᠭᠡᠢ ᠳᠤᠷᠠᠪᠠᠷᠢᠶᠠᠨ ᠡᠰᠢ ᠲᠡᠰᠢ ᠶᠠᠪᠤ!》 ᠭᠡᠵᠦ ᠣᠶᠤᠨᠪᠠᠲᠤᠳᠤ ᠵᠠᠷᠯᠢᠭ ᠪᠠᠭᠤᠯᠭᠠᠪᠠ᠃
ᠬᠣᠶᠠᠷ ᠴᠡᠷᠢᠭᠢ ᠶᠠᠪᠤᠭᠰᠠᠨᠤ ᠰᠡᠭᠦᠯᠡᠷ ᠣᠶᠤᠨᠪᠠᠲᠤ ᠳᠡᠭᠡᠳᠦ ᠵᠡᠷᠭᠡᠶᠢᠨ ᠥᠷᠦᠭᠡᠨᠳᠡᠭᠡᠨ ᠣᠷᠤᠵᠤ᠂ ᠲᠣᠮᠤ ᠪᠣᠰᠤᠭᠠ ᠲᠣᠯᠢᠨᠳᠤ ᠵᠢᠰᠦᠪᠡᠨ ᠦᠵᠡᠭᠰᠡᠨᠴᠢᠨᠢ ᠡᠰᠡᠯᠡ ᠪᠡᠶᠡᠪᠡᠨ ᠲᠠᠨᠢᠵᠤ ᠶᠠᠳᠠᠬᠤ ᠠᠯᠳᠠᠯᠠ᠃ ᠤᠤᠯᠤᠨ ᠤᠯᠠᠭᠠ ᠪᠤᠲᠠᠷᠠᠭᠰᠠᠨ ᠴᠢᠭᠢᠷᠠᠭ ᠳᠦᠷᠢᠨᠢ ᠣᠷᠤ ᠪᠠᠷᠠᠦᠭᠡᠢ ᠠᠷᠢᠯᠵᠤ᠂ ᠬᠣᠶᠠᠷ ᠬᠠᠴᠠᠷᠨᠢ ᠤᠲᠤᠭᠠᠲᠠᠢ ᠴᠠᠭᠠᠰᠤᠰᠢᠭ᠋ ᠰᠢᠷᠠᠯᠠᠨ ᠴᠠᠢᠪᠠᠢᠭᠠᠳ ᠤᠯᠠᠮᠴᠤ ᠲᠦᠨᠲᠦᠢᠵᠦ᠂ ᠪᠣᠰᠤᠭᠠ ᠬᠠᠮᠠᠷᠨᠢ ᠨᠡᠩ ᠪᠦᠳᠦᠭᠦᠨ ᠬᠠᠷᠠᠭᠳᠠᠬᠤᠰᠢᠭ᠋ ᠪᠣᠯᠵᠠᠢ᠃ ᠭᠠᠭᠴᠠᠬᠦ ᠰᠢᠷᠭᠢᠵᠦ ᠰᠠᠭᠤᠭᠰᠠᠨ ᠬᠣᠣᠰ ᠨᠢᠳᠦᠨᠡᠴᠡᠨᠢ ᠣᠴᠢ ᠪᠠᠳᠠᠷᠠᠨ᠂ ᠤᠤᠯᠤᠨ ᠴᠣᠭ ᠵᠢᠪᠬᠤᠯᠠᠩᠲᠤ ᠳᠦᠷᠰᠦᠪᠡᠨ ᠬᠠᠳᠠᠭᠠᠯᠠᠭᠰᠠᠭᠠᠷ ᠪᠠᠢᠯᠠ᠃ ᠮᠠᠩᠨᠠᠢ ᠳᠡᠭᠡᠷᠡᠨᠢ ᠭᠤᠷᠪᠠᠨ ᠬᠤᠷᠤᠭᠤ ᠬᠢᠷᠢᠲᠡᠢ ᠤᠷᠲᠤ ᠰᠢᠨᠡ ᠰᠣᠷᠪᠢ ᠨᠡᠮᠡᠭᠳᠡᠵᠦ᠂ ᠵᠡᠭᠦᠨ ᠴᠢᠬᠢᠨᠢ ᠶᠠᠭᠯᠠ ᠬᠠᠲᠠᠭᠰᠠᠨ ᠮᠥᠭᠦᠰᠢᠭ ᠪᠣᠯᠵᠤ ᠦᠵᠡᠬᠦᠶᠢᠨ ᠳᠦᠷᠢᠪᠡᠨ ᠠᠯᠳᠠᠵᠠᠢ᠃ ᠬᠠᠭᠤᠴᠢᠨ ᠬᠥᠪᠦᠩᠲᠡᠢ ᠣᠯᠤᠨᠳᠠᠢᠨᠢ ᠴᠢᠰᠤ ᠨᠥᠵᠢᠳᠦ ᠪᠢᠯᠳᠠᠭᠳᠠᠵᠤ ᠲᠣᠪᠴᠢ ᠰᠢᠯᠪᠢ ᠭᠡᠵᠦ ᠨᠢᠭᠡᠴᠦ ᠦᠯᠡᠳᠡᠭᠰᠡᠨᠦᠭᠡᠢ᠃ ᠵᠠᠭᠠᠮᠠ ᠪᠣᠯᠤᠨ ᠵᠡᠭᠦᠨ ᠬᠠᠨᠴᠤᠢᠨᠢ ᠤᠷᠠᠭᠳᠠᠭᠠᠳ ᠬᠥᠪᠦᠩᠨᠢ ᠭᠣᠭᠤᠵᠢᠵᠤ ᠪᠠᠢᠪᠠ᠃ ᠣᠶᠤᠨᠪᠠᠲᠤ ᠲᠣᠯᠢᠨᠤ ᠡᠮᠦᠨᠡ ᠪᠡᠶᠡᠪᠡᠨ ᠦᠵᠡᠵᠦ ᠵᠣᠭᠰᠤᠵᠤ ᠪᠠᠢᠭᠠᠳ ᠥᠪᠡᠷᠦᠨ ᠡᠷᠬᠡᠦᠭᠡᠢ ᠢᠨᠢᠶᠡᠳᠦ ᠬᠦᠷᠴᠦ: 《ᠠᠩᠬᠠᠨᠳᠠᠭᠠᠨ ᠡᠭᠦᠨᠢᠴᠢᠨᠢ ᠬᠥᠮᠦᠰᠦᠨ ᠰᠦᠨᠡᠰᠦᠶᠢ ᠬᠥᠨᠳᠡᠬᠦ ᠶᠡᠬᠡ ᠬᠤᠪᠢᠰᠭᠠᠯ ᠭᠡᠵᠦ ᠪᠠᠢᠭᠰᠠᠨᠴᠢᠨᠢ ᠣᠳᠣ ᠦᠵᠡᠬᠦᠳᠦ ᠬᠠᠷᠢᠨ ᠠᠷᠠᠰᠤ ᠮᠢᠬᠠᠲᠠᠢ ᠬᠡᠯᠡᠯᠴᠡᠬᠦ ᠶᠡᠬᠡ ᠬᠤᠪᠢᠰᠭᠠᠯᠶᠤᠮ ᠪᠠᠢᠨᠠ᠃ ᠦᠨᠡᠬᠡᠷ ᠬᠡᠮᠵᠢᠶᠡᠦᠭᠡᠢ ᠶᠡᠬᠡ ᠣᠯᠤᠯᠲᠠᠲᠠᠢ ᠁ ᠬᠡᠮᠵᠢᠶᠡᠦᠭᠡᠢ ᠁》 ᠭᠡᠵᠦ ᠭᠠᠭᠴᠠᠭᠠᠷ ᠥᠭᠦᠯᠡᠨᠡ᠃
ᠣᠷᠤᠢ᠂ ᠬᠥᠮᠦᠰᠢ ᠬᠣᠭᠤᠯᠠᠨ ᠢᠳᠡᠵᠦ ᠪᠠᠷᠠᠭᠰᠠᠨᠤ ᠳᠠᠷᠠᠭᠠ ᠣᠶᠤᠨᠪᠠᠲᠤ ᠬᠤᠪᠢᠰᠭᠠᠯᠤᠨ ᠵᠥᠪᠯᠡᠯᠦᠨ ᠬᠣᠭᠤᠯᠠᠨ ᠭᠡᠷᠲᠦ ᠰᠡᠮᠡᠭᠡᠷ ᠣᠴᠢᠵᠤ ᠬᠣᠶᠠᠷ ᠮᠠᠨᠲᠠᠤ ᠬᠤᠳᠠᠯᠳᠤᠵᠤ ᠠᠪᠴᠢᠷᠠᠭᠠᠳ ᠢᠳᠡᠵᠦ ᠪᠠᠢᠲᠠᠯᠠ ᠭᠡᠨᠡᠳᠲᠡ ᠡᠭᠦᠳᠡ ᠲᠣᠭᠰᠢᠬᠤ 《ᠳᠣᠭ ᠳᠣᠭ》 ᠳᠠᠭᠤᠨ ᠰᠣᠨᠤᠰᠳᠠᠯᠠ᠃ ᠣᠶᠤᠨᠪᠠᠲᠤ ᠲᠡᠷᠢᠭᠦᠨ ᠡᠷᠭᠦᠨ ᠦᠵᠡᠪᠡᠯ᠂ ᠵᠢᠰᠦ ᠴᠢᠷᠠᠢᠨᠢ ᠲᠤᠷᠠᠵᠤ ᠱᠤᠪᠲᠤᠢᠭᠰᠠᠨ ᠨᠢᠭᠡ ᠪᠦᠰᠡᠭᠦᠢ ᠭᠠᠷᠲᠠᠭᠠᠨ ᠪᠣᠭᠤᠳᠠᠯᠲᠠᠢ ᠶᠠᠭᠤᠮᠠ ᠳᠡᠭᠦᠵᠢᠯᠡᠭᠰᠡᠭᠡᠷ ᠣᠷᠤᠵᠤ ᠢᠷᠡᠪᠡ᠃
ᠭᠱᠠᠨ ᠵᠠᠭᠤᠷᠠ ᠲᠡᠷᠡ ᠪᠦᠰᠡᠭᠦᠢ ᠪᠤᠷᠤᠭᠤ ᠭᠡᠷᠲᠦ ᠣᠷᠤᠵᠤ ᠢᠷᠡᠭᠰᠡᠨᠶᠦᠮᠰᠢᠭ ᠪᠠᠭᠠ ᠲᠦᠭᠳᠡᠷᠡᠨ ᠵᠣᠭᠰᠤᠵᠤ ᠨᠠᠮ ᠳᠠᠭᠤᠨᠢᠶᠠᠷ 《ᠶᠣᠬᠤ!》 ᠭᠡᠵᠦ ᠠᠪᠤᠭᠠᠳ ᠬᠣᠢᠰᠢ ᠤᠬᠤᠷᠢᠬᠤ ᠭᠡᠲᠡᠯᠡ᠂ ᠣᠶᠤᠨᠪᠠᠲᠤᠶᠢᠨ ᠨᠢᠳᠦ ᠭᠡᠷᠡᠯᠲᠦᠨ ᠭᠣᠣᠯ ᠵᠢᠷᠦᠬᠡᠨᠢ ᠴᠡᠴᠡᠷᠡᠬᠦᠰᠢᠭ ᠪᠣᠯᠵᠤ ᠭᠦᠶᠦᠨ ᠪᠣᠰᠬᠤᠶᠢᠨ ᠵᠡᠷᠭᠡᠴᠡᠭᠡᠪᠡᠷ:
《ᠲᠣᠷᠭᠠᠨ -》 ᠭᠡᠵᠦ ᠥᠪᠡᠷᠦᠨ ᠡᠷᠬᠡᠦᠭᠡᠢ ᠡᠬᠡᠨᠡᠷᠦᠨᠢᠶᠡᠨ ᠨᠡᠷᠡᠪᠡᠷ ᠳᠠᠭᠤᠳᠠᠪᠠ᠃
ᠲᠡᠷᠡ ᠪᠦᠰᠡᠭᠦᠢ ᠰᠣᠴᠢᠰᠬᠢᠨ ᠪᠠᠬᠠᠨ ᠮᠡᠯᠡᠷᠡᠵᠦ:
《ᠴᠢᠮᠢᠨᠢ ᠮᠥᠨᠶᠦᠮᠦᠦ?》 ᠭᠡᠵᠦ ᠴᠡᠴᠡᠷᠭᠡᠨᠡᠭᠰᠡᠨ ᠳᠠᠭᠤᠨᠢᠶᠠᠷ ᠬᠡᠯᠡᠭᠡᠳ ᠭᠠᠷᠲᠠᠬᠢ ᠪᠣᠭᠤᠳᠠᠯᠢᠶᠠᠨ ᠬᠥᠰᠡᠷ ᠠᠯᠳᠠᠵᠤ᠂ ᠣᠶᠤᠨᠪᠠᠲᠤᠶᠢᠨ ᠵᠦᠭ ᠭᠦᠶᠦᠨ ᠢᠷᠡᠭᠡᠳ ᠭᠠᠷᠠᠴᠠᠨᠢ ᠪᠠᠵᠠᠭᠳᠠᠨ ᠠᠪᠤᠯᠠ᠃ ᠠᠷᠠᠰᠤ ᠶᠠᠰᠤᠯᠠ ᠦᠯᠡᠳᠡᠭᠰᠡᠨ ᠬᠣᠶᠠᠷ ᠬᠣᠣᠰ ᠲᠤᠷᠠᠩᠬᠠᠢ ᠭᠠᠷ ᠬᠠᠷᠢᠯᠴᠠᠨ ᠴᠢᠩᠭᠠ ᠠᠳᠭᠤᠯᠴᠠᠨ᠂ ᠬᠣᠲᠤᠢᠵᠤ ᠰᠠᠭᠤᠭᠰᠠᠨ ᠬᠣᠶᠠᠷ ᠬᠣᠣᠰ ᠨᠢᠳᠦᠨᠳᠦᠨᠢ ᠬᠠᠯᠠᠭᠤᠨ ᠨᠢᠯᠪᠤᠰᠤ ᠮᠡᠯᠲᠡᠭᠡᠨᠡᠨᠡ᠃
ᠲᠣᠷᠭᠠᠨᠲᠠᠯᠠ᠂ ᠡᠷᠡᠶᠢᠨᠢᠶᠡᠨ ᠪᠤᠭᠤᠷᠤᠯ ᠰᠠᠨᠴᠢᠭᠢ ᠵᠥᠭᠡᠯᠡᠨ ᠢᠯᠪᠢᠭᠰᠡᠭᠡᠷ᠂ ᠬᠠᠯᠠᠭᠤᠨ ᠳᠣᠲᠤᠨᠤ ᠪᠥᠭᠡᠳ ᠣᠶᠤᠨᠪᠠᠲᠤᠶᠢᠨ ᠤᠳᠠᠲᠠᠯᠠ ᠣᠯᠵᠤ ᠰᠣᠨᠤᠰᠤᠭᠠᠦᠭᠡᠢ ᠶᠠᠪᠤᠭᠰᠠᠨ ᠮᠣᠩᠭᠤᠯ ᠦᠭᠡᠪᠡᠷ:
《ᠴᠢᠮᠠᠲᠠᠢ ᠠᠮᠢᠳᠤ ᠠᠭᠤᠯᠵᠠᠨᠠ ᠭᠡᠵᠦ ᠰᠠᠨᠠᠭᠰᠠᠨᠦᠭᠡᠢ᠂ ᠴᠢ᠂ ᠁ ᠴᠢᠮᠢᠨᠢ ᠳᠡᠩᠳᠡᠭᠦᠦ ᠶᠡᠬᠡ ᠬᠠᠯᠠ ᠠᠮᠰᠠᠯᠠ ᠪᠢᠵᠡ? ᠬᠦᠨᠳᠦ ᠰᠢᠷᠬᠠᠲᠤᠪᠠᠤᠤ?》 ᠭᠡᠵᠦ ᠣᠶᠤᠨᠪᠠᠲᠤᠶᠢᠨ ᠨᠢᠭᠤᠷ ᠴᠢᠷᠠᠢᠶᠢ ᠨᠠᠷᠢᠨ ᠰᠢᠨᠵᠢᠨᠡ᠃ ᠲᠡᠭᠦᠨᠦ ᠮᠠᠩᠨᠠᠢ ᠳᠡᠭᠡᠷᠡᠬᠢ ᠭᠦᠨ ᠰᠣᠷᠪᠢ ᠪᠣᠯᠤᠨ ᠬᠡᠪ ᠠᠯᠳᠠᠭᠰᠠᠨ ᠮᠠᠭᠤ ᠴᠢᠬᠢᠶᠢᠨᠢ ᠦᠵᠡᠭᠡᠳ ᠲᠣᠷᠭᠠᠨᠲᠠᠯᠠ ᠥᠷᠦ ᠡᠪᠡᠳᠦᠨ ᠬᠠᠢᠷᠠᠯᠠᠭᠰᠠᠨ ᠰᠡᠳᠭᠢᠯᠭᠡᠪᠡᠨ ᠳᠠᠷᠤᠵᠤ ᠶᠠᠳᠠᠨ᠂ ᠨᠢᠭᠤᠷ ᠳᠦᠭᠦᠷᠡᠩ ᠨᠢᠯᠪᠤᠰᠤ ᠠᠰᠭᠠᠷᠠᠭᠤᠯᠤᠨ 《ᠥᠭᠡᠷᠡ ᠬᠠᠮᠢᠭᠠᠴᠢᠨᠢ ᠰᠢᠷᠬᠠᠲᠤᠪᠠ?》 ᠭᠡᠳ ᠰᠢᠷᠬᠠ ᠰᠣᠷᠪᠢᠨᠤᠭᠤᠳᠢᠨᠢ ᠬᠥᠩᠭᠡᠬᠡᠨ ᠲᠡᠮᠲᠡᠷᠢᠵᠦ ᠠᠰᠠᠭᠤᠯᠠ᠃
《ᠥᠭᠡᠷᠡ ᠪᠠᠢᠬᠤᠦᠭᠡᠢ!》 ᠭᠡᠵᠦ ᠣᠶᠤᠨᠪᠠᠲᠤ ᠡᠬᠡᠨᠡᠷᠦᠨᠢᠶᠡᠨ ᠵᠣᠪᠠᠬᠤᠠᠴᠠ ᠪᠣᠯᠭᠤᠮᠵᠢᠯᠠᠨ᠂ ᠭᠠᠷ ᠬᠥᠯ᠂ ᠨᠢᠷᠤᠭᠤᠨᠤ ᠰᠢᠷᠬᠠᠪᠠᠨ ᠦᠵᠡᠭᠦᠯᠦᠭᠰᠡᠨᠦᠭᠡᠢ᠃
