ᠡᠭᠡᠰᠢᠭ ᠵᠣᠬᠢᠴᠠᠬᠤ ᠶᠣᠰᠤ

(1) ᠮᠣᠩᠭᠤᠯ ᠦᠰᠦᠭ᠎ᠦᠨ ᠦᠶ᠎ᠡ᠎ᠶᠢᠨ ᠪᠦᠲᠦᠴᠡ

ᠮᠣᠩᠭᠤᠯ ᠦᠰᠦᠭ᠎ᠦᠨ ᠦᠶ᠎ᠡ᠎ᠨᠢ ᠵᠠᠪᠠᠯ ᠡᠭᠡᠰᠢᠭ᠎ᠢᠶᠡᠷ ᠭᠣᠣᠯᠯᠠᠨ ᠪᠦᠲᠦᠬᠦ ᠪᠥᠭᠡᠳ ᠲᠥᠷᠦᠯᠬᠢ ᠬᠡᠯᠡᠨ᠎ᠦ ᠦᠭᠡᠰ᠎ᠢ ᠬᠣᠯᠪᠤᠨ ᠪᠢᠴᠢᠬᠦ᠎ᠳᠦ ( «ᠲᠡᠷᠰᠯᠡᠭᠦᠦ»᠂ «ᠪᠠᠷᠰ» ᠭᠡᠬᠦ ᠮᠡᠲᠦ᠎ᠶᠢᠨ ᠣᠨᠴᠤᠭᠤᠢ ᠦᠭᠡᠰ᠎ᠢ ᠭᠠᠷᠭᠠᠪᠠᠯ) ᠶᠡᠷᠦᠩᠬᠡᠢ᠎ᠳᠡᠭᠡᠨ ᠭᠡᠢᠭᠦᠯᠦᠭᠴᠢ ᠨᠢᠭᠡᠪᠦᠷᠢ᠎ᠶᠢᠨ ᠬᠣᠢᠨ᠎ᠠ ᠪᠤᠶᠤ ᠡᠮᠦᠨ᠎ᠡ᠎ᠨᠢ ᠨᠢᠭᠡ ᠡᠭᠡᠰᠢᠭ ᠪᠠᠢᠬᠤ ᠶᠣᠰᠤᠲᠠᠢ᠃ ᠭᠡᠢᠭᠦᠯᠦᠭᠴᠢ ᠪᠡᠶ᠎ᠡ᠎ᠪᠡᠨ ᠳᠠᠭᠠᠭᠠᠵᠤ ᠦᠶ᠎ᠡ ᠪᠦᠲᠦᠭᠡᠵᠦ ᠴᠢᠳᠠᠳᠠᠭ᠎ᠦᠭᠡᠢ ᠪᠥᠭᠡᠳ ᠨᠢᠭᠡ ᠦᠶ᠎ᠡ᠎ᠶᠢᠨ ᠳᠣᠲᠤᠷ᠎ᠠ ᠨᠡᠢᠯᠡᠮᠡᠯ ᠭᠡᠢᠭᠦᠯᠦᠭᠴᠢ ᠦᠨᠳᠦᠰᠦᠨ᠎ᠳᠡᠭᠡᠨ ᠣᠷᠤᠳᠠᠭ᠎ᠦᠭᠡᠢ ᠪᠢᠯᠡ (ᠵᠢᠭᠡᠯᠡᠭᠡ ᠦᠭᠡ ᠡᠭᠦᠨ᠎ᠳᠦ ᠪᠠᠭᠲᠠᠬᠤ᠎ᠦᠭᠡᠢ)᠃

① ᠭᠠᠭᠴᠠ ᠡᠭᠡᠰᠢᠭ᠎ᠲᠡᠢ ᠦᠶ᠎ᠡ᠃ ᠵᠢᠱ᠌ᠢᠶᠡᠯᠡᠪᠡᠯ : ᠥ᠂ ᠣ᠊᠂ ᠠ᠂ ᠡ᠊᠂ ᠢ᠊ ᠭᠡᠬᠦ ᠮᠡᠲᠦ᠃

② ᠭᠡᠢᠭᠦᠯᠦᠭᠴᠢ + ᠡᠭᠡᠰᠢᠭ᠎ᠢᠶᠡᠷ ᠪᠦᠲᠦᠭᠰᠡᠨ ᠦᠶ᠎ᠡ᠃ ᠵᠢᠱ᠌ᠢᠶᠡᠯᠡᠪᠡᠯ : ᠲᠠ᠂ ᠴᠢ᠂ ᠪᠢ᠂ ᠰᠦ᠋᠂ ᠮᠥ᠊᠂ ᠬᠣ᠊᠂ ᠊ᠲᠠ᠂ ᠊ᠪᠠ᠊᠂᠎ᠲᠤ ᠭᠡᠬᠦ ᠮᠡᠲᠦ᠃

③ ᠭᠡᠢᠭᠦᠯᠦᠭᠴᠢ + ᠡᠭᠡᠰᠢᠭ + ᠭᠡᠢᠭᠦᠯᠦᠭᠴᠢ᠎ᠪᠡᠷ ᠪᠦᠲᠦᠭᠰᠡᠨ ᠦᠶ᠎ᠡ᠃ ᠵᠢᠱ᠌ᠢᠶᠡᠯᠡᠪᠡᠯ : ᠨᠠᠮ᠂ ᠭᠠᠯ᠂ ᠮᠠᠯ᠊᠂ ᠊ᠴᠢᠨ᠊᠂ ᠊ᠭᠠᠰ᠂ ᠊ᠮᠠᠨ᠊᠂ ᠲᠡᠨ᠊᠂ ᠊ᠬᠠᠨ᠊᠂ ᠵᠥᠭ᠊ ᠭᠡᠬᠦ ᠮᠡᠲᠦ᠃

④ ᠡᠭᠡᠰᠢᠭ + ᠭᠡᠢᠭᠦᠯᠦᠭᠴᠢ᠎ᠪᠡᠷ ᠪᠦᠲᠦᠭᠰᠡᠨ ᠦᠶ᠎ᠡ᠃ ᠵᠢᠱ᠌ᠢᠶᠡᠯᠡᠪᠡᠯ : ᠡᠳ᠋᠂ ᠣᠨ᠂ ᠢᠮ᠊᠂ ᠡᠪ᠂ ᠡᠯ᠊᠂ ᠠᠯ᠊᠂ ᠥᠨ᠊ ᠭᠡᠬᠦ ᠮᠡᠲᠦ᠃

⑤ ᠭᠡᠢᠭᠦᠯᠦᠭᠴᠢ + ᠡᠭᠡᠰᠢᠭ + ᠭᠡᠢᠭᠦᠯᠦᠭᠴᠢ + ᠭᠡᠢᠭᠦᠯᠦᠭᠴᠢ᠎ᠪᠡᠷ ᠪᠦᠲᠦᠭᠰᠡᠨ ᠦᠶ᠎ᠡ᠃ ᠡᠨᠡ᠎ᠨᠢ ᠵᠥᠪᠬᠡᠨ ᠣᠨᠴᠤᠭᠤᠢ ᠦᠭᠡᠰ᠎ᠲᠦ ᠪᠠᠢᠳᠠᠭ᠃ ᠵᠢᠱ᠌ᠢᠶᠡᠯᠡᠪᠠᠯ : ᠲᠡᠷᠰ᠊(ᠲᠡᠷᠰᠯᠡᠭᠦᠦ)᠂ ᠪᠠᠷᠰ᠂ ᠠᠷᠰ᠊ (ᠠᠷᠰᠯᠠᠨ) ᠭᠡᠬᠦ ᠮᠡᠲᠦ᠃