《ᠴᠢ ᠬᠡᠵᠢᠶᠡ ᠡᠨᠳᠡ ᠢᠷᠡᠪᠡ?》
《ᠥᠨᠥ ᠦᠳᠡᠶᠢᠨ ᠡᠮᠦᠨᠡ᠃ ᠴᠢ ᠬᠠᠮᠢᠭᠠᠠᠴᠠ ᠢᠷᠡᠪᠡ ᠳ᠋ᠠ ?》
《ᠪᠠᠢᠭᠤᠯᠭᠠᠶᠢᠨ ᠲᠤᠰᠠᠭᠠᠷᠯᠠᠬᠤ ᠭᠡᠷᠡᠴᠡ ᠢᠷᠡᠯᠡ᠃ ᠪᠢ ᠰᠠᠶᠢ ᠮᠠᠨᠤ ᠶᠠᠭᠤᠮᠠ ᠬᠡᠦᠮᠡᠶᠢ ᠠᠪᠠᠴᠢᠵᠤ ᠬᠤᠷᠢᠶᠠᠭᠰᠠᠨ ᠮᠠᠰᠢᠨ ᠲᠡᠷᠭᠡᠨᠦ ᠬᠥᠮᠦᠷᠭᠡᠳᠦ ᠣᠴᠢᠵᠤ᠂ ᠪᠠᠢᠳᠠᠭ ᠵᠢᠭᠠᠬᠠᠨᠢᠶᠠᠨ ᠣᠩᠭᠢᠴᠢᠨ ᠠᠭᠤᠳᠠᠯᠵᠤ ᠪᠠᠢᠭᠠᠳ ᠳᠥᠩᠭᠡᠵᠢ ᠨᠢᠭᠡ ᠵᠠᠬᠠ ᠬᠤᠪᠴᠠᠰᠤ ᠣᠯᠵᠤ ᠢᠷᠡᠯᠡ᠃ 》
《ᠬᠡᠦᠬᠡᠳᠮᠢᠨᠢ ᠬᠠᠮᠢᠭᠠ ᠪᠠᠢᠨᠠ ᠳ᠋ᠠ ? ᠴᠠᠰᠤᠴᠠᠭᠠᠨᠮᠢᠨᠢ?》
《ᠬᠥᠳᠡᠭᠡ ᠪᠠᠭᠤᠯᠭᠠᠴᠢᠬᠠᠭᠰᠠᠨ ᠠ᠋》 ᠭᠡᠳ ᠲᠣᠷᠭᠠᠨᠲᠠᠯᠠ ᠭᠠᠷ ᠠᠯᠴᠢᠭᠤᠷᠢᠶᠠᠨ ᠭᠠᠷᠭᠠᠵᠤ ᠨᠢᠯᠪᠤᠰᠤᠪᠠᠨ ᠠᠷᠴᠢᠭᠰᠠᠭᠠᠷ 《ᠴᠠᠭᠠᠨ ᠰᠠᠷᠠᠠᠴᠠ ᠡᠮᠦᠨᠡᠬᠡᠨ ᠡᠷᠡᠭᠦᠯ ᠬᠠᠮᠠᠭᠠᠯᠠᠯᠤᠨ ᠰᠢᠰᠲᠧᠮᠦᠨ ᠬᠢᠨᠦ 〈ᠰᠤᠷᠭᠠᠨ ᠬᠥᠮᠦᠵᠢᠭᠦᠯᠵᠦ ᠪᠣᠯᠬᠤ ᠦᠷᠡ ᠬᠡᠦᠬᠡᠳ〉ᠲᠠᠢ ᠬᠠᠮᠲᠤ ᠥᠪᠦᠷ ᠮᠣᠩᠭᠤᠯ᠂ ᠱᠠᠨ ᠱᠢ᠂ ᠾᠧᠪᠧᠢ ᠭᠤᠷᠪᠠᠨ ᠮᠤᠵᠢ ᠣᠷᠤᠨᠤ ᠠᠭᠤᠯᠵᠠᠷᠲᠠᠬᠢ ᠨᠢᠭᠡᠨ ᠦᠢᠯᠡᠳᠪᠦᠷᠢᠯᠡᠯᠦᠨ ᠪᠠᠷᠢᠭᠠᠳᠠᠳᠤ ᠪᠠᠭᠤᠵᠠᠢ》 ᠭᠡᠪᠡ᠃
ᠴᠠᠰᠤᠴᠠᠭᠠᠨ ᠪᠣᠯ ᠡᠳᠡ ᠬᠣᠶᠠᠷᠤᠨ ᠴᠤᠷᠤᠨ ᠭᠠᠭᠴᠠ ᠬᠡᠦᠬᠡᠳ ᠪᠣᠯᠬᠣᠷ ᠡᠴᠢᠭᠡᠨᠢ ᠲᠡᠭᠦᠨᠢ ᠲᠤᠢᠯᠢᠶᠠᠷ ᠬᠠᠢᠷᠠᠯᠠᠨ ᠰᠠᠨᠠᠳᠠᠭ ᠪᠢᠯᠡ᠃ ᠬᠡᠷᠪᠡ ᠣᠶᠤᠨᠪᠠᠲᠤᠶᠢᠨ ᠠᠮᠢ ᠨᠠᠰᠤᠨᠳᠤ ᠬᠦᠴᠦᠲᠦ ᠲᠤᠯᠭᠠᠭᠤᠷᠢ ᠪᠣᠯᠤᠭᠰᠠᠨ ᠡᠨᠡᠬᠦ ᠦᠷᠡ ᠪᠠᠢᠭᠰᠠᠨᠦᠭᠡᠢ ᠪᠣᠯ ᠲᠡᠷᠡ ᠠᠯᠢ ᠬᠡᠳᠦᠢᠨ ᠬᠥᠮᠦᠨᠦ ᠣᠷᠴᠢᠯᠠᠩᠠᠴᠠ ᠠᠩᠭᠢᠵᠢᠷᠠᠭᠰᠠᠨ ᠪᠠᠢᠵᠠᠢ᠃ ᠬᠦᠨᠳᠦ ᠬᠡᠴᠡᠭᠦᠦ ᠡᠷᠡᠭᠦᠦ ᠲᠠᠮᠤᠶᠢᠨ ᠳᠣᠣᠷᠠ ᠰᠡᠳᠭᠢᠯ ᠰᠠᠨᠠᠭᠠ᠂ ᠶᠠᠰᠤ ᠮᠢᠬᠠᠨᠤ ᠳᠠᠷᠤᠯᠲᠠ ᠵᠣᠪᠠᠯᠠᠩ ᠲᠡᠭᠦᠨᠢ ᠨᠢᠭᠡᠮᠦᠰᠦᠨ ᠴᠥᠬᠦᠷᠡᠭᠦᠯᠦᠭᠰᠡᠨ ᠦᠶᠡᠳᠦ ᠬᠠᠢᠷᠠᠲᠤ ᠬᠡᠦᠬᠡᠨᠦ ᠬᠢᠨᠢ 《ᠠᠪᠤᠮᠢᠨᠢ ᠲᠠ ᠨᠠᠮᠠᠶ᠋ᠢᠪᠠᠨ ᠰᠠᠨᠠᠪᠠᠯ ᠶᠠᠭᠠᠬᠢᠭᠰᠠᠨᠴᠤ ᠠᠮᠢᠳᠤ ᠬᠠᠷᠢᠵᠤ ᠢᠷᠡᠬᠦ ᠶᠣᠰᠤᠲᠠᠢ! ᠮᠡᠨᠳᠦ ᠰᠠᠢᠨ ᠬᠠᠷᠢᠵᠤ ᠢᠷᠡᠬᠦᠶᠢᠴᠢᠨᠢ ᠬᠦᠯᠢᠶᠡᠵᠦ ᠪᠠᠢᠶᠠ》 ᠭᠡᠰᠡᠨ ᠴᠢᠬᠢᠨᠳᠦ ᠰᠣᠨᠤᠰᠭᠠᠯᠲᠠᠢ ᠬᠥᠭᠡᠷᠦᠬᠦᠨ ᠳᠠᠭᠤᠨᠢ ᠴᠡᠭᠡᠵᠢᠨᠳᠦᠨᠢ ᠬᠡᠵᠢᠶᠡᠳᠡ ᠬᠠᠳᠠᠩᠰᠢᠭᠰᠠᠭᠠᠷ ᠢᠷᠡᠭᠰᠡᠨ ᠪᠢᠯᠡ᠃
ᠲᠡᠷᠡ ᠬᠡᠦᠬᠡᠨᠢᠶᠡᠨ ᠰᠠᠨᠠᠭᠠᠳ ᠨᠢᠳᠦᠨᠳᠦᠨᠢ ᠵᠠᠢᠷ ᠭᠦᠶᠦᠵᠦ:
《ᠬᠡᠦᠬᠡᠨᠢᠶᠡᠨ ᠶᠠᠭᠤᠨᠳᠤ ᠲᠡᠢᠮᠦ ᠬᠣᠯᠠ ᠶᠠᠪᠤᠭᠤᠯᠴᠢᠬᠠᠪᠠ ᠳ᠋ᠠ ?》 ᠭᠡᠵᠦ ᠡᠬᠡᠨᠡᠷᠢᠶᠡᠨ ᠵᠢᠮᠡᠯᠡᠵᠦ ᠠᠰᠠᠭᠤᠭᠰᠠᠨᠳᠤ ᠲᠣᠷᠭᠠᠨᠲᠠᠯᠠ :
《ᠲᠡᠷᠡᠴᠢᠨᠢ ᠮᠠᠨᠤ ᠰᠠᠨᠠᠭᠠᠪᠠᠷ ᠪᠣᠯᠴᠢᠬᠠᠳᠠᠭ ᠶᠠᠭᠤᠮᠠ ᠪᠢᠰᠢ ᠰᠢᠤ᠃ ᠤᠷᠪᠠᠬᠤᠠᠴᠠ ᠠᠶᠤᠭᠰᠠᠨ ᠪᠣᠯᠤᠯᠲᠠᠢ》 ᠭᠡᠳ ᠪᠤᠷᠤᠭᠤ ᠬᠠᠷᠠᠵᠤ ᠵᠥᠭᠡᠯᠡᠨ ᠰᠠᠭᠤᠳᠠᠯ ᠳᠡᠭᠡᠷᠡ ᠰᠠᠭᠤᠭᠠᠳ: 《ᠣᠷᠤᠬᠤ ᠭᠡᠷ ᠣᠭᠤᠴᠢᠬᠤ ᠠᠶᠠᠭᠠᠦᠭᠡᠢ ᠡᠨᠳᠡ ᠲᠡᠨᠳᠡ ᠲᠡᠨᠦᠵᠦ᠂ ᠡᠨᠡ ᠬᠠᠮᠲᠤ ᠰᠤᠷᠤᠭᠴᠢᠶᠢᠨᠳᠠᠭᠠᠨ ᠨᠢᠭᠡ ᠬᠣᠨᠤᠵᠤ᠂ ᠲᠡᠷᠡ ᠨᠠᠢᠵᠠᠶᠢᠨᠳᠠᠭᠠᠨ ᠬᠣᠶᠠᠷ ᠬᠣᠨᠤᠵᠤ ᠶᠠᠪᠤᠭᠰᠠᠨᠠᠴᠠ ᠳᠡᠭᠡᠷᠡ ᠪᠢᠰᠢᠦᠦ᠂ ᠠᠵᠢᠯᠴᠢᠨ ᠲᠠᠷᠢᠶᠠᠴᠢᠨ ᠲᠦᠮᠡᠨᠲᠡᠢ ᠬᠠᠮᠲᠤ ᠠᠮᠢᠳᠤᠷᠠᠵᠤ ᠬᠠᠮᠲᠤ ᠬᠥᠳᠡᠯᠮᠦᠷᠢᠯᠡᠵᠦ ᠪᠠᠢᠪᠠᠯ ᠬᠣᠵᠢᠮᠤᠨ ᠦᠢᠯᠡᠰᠲᠦᠨᠢ ᠲᠤᠰᠠᠲᠠᠢ ᠰᠢᠳᠡ》 ᠭᠡᠪᠡ᠃
ᠣᠶᠤᠨᠪᠠᠲᠤ ᠲᠣᠯᠤᠭᠠᠢ ᠳᠣᠬᠢᠭᠰᠠᠭᠠᠷ ᠡᠬᠡᠨᠡᠷᠦᠨᠢᠶᠡᠨ ᠬᠠᠵᠠᠭᠤᠳᠤ ᠨᠠᠭᠠᠯᠳᠤᠵᠤ ᠰᠠᠭᠤᠪᠠ᠃
ᠰᠡᠳᠭᠢᠯ ᠰᠠᠨᠠᠭᠠᠨᠢ ᠪᠠᠬᠠᠨ ᠲᠣᠭᠲᠠᠭᠤᠨ ᠪᠣᠯᠤᠭᠰᠠᠨᠤ ᠰᠡᠭᠦᠯᠡᠷ ᠨᠢᠳᠦᠨ ᠡᠮᠦᠨᠡᠬᠢ ᠲᠣᠮᠤ ᠠᠰᠠᠭᠤᠯᠲᠠᠨᠢ ᠡᠨᠡ ᠡᠷᠡ ᠡᠮᠡ ᠬᠣᠶᠠᠷᠤᠨ ᠲᠠᠷᠢᠬᠢᠨᠳᠤ ᠵᠡᠷᠭᠡᠪᠡᠷ ᠣᠷᠤᠵᠤ ᠢᠷᠡᠯᠡ᠃
《ᠡᠨᠡᠴᠢᠨᠢ ᠮᠠᠨᠢ ᠴᠣᠬᠤᠮ ᠶᠠᠭᠠᠬᠢᠬᠤ ᠭᠡᠵᠦ ᠪᠠᠢᠭᠠᠶᠤᠮ?》 ᠭᠡᠵᠦ ᠲᠣᠷᠭᠠᠨᠲᠠᠯᠠ ᠨᠢᠳᠦᠪᠡᠨ ᠪᠦᠯᠲᠡᠢᠯᠭᠡᠨ ᠭᠠᠢᠬᠠᠭᠰᠠᠨ ᠮᠥᠷᠲᠡᠭᠡᠨ ᠰᠡᠷᠡᠮᠵᠢᠯᠡᠭᠰᠡᠨ ᠬᠠᠷᠠᠴᠠᠪᠠᠷ ᠡᠨᠡᠬᠦ ᠬᠡᠭᠡᠨᠴᠢᠷ ᠭᠤᠸᠠᠯᠢᠭ ᠣᠷᠳᠤᠨ ᠮᠡᠲᠦ ᠰᠠᠢᠬᠠᠨ ᠥᠷᠦᠭᠡᠶᠢ ᠰᠢᠨᠵᠢᠭᠰᠡᠭᠡᠷ ᠠᠰᠠᠭᠤᠬᠤᠳᠤ:
《ᠮᠡᠳᠡᠬᠦᠦᠭᠡᠢ᠂ ᠪᠢ ᠶᠠᠭᠠᠬᠢᠵᠤ ᠪᠣᠳᠤᠭᠠᠳᠴᠤ ᠤᠬᠠᠭᠠᠨᠢᠨᠢ ᠣᠯᠬᠤᠦᠭᠡᠢ ᠪᠠᠢᠭᠰᠠᠭᠠᠷ ᠠ᠋》 ᠭᠡᠵᠦ ᠣᠶᠤᠨᠪᠠᠲᠤ ᠲᠣᠯᠤᠭᠠᠢ ᠰᠡᠭᠰᠦᠷᠦᠭᠡᠳ: 《ᠡᠳᠡᠨᠦᠰᠡ ᠴᠣᠬᠤᠮ ᠶᠠᠮᠠᠷ ᠤᠬᠠᠭᠠᠨ ᠭᠠᠷᠭᠠᠵᠤ ᠪᠠᠢᠬᠤᠶᠢ ᠪᠤᠤ ᠮᠡᠳᠡ! ᠪᠢ ᠶᠠᠭᠠᠬᠢᠭᠰᠠᠨᠴᠤ ᠲᠠᠭᠠᠮᠠᠭᠯᠠᠵᠤ ᠣᠯᠬᠤᠦᠭᠡᠢ ᠪᠠᠢᠨᠠ》 ᠭᠡᠵᠦ ᠨᠠᠮ ᠬᠡᠯᠡᠪᠡ᠃
ᠰᠡᠷᠭᠡᠭ ᠴᠣᠪᠤᠭᠤ ᠵᠠᠩᠲᠠᠢ ᠲᠣᠷᠭᠠᠨᠲᠠᠯᠠ᠂ ᠪᠠᠢᠰᠢᠩᠤᠨ ᠥᠨᠴᠦᠭ ᠪᠤᠯᠤᠩᠠᠴᠠ ᠠᠪᠤᠭᠠᠳ ᠪᠠᠢᠳᠠᠭ ᠡᠳ᠋ ᠲᠠᠸᠠᠷᠲᠤᠨᠢ ᠬᠦᠷᠲᠡᠯᠡ ᠨᠠᠷᠢᠨ ᠠᠵᠢᠭᠯᠠᠭᠰᠠᠭᠠᠷ ᠭᠡᠨᠡᠳᠲᠡ ᠡᠷᠡᠶᠢᠨᠢᠶᠡᠨ ᠴᠢᠬᠢᠨᠳᠦ:
《ᠡᠨᠳᠡᠴᠢᠨᠢ ᠬᠤᠯᠠᠭᠠᠢᠯᠠᠨ ᠰᠣᠨᠤᠰᠬᠤ ᠮᠠᠰᠢᠨᠦᠭᠡᠢ ᠪᠢᠵᠡ?》 ᠭᠡᠵᠦ ᠠᠰᠠᠭᠤᠪᠠ᠃