ᠣᠳᠣ ᠦᠶ᠎ᠡ᠎ᠶᠢᠨ ᠮᠣᠩᠭᠤᠯ ᠬᠡᠯᠡᠨ᠎ᠦ ᠡᠷᠭᠦᠯᠲᠡ᠎ᠨᠢ ᠶᠡᠷᠦᠩᠬᠡᠢ᠎ᠳᠡᠭᠡᠨ ᠦᠭᠡ᠎ᠶᠢᠨ ᠨᠢᠭᠡᠳᠦᠭᠡᠷ ᠦᠶ᠎ᠡ᠎ᠳᠦ ᠪᠠᠢᠳᠠᠭ ᠲᠤᠯᠠ ᠨᠢᠭᠡᠳᠦᠭᠡᠷ ᠦᠶ᠎ᠡ᠎ᠳᠦ ᠵᠠᠪᠠᠯ ᠡᠭᠡᠰᠢᠭ ᠣᠷᠤᠬᠤ ᠬᠡᠷᠡᠭᠲᠡᠢ᠂ ᠲᠤᠰ ᠡᠭᠡᠰᠢᠭ᠎ᠦᠨ ᠡᠮᠦᠨ᠎ᠡ ᠨᠡᠢᠯᠡᠮᠡᠯ ᠭᠡᠢᠭᠦᠯᠦᠭᠴᠢ ᠣᠷᠤᠳᠠᠭ᠎ᠦᠭᠡᠢ᠎ᠶᠤᠮ᠃ ᠵᠠᠷᠢᠮ ᠡᠷᠲᠡᠨ᠎ᠦ ᠵᠢᠭᠡᠯᠡᠭᠡ ᠦᠭᠡ᠂ ᠵᠢᠱ᠌ᠢᠶᠡᠯᠡᠪᠡᠯ «ᠰᠢᠯᠦᠭ» ᠭᠡᠳᠡᠭ ᠬᠠᠷᠢ ᠭᠠᠷᠤᠯᠲᠠᠢ ᠦᠭᠡ᠎ᠶᠢ ᠡᠬᠢᠨ᠎ᠳᠡᠭᠡᠨ «ᠱᠯᠦᠺ» ᠬᠡᠮᠡᠨ ᠤᠭ ᠳᠠᠭᠤᠳᠠᠯᠭ᠎ᠠ᠎ᠪᠠᠷ᠎ᠨᠢ ᠪᠠᠭᠤᠯᠭᠠᠭᠰᠠᠨ᠎ᠠᠴᠠ ᠨᠢᠭᠡᠳᠦᠭᠡᠷ ᠦᠶ᠎ᠡ᠎ᠶᠢᠨ ᠡᠭᠡᠰᠢᠭ᠎ᠦᠨ ᠡᠮᠦᠨ᠎ᠡ ᠨᠡᠢᠯᠡᠮᠡᠯ ᠭᠡᠢᠭᠦᠯᠦᠭᠴᠢ ᠣᠷᠤᠵᠠᠢ᠃ ᠡᠨᠡ᠎ᠨᠢ ᠮᠣᠩᠭᠤᠯ ᠬᠡᠯᠡᠨ᠎ᠦ ᠣᠨᠴᠠᠯᠢᠭ᠎ᠲᠤ ᠨᠡᠢᠴᠡᠬᠦ᠎ᠦᠭᠡᠢ ᠪᠣᠯᠬᠣᠷ ᠬᠣᠵᠢᠮ ᠠᠭᠠᠵᠢᠮ᠎ᠢᠶᠠᠷ ᠮᠣᠩᠭᠤᠯ ᠬᠡᠯᠡᠨ᠎ᠦ ᠳᠣᠲᠤᠭᠠᠳᠤ ᠵᠢᠮ᠎ᠡ ᠬᠠᠤᠯᠢ᠎ᠶᠢ ᠳᠠᠭᠠᠵᠤ᠂ ᠨᠢᠭᠡᠳᠦᠭᠡᠷ ᠦᠶ᠎ᠡ᠎ᠳᠦ ᠡᠭᠡᠰᠢᠭ᠎ᠲᠡᠢ ᠳᠠᠭᠤᠳᠠᠵᠤ᠂ ᠡᠨᠡᠬᠦ ᠳᠠᠭᠤᠳᠠᠯᠭ᠎ᠠ᠎ᠶᠢᠨ ᠶᠣᠰᠤᠭᠠᠷ «ᠰᠢᠯᠦᠭ» ᠬᠡᠮᠡᠨ ᠪᠢᠴᠢᠬᠦ ᠪᠣᠯᠵᠠᠢ᠃ ᠡᠭᠦᠨ᠎ᠲᠡᠢ ᠠᠳᠠᠯᠢ᠎ᠪᠠᠷ᠂ ᠬᠠᠷᠢ ᠭᠠᠷᠤᠯᠲᠠᠢ «ᠪᠷᠢᠭᠠᠳ᠋» ᠭᠡᠳᠡᠭ ᠦᠭᠡ᠎ᠶᠢᠨ ᠡᠬᠢᠨ᠎ᠦ ᠦᠶ᠎ᠡ᠎ᠳᠦ ᠨᠡᠢᠯᠡᠮᠡᠯ ᠭᠡᠢᠭᠦᠯᠦᠭᠴᠢ᠎ᠲᠡᠢ ᠪᠣᠯᠪᠠᠴᠤ ᠮᠣᠩᠭᠤᠯ ᠶᠠᠷᠢᠶᠠᠨ᠎ᠤ ᠬᠡᠯᠡᠨ᠎ᠳᠦ «barigad»ᠭᠡᠵᠦ ᠤᠩᠰᠢᠳᠠᠭ ᠲᠤᠯᠠ᠂ ᠮᠣᠩᠭᠤᠯ ᠬᠡᠯᠡᠨ᠎ᠳᠡᠬᠢ ᠪᠣᠳᠠᠲᠠᠢ ᠳᠠᠭᠤᠳᠠᠯᠭ᠎ᠠ᠎ᠶᠢ᠎ᠨᠢ ᠦᠨᠳᠦᠰᠦᠯᠡᠵᠦ᠂ ᠣᠳᠣ ᠲᠡᠭᠦᠨ᠎ᠢ «ᠪᠠᠷᠢᠭᠠᠳᠠ» ᠬᠡᠮᠡᠨ ᠥᠭᠡᠷᠡᠴᠢᠯᠡᠵᠦ ᠪᠢᠴᠢᠬᠦ ᠪᠣᠯᠤᠯ᠎ᠠ᠃ ᠭᠡᠪᠡᠴᠦ᠂ «ᠰᠲ᠋ᠠᠯᠢᠨ᠂ ᠹᠷᠠᠨᠼᠢ᠂ ᠭ᠋ᠷᠧᠭ» ᠭᠡᠬᠦ ᠵᠡᠷᠭᠡ ᠬᠠᠷᠢ ᠭᠠᠷᠤᠯ᠎ᠲᠠᠢ ᠲᠤᠰᠭᠠᠢ ᠨᠡᠷ᠎ᠡ ᠦᠭᠡᠰ᠎ᠢ ᠤᠭ᠎ᠤᠨ ᠳᠠᠭᠤᠳᠠᠯᠭ᠎ᠠ᠎ᠪᠠᠷ᠎ᠨᠢ ᠪᠠᠭᠤᠯᠭᠠᠨ ᠪᠢᠴᠢᠳᠡᠭ᠃

(2) ᠮᠣᠩᠭᠤᠯ ᠬᠡᠯᠡᠨ᠎ᠦ ᠡᠭᠡᠰᠢᠭ ᠵᠣᠬᠢᠴᠠᠬᠤ ᠶᠣᠰᠤ

① ᠴᠢᠩᠭ᠎ᠠ᠂ ᠬᠥᠨᠳᠡᠢ ᠡᠭᠡᠰᠢᠭ᠎ᠢᠶᠡᠷ ᠵᠣᠬᠢᠴᠠᠬᠤ : ᠴᠢᠩᠭ᠎ᠠ ᠡᠭᠡᠰᠢᠭ ᠠ᠊(ɑ)᠂ ᠣ᠊(o)᠂ ᠤ᠊(u) ᠨᠢᠭᠡ ᠦᠭᠡᠨ᠎ᠳᠦ ᠣᠷᠤᠵᠤ ᠴᠢᠩᠭ᠎ᠠ᠎ᠦᠭᠡ᠎ᠶᠢ ᠪᠦᠲᠦᠭᠡᠵᠦ᠂ ᠬᠥᠨᠳᠡᠢ ᠡᠭᠡᠰᠢᠭ ᠡ᠊(e)᠂ ᠥ᠊(ö)᠂ ᠦ᠊(ü) ᠨᠢᠭᠡ ᠦᠭᠡᠨ᠎ᠳᠦ ᠣᠷᠤᠵᠤ ᠬᠥᠨᠳᠡᠢ ᠦᠭᠡ᠎ᠶᠢ ᠪᠦᠲᠦᠭᠡᠳᠡᠭ᠃ ᠰᠠᠭᠠᠷᠮᠠᠭ ᠡᠭᠡᠰᠢᠭ ᠢ᠊(i) ᠴᠢᠩᠭ᠎ᠠ᠂ ᠬᠥᠨᠳᠡᠢ ᠦᠭᠡᠨ᠎ᠳᠦ ᠴᠥᠮ ᠣᠷᠤᠵᠤ ᠪᠣᠯᠤᠨ᠎ᠠ᠃ ᠶᠡᠷᠦ᠎ᠶᠢᠨ ᠪᠠᠢᠳᠠᠯ ᠳᠣᠣᠷ᠎ᠠ ᠴᠢᠩᠭ᠎ᠠ᠂ ᠬᠥᠨᠳᠡᠢ ᠡᠭᠡᠰᠢᠭ ᠨᠢᠭᠡ ᠦᠭᠡᠨ᠎ᠳᠦ ᠬᠤᠳᠭᠤᠨ ᠣᠷᠤᠵᠤ ᠪᠣᠯᠬᠤ᠎ᠦᠭᠡᠢ᠃

② ᠤᠷᠤᠭᠤᠯ᠎ᠢᠶᠠᠷ ᠵᠣᠬᠢᠴᠠᠬᠤ : ᠤᠷᠤᠭᠤᠯ᠎ᠤᠨ ᠴᠢᠩᠭ᠎ᠠ ᠡᠭᠡᠰᠢᠭ ᠣ᠊(o)᠎ᠶᠢᠨ ᠳᠠᠷᠠᠭ᠎ᠠ ᠪᠤᠰᠤᠳ ᠴᠢᠩᠭ᠎ᠠ ᠡᠭᠡᠰᠢᠭ ᠣᠷᠤᠵᠤ ᠪᠣᠯᠬᠤ ᠪᠣᠯᠪᠠᠴᠤ᠂ ᠪᠤᠰᠤᠳ ᠴᠢᠩᠭ᠎ᠠ ᠡᠭᠡᠰᠢᠭ᠎ᠦᠨ ᠳᠠᠷᠠᠭ᠎ᠠ ᠣ᠊(o) ᠣᠷᠤᠵᠤ ᠪᠣᠯᠬᠤ᠎ᠦᠭᠡᠢ᠃ ᠬᠥᠨᠳᠡᠢ ᠡᠭᠡᠰᠢᠭ ᠥ᠊(ö)᠎ᠶᠢᠨ ᠳᠠᠷᠠᠭ᠎ᠠ ᠪᠤᠰᠤᠳ ᠬᠥᠨᠳᠡᠢ ᠡᠭᠡᠰᠢᠭ ᠣᠷᠤᠵᠤ ᠪᠣᠯᠬᠤ ᠪᠣᠯᠪᠠᠴᠤ ᠪᠤᠰᠤᠳ ᠬᠥᠨᠳᠡᠢ ᠡᠭᠡᠰᠢᠭ᠎ᠦᠨ ᠳᠠᠷᠠᠭ᠎ᠠ ᠥ᠊(ö) ᠣᠷᠤᠵᠤ ᠪᠣᠯᠬᠤ᠎ᠦᠭᠡᠢ᠃