《ᠪᠠᠢᠪᠠᠯ ᠪᠠᠢᠭ ᠴᠠᠰᠢᠨᠢ!》 ᠭᠡᠰᠡᠨ ᠣᠶᠤᠨᠪᠠᠲᠤ ᠬᠣᠭᠤᠯᠠᠢᠪᠠᠨ ᠳᠡᠭᠡᠷᠡᠳᠡᠭᠦᠯᠦᠨ ᠵᠣᠷᠢᠭᠤᠳᠠ ᠶᠡᠬᠡ ᠳᠠᠭᠤᠨᠢᠶᠠᠷ: 《ᠪᠢᠳᠡ ᠨᠢᠭᠡ ᠨᠠᠰᠤᠪᠠᠷᠢᠶᠠᠨ ᠲᠥᠪ ᠦᠨᠡᠨᠴᠢ ᠴᠢᠭᠡᠴᠢ ᠰᠢᠳᠤᠷᠭᠤᠪᠠᠷ ᠶᠠᠪᠤᠵᠤ ᠢᠷᠡᠭᠰᠡᠨ ᠤᠯᠤᠰ᠃ ᠭᠡᠷᠲᠡᠭᠡᠨᠴᠦ ᠲᠡᠷᠡ᠂ ᠭᠠᠳᠠᠭᠠᠴᠤ ᠲᠡᠷᠡ᠂ ᠡᠭᠦᠷᠢᠳᠡ ᠨᠢᠭᠡᠯᠡ ᠶᠠᠩᠵᠤᠪᠠᠷ ᠬᠡᠯᠡᠵᠦ ᠶᠠᠷᠢᠵᠤ ᠶᠠᠪᠤᠳᠠᠭ ᠤᠯᠤᠰ ᠠ᠋! ᠮᠠᠨᠳᠤ ᠨᠢᠭᠤᠵᠤ ᠳᠠᠯᠳᠠᠯᠠᠬᠤ ᠵᠦᠢᠯ ᠭᠡᠵᠦ ᠤᠭᠠᠴᠠ ᠥᠴᠦᠬᠡᠨᠴᠦ ᠪᠠᠢᠳᠠᠭᠦᠭᠡᠢ᠃ ᠬᠤᠯᠠᠭᠠᠢᠯᠠᠵᠤ ᠰᠣᠨᠤᠰᠬᠤ ᠪᠠᠢᠲᠤᠭᠠᠢ ᠰᠢᠩᠭᠡᠭᠡᠭᠡᠳ ᠠᠪᠤᠭᠰᠠᠨᠴᠤ ᠪᠣᠯᠤᠨᠠ!》 ᠭᠡᠯᠡ᠃ ᠲᠡᠳᠡ ᠬᠣᠶᠠᠷ ᠰᠢᠷᠡᠭᠡᠨ ᠳᠡᠭᠡᠷᠡᠬᠢ ᠮᠥᠩᠭᠦᠨ ᠴᠠᠭᠠᠰᠤᠲᠠᠢ ᠲᠠᠮᠠᠬᠢ ᠪᠣᠯᠤᠨ ᠠᠩᠬᠢᠯᠤᠮᠠ ᠰᠠᠢᠬᠠᠨ ᠴᠠᠢᠶᠢ ᠨᠢᠭᠡᠴᠦ ᠬᠥᠳᠡᠯᠭᠡᠭᠰᠡᠨᠦᠭᠡᠢ᠃ ᠤᠳᠠᠭᠠᠨ ᠡᠳᠦᠷ ᠰᠠᠯᠵᠤ᠂ ᠦᠬᠦᠯᠦᠨ ᠲᠠᠮᠤᠪᠠᠨ ᠦᠵᠡᠭᠡᠳ ᠳᠠᠬᠢᠨ ᠤᠴᠠᠷᠠᠭᠰᠠᠨ ᠡᠷᠡ ᠡᠮᠡ ᠬᠣᠶᠠᠭᠤᠯᠠ ᠬᠡᠯᠡᠭᠡᠳ ᠦᠯᠦ ᠪᠠᠷᠠᠬᠤ ᠦᠭᠡ᠂ ᠲᠣᠭᠠᠴᠢᠭᠠᠳ ᠦᠯᠦ ᠪᠠᠷᠠᠬᠤ ᠵᠣᠪᠠᠯᠠᠩᠢᠶᠠᠨ ᠶᠠᠷᠢᠯᠴᠠᠭᠰᠠᠭᠠᠷ ᠪᠠᠢᠲᠠᠯᠠ ᠰᠥᠨᠢ ᠳᠦᠯᠢ ᠥᠩᠭᠡᠷᠡᠪᠡ᠃ ᠭᠡᠭᠡᠨ ᠰᠠᠷᠠᠨᠤ ᠭᠡᠷᠡᠯ ᠨᠢᠮᠭᠡᠨ ᠱᠠᠪᠠᠷ ᠬᠢᠭᠰᠡᠨ ᠴᠣᠩᠬᠤᠨ ᠬᠥᠰᠢᠭᠡᠶᠢ ᠨᠡᠪᠲᠡᠯᠵᠦ ᠲᠡᠳᠡ ᠬᠣᠶᠠᠷᠤᠨ ᠨᠢᠭᠤᠷ ᠳᠡᠭᠡᠷᠡ ᠲᠣᠰᠤᠨᠠ᠃ ᠣᠶᠤᠨᠪᠠᠲᠤᠶᠢᠨ ᠨᠢᠳᠦᠨᠡᠴᠡ ᠭᠡᠷᠡᠯᠲᠦᠭᠰᠡᠨ ᠣᠶᠤᠨᠤ ᠣᠴᠢ ᠦᠨᠡᠨᠴᠢ ᠰᠡᠳᠭᠢᠯᠦᠨ ᠬᠢᠨᠢ ᠨᠠᠮ ᠲᠣᠭᠲᠠᠭᠤᠨᠢ ᠬᠠᠷᠠᠭᠤᠯᠤᠨᠠ᠃ ᠭᠡᠲᠡᠯᠡ ᠡᠨᠡᠬᠦ ᠤᠬᠠᠭᠠᠨ ᠲᠥᠬᠦᠭᠡᠶᠢᠨᠢ ᠣᠯᠬᠤᠦᠭᠡᠢ ᠠᠭᠤᠯᠵᠠᠯᠲᠠ ᠪᠣᠯᠤᠨ ᠵᠡᠭᠦᠳᠦᠨᠳᠦ ᠣᠷᠤᠮᠠᠦᠭᠡᠢ 《ᠬᠠᠷᠠᠭᠠᠯᠵᠠᠯ》ᠢ ᠪᠣᠳᠤᠬᠤ ᠲᠤᠰᠤᠮ ᠲᠡᠳᠡ ᠬᠣᠶᠠᠷᠤᠨ ᠳᠣᠲᠤᠷᠠ ᠠᠮᠤᠷᠦᠭᠡᠢ ᠪᠣᠯᠵᠤ ᠶᠠᠭᠯᠠ ᠴᠠᠭᠲᠠᠢ ᠳᠡᠯᠪᠡᠷᠡᠬᠦ ᠪᠥᠮᠪᠦᠭᠡ ᠳᠡᠭᠡᠷᠡ ᠰᠠᠭᠤᠭᠰᠠᠨ ᠮᠡᠲᠦ ᠲᠣᠭᠲᠠᠵᠤ ᠶᠠᠳᠠᠨᠠ᠃ ᠲᠡᠳᠡ ᠬᠠᠶᠠ ᠬᠥᠮᠦᠰᠭᠡ ᠵᠠᠩᠭᠢᠳᠤᠨ ᠪᠣᠳᠤᠯᠬᠢᠯᠠᠵᠤ᠂ ᠪᠠᠢᠨ ᠪᠠᠢᠨ ᠨᠢᠭᠡ ᠵᠦᠢᠯᠦᠨ ᠲᠠᠭᠠᠮᠠᠭᠯᠠᠯ ᠳᠤᠷᠠᠳᠤᠨ ᠶᠠᠷᠢᠯᠴᠠᠭᠰᠠᠭᠠᠷ ᠪᠠᠢᠲᠠᠯᠠ ᠭᠡᠭᠡ ᠣᠷᠤᠯᠠ᠃
ᠥᠷᠯᠦᠭᠡᠶᠢᠨ ᠬᠣᠭᠤᠯᠠ ᠢᠳᠡᠬᠦ ᠵᠠᠭᠤᠷᠠ᠂ ᠲᠣᠷᠭᠠᠨᠲᠠᠯᠠ ᠭᠡᠨᠡᠳᠲᠡ ᠰᠢ ᠵᠦᠴᠦᠭᠡ᠂ ᠺᠢᠨᠣ᠋᠂ ᠤᠷᠠᠨ ᠵᠣᠬᠢᠶᠠᠯᠤᠳᠲᠤ ᠭᠠᠷᠳᠠᠭ ᠰᠣᠨᠢᠷᠬᠠᠯᠲᠠᠢ ᠵᠦᠢᠯᠢ ᠪᠣᠳᠤᠵᠤ ᠣᠯᠪᠠ: ᠵᠢᠱ᠌ᠢᠶᠡᠯᠡᠪᠡᠯ᠂ ᠳᠠᠢᠰᠤᠨ᠂ ᠮᠠᠨᠤ ᠨᠠᠮ ᠪᠣᠯᠤᠨ ᠴᠡᠷᠢᠭᠦᠨ ᠨᠢᠭᠤᠴᠠᠶᠢ ᠮᠡᠳᠡᠬᠦᠶᠢᠨ ᠲᠥᠯᠦᠭᠡ ᠪᠠᠷᠢᠪᠴᠢᠯᠠᠭᠳᠠᠭᠰᠠᠨ ᠬᠤᠪᠢᠰᠭᠠᠯᠴᠢᠳᠢ ᠶᠠᠩᠵᠤ ᠪᠦᠷᠢᠪᠡᠷ ᠡᠷᠡᠭᠦᠳᠡᠨ ᠲᠠᠮᠤᠯᠠᠳᠠᠭ ᠪᠤᠶᠤ ᠡᠷᠬᠢᠮ ᠵᠡᠷᠭᠡ ᠡᠳ᠋ ᠮᠥᠩᠭᠦ᠂ ᠥᠩᠭᠡ ᠵᠢᠰᠦᠪᠡᠷ ᠲᠠᠲᠠᠬᠤ ᠵᠡᠷᠭᠡ ᠠᠷᠭᠠ ᠪᠦᠬᠦᠨᠢ ᠬᠠᠪᠰᠤᠷᠭᠠᠨ ᠬᠡᠷᠡᠭᠯᠡᠳᠡᠭ ᠭᠡᠳᠡᠭᠰᠡᠨ᠃ ᠡᠨᠡᠴᠢᠨᠢ ᠶᠠᠭ ᠳᠠᠢᠰᠤᠨ ᠡᠲᠡᠭᠡᠳ ᠬᠤᠪᠢᠰᠭᠠᠯᠴᠢᠳᠲᠤ ᠠᠪᠳᠠᠭ ᠬᠠᠲᠠᠭᠤ ᠵᠥᠭᠡᠯᠡᠨᠢ ᠬᠣᠣᠰᠯᠠᠭᠤᠯᠵᠤ ᠪᠠᠢᠭᠠ ᠬᠤᠤᠪᠢᠯᠳᠤᠯᠭᠠ ᠪᠢᠰᠢᠦᠦ?
ᠣᠶᠤᠨᠪᠠᠲᠤ ᠰᠣᠨᠤᠰᠤᠭᠠᠳ ᠶᠡᠬᠡᠯᠡ ᠢᠨᠢᠶᠡᠳᠦ ᠠᠯᠳᠠᠨ᠂ ᠬᠣᠱᠤᠩᠨᠠᠭᠰᠠᠨ ᠪᠠᠢᠳᠠᠯᠢᠶᠠᠷ:
《ᠲᠡᠭᠡᠪᠡᠯ ᠴᠢᠴᠢᠨᠢ ᠥᠴᠦᠭᠡᠳᠦᠷ ᠰᠥᠨᠢ ᠭᠣᠶᠤ ᠡᠬᠡᠨᠡᠷᠦᠨ ᠣᠷᠤᠨᠳᠤ ᠢᠷᠡᠭᠰᠡᠨᠶᠦᠮ ᠪᠠᠢᠨᠠ ᠰᠢᠳᠡ᠃ ᠭᠡᠪᠡᠴᠦ ᠳᠥᠴᠢ ᠭᠠᠷᠤᠭᠠᠳ ᠲᠠᠪᠢ ᠰᠢᠬᠠᠭᠰᠠᠨ ᠬᠥᠭᠰᠢᠨᠮᠢᠨᠢ ᠴᠢ ᠬᠥᠮᠦᠨᠳᠦ ᠲᠣᠭᠤᠭᠳᠠᠬᠤᠠᠴᠠᠪᠠᠨ ᠥᠩᠭᠡᠷᠡᠴᠢᠬᠡᠵᠡᠢ᠃ ᠬᠡᠷᠪᠡ ᠬᠣᠷᠢᠨ ᠵᠢᠯᠦᠨ ᠡᠮᠦᠨᠡᠬᠢ ᠪᠢᠳᠡ ᠬᠣᠶᠠᠷᠤᠨ ᠰᠠᠶᠢ ᠬᠤᠷᠢᠮᠯᠠᠬᠤ ᠦᠶᠡᠰᠢᠭ ᠪᠠᠢᠭᠰᠠᠨ ᠪᠣᠯ ᠬᠠᠷᠢᠨ ᠨᠡᠯᠢᠶᠡᠳ ᠦᠢᠯᠡᠳᠦᠯ ᠦᠵᠡᠭᠦᠯᠵᠦᠴᠦ ᠮᠡᠳᠡᠬᠦ ᠪᠠᠢᠬᠤ ᠁》 ᠭᠡᠰᠡᠨᠳᠦ ᠲᠣᠷᠭᠠᠨᠲᠠᠯᠠ ᠪᠠᠰᠠ ᠬᠠᠳᠠᠭᠠᠨᠠᠲᠠᠯᠠ ᠢᠨᠢᠶᠡᠪᠡ᠃
ᠢᠨᠢᠶᠡᠳᠦᠨᠢ ᠳᠥᠩᠭᠡᠵᠢ ᠵᠣᠭᠰᠤᠬᠤ ᠦᠶᠡᠳᠦ ᠥᠴᠦᠭᠡᠳᠦᠷᠦᠨ ᠥᠨᠥ ᠬᠣᠶᠠᠷ ᠴᠡᠷᠢᠭ ᠣᠷᠤᠵᠤ ᠢᠷᠡᠭᠡᠳ: 《ᠰᠧᠯᠢᠩ ᠳᠠᠷᠤᠭᠠ ᠴᠢᠮᠠᠲᠠᠢ ᠠᠭᠤᠯᠵᠠᠬᠤ ᠭᠡᠨᠡ᠂ ᠣᠳᠣ ᠶᠠᠪᠤᠶᠠ!》 ᠭᠡᠵᠦ ᠣᠶᠤᠨᠪᠠᠲᠤᠳᠤ ᠬᠡᠯᠡᠪᠡ᠃
ᠣᠶᠤᠨᠪᠠᠲᠤ᠂ ᠡᠬᠡᠨᠡᠷᠦᠨᠢᠶᠡᠨ ᠵᠢᠭᠠᠬᠠᠨ ᠲᠣᠭᠲᠠᠪᠤᠷᠢᠦᠭᠡᠢ ᠪᠣᠯᠤᠭᠰᠠᠨ ᠪᠠᠢᠳᠠᠯᠢ ᠦᠵᠡᠭᠡᠳ᠂ ᠮᠣᠩᠭᠤᠯᠢᠶᠠᠷ ᠪᠠᠬᠠᠨ ᠲᠠᠢᠳᠭᠤᠷᠠᠭᠤᠯᠬᠤ ᠦᠭᠡ ᠬᠡᠯᠡᠭᠡᠳ ᠲᠤᠢᠯᠤᠨ ᠳᠣᠲᠤᠨᠤᠰᠤᠭ ᠬᠠᠷᠠᠴᠠᠪᠠᠷ ᠨᠢᠭᠡ ᠰᠢᠷᠲᠡᠵᠦ ᠠᠪᠤᠭᠠᠳ ᠬᠣᠶᠠᠷ ᠴᠡᠷᠢᠭᠲᠡᠢ ᠬᠠᠮᠲᠤ ᠭᠠᠷᠴᠤ ᠶᠠᠪᠤᠯᠠ᠃
ᠱᠠᠩᠬᠠᠢ ᠱᠣᠰᠢᠭᠠᠳᠤ ᠪᠠᠭᠠ ᠮᠠᠰᠢᠨ ᠬᠡᠳᠦ ᠬᠡᠳᠦᠨ ᠳᠠᠪᠬᠤᠷ ᠴᠠᠭᠳᠠᠯᠲᠠᠶᠢ ᠥᠩᠭᠡᠷᠡᠭᠡᠵᠦ ᠰᠧᠯᠢᠩ ᠳᠠᠷᠤᠭᠠᠶᠢᠨ ᠠᠯᠪᠠᠨ ᠭᠠᠵᠠᠷ ᠬᠦᠷᠴᠦ ᠢᠷᠡᠯᠡ᠃
ᠣᠶᠤᠨᠪᠠᠲᠤ᠂ 《ᠦᠭᠡᠶᠢᠨ ᠲᠡᠭᠦᠪᠦᠷᠢ》ᠪᠡᠨ ᠡᠮᠦᠨᠡᠪᠡᠨ ᠪᠠᠷᠢᠵᠤ᠂ ᠰᠧᠯᠢᠩ ᠳᠠᠷᠤᠭᠠᠶᠢᠨ ᠠᠯᠪᠠᠨ ᠭᠡᠷᠲᠦ ᠣᠷᠤᠬᠤᠳᠤ᠂ 《ᠮᠠᠯᠲᠠᠵᠤ ᠠᠷᠢᠯᠭᠠᠬᠤ》 ᠬᠥᠳᠡᠯᠭᠡᠭᠡᠨᠦ ᠳᠡᠳ᠋ ᠶᠡᠷᠦᠩᠬᠡᠢ ᠵᠢᠯᠤᠭᠤᠳᠤᠭᠴᠢ ᠪᠥᠭᠡᠳ ᠲᠤᠰᠭᠠᠢ ᠬᠡᠷᠡᠭᠦᠨ ᠳᠤᠭᠤᠢᠯᠠᠩᠤᠨ ᠳᠠᠷᠤᠭᠠ ᠰᠢᠳᠠᠮ ᠳᠠᠯᠠᠢ ᠪᠠᠰᠠ ᠰᠧᠯᠢᠩᠦᠨ ᠳᠡᠷᠭᠡᠳᠡ ᠰᠠᠭᠤᠵᠤ ᠪᠠᠢᠯᠠ᠃