(3) ᠡᠭᠡᠰᠢᠭ ᠪᠠ ᠭᠡᠢᠭᠦᠯᠦᠭᠴᠢ᠎ᠶᠢᠨ ᠵᠣᠬᠢᠴᠠᠯ

ᠮᠣᠩᠭᠤᠯ ᠬᠡᠯᠡᠨ᠎ᠦ ᠵᠥᠪ ᠪᠢᠴᠢᠬᠦ ᠳᠦᠷᠢᠮ᠎ᠳᠦ ᠭᠡᠢᠭᠦᠯᠦᠭᠴᠢ ᠭ(g)᠂ ᠬ(x)᠎ᠢ ᠬᠣᠶᠠᠷ ᠵᠦᠢᠯ᠎ᠢᠶᠡᠷ ᠪᠢᠴᠢᠳᠡᠭ᠃ ᠴᠢᠩᠭ᠎ᠠ ᠡᠭᠡᠰᠢᠭ ᠠ᠊(a)᠂ ᠣ᠊(o)᠂ ᠤ᠊(u)᠎ᠲᠠᠢ ᠤᠶᠠᠯᠳᠤᠬᠤ ᠦᠶ᠎ᠡ᠎ᠳᠦ ᠭᠠ᠊(ga)᠂ ᠭᠣ᠊(go)᠂ ᠭᠤ᠊(gu)᠂ ᠬᠠ᠊(xa)᠂ ᠬᠣ᠊(xo)᠂ ᠬᠤ᠊(xu) ᠭᠡᠵᠦ ᠪᠢᠴᠢᠨ᠎ᠡ᠃ ᠬᠥᠨᠳᠡᠢ ᠡᠭᠡᠰᠢᠭ ᠡ᠊(e)᠂ ᠥ᠊(ö)᠂ ᠦ᠊(ü)᠎ᠲᠠᠢ ᠤᠶᠠᠯᠳᠤᠬᠤ ᠦᠶ᠎ᠡ᠎ᠳᠦ ᠭᠡ᠊(ge)᠂ ᠭᠥ᠊(gö)᠂ ᠭᠦ᠊(gü)᠂ ᠬᠡ᠊(xe)᠂ ᠬᠥ᠊(xö)᠂ ᠬᠦ᠊(xü) ᠭᠡᠵᠦ ᠪᠢᠴᠢᠨ᠎ᠡ᠃ ᠢ᠊(i) ᠡᠭᠡᠰᠢᠭ᠎ᠲᠡᠢ ᠤᠶᠠᠯᠳᠤᠬᠤ᠎ᠳᠤ ᠭᠢ᠊(gi)᠂ ᠬᠢ᠊(xi)᠎ᠶᠢᠨ ᠬᠡᠯᠪᠡᠷᠢ᠎ᠪᠡᠷ ᠪᠢᠴᠢᠳᠡᠭ᠃

ᠡᠭᠦᠨ᠎ᠡᠴᠡ ᠭᠠᠳᠠᠨ᠎ᠠ᠂ ᠮᠣᠩᠭᠤᠯ ᠬᠡᠯᠡᠨ᠎ᠳᠦ ᠪᠠᠰᠠ ᠭᠡᠢᠭᠦᠯᠦᠭᠴᠢ ᠵᠣᠬᠢᠴᠠᠬᠤ ᠦᠵᠡᠭᠳᠡᠯ ᠪᠣᠢ᠃ ᠵᠢᠱ᠌ᠢᠶᠡᠯᠡᠪᠡᠯ : ᠊ᠪ(b)᠂ ᠊ᠭ ᠊ᠭ(g)᠂ ᠊ᠷ(r)᠂ ᠊ᠰ(s)᠂ ᠊ᠳ(d)᠎ᠢᠶᠡᠷ ᠲᠡᠭᠦᠰᠦᠭᠰᠡᠨ ᠦᠭᠡ᠎ᠶᠢᠨ ᠬᠣᠢᠨ᠎ᠠ ᠲ(t)᠂ ᠴ(č)᠎ᠢᠶᠠᠷ ᠡᠬᠢᠯᠡᠭᠰᠡᠨ ᠳᠠᠭᠠᠪᠤᠷᠢ ᠵᠠᠯᠭᠠᠳᠠᠭ᠃ ᠵᠢᠱ᠌ᠢᠶᠡᠯᠡᠪᠡᠯ : ᠠᠪᠴᠤ᠂ ᠭᠠᠷᠴᠤ᠂ ᠥᠭᠴᠦ᠂ ᠭᠠᠷ᠎ᠲᠤ᠂ ᠬᠦᠷᠴᠡᠢ ᠭᠡᠬᠦ ᠮᠡᠲᠦ᠃ ᠬᠠᠷᠢᠨ ᠡᠭᠡᠰᠢᠭ ᠪᠣᠯᠤᠨ ᠊ᠨ(n)᠂ ᠊ᠮ(m)᠂ ᠊ᠯ(l)᠂ ᠊ᠩ(ng)᠎ᠢᠶᠡᠷ ᠲᠡᠭᠦᠰᠦᠭᠰᠡᠨ ᠦᠭᠡ᠎ᠶᠢᠨ ᠬᠣᠢᠨ᠎ᠠ ᠳ(ｄ)᠂ ᠵ(ｊ)᠎ᠢᠶᠡᠷ ᠡᠬᠢᠯᠡᠭᠰᠡᠨ ᠳᠠᠭᠠᠪᠤᠷᠢ ᠵᠠᠯᠭᠠᠳᠠᠭ᠃ ᠵᠢᠱ᠌ᠢᠶᠡᠯᠡᠪᠡᠯ : ᠣᠷᠤᠨ᠎ᠳᠤ᠂ ᠡᠮ᠎ᠳᠦ᠂ ᠮᠠᠯ᠎ᠳᠤ᠂ ᠰᠠᠩ᠎ᠳᠤ᠂ ᠢᠷᠡᠵᠡᠢ᠂ ᠶᠠᠪᠤᠵᠠᠢ ᠭᠡᠬᠦ ᠮᠡᠲᠦ᠃

ᠷᠠ᠊(ra)᠂ ᠷᠢ᠊(ri)᠎ᠪᠡᠷ ᠲᠡᠭᠦᠰᠦᠭᠰᠡᠨ ᠦᠢᠯᠡ ᠦᠭᠡ᠎ᠶᠢᠨ ᠬᠣᠢᠨ᠎ᠠ ᠭᠡᠢᠭᠦᠯᠦᠭᠴᠢ «ᠷ(r)» ᠣᠷᠤᠯᠴᠠᠭᠰᠠᠨ ᠳᠠᠭᠠᠪᠤᠷᠢ᠎ᠶᠢ ᠵᠠᠯᠭᠠᠬᠤ᠎ᠳᠤ «ᠷ»᠎ᠨᠢ ᠣᠯᠠᠩᠬᠢ᠎ᠳᠠᠭᠠᠨ «ᠯ(l)» ᠪᠣᠯᠤᠨ ᠬᠤᠪᠢᠷᠠᠳᠠᠭ᠃ ᠡᠨᠡ ᠪᠣᠯ ᠨᠢᠭᠡ ᠵᠦᠢᠯ᠎ᠦᠨ ᠠᠪᠢᠶ᠎ᠠ ᠣᠨᠳᠣᠣᠰᠢᠬᠤ ᠦᠵᠡᠭᠳᠡᠯ ᠪᠣᠯᠤᠨ᠎ᠠ᠃ ᠵᠢᠱ᠌ᠢᠶᠡᠯᠡᠪᠡᠯ :

ᠪᠠᠷᠢ + ᠊ᠭᠤᠷ = ᠪᠠᠷᠢᠭᠤᠯ

ᠰᠣᠷᠤ + ᠊ᠭᠤᠷ = ᠰᠣᠷᠤᠭᠤᠯ

ᠰᠢᠷ᠎ᠠ + ᠊ᠷᠠ = ᠰᠢᠷᠠᠯᠠ

ᠬᠠᠷ᠎ᠠ + ᠊ᠷᠠ = ᠬᠠᠷᠠᠯᠠ

ᠭᠡᠬᠦ ᠮᠡᠲᠦ᠃

«᠊ᠨ(n)»᠎ᠢᠶᠡᠷ ᠲᠡᠭᠦᠰᠦᠭᠰᠡᠨ ᠦᠭᠡ᠎ᠶᠢᠨ ᠬᠣᠢᠨ᠎ᠠ «ᠭ(g)᠂ ᠬ(x)᠂ ᠨ(n)»᠎ᠢᠶᠡᠷ ᠡᠬᠢᠯᠡᠭᠰᠡᠨ ᠳᠠᠭᠠᠪᠤᠷᠢ᠎ᠶᠢ ᠵᠠᠯᠭᠠᠬᠤ᠎ᠳᠤ «᠊ᠨ(n)»᠎ᠨᠢ ᠣᠯᠠᠩᠬᠢ᠎ᠳᠠᠭᠠᠨ «ᠩ(ng)» ᠪᠣᠯᠤᠨ ᠬᠤᠪᠢᠷᠠᠳᠠᠭ᠃ ᠡᠨᠡ᠎ᠨᠢ ᠨᠢᠭᠡ ᠵᠦᠢᠯ᠎ᠦᠨ ᠠᠪᠢᠶ᠎ᠠ ᠢᠵᠢᠯᠰᠢᠬᠦ ᠦᠵᠡᠭᠳᠡᠯ ᠪᠣᠯᠤᠨ᠎ᠠ᠃ ᠵᠢᠱ᠌ᠢᠶᠡᠯᠡᠪᠡᠯ :