ᠬᠣᠨᠢᠨ ᠮᠢᠬᠠᠨᠳᠤ ᠬᠣᠪᠳᠤᠭ ᠴᠢᠨᠤᠠᠶᠢᠨ ᠰᠢᠨᠤᠯᠲᠠᠢ ᠰᠧᠯᠢᠩ ᠳᠠᠷᠤᠭᠠᠶᠢᠨ ᠲᠠᠭᠳᠠᠭᠠᠷ ᠪᠡᠶᠡᠨᠢ ᠥᠨᠳᠦᠷᠢᠶᠡᠷᠢᠶᠡᠨ ᠦᠯᠡᠭᠳᠡᠵᠦ ᠥᠷᠭᠡᠨᠢᠶᠡᠷᠢᠶᠡᠨ ᠵᠤᠵᠠᠭᠠᠷᠠᠭᠠᠳ ᠥᠪᠦᠷ ᠮᠣᠩᠭᠤᠯᠳᠤ ᠰᠠᠶᠢ ᠢᠷᠡᠭᠰᠡᠨᠲᠡᠢᠨᠢ ᠠᠳᠠᠯᠢᠳᠭᠠᠪᠠᠯ ᠦᠨᠡᠬᠡᠷ ᠪᠣᠷᠳᠤᠭᠠᠨ ᠭᠠᠬᠠᠢᠰᠢᠭ᠋ ᠪᠣᠯᠵᠠᠢ᠃ ᠲᠡᠷᠡ᠂ ᠨᠢᠭᠤᠷ ᠦᠵᠡᠭᠳᠡᠮᠡ ᠥᠩᠭᠡᠲᠡᠢ ᠥᠷᠭᠡᠨ ᠰᠢᠷᠡᠭᠡᠨᠦ ᠴᠠᠭᠠᠨᠠ ᠶᠡᠬᠡᠮᠰᠦᠭ ᠳᠦᠷᠢᠪᠡᠷ ᠰᠠᠭᠤᠭᠠᠳ᠂ ᠣᠶᠤᠨᠪᠠᠲᠤᠶᠢᠨ ᠵᠦᠭ 《ᠰᠠᠭᠤ》 ᠭᠡᠰᠡᠨ ᠮᠠᠶᠢ᠍ᠭᠲᠠᠢ ᠨᠢᠭᠡ ᠳᠣᠬᠢᠵᠤ᠂ ᠰᠠᠷᠭᠢᠶᠠ ᠪᠦᠳᠦᠭᠦᠨ ᠬᠣᠭᠤᠯᠠᠢᠪᠠᠨ ᠰᠢᠬᠠᠵᠤ ᠳᠣᠲᠤᠷᠠ ᠭᠠᠵᠠᠷᠤᠨ ᠬᠢᠲᠠᠳ ᠬᠡᠯᠡᠪᠡᠷ:
《ᠶᠠᠭᠤᠨᠳᠤ ᠴᠢᠮᠠᠢ ᠰᠤᠯᠠᠯᠠᠭᠰᠠᠨᠢ ᠮᠡᠳᠡᠵᠦ ᠪᠠᠢᠨᠠᠤᠤ?》 ᠭᠡᠰᠡᠨᠳᠦ ᠣᠶᠤᠨᠪᠠᠲᠤ ᠰᠢᠪ ᠰᠢᠭᠤᠳᠬᠠᠨᠢᠶᠠᠷ:
《ᠮᠡᠳᠡᠬᠦᠦᠭᠡᠢ》 ᠭᠡᠪᠡ᠃
《ᠡᠩ᠂ ᠴᠢ ᠮᠡᠳᠡᠬᠦᠦᠭᠡᠢ ᠪᠠᠢᠬᠤᠨᠢ ᠶᠠᠷᠢᠶᠠᠨᠦᠭᠡᠢ》 ᠭᠡᠳ ᠰᠧᠯᠢᠩ ᠶᠡᠬᠡᠯᠡ ᠰᠦᠷ ᠮᠠᠨᠳᠤᠭᠤᠯᠤᠨ ᠭᠠᠷᠲᠠᠬᠢ ᠬᠠᠷᠠᠨᠳᠠᠪᠠᠨ ᠡᠷᠭᠢᠯᠳᠦᠭᠦᠯᠦᠨ ᠨᠠᠭᠠᠳᠤᠭᠰᠠᠭᠠᠷ ᠣᠶᠤᠨᠪᠠᠲᠤᠶᠢ ᠰᠢᠷᠦᠭᠦᠨ ᠭᠡᠭᠴᠢ ᠰᠢᠷᠲᠡᠵᠦ: 《ᠴᠢ ᠬᠡᠳᠦᠢᠪᠡᠷ ᠥᠪᠡᠷᠦᠨ ᠶᠠᠯᠠᠪᠠᠨ ᠪᠦᠷᠢᠮᠦᠰᠦᠨ ᠲᠤᠢᠯᠪᠤᠷᠢᠲᠠᠢ ᠲᠤᠰᠢᠶᠠᠭᠰᠠᠨᠦᠭᠡᠢ ᠪᠣᠯᠪᠠᠴᠤ ᠮᠠᠨᠤ ᠤᠯᠠᠭᠠᠨ ᠵᠠᠰᠠᠭ ᠮᠥᠨ ᠴᠢᠮᠠᠢ ᠢᠲᠡᠭᠡᠭᠰᠡᠭᠡᠷ ᠪᠠᠢᠨᠠ᠃ ᠣᠳᠣ ᠪᠢ ᠴᠢᠮᠠᠳᠤ ᠨᠢᠭᠡ ᠣᠨᠴᠤᠭᠤᠢ ᠁ ᠠ! ᠶᠠᠷᠢᠶᠠᠨᠦᠭᠡᠢᠴᠤ ᠢᠷᠠᠭᠤ ᠠᠯᠳᠠᠷᠲᠠᠢ ᠡᠭᠦᠷᠭᠡ ᠲᠤᠰᠢᠶᠠᠵᠤ ᠥᠭᠭᠦᠶᠡ! ᠮᠠᠷᠭᠠᠰᠢ ᠮᠠᠨᠤ ᠥᠪᠦᠷ ᠮᠣᠩᠭᠤᠯᠳᠤ ᠭᠠᠳᠠᠭᠠᠳᠤᠶᠢᠨ ᠨᠢᠭᠡᠨ ᠵᠣᠴᠢᠨ ᠢᠷᠡᠬᠦ ᠪᠣᠯᠤᠨᠠ᠃ ᠲᠡᠷᠡ ᠪᠣᠯ ᠤᠤᠯ ᠨᠤᠲᠤᠭᠤᠨᠴᠢᠨᠢ ᠬᠥᠮᠦᠨ ᠪᠥᠭᠡᠳ ᠶᠠᠫᠤᠨᠳᠤ ᠰᠤᠷᠤᠯᠴᠠᠵᠤ ᠪᠠᠢᠭᠰᠠᠨ ᠦᠶᠡᠶᠢᠨᠴᠢᠨᠢ ᠬᠠᠮᠲᠤ ᠰᠤᠷᠤᠭᠴᠢ ᠨᠠᠰᠤᠲᠤ ᠪᠣᠯᠤᠨᠠ ᠁》 ᠭᠡᠵᠦ ᠵᠠᠷᠯᠢᠭᠳᠠᠨ ᠵᠠᠩᠳᠤᠴᠢᠵᠤ ᠪᠠᠢᠬᠤᠰᠢᠭ᠋ ᠬᠡᠯᠡᠪᠡ᠃
ᠣᠶᠤᠨᠪᠠᠲᠤ ᠰᠣᠨᠤᠰᠤᠭᠠᠳ ᠳᠣᠲᠤᠷᠠᠪᠠᠨ ᠨᠡᠯᠢᠶᠡᠳ ᠣᠯᠠᠨ ᠶᠠᠭᠤᠮᠠ ᠪᠣᠳᠤᠪᠠ᠃
ᠰᠧᠯᠢᠩ ᠦᠭᠡᠪᠡᠨ ᠵᠠᠯᠭᠠᠵᠤ: 《᠁ ᠡᠨᠡ ᠬᠥᠮᠦᠨ ᠣᠳᠣ ᠪᠣᠯ ᠶᠠᠫᠤᠨᠳᠤ ᠰᠠᠭᠤᠭᠠ ᠳᠤᠮᠳᠠᠳᠤᠶᠢᠨ ᠬᠠᠷᠢᠶᠠᠲᠤᠨᠠᠷᠤᠨ ᠶᠡᠷᠦᠩᠬᠡᠢ ᠡᠪᠯᠡᠯᠦᠨ ᠭᠣᠣᠯ ᠲᠣᠯᠤᠭᠠᠢᠯᠠᠭᠴᠢᠳᠤᠨ ᠨᠢᠭᠡᠨᠢ ᠪᠣᠯᠬᠤ ᠪᠥᠭᠡᠳ ᠳᠤᠮᠳᠠᠳᠤ ᠶᠠᠫᠤᠨ ᠬᠣᠶᠠᠷ ᠤᠯᠤᠰᠤᠨ ᠠᠷᠠᠳ ᠲᠦᠮᠡᠨᠦ ᠨᠥᠬᠦᠷᠯᠡᠯᠦᠨ ᠬᠥᠭᠵᠢᠯᠲᠡ᠂ ᠬᠣᠶᠠᠷ ᠤᠯᠤᠰᠤᠨ ᠡᠮ ᠡᠮᠨᠡᠯᠭᠡᠶᠢᠨ ᠦᠢᠯᠡᠰᠦᠨ ᠬᠠᠮᠲᠤᠷᠠᠨ ᠠᠵᠢᠯᠯᠠᠬᠤᠳᠤ ᠴᠥᠮ ᠨᠡᠯᠢᠶᠡᠳ ᠭᠠᠪᠢᠶᠠ ᠵᠢᠳᠭᠦᠯ ᠦᠵᠡᠭᠦᠯᠦᠭᠰᠡᠨᠶᠦᠮ》 ᠭᠡᠪᠡ᠃ ᠪᠢᠯᠳᠠᠤᠴᠢ ᠵᠠᠩᠲᠠᠢ ᠰᠢᠳᠠᠮ ᠰᠧᠯᠢᠩᠦᠨ ᠦᠭᠡᠶᠢ ᠡᠯᠭᠦᠵᠦ ᠠᠪᠤᠭᠠᠳ:
《ᠲᠡᠷᠡ ᠬᠥᠮᠦᠨᠦ ᠡᠬᠡ ᠣᠷᠤᠨ ᠪᠣᠯᠤᠨ ᠨᠠᠮᠳᠠᠭᠠᠨ ᠬᠠᠨᠳᠤᠬᠤ ᠣᠪᠤᠷᠨᠢ ᠬᠠᠷᠢᠨ ᠴᠢᠮᠠᠲᠠᠢ ᠡᠷᠡᠰ ᠣᠨᠳᠣᠣ ᠰᠢᠤ》 ᠭᠡᠵᠦ ᠬᠤᠷᠤᠭᠤᠨᠳᠠᠭᠠᠨ ᠬᠠᠪᠴᠢᠭᠰᠠᠨ ᠶᠠᠩᠵᠤᠤᠷᠤᠨ ᠦᠨᠡᠰᠦᠶᠢ ᠬᠦᠴᠦᠲᠡᠢᠬᠡᠨ ᠨᠢᠰᠠᠯᠤᠭᠰᠠᠭᠠᠷ ᠬᠡᠯᠡᠨᠡ᠃
ᠰᠧᠯᠢᠩ ᠳᠠᠷᠤᠭᠠ ᠮᠣᠨᠴᠤᠭᠤᠷ ᠲᠠᠷᠭᠤᠨ ᠲᠣᠯᠤᠭᠠᠢᠪᠠᠨ ᠳᠣᠬᠢᠰᠬᠢᠭᠡᠳ: 《ᠲᠡᠢᠮᠦ ᠰᠢᠦ! ᠵᠠᠷᠢᠮ ᠬᠥᠮᠦᠨ ᠠᠰᠤᠨ ᠪᠡᠶᠡᠨᠢ ᠭᠠᠳᠠᠭᠠᠳᠤᠳᠤ ᠪᠠᠢᠪᠠᠴᠤ ᠠᠶᠤᠤᠯᠢᠬᠠᠢ ᠴᠡᠭᠡᠵᠢᠨᠳᠡᠭᠡᠨ ᠡᠬᠡ ᠣᠷᠤᠨᠢᠶᠠᠨ ᠪᠣᠳᠤᠳᠠᠭ᠂ ᠭᠡᠲᠡᠯᠡ ᠮᠠᠨᠤ ᠡᠨᠳᠡᠬᠢᠶᠢᠨ ᠵᠠᠷᠢᠮᠨᠢ ᠬᠠᠷᠢᠨ ᠠᠷᠠᠳ ᠲᠦᠮᠡᠨᠦ ᠲᠠᠷᠢᠭᠰᠠᠨ ᠲᠤᠲᠤᠷᠭᠠ ᠴᠠᠭᠠᠨ ᠭᠤᠯᠢᠷᠢᠶᠠᠷ ᠭᠡᠳᠡᠰᠦᠪᠡᠨ ᠪᠣᠷᠳᠤᠵᠤ᠂ ᠤᠯᠤᠰᠤᠨ ᠬᠥᠷᠦᠩᠭᠡ ᠮᠥᠩᠭᠦᠪᠡᠷ ᠭᠡᠷᠢᠶᠡᠨ ᠪᠠᠶᠠᠵᠢᠭᠤᠯᠤᠭᠠᠳ᠂ ᠳᠠᠩᠳᠠ ᠮᠠᠭᠤ ᠬᠡᠷᠡᠭ ᠦᠢᠯᠡᠳᠴᠦ ᠪᠠᠢᠨᠠ ᠁ ᠵᠠ ᠪᠣᠯᠵᠠᠢ᠂ ᠥᠨᠥᠳᠦᠷ ᠡᠳᠡᠭᠡᠷᠢ ᠨᠤᠷᠱᠤᠬᠤᠪᠠᠨ ᠪᠣᠯᠢᠶᠠ! ᠭᠠᠳᠠᠭᠠᠳᠤᠶᠢᠨ ᠵᠣᠴᠢᠨ ᠢᠷᠡᠨᠡ ᠭᠡᠵᠦ ᠪᠠᠢᠬᠤᠳᠤ ᠪᠢᠳᠡ ᠤᠭᠲᠤᠬᠤᠦᠭᠡᠢ ᠭᠡᠬᠦᠦᠭᠡᠢ᠂ ᠬᠥᠮᠦᠨ ᠴᠢᠮᠠᠲᠠᠢ ᠵᠣᠯᠭᠠᠨᠠ ᠭᠡᠵᠦ ᠪᠠᠢᠬᠤᠳᠤ ᠪᠢᠳᠡ ᠪᠠᠰᠠ ᠵᠥᠪᠰᠢᠶᠡᠷᠡᠬᠦᠦᠭᠡᠢ ᠪᠠᠢᠵᠤ ᠪᠣᠯᠬᠤᠦᠭᠡᠢ ᠰᠢᠦ ᠳ᠋ᠠ ᠁》 ᠭᠡᠵᠦ ᠬᠡᠯᠡᠭᠡᠳ ᠡᠷᠭᠢᠨ ᠬᠠᠷᠠᠵᠤ ᠰᠢᠳᠠᠮᠠᠴᠠ: 《ᠡᠭᠦᠨᠢ ᠥᠨᠥ ᠭᠡᠷᠲᠦᠨᠢ ᠣᠷᠤᠭᠤᠯᠴᠢᠬᠠᠭᠰᠠᠨᠤᠤ? ᠶᠠᠮᠠᠷᠰᠢᠭ᠋ ᠲᠥᠪᠬᠢᠨᠡᠭᠦᠯᠪᠡ ᠳ᠋ᠠ ?》 ᠭᠡᠵᠦ ᠠᠰᠠᠭᠤᠬᠤᠳᠤ᠂ ᠰᠢᠳᠠᠮ ᠳᠣᠣᠷᠠᠪᠠᠨ ᠪᠣᠰᠴᠤ ᠵᠣᠭᠰᠤᠭᠠᠳ:
《ᠪᠦᠷ ᠰᠠᠢᠬᠠᠨ ᠲᠥᠪᠬᠢᠨᠡᠭᠦᠯᠴᠢᠬᠡᠭᠰᠡᠨ ᠡ!》 ᠭᠡᠵᠦ ᠴᠢᠷᠠᠢ ᠳᠦᠭᠦᠷᠡᠩ ᠢᠨᠢᠶᠡᠵᠦ ᠬᠠᠷᠢᠭᠤᠯᠤᠭᠠᠳ᠂ ᠣᠶᠤᠨᠪᠠᠲᠤ ᠥᠭᠡᠳᠡ ᠬᠠᠷᠠᠵᠤ 《ᠶᠠᠮᠠᠷ ᠪᠤᠢ? ᠤᠤᠯᠤᠨ ᠬᠠᠷᠠ ᠭᠡᠷᠡᠴᠡᠴᠢᠨᠢ ᠬᠠᠮᠢᠶᠠᠦᠭᠡᠢ ᠭᠠᠩᠭᠠᠩ ᠪᠢᠰᠢᠦᠦ?》 ᠭᠡᠨᠡ᠃
ᠣᠶᠤᠨᠪᠠᠲᠤ ᠰᠡᠭᠡᠰᠬᠢᠨ ᠤᠬᠠᠭᠠᠷᠠᠵᠤ᠂ ᠳᠣᠲᠤᠷᠠᠨᠢ ᠤᠯᠠᠮ ᠪᠠᠴᠢᠮᠳᠠᠨ᠂ ᠥᠪᠡᠷᠦᠨ ᠡᠷᠬᠡᠦᠭᠡᠢ ᠣᠷᠤᠨᠠᠴᠠᠪᠠᠨ ᠪᠣᠰᠴᠤ ᠵᠣᠭᠰᠤᠭᠠᠳ᠂ ᠰᠧᠯᠢᠩ ᠳᠠᠷᠤᠭᠠᠶᠢᠨ ᠡᠰᠡᠷᠭᠦ ᠠᠷᠠᠢᠯᠠ 《ᠨᠥᠬᠦᠷ ᠡ》 ᠭᠡᠵᠦ ᠳᠠᠭᠤᠳᠠᠴᠢᠬᠠᠬᠤ ᠰᠢᠬᠠᠯᠠ᠃ ᠰᠣᠶᠤᠯᠤᠨ ᠬᠤᠪᠢᠰᠭᠠᠯᠤᠨ ᠡᠬᠢᠨᠦ ᠦᠶᠡᠳᠦ ᠤᠳᠠᠭᠠᠨ ᠵᠢᠯᠦᠨ ᠵᠠᠩᠰᠢᠯ ᠵᠤᠷᠰᠢᠯᠢᠶᠠᠷᠢᠶᠠᠨ ᠬᠤᠪᠢᠰᠭᠠᠯᠲᠤ ᠣᠯᠠᠨ ᠲᠦᠮᠡᠨᠢ 《ᠨᠥᠬᠦᠷ》 ᠭᠡᠵᠦ ᠳᠠᠭᠤᠳᠠᠭᠠᠳ ᠪᠠᠭᠠᠦᠭᠡᠢ ᠣᠯᠠᠨ ᠬᠠᠴᠠᠷᠢᠶᠠᠨ ᠬᠠᠰᠢᠭᠤᠯᠤᠭᠰᠠᠨ ᠪᠢᠯᠡ᠃ ᠣᠳᠣ ᠡᠨᠡ ᠳᠠᠳᠭᠠᠯᠢᠶᠠᠨ ᠶᠠᠭᠤᠴᠤ ᠭᠡᠰᠡᠨ ᠴᠢᠳᠠᠨ ᠶᠠᠳᠠᠨ ᠬᠠᠯᠠᠵᠤ ᠳᠡᠢᠯᠦᠯᠡ᠃ ᠲᠡᠷᠡ ᠥᠪ ᠦᠨᠡᠨ ᠭᠤᠶᠤᠴᠢᠯᠠᠭᠰᠠᠨ ᠰᠡᠳᠭᠢᠯᠭᠡᠪᠡᠷ:
《ᠰᠧᠯᠢᠩᠮᠢᠨᠢ ᠡ᠂ ᠠᠭᠤᠴᠢᠯᠠᠴᠢᠬᠠ ᠡ! ᠪᠢ ᠲᠡᠭᠦᠨᠲᠡᠢ ᠳᠠᠬᠢᠭᠠᠳ ᠠᠭᠤᠯᠵᠠᠬᠤᠪᠠᠨ ᠪᠣᠯᠢᠶᠠ᠃ ᠲᠡᠷᠡ ᠵᠢᠯᠦᠨ ᠠᠭᠤᠯᠵᠠᠭᠰᠠᠨᠢᠶᠠᠨ ᠪᠢ ᠭᠤᠷᠪᠠᠨ ᠵᠢᠯ ᠲᠤᠰᠢᠶᠠᠭᠠᠳ ᠪᠠᠰᠠ ᠪᠠᠷᠠᠭᠠᠳᠤᠢ ᠪᠠᠢᠭᠰᠠᠭᠠᠷ ᠠ᠋᠃ ᠬᠡᠷᠪᠡ ᠳᠠᠬᠢᠭᠠᠳ ᠠᠭᠤᠯᠵᠠᠪᠠᠯ ᠮᠢᠨᠦ ᠡᠨᠡ ᠲᠡᠦᠬᠡᠨ ᠳᠡᠭᠡᠷᠡᠬᠢ ᠲᠠᠩᠨᠠᠭᠤᠯ᠂ ᠭᠠᠳᠠᠭᠠᠳᠤᠲᠠᠢ ᠰᠦᠯᠪᠡᠭᠡᠯᠳᠦᠭᠰᠡᠨ ᠡᠲᠡᠭᠡᠳ ᠵᠡᠷᠭᠡ ᠶᠠᠯᠠ ᠪᠠᠰᠠ ᠰᠢᠨᠡ ᠠᠭᠤᠯᠭᠠᠲᠠᠢ ᠪᠣᠯᠵᠤ ᠨᠠᠰᠤᠨᠳᠠᠭᠠᠨ ᠲᠤᠰᠢᠶᠠᠭᠠᠳ ᠪᠠᠷᠠᠬᠤᠦᠭᠡᠢ ᠶᠠᠪᠤᠳᠠᠯ ᠪᠣᠯᠤᠨᠠ᠃ ᠲᠠ ᠁ ᠨᠠᠮᠠᠢ ᠶᠠᠭᠠᠬᠢᠭᠰᠠᠨᠴᠤ ᠲᠡᠭᠦᠨᠲᠡᠢ ᠳᠠᠬᠢᠭᠠᠳ ᠪᠤᠤᠯᠠ ᠠᠭᠤᠯᠵᠠᠭᠤᠯ ᠳ᠋ᠠ᠂ ᠪᠢ ᠰᠧᠯᠢᠩᠳᠦ ᠭᠤᠶᠤᠶᠠ》 ᠭᠡᠪᠡ᠃
《ᠣᠳᠣ ᠪᠣᠯ ᠤᠳᠤᠷᠢᠳᠤᠯᠭᠠᠠᠴᠠ ᠴᠢᠮᠠᠢ ᠲᠡᠭᠦᠨᠲᠡᠢ ᠠᠭᠤᠯᠵᠠᠭᠤᠯᠬᠤ ᠭᠡᠵᠦ ᠪᠠᠢᠨᠠ᠂ ᠥᠩᠭᠡᠷᠡᠭᠰᠡᠨᠲᠡᠢ ᠲᠠᠭᠠᠷᠠᠬᠤᠦᠭᠡᠢ》 ᠭᠡᠵᠦ ᠰᠧᠯᠢᠩ ᠳᠠᠷᠤᠭᠠ ᠪᠦᠳᠦᠭᠦᠨ ᠬᠣᠭᠤᠯᠠᠢᠪᠠᠷ ᠬᠡᠯᠡᠨᠡ᠃
《ᠥᠩᠭᠡᠷᠡᠭᠰᠡᠨᠳᠦᠴᠦ ᠮᠥᠨ ᠤᠳᠤᠷᠢᠳᠤᠯᠭᠠᠠᠴᠠ ᠠᠭᠤᠯᠵᠠᠭᠤᠯᠤᠭᠰᠠᠨ ᠰᠢᠤ ᠳ᠋ᠠ 》 ᠭᠡᠵᠦ ᠣᠶᠤᠨᠪᠠᠲᠤᠶᠢ ᠬᠡᠯᠡᠬᠦᠳᠦ ᠰᠢᠳᠠᠮ ᠥᠨᠳᠦᠷ ᠳᠠᠭᠤᠨᠢᠶᠠᠷ:
《ᠲᠡᠳᠡᠴᠢᠨᠢ ᠶᠠᠮᠠᠷ ᠤᠳᠤᠷᠢᠳᠤᠯᠭᠠᠶᠤᠮ? ᠨᠢᠭᠡ ᠨᠢᠭᠡᠪᠡᠷᠢᠶᠡᠨ ᠨᠠᠮᠢ ᠡᠰᠡᠷᠭᠦᠴᠡᠵᠦ ᠤᠯᠤᠰᠠᠴᠠ ᠤᠷᠪᠠᠬᠤ ᠪᠦᠯᠦᠭᠦᠨ ᠭᠣᠣᠯ ᠬᠦᠴᠦᠨ ᠨᠤᠭᠦᠳ ᠪᠥᠭᠡᠳ ᠨᠢᠭᠡ ᠪᠦᠯᠦᠭ ᠤᠷᠪᠠᠭᠴᠢ ᠲᠠᠩᠨᠠᠭᠤᠯ᠂ ᠬᠥᠷᠦᠩᠭᠡᠲᠦ ᠶᠣᠰᠤᠨᠤ ᠵᠠᠮᠢᠶᠠᠷ ᠶᠠᠪᠤᠭᠴᠢ ᠡᠷᠬᠡ ᠪᠠᠷᠢᠭᠴᠢᠳ ᠮᠥᠨ᠂ ᠲᠠᠨᠠᠷ ᠴᠥᠮ ᠨᠢᠭᠡ ᠡᠭᠦᠷᠦᠨ ᠡᠯᠪᠡᠩᠭᠦ! ᠡᠢᠮᠦᠡᠴᠡ ᠰᠧᠯᠢᠩᠢᠶᠡᠷ ᠮᠠᠩᠯᠠᠢᠯᠠᠭᠤᠯᠤᠭᠰᠠᠨ ᠤᠯᠠᠭᠠᠨ ᠵᠠᠰᠠᠭᠲᠠᠢ ᠶᠠᠭᠠᠬᠢᠵᠤ ᠠᠳᠠᠯᠢᠳᠭᠠᠵᠤ ᠪᠣᠯᠬᠤ ᠪᠤᠢ?》 ᠭᠡᠵᠦ ᠰᠧᠯᠢᠩᠦᠨ ᠴᠢᠷᠠᠢᠶᠢ ᠰᠡᠮᠬᠡᠨ ᠬᠠᠷᠠᠵᠤ ᠠᠪᠤᠭᠠᠳ 《ᠦᠵᠡ! ᠴᠢᠨᠦ ᠠᠩᠭᠢᠶᠢᠨ ᠵᠣᠭᠰᠤᠯᠲᠠᠴᠢᠨᠢ ᠥᠴᠦᠬᠡᠨᠴᠦ ᠰᠢᠯᠵᠢᠭᠰᠡᠨᠦᠭᠡᠢ ᠪᠠᠢᠭᠰᠠᠭᠠᠷ!》 ᠭᠡᠵᠦ ᠣᠶᠤᠨᠪᠠᠲᠤᠶᠢ ᠶᠡᠬᠡᠯᠡ ᠪᠤᠷᠤᠭᠤᠰᠢᠶᠠᠨ ᠵᠢᠮᠡᠯᠡᠪᠡ᠃
《ᠵᠦᠢᠲᠡᠢ! ᠡᠢᠮᠦᠡᠴᠡ ᠪᠢ ᠨᠡᠩᠴᠦ ᠭᠠᠳᠠᠭᠠᠳᠤ ᠤᠯᠤᠰᠤᠨ ᠬᠥᠮᠦᠨᠲᠡᠢ ᠠᠭᠤᠯᠵᠠᠬᠤ ᠡᠷᠬᠡᠦᠭᠡᠢ》 ᠭᠡᠵᠦ ᠣᠶᠤᠨᠪᠠᠲᠤ ᠳᠣᠷᠤᠭᠰᠢ ᠬᠠᠷᠠᠭᠰᠠᠭᠠᠷ ᠬᠡᠯᠡᠭᠡᠳ᠂ ᠳᠣᠲᠤᠷᠠᠪᠠᠨ ᠡᠨᠡ ᠭᠠᠢᠬᠠᠯ ᠨᠠᠮᠠᠢ ᠳᠡᠭᠡᠷᠡ ᠳᠡᠭᠡᠷᠡᠨᠢ ᠪᠤᠷᠤᠭᠤᠰᠢᠶᠠᠨ ᠰᠢᠭᠦᠮᠵᠢᠯᠡᠵᠦ᠂ ᠰᠧᠯᠢᠩᠦᠨ ᠡᠮᠦᠨᠡ ᠮᠢᠨᠦ ᠦᠵᠡᠯ ᠰᠠᠨᠠᠭᠠᠶᠢ ᠲᠡᠷᠰᠯᠡᠭᠦᠦᠶᠢᠨ ᠲᠤᠢᠯᠳᠤ ᠲᠤᠯᠲᠠᠯᠠ ᠬᠡᠯᠡᠪᠡᠯ ᠨᠡᠩ ᠰᠠᠢᠨ᠂ ᠡᠨᠡ ᠤᠳᠠᠭᠠᠶᠢᠨ ᠠᠭᠤᠯᠵᠠᠯᠲᠠᠠᠴᠠ ᠨᠠᠮᠠᠢ ᠳᠥᠩᠭᠡᠭᠡᠳ ᠬᠡᠯᠲᠦᠷᠢᠭᠦᠯᠴᠢᠬᠡᠪᠡᠯ ᠪᠣᠯᠴᠢᠬᠠᠨᠠ ᠭᠡᠵᠦ ᠪᠣᠳᠤᠨᠠ᠃ 《 ᠪᠢᠳᠡ ᠡᠨᠳᠡ ᠦᠭᠡᠭᠦᠦ ᠠᠩᠭᠢᠶᠢᠨ ᠰᠧᠯᠢᠩᠪᠦ᠋ᠶᠢ ᠲᠥᠯᠦᠭᠡᠯᠡᠵᠦ᠂ ᠠᠩᠭᠢᠶᠢᠨ ᠳᠠᠢᠰᠤᠨᠲᠠᠢ ᠪᠠᠢᠯᠳᠤᠵᠤ ᠪᠠᠢᠨᠠ!》 ᠭᠡᠵᠦ ᠰᠧᠯᠢᠩ ᠠᠪ ᠠᠭᠠᠵᠢᠭᠤ ᠳᠤᠤᠭᠠᠷᠤᠭᠠᠳ: 《ᠪᠢᠳᠡ ᠪᠣᠯ ᠨᠠᠮᠤᠨ ᠲᠥᠷᠦᠶᠢᠨ ᠪᠣᠳᠤᠯᠭᠠᠶᠢ ᠡᠷᠡᠰ ᠰᠢᠭᠤᠷᠬᠠᠢ ᠲᠤᠤᠱᠯᠠᠭᠤᠯᠵᠤ᠂ ᠦᠰᠦᠨ ᠲᠡᠳᠦᠢᠴᠦ ᠭᠠᠵᠢᠭᠤᠳᠠᠭᠤᠯᠳᠠᠭᠦᠭᠡᠢᠶᠤᠮ᠃ ᠪᠢᠳᠡ ᠴᠢᠮᠠᠢ ᠥᠨᠥᠳᠦᠷ ᠪᠠᠰᠠ ᠲᠠᠩᠨᠠᠭᠤᠯᠤᠨ ᠬᠥᠳᠡᠯᠭᠡᠭᠡᠨᠲᠡᠢ ᠪᠠᠢᠨᠠ ᠭᠡᠵᠦ ᠬᠡᠷᠡᠭ ᠨᠥᠮᠦᠷᠦᠭᠦᠯᠵᠦ᠂ ᠬᠢᠯᠢᠰᠳᠡᠭᠦᠯᠬᠦᠪᠡᠷᠦᠭᠡᠢ᠃ ᠦᠨᠡᠨᠳᠡᠭᠡᠨ ᠴᠢᠴᠦ ᠪᠠᠰᠠ ᠥᠩᠭᠡᠷᠡᠭᠰᠡᠨᠲᠡᠢᠪᠡᠨ ᠠᠳᠠᠯᠢᠪᠠᠷ ᠲᠡᠳᠡᠭᠡᠷ ᠠᠵᠢᠯᠯᠠᠭᠠᠶᠢ ᠦᠢᠯᠡᠳᠴᠦᠴᠦ ᠴᠢᠳᠠᠬᠤᠦᠭᠡᠢᠶᠤᠮ᠃ ᠪᠢᠳᠡ ᠴᠢᠨᠦ ᠡᠨᠡ ᠪᠠᠢᠳᠠᠯᠢ ᠪᠦᠷ ᠮᠡᠳᠡᠵᠦ ᠪᠠᠢᠨᠠ》 ᠭᠡᠪᠡ᠃
᠁ ᠡᠨᠡ ᠦᠶᠡᠳᠦ᠂ ᠰᠧᠯᠢᠩᠦᠨ ᠰᠢᠷᠡᠭᠡᠨ ᠳᠡᠭᠡᠷᠡᠬᠢ ᠳ᠋ᠢᠶᠠᠩᠬᠤᠸᠠ ᠲᠠᠷᠴᠢᠭᠢᠨᠠᠪᠠ᠃ ᠬᠠᠷᠢᠯᠴᠠᠭᠤᠷᠢ ᠯᠠᠷᠵᠢᠶᠠᠲᠠᠢ ᠭᠡᠭᠴᠢᠪᠡᠷ ᠲᠣᠰᠴᠤ᠂ ᠤᠷᠲᠤ ᠠᠶᠠᠯᠭᠠ ᠲᠠᠲᠠᠨ 《 ᠸᠧᠢ - ᠬᠡᠨ ᠪᠤᠢ?》 ᠭᠡᠰᠡᠨᠢᠶᠡᠨ ᠳᠣᠣᠷᠠᠪᠠᠨ ᠰᠠᠨᠳᠤᠷᠴᠤ ᠬᠣᠶᠠᠷ ᠭᠠᠷᠢᠶᠠᠷᠢᠶᠠᠨ ᠬᠠᠷᠢᠯᠴᠠᠭᠤᠷᠢ ᠠᠳᠭᠤᠨ᠂ ᠥᠪᠡᠷᠦᠨ ᠡᠷᠬᠡᠦᠭᠡᠢ ᠪᠣᠰᠴᠤ ᠵᠣᠭᠰᠤᠭᠠᠳ ᠬᠢᠴᠢᠶᠡᠩᠭᠦᠢᠯᠡᠨ ᠴᠢᠩᠨᠠᠵᠤ: 《ᠵᠠ ᠁ ᠪᠢ ᠮᠥᠨ ᠁ ᠮᠡᠳᠡᠴᠢᠬᠡᠯᠡ ᠁ ᠵᠠ ᠵᠠ ᠁ ᠡᠨᠡ᠂ ᠮᠠᠷᠭᠠᠰᠢ ᠦᠳᠡᠶᠢᠨ ᠡᠮᠦᠨᠡ ᠢᠷᠡᠨᠡ ᠭᠡᠨᠡ ᠁ ᠲᠡᠭᠦᠨᠢ ᠨᠢᠭᠡᠨᠲᠡ ᠲᠠᠯᠪᠢᠭᠠᠳ ᠪᠠᠢᠨᠠ᠂ ᠪᠢ ᠣᠳᠣ ᠶᠠᠭ ᠲᠡᠭᠦᠨᠲᠡᠢ ᠶᠠᠷᠢᠯᠴᠠᠵᠤ ᠪᠠᠢᠨᠠ ᠁ ᠵᠠ᠂ ᠵᠠ᠂ ᠲᠡᠢᠮᠦ᠂ ᠲᠡᠢᠮᠦ᠂ ᠴᠥᠭᠡᠨ ᠲᠣᠭᠠᠲᠤ ᠦᠨᠳᠦᠰᠦᠲᠡᠨᠦ ᠰᠡᠬᠡᠭᠡᠲᠡᠨ ᠲᠤᠩ ᠴᠥᠭᠡᠨ ᠡ ᠁ ᠵᠠ᠂ ᠵᠠ᠂ ᠴᠢᠳᠠᠪᠤᠷᠢᠲᠠᠨ ᠡᠷᠳᠡᠮᠲᠡᠨᠨᠡᠷᠢ ᠬᠠᠢᠷᠠᠯᠠᠪᠠᠯ ᠵᠣᠬᠢᠨᠠ ᠁ ᠵᠠ ᠁》 ᠭᠡᠰᠡᠨᠢᠶᠡᠨ ᠲᠡᠷᠡ ᠰᠠᠨᠳᠤᠷᠴᠤ ᠭᠠᠷᠲᠠᠬᠢ ᠬᠠᠷᠢᠯᠴᠠᠭᠤᠷᠢᠶᠠᠨ ᠵᠢᠭᠠᠭᠠᠳ ᠣᠶᠤᠨᠪᠠᠲᠤᠶᠢ ᠳᠠᠯᠠᠯᠤᠨ ᠳᠣᠣᠷᠠ ᠳᠠᠭᠤᠨᠢᠶᠠᠷ:
《ᠨᠠᠰᠢᠪᠠᠨ᠂ ᠨᠠᠰᠢᠪᠠᠨ᠂ ᠬᠤᠷᠳᠤᠨ ᠢᠷᠡ! ᠵᠧᠦ ᠶᠡᠷᠦᠩᠬᠡᠢ ᠰᠠᠢᠳ ᠴᠢᠮᠠᠲᠠᠢ ᠦᠭᠡ ᠬᠡᠯᠡᠯᠴᠡᠨᠡ ᠭᠡᠨᠡ! ᠬᠤᠷᠳᠤᠯᠠ!》 ᠭᠡᠪᠡ᠃
ᠣᠶᠤᠨᠪᠠᠲᠤ᠂ ᠭᠱᠠᠨ ᠵᠠᠭᠤᠷᠠ ᠴᠡᠭᠡᠵᠢ ᠳᠡᠯᠪᠡᠷᠡᠮᠡ ᠪᠠᠶᠠᠷᠯᠠᠵᠤ᠂ ᠬᠥᠭᠡᠷᠬᠦ ᠰᠡᠳᠭᠢᠯᠭᠡᠪᠡᠨ ᠳᠠᠷᠤᠵᠤ ᠳᠡᠢᠯᠬᠦᠦᠭᠡᠢ ᠪᠣᠯᠵᠤ᠂ ᠬᠥᠯ ᠨᠢᠷᠤᠭᠤ ᠡᠪᠡᠳᠬᠦᠪᠡᠨ ᠲᠠᠭ ᠮᠠᠷᠲᠠᠭᠠᠳ ᠠᠯᠪᠠᠨ ᠰᠢᠷᠬᠡᠨ ᠳᠡᠷᠭᠡᠳᠡ ᠭᠦᠶᠦᠨ ᠬᠦᠷᠴᠦ ᠬᠠᠷᠢᠯᠴᠠᠭᠤᠷᠢ ᠬᠣᠶᠠᠷ ᠭᠠᠷᠢᠶᠠᠷᠢᠶᠠᠨ ᠲᠣᠰᠴᠤ ᠠᠪᠤᠭᠠᠳ:
《ᠶᠡᠷᠦᠩᠬᠡᠢ ᠰᠠᠢᠳ ᠠ᠋! ᠪᠢ ᠣᠶᠤᠨᠪᠠᠲᠤ ᠮᠥᠨ!》 ᠭᠡᠵᠦ ᠴᠡᠴᠡᠷᠭᠡᠨᠡᠭᠰᠡᠨ ᠬᠣᠭᠤᠯᠠᠢᠪᠠᠷ ᠮᠡᠳᠡᠭᠦᠯᠦᠯᠡ᠃
《ᠦ᠂ ᠨᠥᠬᠦᠷ ᠣᠶᠤᠨᠪᠠᠲᠤ ᠲᠠ ᠰᠠᠢᠨ ᠪᠠᠢᠨᠠᠤᠤ? ᠴᠢᠨᠦ ᠰᠠᠢᠨ ᠲᠠᠨᠢᠯ ᠨᠠᠰᠤᠲᠤᠴᠢᠨᠢ ᠶᠠᠫᠤᠨᠠᠴᠠ ᠬᠦᠷᠦᠭᠡᠳ ᠢᠷᠡᠯᠡ᠃ ᠲᠡᠷᠡ ᠪᠣᠯ ᠮᠠᠨᠤ ᠨᠠᠢᠵᠠᠶᠤᠮ᠃ ᠡᠨᠡ ᠤᠳᠠᠭᠠ ᠤᠯᠤᠰᠲᠠᠭᠠᠨ ᠲᠣᠭᠤᠷᠢᠬᠤᠪᠠᠷ ᠢᠷᠡᠬᠦᠳᠡᠭᠡᠨ ᠴᠢᠨᠦ ᠡᠮᠦᠨ ᠵᠣᠷᠢᠶᠠᠷ ᠬᠢᠭᠰᠡᠨ ᠵᠢᠷᠦᠬᠡᠨ ᠰᠤᠳᠠᠰᠤᠶᠢᠨ ᠡᠪᠡᠳᠴᠢᠨᠢ ᠵᠠᠰᠠᠬᠤ ᠰᠢᠨᠡ ᠡᠮ ᠠᠪᠴᠢᠷᠠᠵᠤ ᠥᠭᠴᠡᠢ》 ᠭᠡᠬᠦ ᠶᠡᠷᠦᠩᠬᠡᠢ ᠰᠠᠢᠳᠤᠨ ᠬᠠᠯᠠᠭᠤᠨ ᠳᠣᠲᠤᠨᠤ ᠳᠠᠭᠤᠨᠢ ᠣᠶᠤᠨᠪᠠᠲᠤᠶᠢᠨ ᠴᠢᠬᠢᠨᠳᠦ ᠲᠣᠪ ᠲᠣᠳᠤᠬᠠᠨ ᠰᠣᠨᠤᠰᠳᠠᠨᠠ᠃
《ᠡᠨᠡ ᠡᠮ ᠶᠠᠫᠤᠨᠳᠤ ᠨᠡᠯᠢᠶᠡᠳ ᠰᠠᠢᠨ ᠦᠢᠯᠡᠳᠦᠯ ᠦᠵᠡᠭᠦᠯᠵᠡᠢ᠃ ᠣᠳᠣ ᠨᠠᠰᠤᠲᠤ ᠠᠪᠤᠭᠠᠢ ᠴᠢᠮᠠᠢ ᠡᠷᠢᠨ ᠣᠴᠢᠵᠤ᠂ ᠣᠢᠷᠠᠶᠢᠨ ᠵᠢᠯᠦᠨ ᠰᠤᠳᠤᠯᠤᠯᠲᠠᠶᠢᠨ ᠬᠢᠷᠢ ᠪᠦᠲᠦᠮᠵᠢᠶᠢᠴᠢᠨᠢ ᠣᠢᠯᠠᠭᠠᠨ ᠰᠤᠷᠤᠯᠴᠠᠵᠤ᠂ ᠴᠢᠮᠠᠲᠠᠢ ᠤᠯᠠᠮ ᠨᠢᠭᠡ ᠠᠯᠬᠤᠮ ᠬᠠᠮᠲᠤᠷᠠᠨ ᠠᠵᠢᠯᠯᠠᠬᠤ ᠰᠠᠨᠠᠭᠠᠲᠠᠢ ᠪᠠᠢᠨᠠ᠃ ᠡᠨᠡ ᠪᠣᠯ ᠰᠢᠨᠵᠢᠯᠡᠬᠦ ᠤᠬᠠᠭᠠᠨᠤ ᠲᠠᠯᠠᠪᠠᠷ ᠨᠡᠯᠢᠶᠡᠳ ᠬᠤᠪᠢ ᠨᠡᠮᠡᠭᠦᠷᠢ ᠦᠵᠡᠭᠦᠯᠬᠦ ᠢᠷᠠᠭᠤ ᠠᠯᠳᠠᠷᠲᠠᠢ ᠠᠵᠢᠯ ᠪᠣᠯᠤᠨᠠ᠃ ᠪᠢ ᠲᠠᠨᠠᠷᠤᠨ ᠬᠠᠮᠲᠤᠷᠠᠨ ᠠᠵᠢᠯᠯᠠᠵᠤ᠂ ᠨᠡᠩ ᠶᠡᠬᠡ ᠠᠮᠵᠢᠯᠲᠠ ᠣᠯᠵᠤ᠂ ᠳᠤᠮᠳᠠᠳᠤ ᠶᠠᠫᠤᠨ ᠬᠣᠶᠠᠷ ᠤᠯᠤᠰᠤᠨ ᠠᠷᠠᠳ ᠲᠦᠮᠡᠨ ᠪᠣᠯᠤᠨ ᠳᠡᠯᠡᠬᠡᠢᠶᠢᠨ ᠠᠷᠠᠳ ᠲᠦᠮᠡᠨᠳᠦ ᠶᠡᠬᠡ ᠭᠠᠪᠢᠶᠠ ᠵᠢᠳᠭᠦᠯᠢᠶᠡᠨ ᠡᠷᠭᠦᠬᠦᠶᠢᠴᠢᠨᠢ ᠢᠷᠦᠭᠡᠶᠡ᠃ 》
《ᠶᠡᠷᠦᠩᠬᠡᠢ ᠰᠠᠢᠳᠤᠨ ᠬᠠᠷᠠᠭᠠᠯᠵᠠᠯᠳᠤ ᠲᠠᠯᠠᠷᠬᠠᠵᠤ ᠪᠠᠢᠨᠠ!》 ᠭᠡᠳ ᠣᠶᠤᠨᠪᠠᠲᠤ ᠨᠢᠳᠦᠨᠳᠡᠭᠡᠨ ᠲᠠᠯᠠᠷᠬᠠᠯᠤᠨ ᠨᠢᠯᠪᠤᠰᠤ ᠮᠡᠯᠲᠡᠭᠡᠨᠡᠭᠦᠯᠦᠭᠰᠡᠭᠡᠷ: 《ᠪᠢ ᠵᠠᠪᠠᠯ ᠶᠡᠷᠦᠩᠬᠡᠢ ᠰᠠᠢᠳᠤᠨ ᠵᠢᠭᠠᠪᠤᠷᠢ ᠶᠣᠰᠤᠭᠠᠷ ᠴᠢᠷᠮᠠᠢᠨ ᠠᠵᠢᠯᠯᠠᠨᠠ!》 ᠭᠡᠵᠦ ᠴᠡᠴᠡᠷᠭᠡᠨᠡᠭᠰᠡᠨ ᠬᠣᠭᠤᠯᠠᠢᠪᠠᠷ ᠬᠡᠯᠡᠨᠡ᠃
ᠲᠡᠷᠡ ᠬᠠᠷᠢᠯᠴᠠᠭᠤᠷᠢᠶᠠᠨ ᠲᠠᠯᠪᠢᠭᠤᠨ ᠤᠳᠠᠲᠠᠯᠠ ᠮᠡᠯᠡᠷᠡᠨ ᠵᠣᠭᠰᠤᠯᠠ᠃ ᠲᠡᠭᠦᠨᠦ ᠴᠡᠭᠡᠵᠢᠨᠳᠦ ᠪᠠᠶᠠᠰᠤᠯ᠂ ᠭᠣᠮᠤᠳᠠᠯ᠂ ᠭᠠᠰᠢᠭᠤᠳᠠᠯ᠂ ᠵᠣᠪᠠᠨᠢᠯᠢᠶᠠᠷ ᠪᠢᠯᠬᠠᠵᠤ᠂ ᠬᠦᠨᠳᠦᠲᠦ ᠬᠠᠢᠷᠠᠲᠤ ᠶᠡᠷᠦᠩᠬᠡᠢ ᠰᠠᠢᠳᠤᠨᠢᠶᠠᠨ ᠲᠤᠰᠢᠶᠠᠵᠤ ᠥᠭᠭᠦᠭᠰᠡᠨ ᠠᠷᠢᠭᠤᠨ ᠡᠭᠦᠷᠭᠡᠶᠢ ᠶᠠᠭᠠᠬᠢᠨ ᠪᠡᠶᠡᠯᠡᠭᠦᠯᠬᠦᠪᠡᠨ ᠮᠡᠳᠡᠬᠦᠦᠭᠡᠢ ᠪᠤᠬᠢᠨᠢᠳᠤᠨᠠ᠃ ᠬᠢᠲᠠᠳ᠂ ᠡᠸᠦ᠋ᠷᠣᠫᠡ ᠡᠮᠨᠡᠯᠭᠡᠶᠢ ᠤᠶᠠᠯᠳᠤᠭᠤᠯᠬᠤ ᠵᠠᠮᠢᠶᠠᠷ ᠵᠠᠮᠨᠠᠨ᠂ ᠡᠮ ᠡᠮᠨᠡᠯᠭᠡᠶᠢᠨ ᠲᠠᠯᠠᠪᠠᠷ ᠬᠢ ᠪᠡᠷᠬᠡ ᠪᠠᠷᠲᠠᠭᠠᠶᠢ ᠲᠠᠭᠤᠯᠵᠤ᠂ ᠡᠬᠡ ᠣᠷᠤᠨ ᠪᠣᠯᠤᠨ ᠪᠦᠬᠦ ᠬᠥᠮᠦᠨ ᠲᠥᠷᠦᠯᠭᠢᠲᠡᠨᠳᠦ ᠬᠤᠪᠢ ᠨᠡᠮᠡᠭᠦᠷᠢᠪᠡᠨ ᠡᠷᠭᠦᠬᠦ ᠬᠡᠷᠡᠭᠲᠡᠢ ᠭᠡᠵᠦ ᠵᠧᠦ ᠶᠡᠷᠦᠩᠬᠡᠢ ᠰᠠᠢᠳᠮᠢᠨᠢ ᠠᠯᠢ ᠬᠡᠳᠦᠢᠨ ᠵᠢᠭᠠᠪᠤᠷᠢᠯᠠᠵᠤ ᠪᠠᠢᠭᠰᠠᠨ ᠪᠢᠯᠡ᠃ ᠣᠶᠤᠨᠪᠠᠲᠤ ᠶᠠᠭ ᠡᠨᠡ ᠵᠠᠮᠢᠶᠠᠷ ᠡᠳᠦᠷ ᠰᠥᠨᠢᠦᠭᠡᠢ ᠮᠡᠷᠡᠢᠨ ᠴᠢᠷᠮᠠᠢᠵᠤ᠂ ᠵᠦᠢᠯ ᠪᠦᠷᠢᠶᠢᠨ ᠬᠦᠴᠢᠷᠳᠡᠯᠢ ᠢᠯᠠᠨ ᠳᠠᠪᠠᠵᠤ᠂ ᠵᠢᠷᠦᠬᠡᠨ ᠰᠤᠳᠠᠰᠤᠨᠤ ᠡᠪᠡᠳᠴᠢᠨᠢ ᠵᠠᠰᠠᠬᠤ ᠲᠠᠯᠠᠪᠠᠷ ᠳᠣᠪᠤᠢᠭᠰᠠᠨ ᠠᠮᠵᠢᠯᠲᠠ ᠣᠯᠬᠤ ᠭᠡᠵᠦ ᠪᠠᠢᠲᠠᠯᠠ᠂ ᠡᠨᠡ ᠤᠳᠠᠭᠠᠶᠢᠨ ᠰᠣᠶᠤᠯᠤᠨ ᠬᠤᠪᠢᠰᠭᠠᠯ ᠭᠡᠳᠡᠭ ᠶᠡᠬᠡ ᠭᠠᠮᠰᠢᠭᠲᠤ ᠳᠠᠭᠠᠷᠢᠭᠳᠠᠪᠠ᠃ ᠣᠳᠣ ᠭᠠᠳᠠᠭᠠᠳᠤ ᠤᠯᠤᠰᠤᠨ ᠬᠥᠮᠦᠨ ᠮᠠᠨᠤ ᠰᠤᠳᠤᠯᠵᠤ ᠭᠠᠷᠭᠠᠭᠰᠠᠨ ᠵᠦᠢᠯᠢ ᠠᠪᠠᠴᠢᠭᠠᠳ᠂ ᠰᠢᠨᠡ ᠡᠮ ᠨᠠᠢᠷᠠᠭᠤᠯᠵᠤ ᠶᠡᠬᠡ ᠠᠮᠵᠢᠯᠲᠠ ᠭᠠᠷᠭᠠᠭᠰᠠᠨ ᠪᠠᠢᠲᠠᠯᠠ᠂ ᠣᠶᠤᠨᠪᠠᠲᠤ ᠬᠠᠷᠢᠨ ᠶᠠᠮᠠᠷᠴᠤ ᠠᠮᠵᠢᠯᠲᠠ ᠪᠦᠲᠦᠮᠵᠢᠦᠭᠡᠢ ᠮᠥᠷᠲᠡᠭᠡᠨ ᠴᠣᠬᠤᠮ 《 ᠪᠠᠢᠳᠠᠭᠢᠶᠠᠨ ᠪᠠᠷᠠᠭᠠᠳ ᠪᠠᠯᠢᠩ ᠲᠠᠬᠢᠯᠢᠶᠠᠨ ᠬᠤᠷᠢᠶᠠᠴᠢᠬᠠᠵᠠᠢ》᠃
《ᠵᠡᠭᠦᠨ ᠭᠠᠷᠤᠨ》 ᠰᠧᠯᠢᠩ ᠮᠣᠩᠭᠤᠯᠴᠤᠳᠤᠨ ᠳᠣᠲᠤᠷᠠ ᠰᠢᠳᠠᠮ ᠳᠠᠯᠠᠢᠠᠴᠠ ᠥᠭᠡᠷᠡ ᠰᠢᠯᠭᠠᠷᠠᠭᠰᠠᠨ ᠰᠠᠢᠨ ᠶᠠᠭᠤᠮᠠᠦᠭᠡᠢ᠂ ᠢᠯᠠᠩᠭᠤᠶᠠ ᠡᠷᠳᠡᠮ ᠴᠢᠳᠠᠪᠤᠷᠢᠲᠠᠢ ᠬᠥᠮᠦᠨ ᠭᠡᠪᠡᠯ ᠡᠳᠦᠷᠦᠨ ᠣᠳᠤ ᠡᠪᠦᠯᠦᠨ ᠴᠡᠴᠡᠭᠰᠢᠭ ᠬᠣᠪᠤᠷ ᠭᠡᠵᠦ ᠪᠣᠳᠤᠵᠤ ᠪᠠᠢᠵᠠᠢ᠃ ᠥᠨᠥᠳᠦᠷ ᠲᠡᠷᠡ ᠵᠧᠦ ᠶᠡᠷᠦᠩᠬᠡᠢ ᠰᠠᠢᠳᠤᠨ ᠦᠭᠡᠶᠢ ᠰᠣᠨᠤᠰᠤᠭᠠᠳ ᠳᠣᠲᠤᠷᠠᠪᠠᠨ ᠶᠡᠬᠡᠯᠡ ᠰᠣᠴᠢᠨ᠂ ᠡᠮᠦᠨᠡᠨᠢ ᠵᠣᠭᠰᠤᠵᠤ ᠪᠠᠢᠭᠠ ᠡᠨᠡᠬᠦ ᠨᠢᠭᠤᠷ ᠴᠢᠷᠠᠢᠨᠢ ᠰᠢᠷᠠᠯᠠᠵᠤ᠂ ᠠᠷᠠᠰᠤᠨ ᠲᠤᠯᠤᠮ ᠶᠠᠰᠤᠨ ᠬᠡᠯᠬᠢᠶᠡ ᠪᠣᠯᠤᠭᠰᠠᠨ ᠮᠣᠩᠭᠤᠯ ᠬᠥᠮᠦᠨᠢ ᠬᠠᠷᠠᠭᠰᠠᠭᠠᠷ:
《ᠴᠢᠴᠢᠨᠢ ᠪᠠᠰᠠ ᠨᠡᠯᠢᠶᠡᠳ ᠡᠷᠳᠡᠮ ᠴᠢᠳᠠᠪᠤᠷᠢᠲᠠᠢ ᠬᠥᠮᠦᠨ ᠪᠠᠢᠵᠤ ᠰᠢᠪ ᠳ᠋ᠠ᠃ ᠴᠢᠨᠦ ᠡᠮᠦᠨ ᠵᠣᠷᠴᠢᠨᠢ ᠶᠠᠭᠠᠬᠢᠭᠠᠳ ᠶᠠᠫᠤᠨᠳᠤ ᠬᠦᠷᠴᠢᠬᠡᠭᠰᠡᠨᠶᠦᠮ?》 ᠭᠡᠵᠦ ᠬᠠᠴᠢᠷᠬᠠᠨ ᠠᠰᠠᠭᠤᠯᠠ᠃
《ᠨᠠᠰᠤᠲᠤ ᠠᠪᠤᠭᠠᠢᠶᠢᠨ ᠬᠠᠲᠤᠨᠨᠢ ᠶᠠᠫᠤᠨ ᠬᠥᠮᠦᠨᠶᠦᠮ᠂ ᠰᠠ ᠲᠤᠰᠴᠤ ᠤᠳᠠᠭᠠᠨ ᠵᠢᠯ ᠬᠡᠪᠲᠡᠭᠰᠡᠨ ᠪᠣᠯᠪᠠᠴᠤ ᠵᠠᠰᠠᠵᠤ ᠴᠢᠳᠠᠭᠰᠠᠨᠦᠭᠡᠢ᠃ ᠲᠡᠷᠡ ᠵᠢᠯ ᠨᠠᠰᠤᠲᠤ ᠠᠪᠤᠭᠠᠢ ᠤᠯᠤᠰᠲᠠᠭᠠᠨ ᠠᠢᠯᠴᠢᠯᠠᠵᠤ ᠢᠷᠡᠭᠡᠳ ᠨᠠᠳᠠ ᠬᠡᠯᠡᠭᠰᠡᠨ᠂ ᠪᠢ ᠤᠳᠤᠷᠢᠳᠤᠯᠭᠠᠶᠢᠨ ᠵᠥᠪᠰᠢᠶᠡᠷᠡᠯᠢ ᠣᠯᠵᠤ ᠨᠢᠭᠡ ᠡᠮᠦᠨ ᠵᠣᠷ ᠨᠠᠢᠷᠠᠭᠤᠯᠵᠤ ᠥᠭᠭᠦᠭᠰᠡᠨᠶᠦᠮ》 ᠭᠡᠵᠦ ᠣᠶᠤᠨᠪᠠᠲᠤ ᠬᠠᠷᠢᠭᠤᠯᠤᠭᠰᠠᠨᠢᠶᠠᠨ ᠡᠷᠭᠢᠨ ᠬᠠᠷᠠᠵᠤ ᠰᠢᠳᠠᠮᠢ ᠬᠤᠷᠤᠭᠤᠪᠠᠷᠢᠶᠠᠨ ᠵᠢᠭᠠᠭᠠᠳ: 《ᠨᠠᠮᠠᠢ ᠭᠠᠳᠠᠭᠠᠳᠤᠶᠢᠨ ᠲᠠᠩᠨᠠᠭᠤᠯᠳᠤ ᠨᠢᠭᠤᠴᠠ ᠮᠡᠳᠡᠭᠡ ᠬᠦᠷᠭᠡᠵᠦ᠂ ᠭᠠᠳᠠᠭᠠᠳᠤ ᠤᠯᠤᠰᠲᠠᠢ ᠰᠦᠯᠪᠡᠭᠡᠯᠳᠦᠯᠡ ᠭᠡᠵᠦ ᠡᠭᠦᠨᠦ ᠬᠡᠯᠡᠳᠡᠭᠨᠢ ᠡᠨᠡ ᠡᠮᠦᠨ ᠵᠣᠷᠢ ᠬᠡᠯᠡᠵᠦ ᠪᠠᠢᠭᠠᠶᠤᠮ᠂ ᠨᠢᠳᠤᠨᠤᠨ ᠰᠧᠯᠢᠩ ᠳᠠᠷᠤᠭᠠ ᠪᠠᠰᠠ ᠨᠠᠮᠠᠢ 〈ᠥᠪᠦᠷ ᠮᠣᠩᠭᠤᠯᠤᠨ ᠡᠳᠦᠷᠦᠨ ᠰᠣᠨᠢᠨ〉 ᠳᠡᠭᠡᠷᠡ ᠁》 ᠭᠡᠵᠦ ᠬᠢᠯᠢᠩᠯᠡᠨ ᠬᠡᠯᠡᠭᠰᠡᠨᠢᠶᠡᠨ ᠳᠣᠷᠤᠭᠰᠢ ᠵᠠᠯᠭᠠᠵᠤ ᠶᠠᠷᠢᠬᠤᠠᠴᠠᠪᠠᠨ ᠪᠠᠬᠠᠨ ᠲᠦᠪᠡᠭᠰᠢᠶᠡᠵᠦ ᠦᠭᠡᠪᠡᠨ ᠳᠤᠲᠠᠭᠤ ᠵᠣᠭᠰᠤᠭᠠᠪᠠ᠃
ᠡᠨᠡ ᠬᠣᠶᠠᠷ ᠵᠢᠯᠦᠨ ᠲᠤᠷᠰᠢ᠂ ᠰᠢᠳᠠᠮ ᠵᠡᠷᠭᠡ ᠬᠥᠮᠦᠰᠦᠨ ᠬᠠᠷᠢᠭᠤ ᠮᠡᠳᠡᠭᠦᠯᠦᠯᠲᠡᠪᠡᠷ ᠰᠧᠯᠢᠩ ᠭᠤᠸᠠᠢ ᠶᠡᠬᠡ ᠪᠠᠭᠠ ᠬᠤᠷᠠᠯᠠᠴᠠ ᠠᠪᠤᠭᠠᠳ ᠰᠣᠨᠢᠨ ᠰᠡᠳᠭᠦᠯ᠂ ᠷᠠᠳᠢᠣ᠋ ᠨᠡᠪᠲᠡᠷᠡᠭᠦᠯᠭᠡᠳᠦ ᠬᠦᠷᠲᠡᠯᠡ ᠳᠤᠷᠠ ᠲᠠᠪᠠᠪᠠᠷᠢᠶᠠᠨ ᠨᠡᠷᠡ ᠳᠤᠷᠠᠳᠤᠨ᠂ ᠮᠠᠯᠠᠭᠠᠢ ᠡᠮᠦᠰᠭᠡᠨ᠂ ᠴᠥᠭᠡᠨ ᠪᠤᠰᠤ ᠬᠥᠮᠦᠨᠢ ᠬᠣᠣᠷ ᠠᠮᠰᠠᠭᠤᠯᠵᠤ ᠴᠢᠨᠠᠭᠰᠢᠯᠠᠪᠠᠯ ᠲᠣᠭᠠᠦᠭᠡᠢ ᠣᠯᠠᠨ ᠬᠥᠮᠦᠨᠢ ᠳᠤᠲᠠᠭᠤ ᠵᠡᠮᠳᠡᠭ ᠪᠣᠯᠭᠠᠭᠰᠠᠨᠶᠤᠮᠤᠤ᠂ ᠡᠰᠡᠬᠦᠯᠡ ᠠᠮᠢ ᠨᠠᠰᠤᠶᠢᠨᠢ ᠬᠣᠬᠢᠷᠠᠭᠤᠯᠤᠭᠰᠠᠨᠶᠤᠮ᠃ ᠰᠧᠯᠢᠩ ᠭᠤᠸᠠᠢ ᠡᠨᠡ ᠪᠦᠬᠦᠨᠢ ᠪᠣᠳᠤᠬᠤ ᠪᠦᠷᠢ ᠳᠣᠲᠤᠷᠠᠪᠠᠨ ᠪᠠᠬᠠᠨ ᠠᠶᠤᠳᠠᠭ᠂ ᠭᠡᠪᠡᠴᠦ ᠠᠯᠳᠠᠭᠠ ᠪᠤᠷᠤᠭᠤᠪᠠᠨ ᠮᠡᠳᠡᠷᠡᠳᠡᠭᠦᠭᠡᠢ ᠪᠤᠷᠤᠩᠬᠤᠢ ᠨᠣᠶᠠᠨ ᠰᠣᠶᠤᠯᠤᠨ ᠬᠤᠪᠢᠰᠭᠠᠯᠤᠨ 《ᠲᠤᠭᠴᠢ》ᠶᠢᠨ ᠰᠣᠯᠤᠭᠠᠢ ᠯᠣᠭᠢᠭᠢᠶᠠᠷ ᠪᠡᠶᠡᠪᠡᠨ ᠦᠷᠭᠦᠯᠵᠢ ᠥᠮᠦᠭᠯᠡᠳᠡᠭ ᠪᠣᠯᠬᠣᠷ᠂ ᠥᠨᠥ ᠪᠠᠰᠠ ᠣᠶᠤᠨᠪᠠᠲᠤᠶᠢ ᠰᠢᠭᠦᠮᠵᠢᠯᠡᠵᠦ:
《ᠴᠢ ᠡᠩ ᠲᠡᠷᠢᠭᠦᠨᠳᠦ ᠰᠣᠶᠤᠯᠤᠨ ᠬᠤᠪᠢᠰᠭᠠᠯᠳᠤ ᠵᠥᠪᠢᠶᠡᠷ ᠬᠠᠨᠳᠤᠬᠤ ᠬᠡᠷᠡᠭᠲᠡᠢ᠃ ᠣᠯᠠᠨ ᠲᠦᠮᠡᠨᠴᠢ ᠬᠥᠳᠡᠯᠭᠡᠭᠡᠨ ᠬᠡᠵᠢᠶᠡᠳᠡ ᠵᠥᠪ ᠭᠡᠳᠡᠭ ᠪᠣᠯ ᠮᠠᠷᠭᠤᠰᠢᠦᠭᠡᠢ ᠦᠨᠡᠨ ᠶᠣᠰᠤᠶᠤᠮ ᠰᠢᠤ ᠳ᠋ᠠ᠂ ᠠ! ᠁ ᠪᠢ ᠲᠠᠨᠤ ᠮᠣᠩᠭᠤᠯ ᠦᠨᠳᠦᠰᠦᠲᠡᠨᠦ ᠳᠣᠲᠤᠷᠠᠬᠢ ᠡᠷᠳᠡᠮ ᠴᠢᠳᠠᠯᠲᠠᠢ ᠬᠥᠮᠦᠨᠢ ᠶᠡᠬᠡ ᠬᠠᠢᠷᠠᠯᠠᠳᠠᠭ ᠰᠢᠤ ᠁》 ᠭᠡᠪᠡ᠃
《ᠵᠡᠭᠦᠨ ᠭᠠᠷᠤᠨ》 ᠰᠧᠯᠢᠩᠳᠡᠭᠡᠨ ᠰᠠᠢᠨ ᠦᠵᠡᠭᠳᠡᠬᠦᠶᠢ ᠭᠣᠷᠢᠳᠠᠭᠰᠠᠨ ᠰᠢᠳᠠᠮ ᠬᠢᠮᠤᠰᠤᠨ ᠲᠡᠳᠦᠢ ᠵᠠᠪᠰᠠᠷᠢᠴᠤ ᠠᠯᠳᠠᠯᠦᠭᠡᠢ ᠬᠣᠩᠰᠢᠶᠠᠷ ᠲᠥᠷᠦᠵᠦ:
《ᠦᠯᠦ ᠲᠡᠢᠮᠦ ᠪᠠᠢᠯᠭᠦᠢ᠂ ᠲᠠᠨᠠᠷᠢ ᠵᠠᠰᠠᠪᠤᠷᠢᠯᠠᠬᠤ ᠦᠵᠡᠯᠦᠨ ᠯᠠᠢ ᠯᠣᠪᠰᠢᠲᠠᠢ ᠯᠠᠭ ᠰᠢᠪᠠᠷᠠᠴᠠ ᠭᠠᠷᠭᠠᠬᠤᠠᠴᠠ ᠢᠯᠡᠭᠦᠦ ᠥᠷᠦᠰᠢᠶᠡᠯ ᠬᠠᠢᠷᠠᠯᠠᠯ ᠭᠡᠵᠦ ᠪᠠᠢᠨᠠᠤᠤ?》 ᠭᠡᠨᠡ᠃
《ᠲᠡᠢᠮᠦ ᠰᠢᠦ! ᠪᠢ ᠵᠠᠷᠢᠮᠳᠠᠭᠠᠨ ᠲᠠᠨᠤ ᠮᠣᠩᠭᠤᠯ ᠦᠨᠳᠦᠰᠦᠲᠡᠨᠦ ᠠ᠊ ᠁》 ᠭᠡᠳ ᠰᠧᠯᠢᠩᠦᠨ ᠦᠭᠡᠨᠢ ᠲᠡᠭᠡᠭᠯᠡᠵᠦ᠂ ᠪᠠᠷᠤᠭᠯᠠ 《ᠠᠬᠠ ᠳᠡᠭᠦᠦ》ᠨᠠᠷ ᠭᠡᠵᠦ ᠠᠩᠭᠢᠶᠢᠨ ᠵᠣᠭᠰᠤᠯᠲᠠᠪᠠᠨ ᠠᠯᠳᠠᠭᠰᠠᠨ ᠦᠭᠡ ᠬᠡᠯᠡᠴᠢᠬᠡᠬᠦ ᠰᠢᠬᠠᠭᠠᠳ᠂ ᠳᠣᠣᠷᠠᠪᠠᠨ ᠦᠭᠡᠪᠡᠨ ᠥᠭᠡᠷᠡᠲᠦᠭᠦᠯᠵᠦ 《᠁ ᠠᠰᠠᠭᠤᠳᠠᠯᠲᠠᠢ ᠬᠥᠮᠦᠨᠳᠦ ᠴᠢᠩᠭᠠ ᠣᠷᠤᠵᠤ᠂ 〈 ᠴᠢᠩᠭᠠᠪᠠᠷ ᠰᠠᠭᠤᠷᠢ ᠪᠣᠯᠭᠠᠬᠤ〉 ᠬᠡᠷᠡᠭᠲᠡᠢ ᠭᠡᠳᠡᠭᠶᠦᠮ᠂ ᠴᠢᠩᠭᠠ ᠣᠷᠤᠬᠤᠨᠢ ᠬᠠᠢᠷᠠᠯᠠᠬᠤᠶᠢᠨ ᠲᠥᠯᠦᠭᠡ ᠰᠢᠦ ᠳ᠋ᠠ !》 ᠭᠡᠯᠡ᠃
《ᠲᠠᠨᠠᠷᠤᠨ ᠠᠪᠤᠷᠠᠯᠲᠠᠴᠢᠨᠢ ᠬᠡᠴᠢᠨᠡᠨ ᠬᠥᠮᠦᠨᠦ ᠠᠮᠢ ᠨᠠᠰᠤᠶᠢ ᠬᠣᠬᠢᠷᠠᠭᠤᠯᠤᠭᠰᠠᠨ ᠠᠵᠢ!》 ᠭᠡᠵᠦ ᠣᠶᠤᠨᠪᠠᠲᠤ ᠳᠣᠲᠤᠷᠠᠪᠠᠨ ᠪᠣᠳᠤᠭᠠᠳᠯᠠ ᠥᠩᠭᠡᠷᠡᠭᠰᠡᠨᠡᠴᠡ ᠪᠢᠰᠢ᠂ ᠬᠡᠯᠡᠵᠦ ᠭᠠᠷᠭᠠᠵᠤ ᠴᠢᠳᠠᠭᠰᠠᠨᠦᠭᠡᠢ᠃
ᠰᠧᠯᠢᠩ ᠳᠠᠷᠤᠭᠠ ᠭᠢᠯᠦᠢᠲᠡᠯᠡ ᠰᠢᠷᠳᠡᠭᠰᠡᠨ ᠮᠣᠳᠤᠨ ᠱᠠᠯᠠ ᠳᠡᠭᠡᠭᠦᠷ ᠨᠠᠰᠢ ᠴᠠᠰᠢ ᠬᠣᠯᠬᠢᠨ ᠠᠯᠬᠤᠭᠰᠠᠭᠠᠷ᠂ ᠶᠡᠬᠡᠯᠡ ᠰᠠᠨᠠᠭᠠᠴᠢᠯᠠᠨ:
《ᠴᠢ ᠡᠮᠨᠡᠯᠭᠡᠶᠢᠨ ᠠᠵᠢᠯᠢᠶᠠᠨ ᠬᠢᠷᠢ ᠵᠡᠷᠭᠡ ᠰᠤᠳᠤᠯᠪᠠ? ᠲᠡᠷᠡ ᠬᠥᠮᠦᠨ ᠡᠨᠡ ᠤᠳᠠᠭᠠ ᠴᠢᠮᠠᠲᠠᠢ ᠰᠤᠳᠤᠯᠬᠤᠪᠠᠷ ᠢᠷᠡᠬᠦᠳᠦ ᠴᠢ ᠶᠠᠭᠠᠬᠢᠶᠠ ᠭᠡᠵᠦ ᠪᠣᠳᠤᠵᠤ ᠪᠠᠢᠨᠠ ᠪᠤᠢ?》 ᠭᠡᠵᠦ ᠠᠰᠠᠭᠤᠪᠠ᠃
ᠣᠶᠤᠨᠪᠠᠲᠤ ᠲᠤᠢᠯᠤᠨ ᠬᠠᠷᠠᠮᠰᠠᠯᠲᠠᠢᠪᠠᠷ ᠲᠣᠯᠤᠭᠠᠢᠪᠠᠨ ᠰᠠᠵᠢᠵᠤ᠂ ᠰᠢᠳᠠᠮ ᠳᠠᠯᠠᠢᠶᠢ ᠵᠢᠭᠠᠭᠰᠠᠭᠠᠷ:
《ᠬᠡᠳᠦᠨ ᠠᠷᠪᠠᠨ ᠵᠢᠯᠦᠨ ᠲᠤᠷᠰᠢ ᠪᠦᠬᠦ ᠰᠡᠳᠭᠢᠯ ᠪᠦᠬᠦ ᠬᠦᠴᠦᠪᠡᠨ ᠰᠢᠪᠬᠠᠵᠤ ᠰᠤᠳᠤᠯᠤᠭᠰᠠᠨ ᠲᠤᠷᠰᠢᠯᠲᠠᠶᠢᠨᠮᠢᠨᠢ ᠪᠠᠢᠳᠠᠭ ᠦᠷᠡ ᠪᠦᠲᠦᠭᠡᠯᠢ ᠡᠳᠡᠨ ᠪᠦᠷ ᠲᠠᠮᠲᠤᠭᠯᠠᠵᠤ ᠬᠠᠶᠠᠯᠠ! ᠁》 ᠭᠡᠳ ᠨᠢᠯᠪᠤᠰᠤ ᠤᠨᠠᠭᠠᠨ ᠠᠯᠳᠠᠵᠤ᠂ ᠳᠣᠭᠳᠤᠯᠤᠭᠰᠠᠨ ᠰᠡᠳᠭᠢᠯᠢᠶᠡᠨ ᠳᠠᠷᠤᠵᠤ ᠶᠠᠳᠠᠭᠰᠠᠨ ᠪᠠᠢᠳᠠᠯᠢᠶᠠᠷ 《ᠮᠠᠨᠤ ᠰᠤᠳᠤᠯᠬᠤ ᠭᠠᠵᠠᠷᠢ ᠪᠦᠷ ᠪᠠᠯᠪᠠᠴᠢᠯᠠ᠂ ᠰᠤᠳᠤᠯᠬᠤ ᠠᠵᠢᠯᠲᠠᠳᠢ ᠴᠥᠮ ᠳᠠᠢᠰᠤᠨ ᠪᠣᠯᠭᠠᠯᠠ᠂ ᠮᠠᠰᠢᠨ ᠲᠣᠨᠤᠭᠯᠠᠯᠢ ᠪᠠᠰᠠ ᠪᠦᠷ ᠬᠡᠮᠬᠡᠴᠢᠭᠡᠳ ᠬᠠᠶᠠᠴᠢᠬᠠᠯᠠ᠂ ᠴᠢᠬᠤᠯᠠ ᠡᠮᠦᠨ ᠵᠦᠢᠯᠢ ᠪᠦᠷ ᠳᠡᠭᠡᠷᠡᠮᠳᠡᠭᠡᠳ ᠠᠪᠴᠢᠬᠠᠯᠠ᠂ ᠪᠢᠴᠢᠭ ᠮᠠᠲᠧᠷᠢᠶᠠᠯ᠂ ᠨᠣᠮ ᠰᠤᠳᠤᠷᠲᠤ ᠬᠦᠷᠲᠡᠯᠡ ᠪᠦᠷ ᠰᠢᠲᠠᠭᠠᠴᠢᠬᠠᠯᠠ᠂ ᠦᠯᠡᠳᠡᠵᠦ ᠬᠣᠴᠤᠷᠤᠭᠰᠠᠨᠨᠢ ᠭᠠᠭᠴᠠᠬᠦ ᠮᠢᠨᠦ ᠡᠨᠡ ᠮᠠᠭᠤ ᠪᠠᠯᠪᠠᠴᠢᠭᠠᠳ ᠬᠠᠭᠠᠷᠠᠳᠠᠭᠦᠭᠡᠢ 〈 ᠨᠣᠬᠠᠢᠶᠢᠨ ᠲᠣᠯᠤᠭᠠᠢ〉ᠯᠠ ᠮᠥᠨ ᠰᠢᠷᠬᠠ ᠰᠣᠷᠪᠢᠪᠠᠷ ᠳᠦᠭᠦᠷᠦᠭᠡᠳ ᠪᠠᠢᠭᠰᠠᠭᠠᠷ ᠠ᠋᠃ ᠭᠡᠪᠡᠴᠦ ᠤᠬᠠᠭᠠᠨ ᠮᠡᠳᠡᠷᠡᠯ ᠤᠷᠢᠳᠠᠶᠢᠨ ᠭᠢᠪᠡᠨ ᠬᠣᠯᠠ ᠬᠦᠷᠬᠦᠪᠡᠨ ᠪᠣᠯᠢᠴᠢᠬᠠᠵᠠᠢ!》 ᠭᠡᠯᠡ᠃
ᠰᠧᠯᠢᠩ ᠳᠠᠷᠤᠭᠠ ᠠᠩᠭᠢᠶᠢᠨ ᠳᠠᠢᠰᠤᠨᠤ ᠭᠡᠳᠡᠷᠭᠦ ᠳᠠᠭᠠᠷᠢᠯᠲᠠᠳᠤ ᠤᠴᠠᠷᠠᠭᠰᠠᠨ ᠮᠡᠲᠦ ᠪᠣᠯᠵᠤ᠂ ᠶᠡᠬᠡᠯᠡ ᠲᠠᠪᠠᠦᠭᠡᠢ ᠪᠠᠢᠳᠠᠯᠲᠠᠢᠪᠠᠷ:
《ᠬᠤᠪᠢᠰᠭᠠᠯ ᠭᠡᠳᠡᠭᠴᠢᠨᠢ ᠬᠡᠮᠬᠡᠴᠢᠵᠦ ᠪᠠᠯᠪᠠᠴᠢᠳᠠᠭᠯᠠ ᠰᠢᠤ ᠳ᠋ᠠ ! ᠬᠠᠭᠤᠴᠢᠨ ᠶᠢᠷᠲᠢᠨᠴᠦᠶᠢ ᠪᠠᠯᠪᠠᠴᠢᠬᠤᠦᠭᠡᠢ ᠪᠣᠯ ᠰᠢᠨᠡ ᠶᠢᠷᠲᠢᠨᠴᠦᠶᠢ ᠶᠠᠭᠠᠬᠢᠵᠤ ᠪᠠᠢᠭᠤᠯᠤᠨᠠ ᠪᠤᠢ?!》 ᠭᠡᠵᠦ ᠬᠡᠯᠡᠪᠡ᠃
ᠣᠶᠤᠨᠪᠠᠲᠤ᠂ ᠲᠣᠭᠲᠠᠭᠤᠨ ᠪᠠᠢᠳᠠᠯᠲᠠᠢ ᠳᠣᠣᠷᠠ ᠳᠠᠭᠤᠨᠢᠶᠠᠷ:
《ᠰᠧᠯᠢᠩ ᠳᠠᠷᠤᠭᠠ ᠡ᠂ ᠮᠠᠨᠤ ᠰᠤᠳᠤᠯᠬᠤ ᠭᠠᠵᠠᠷ ᠪᠣᠯ ᠤᠯᠤᠰ ᠪᠠᠢᠭᠤᠯᠤᠭᠳᠠᠭᠰᠠᠨᠠᠴᠠ ᠬᠣᠢᠰᠢ ᠪᠦᠲᠦᠭᠡᠨ ᠪᠠᠢᠭᠤᠯᠤᠭᠰᠠᠨ ᠪᠥᠭᠡᠳ ᠠᠯᠢᠪᠠ ᠮᠠᠰᠢᠨ ᠲᠣᠨᠤᠭᠯᠠᠯ ᠪᠠ ᠨᠣᠮ ᠰᠤᠳᠤᠷᠲᠤ ᠬᠦᠷᠲᠡᠯᠡ ᠪᠦᠷ ᠤᠯᠤᠰᠠᠴᠠ ᠪᠡᠯᠡ ᠣᠷᠤᠭᠤᠯᠤᠭᠰᠠᠨ ᠰᠢᠤ》 ᠭᠡᠵᠦ ᠳᠥᠬᠦᠮ ᠲᠠᠨᠢᠯᠴᠠᠭᠤᠯᠤᠯᠠ᠃
ᠥᠪᠦᠷ ᠮᠣᠩᠭᠤᠯᠳᠤ ᠢᠷᠡᠭᠡᠳ ᠪᠦᠲᠦᠨ ᠭᠤᠷᠪᠠᠨ ᠵᠢᠯᠦᠨ ᠨᠢᠭᠤᠷ ᠦᠵᠡᠭᠡᠦᠭᠡᠢᠪᠡᠷ ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠣᠷᠤᠨᠤ ᠨᠠᠮ᠂ ᠵᠠᠰᠠᠭ᠂ ᠴᠡᠷᠢᠭᠦᠨ ᠣᠯᠠᠨ ᠲᠦᠮᠡᠨᠦ ᠵᠣᠬᠢᠶᠠᠨ ᠪᠠᠢᠭᠤᠯᠤᠯᠲᠠᠶᠢᠨ ᠪᠠᠢᠳᠠᠭ ᠶᠡᠬᠡ ᠡᠷᠬᠡᠶᠢ ᠭᠠᠭᠴᠠᠭᠠᠷ ᠡᠵᠡᠷᠬᠡᠭᠰᠡᠨ ᠰᠧᠯᠢᠩᠦᠨ ᠥᠭᠡᠳᠡᠡᠴᠡ ᠠᠶᠤᠮᠰᠢᠭᠦᠭᠡᠢᠪᠠᠷ ᠢᠩᠭᠢᠵᠦ ᠬᠠᠷᠢᠭᠤᠴᠠᠭᠰᠠᠨ ᠬᠥᠮᠦᠨ ᠶᠡᠷᠦ ᠭᠠᠷᠤᠭᠠᠦᠭᠡᠢᠰᠠᠨ᠂ ᠰᠧᠯᠢᠩ ᠠᠷᠠᠭᠠ ᠰᠢᠳᠦᠪᠡᠨ ᠬᠠᠪᠢᠷᠤᠯᠠ᠃ ᠭᠡᠪᠡᠴᠦ ᠣᠷᠴᠢᠮᠤᠨ ᠴᠥᠭᠡᠨ ᠪᠤᠰᠤ ᠬᠥᠮᠦᠨ ᠪᠡᠭᠡᠵᠢᠩᠳᠦ ᠣᠴᠢᠵᠤ ᠵᠠᠷᠭᠤ ᠵᠠᠭᠠᠯᠳᠤᠯᠭᠠ ᠬᠢᠵᠦ᠂ ᠵᠠᠷᠢᠮᠨᠢ ᠲᠥᠪᠲᠦ ᠵᠠᠬᠢᠳᠠᠯ ᠪᠢᠴᠢᠵᠦ ᠰᠢᠭᠤᠳ ᠲᠡᠭᠦᠨᠢ ᠵᠠᠭᠠᠯᠳᠤᠵᠠᠢ᠃ ᠲᠡᠢᠮᠦ ᠪᠣᠯᠬᠣᠷ᠂ ᠰᠧᠯᠢᠩ ᠳᠠᠷᠤᠭᠠ ᠨᠢᠭᠡ ᠲᠠᠯᠠᠪᠠᠷ ᠴᠢᠳᠠᠬᠤ ᠴᠢᠨᠡᠭᠡᠪᠡᠷ ᠠᠭᠤᠷ ᠣᠮᠤᠭᠢᠶᠠᠨ ᠳᠠᠷᠤᠵᠤ᠂ ᠨᠥᠭᠦᠭᠡ ᠲᠠᠯᠠᠪᠠᠷ ᠣᠶᠤᠨᠪᠠᠲᠤ ᠰᠥᠰᠦᠷᠬᠡᠦ ᠬᠥᠮᠦᠨ ᠭᠡᠳᠡᠭᠢ ᠮᠡᠳᠡᠭᠡᠳ ᠳᠣᠲᠤᠷᠠᠪᠠᠨ ᠪᠠᠬᠠᠨ ᠵᠢᠷᠦᠬᠡᠰᠢᠵᠦ᠂ ᠡᠨᠡ ᠭᠠᠢᠬᠠᠯ ᠶᠡᠷᠦᠩᠬᠡᠢ ᠰᠠᠢᠳᠲᠠᠢ ᠲᠠᠨᠢᠯ ᠲᠤᠯᠠ ᠵᠠᠬᠢᠳᠠᠯ ᠪᠢᠴᠢᠬᠦᠶᠦᠮᠦᠦ᠂ ᠡᠰᠡᠬᠦᠯᠡ ᠮᠠᠷᠭᠠᠰᠢᠶᠢᠨ ᠢᠷᠡᠬᠦ ᠭᠠᠳᠠᠭᠠᠳᠤᠶᠢᠨ ᠵᠣᠴᠢᠨᠢᠶᠠᠷ ᠳᠠᠮᠵᠢᠭᠤᠯᠵᠤ ᠡᠨᠳᠡᠬᠢ ᠪᠠᠢᠳᠠᠯᠢ ᠲᠤᠰᠭᠠᠪᠠᠯ ᠨᠡᠩᠴᠦ ᠠᠶᠤᠮᠰᠢᠭᠲᠠᠢ ᠪᠣᠯᠤᠨᠠ ᠭᠡᠵᠦ ᠪᠣᠳᠤᠭᠠᠳ:
《ᠭᠡᠭᠡᠭᠳᠡᠭᠰᠡᠨ ᠶᠠᠭᠤᠮᠠᠰᠢ ᠪᠠᠰᠠ ᠡᠭᠡᠭᠦᠯᠦᠭᠡᠳ ᠣᠯᠵᠤ ᠪᠣᠯᠤᠨᠠ᠂ ᠡᠪᠳᠡᠵᠦ ᠬᠠᠭᠠᠯᠤᠭᠰᠠᠨᠢᠨᠢ ᠪᠠᠰᠠ ᠳᠠᠬᠢᠭᠠᠳ ᠬᠤᠳᠠᠯᠳᠤᠭᠠᠳ ᠠᠪᠴᠤ ᠪᠣᠯᠤᠨᠠ ᠰᠢᠤ!》 ᠭᠡᠳ ᠢᠨᠢᠶᠡᠪᠬᠢᠯᠡᠪᠡ᠃
《ᠴᠢᠩᠭᠢᠪᠡᠯ ᠭᠡᠭᠡᠭᠳᠡᠭᠰᠡᠨ ᠴᠠᠭ ᠮᠥᠴᠡᠶᠢ ᠶᠠᠭᠠᠬᠢᠨᠠ ᠪᠤᠢ?》 ᠭᠡᠵᠦ ᠣᠶᠤᠨᠪᠠᠲᠤ ᠣᠮᠤᠭ ᠲᠡᠭᠦᠯᠳᠡᠷ ᠬᠠᠷᠢᠭᠤ ᠠᠰᠠᠭᠤᠬᠤᠳᠠᠭᠠᠨ: 《ᠠᠯᠢᠪᠠ ᠡᠷᠬᠢᠮ ᠴᠤᠬᠠᠭ ᠵᠦᠢᠯᠦᠨ ᠳᠣᠲᠤᠷᠠ ᠴᠠᠭ ᠮᠥᠴᠡ ᠪᠣᠯ ᠬᠠᠮᠤᠭᠤᠨ ᠬᠣᠪᠤᠷ ᠨᠠᠨᠳᠢᠨᠶᠤᠮ᠃ ᠲᠡᠭᠦᠨᠢ ᠪᠠᠰᠠ ᠡᠭᠡᠭᠦᠯᠦᠭᠡᠳ ᠠᠪᠴᠢᠷᠠᠬᠤᠶᠤᠮᠤᠤ᠂ ᠡᠰᠡᠬᠦᠯᠡ ᠬᠤᠳᠠᠯᠳᠤᠭᠠᠳ ᠠᠪᠴᠢᠷᠠᠵᠤ ᠳᠡᠢᠯᠦᠨᠡᠦᠦ?》 ᠭᠡᠪᠡ᠃
ᠭᠡᠷᠲᠦ ᠨᠠᠮ ᠭᠦᠮ᠃
ᠬᠠᠶᠠᠭᠠᠨ ᠳᠡᠭᠡᠷᠡᠬᠢ ᠴᠠᠬᠢᠯᠭᠠᠨ ᠴᠠᠭ 《ᠲᠢᠭ ᠲᠠᠭ》 ᠳᠤᠤᠭᠠᠷᠴᠤ᠂ ᠬᠥᠮᠦᠰᠦᠨ ᠳᠤᠷᠠᠲᠠᠢ ᠪᠠ ᠡᠰᠡᠬᠦᠶᠢ ᠬᠠᠢᠬᠤᠷᠤᠯᠦᠭᠡᠢᠪᠠᠷ ᠬᠢᠵᠠᠭᠠᠯᠠᠰᠢᠦᠭᠡᠢ ᠢᠷᠡᠭᠡᠳᠦᠢᠪᠡᠨ ᠵᠣᠷᠢᠨ᠂ ᠥᠴᠦᠬᠡᠨᠴᠦ ᠲᠠᠲᠠᠭᠠᠯᠵᠠᠯᠦᠭᠡᠢᠪᠠᠷ ᠤᠷᠤᠭᠰᠢᠯᠠᠭᠰᠠᠭᠠᠷ ᠁
ᠣᠶᠤᠨᠪᠠᠲᠤ ᠨᠡᠲᠦᠭᠡᠷ ᠬᠠᠷᠠᠩᠭᠤᠢ ᠳᠤᠮᠳᠠ ᠠᠯᠳᠠᠵᠤ ᠰᠦᠢᠲᠦᠭᠰᠡᠨ ᠡᠷᠬᠢᠮ ᠨᠠᠨᠳᠢᠨ ᠴᠠᠭ ᠮᠥᠴᠡᠪᠡᠨ ᠲᠤᠢᠯᠤᠨ ᠬᠠᠷᠠᠮᠰᠠᠯᠲᠠᠢᠪᠠᠷ ᠡᠷᠭᠢᠴᠡᠭᠦᠯᠦᠨ ᠪᠣᠳᠤᠬᠤᠶᠠ᠂ ᠡᠯᠢᠭᠡ ᠵᠢᠷᠦᠬᠡᠨᠢ ᠵᠡᠭᠦᠦᠪᠡᠷ ᠰᠢᠪᠡᠬᠦᠰᠢᠭ ᠰᠢᠮᠰᠢᠷᠡᠵᠦ᠂ ᠥᠷᠦᠴᠡ ᠴᠡᠭᠡᠵᠢᠨᠳᠦᠨᠢ ᠠᠨᠠᠪᠠᠳ ᠳᠠᠯᠠᠢ ᠣᠢᠯᠤᠨ ᠪᠣᠰᠬᠤᠰᠢᠭ᠋ ᠪᠣᠯᠤᠯᠠ ᠁ 《ᠴᠠᠭ ᠮᠥᠴᠡᠦᠭᠡᠢ ᠪᠣᠯ ᠠᠮᠢ ᠨᠠᠰᠤᠴᠤ ᠪᠠᠢᠵᠤ ᠴᠢᠳᠠᠬᠤᠦᠭᠡᠢ!》