ᠬᠠᠨ + ᠊ᠬᠤ = ᠬᠠᠩᠬᠤ

ᠬᠠᠨ + ᠊ᠭ᠎ᠠ = ᠬᠠᠩᠭ᠎ᠠ

ᠰᠤᠨ + ᠊ᠭ᠎ᠠ = ᠰᠤᠩᠭ᠎ᠠ

ᠡᠵᠡᠨ + ᠊ᠨᠡ = ᠡᠵᠡᠩᠨᠡ

ᠭᠡᠬᠦ ᠮᠡᠲᠦ᠃

(4) ᠮᠣᠩᠭᠤᠯ ᠬᠡᠯᠡᠨ᠎ᠦ ᠠᠪᠢᠶ᠎ᠠ ᠵᠣᠬᠢᠴᠠᠬᠤ ᠦᠵᠡᠭᠳᠡᠯ ᠦᠭᠡ᠎ᠶᠢᠨ ᠢᠵᠠᠭᠤᠷ᠂ ᠦᠨᠳᠦᠰᠦᠨ᠎ᠳᠦ ᠢᠯᠡᠷᠡᠳᠡᠭ᠎ᠢᠶᠡᠷ ᠦᠯᠦ ᠪᠠᠷᠠᠮ᠂ ᠳᠠᠭᠠᠪᠤᠷᠢ᠎ᠶᠢᠨ ᠪᠢᠴᠢᠯᠭᠡ᠎ᠳᠦ᠎ᠴᠦ ᠴᠢᠩᠭ᠎ᠠ᠂ ᠬᠥᠨᠳᠡᠢ ᠬᠣᠶᠠᠷ ᠪᠦᠯᠦᠭ ᠳᠠᠭᠠᠪᠤᠷᠢ ᠪᠠᠢᠳᠠᠭ᠃ ᠵᠢᠱ᠌ᠢᠶᠡᠯᠡᠪᠡᠯ : ᠊ᠬᠤᠯᠠᠷ - ᠊ᠬᠦᠯᠡᠷ᠂ ᠊ᠬᠤᠯ᠎ᠠ - ᠊ᠬᠦᠯ᠎ᠡ᠂ ᠊ᠩᠭᠤᠢ - ᠊ᠩᠭᠦᠢ᠂ ᠊ᠴᠢᠬ᠎ᠠ - ᠊ᠴᠢᠬᠡ᠂ ᠊ᠬᠤ - ᠊ᠬᠦ᠂ ᠊ᠭ᠎ᠠ - ᠊ᠭᠡ᠂ ᠊ᠭᠤᠯᠠᠩ - ᠊ᠭᠦᠯᠡᠩ᠂ ᠊ᠭᠠᠳ - ᠊ᠭᠡᠳ᠂ ᠊ᠭᠤᠯᠠ - ᠊ᠭᠦᠯᠡ᠂ ᠊ᠭᠤᠷ - ᠊ᠭᠦᠷ᠂ ᠊ᠭᠠᠰᠤ - ᠊ᠭᠡᠰᠦ᠂ ᠊ᠭᠠᠯᠵᠠ - ᠊ᠭᠡᠯᠵᠡ᠂ ᠊ᠭᠠᠴᠢ - ᠊ᠭᠡᠴᠢ᠂ ᠊ᠭᠴᠢ - ᠊ᠭ᠌ᠴᠢ᠂ ᠊ᠭ - ᠊ᠭ᠂ ᠊ᠭᠰᠠᠭᠠᠷ - ᠊ᠭ᠌ᠰᠡᠭᠡᠷ᠂ ᠊ᠭᠰᠠᠨ - ᠊ᠭ᠌ᠰᠡᠨ᠂ ᠊ᠳᠤᠭᠠᠷ - ᠊ᠳᠦᠭᠡᠷ᠂ ᠊ᠮᠠᠭᠴᠠ - ᠊ᠮᠡᠭᠴᠡ᠂ ᠊ᠯᠭ᠎ᠠ - ᠊ᠯᠭᠡ᠂᠎ᠯᠤᠭ᠎ᠠ - ᠯᠤᠭᠡ᠂᠎ᠨᠤᠭᠤᠳ - ᠨᠤᠭᠦᠳ ᠭᠡᠬᠦ ᠮᠡᠲᠦ᠃ ᠡᠳᠡᠭᠡᠷ ᠳᠠᠭᠠᠪᠤᠷᠢ᠎ᠶᠢᠨ ᠴᠢᠩᠭ᠎ᠠ ᠳᠠᠭᠠᠪᠤᠷᠢ᠎ᠨᠢ ᠴᠢᠩᠭ᠎ᠠ ᠦᠭᠡᠨ᠎ᠳᠦ᠂ ᠬᠥᠨᠳᠡᠢ ᠳᠠᠭᠠᠪᠤᠷᠢ᠎ᠨᠢ ᠬᠥᠨᠳᠡᠢ ᠦᠭᠡᠨ᠎ᠳᠦ ᠵᠠᠯᠭᠠᠭᠳᠠᠨ᠎ᠠ᠃ ᠵᠠᠷᠢᠮ ᠳᠠᠭᠠᠪᠤᠷᠢ᠎ᠨᠢ ᠴᠢᠩᠭ᠎ᠠ᠂ ᠬᠥᠨᠳᠡᠢ ᠦᠭᠡ᠎ᠶᠢᠨ ᠳᠠᠷᠠᠭ᠎ᠠ ᠣᠷᠤᠬᠤ᠎ᠳᠤ ᠳᠦᠷᠰᠦ᠎ᠶᠢᠨ ᠢᠯᠭᠠᠯ᠎ᠦᠭᠡᠢ ᠪᠣᠯᠪᠠᠴᠤ ᠴᠢᠩᠭ᠎ᠠ ᠦᠭᠡ᠎ᠶᠢᠨ ᠬᠣᠢᠨ᠎ᠠ ᠵᠠᠯᠭᠠᠪᠠᠯ ᠴᠢᠩᠭ᠎ᠠ᠎ᠪᠠᠷ ᠤᠩᠰᠢᠭᠳᠠᠵᠤ᠂ ᠬᠥᠨᠳᠡᠢ ᠦᠭᠡ᠎ᠶᠢᠨ ᠬᠣᠢᠨ᠎ᠠ ᠵᠠᠯᠭᠠᠪᠠᠯ ᠬᠥᠨᠳᠡᠢ᠎ᠪᠡᠷ ᠤᠩᠰᠢᠭᠳᠠᠨ᠎ᠠ᠃ ᠵᠢᠱ᠌ᠢᠶᠡᠯᠡᠪᠡᠯ : ᠊ᠨ᠎ᠡ᠂ ᠊ᠯᠴᠠ᠂ ᠊ᠯᠳᠤ᠂ ᠊ᠪᠠ᠂ ᠊ᠮᠳᠠ᠂ ᠊ᠮᠠᠯ᠂ ᠊ᠮᠠᠷ᠂ ᠊ᠮᠤᠢ᠂ ᠊ᠷ᠎ᠠ᠂ ᠊ᠯᠳᠠ᠂ ᠊ᠶ᠎ᠠ᠂ ᠊ᠳᠠ᠂ ᠊ᠳᠠᠯ᠂ ᠊ᠪᠠᠰᠤ᠂ ᠊ᠪᠠᠴᠤ᠂ ᠊ᠪᠠᠯ᠂ ᠊ᠴᠤ᠂ ᠊ᠴᠠᠢ᠂ ᠊ᠵᠠᠢ᠂᠎ᠪᠠᠷ᠂᠎ᠢᠶᠠᠷ᠂᠎ᠡᠴᠡ᠂ ᠊ᠤᠳ᠂ ᠊ᠴᠤᠳ᠂᠎ᠨᠠᠷ᠂ ᠶᠤ᠂ ᠰᠢ᠂ ᠪᠠᠢ ᠂᠎ᠦᠦ ᠮᠡᠲᠦ᠃

(5) ᠡᠭᠡᠰᠢᠭ ᠭᠡᠢᠭᠦᠯᠦᠭᠴᠢ ᠤᠶᠠᠯᠳᠤᠬᠤ ᠳᠦᠷᠢᠮ᠃ ᠮᠣᠩᠭᠤᠯ ᠬᠡᠯᠡᠨ᠎ᠦ ᠵᠥᠪ ᠪᠢᠴᠢᠯᠭᠡ᠎ᠶᠢᠨ ᠳᠦᠷᠢᠮ᠎ᠳᠦ᠂ ᠵᠠᠷᠢᠮ ᠲᠡᠢᠨ ᠢᠯᠭᠠᠯ᠎ᠤᠨ ᠳᠠᠭᠠᠪᠤᠷᠢ᠂ ᠬᠠᠮᠢᠶᠠᠳᠠᠭᠤᠯᠬᠤ ᠳᠠᠭᠠᠪᠤᠷᠢ᠂ ᠣᠯᠠᠨ ᠲᠣᠭᠠᠨ᠎ᠤ ᠳᠠᠭᠠᠪᠤᠷᠢ᠎ᠨᠤᠭᠤᠳ᠎ᠨᠢ ᠴᠥᠮ ᠬᠣᠶᠠᠷ ᠵᠦᠢᠯ᠎ᠦᠨ ᠪᠢᠴᠢᠯᠭᠡ᠎ᠲᠡᠢ ᠪᠠᠢᠵᠤ᠂ ᠨᠢᠭᠡ ᠵᠦᠢᠯ᠎ᠨᠢ ᠡᠭᠡᠰᠢᠭ᠎ᠢᠶᠡᠷ ᠡᠬᠢᠯᠡᠵᠦ᠂ ᠪᠠᠰᠠ ᠨᠢᠭᠡ ᠵᠦᠢᠯ᠎ᠨᠢ ᠭᠡᠢᠭᠦᠯᠦᠭᠴᠢ᠎ᠪᠡᠷ ᠡᠬᠢᠯᠡᠭᠰᠡᠨ ᠪᠠᠢᠳᠠᠭ᠃ ᠮᠣᠩᠭᠤᠯ ᠬᠡᠯᠡᠨ᠎ᠦ ᠠᠪᠢᠶ᠎ᠠ ᠤᠶᠠᠯᠳᠤᠬᠤ ᠵᠢᠮ᠎ᠡ ᠬᠠᠤᠯᠢ᠎ᠶᠢ ᠦᠨᠳᠦᠰᠦᠯᠡᠨ᠂ ᠡᠭᠡᠰᠢᠭ᠎ᠢᠶᠡᠷ ᠲᠡᠭᠦᠰᠦᠭᠰᠡᠨ ᠦᠭᠡᠨ᠎ᠳᠦ ᠭᠡᠢᠭᠦᠯᠦᠭᠴᠢ᠎ᠪᠡᠷ ᠡᠬᠢᠯᠡᠭᠰᠡᠨ ᠳᠠᠭᠠᠪᠤᠷᠢ᠎ᠶᠢ ᠵᠠᠯᠭᠠᠵᠤ᠂ ᠭᠡᠢᠭᠦᠯᠦᠭᠴᠢ᠎ᠪᠡᠷ ᠲᠡᠭᠦᠰᠦᠭᠰᠡᠨ ᠦᠭᠡᠨ᠎ᠳᠦ ᠡᠭᠡᠰᠢᠭ᠎ᠢᠶᠡᠷ ᠡᠬᠢᠯᠡᠭᠰᠡᠨ ᠳᠠᠭᠠᠪᠤᠷᠢ᠎ᠶᠢ ᠵᠠᠯᠭᠠᠳᠠᠭ᠃ ᠵᠢᠱ᠌ᠢᠶᠡᠯᠡᠪᠡᠯ : «᠎ᠶᠢᠨ᠂᠎ᠶᠢ᠂᠎ᠪᠡᠷ᠂᠎ᠪᠡᠨ᠂᠎ᠨᠤᠭᠤᠳ(ᠨᠤᠭᠦᠳ)» ᠵᠡᠷᠭᠡ᠎ᠶᠢ ᠡᠭᠡᠰᠢᠭ᠎ᠢᠶᠡᠷ ᠲᠡᠭᠦᠰᠦᠭᠰᠡᠨ ᠦᠭᠡᠨ᠎ᠳᠦ᠂ «᠎ᠤᠨ᠂᠎ᠤ᠂᠎ᠢ᠂᠎ᠢᠶᠠᠷ᠂᠎ᠢᠶᠠᠨ᠂᠎ᠤᠳ» ᠵᠡᠷᠭᠡ᠎ᠶᠢ ᠭᠡᠢᠭᠦᠯᠦᠭᠴᠢ᠎ᠪᠡᠷ ᠲᠡᠭᠦᠰᠦᠭᠰᠡᠨ ᠦᠭᠡᠨ᠎ᠳᠦ ᠵᠠᠯᠭᠠᠳᠠᠭ᠃